Read Tunisian Arabic New Testament أَعْمَالْ 11 Bible Online

أَعْمَالْ 11 - Tunisian Arabic New Testament bible

أَعْمَالْ 11

¹وْسَمْعُوا الرُّسُلْ وِالإِخْوَة الِّي فِي اليَهُودِيَّة، الِّي الشْعُوبْ الأُخْرِينْ هُومَا زَادَا قِبْلُوا كِلْمِةْ اللهْ.

²وَقْتِلِّي رْجَعْ بُطْرُسْ لْأُورْشَلِيمْ نَاقْشُوهْ المُؤْمْنِينْ اليْهُودْ الِّي هُومَا مْطَهّْرِينْ وْعَارْضُوهْ وْقَالُولُو:

³«كِيفَاشْ دْخَلْتْ لْدَارْ نَاسْ مُوشْ مْطَهّْرِينْ وِكْلِيتْ مْعَاهُمْ؟»

⁴يَاخِي قْعَدْ بُطْرُسْ يْفَسّْرِلْهُمْ فِي الشَّيْء الِّي جْرَالُو بِالحَاجَة بِالحَاجَة وْقَالْ:

⁵«كُنْتْ نْصَلِّي فِي مْدِينِةْ يَافَا وْشُفْتْ فِي رُؤْيَا حَاجَة تِشْبِهْ لْمَلْحْفَة كْبِيرَة مَرْبُوطَة مِنْ أَطْرَافْهَا الأَرْبْعَة وْهَابْطَة مِالسْمَاءْ وْجَاتْ قْرِيبَة لِيَّا.

⁶وَقْتِلِّي خْزَرْتْ مْلِيحْ لْقِيتْ فِيهَا أَنْوَاعْ الحَيَوَانَاتْ الِّي تِمْشِي عْلَى أَرْبْعَة سَاقِينْ وِالوُحُوشْ وِلِّي تَزْحِفْ وِطْيُورْ السْمَاءْ الكُلْهَا.

⁷وِسْمَعْتْ صُوتْ يْقُلِّي: "يَا بُطْرُسْ قُومْ اذْبَحْ وْكُولْ!"

⁸آمَا آنَا جَاوِبْتْ: "لاَ، لاَ يَا رَبْ رَانِي عُمْرِي مَا حَطِّيتْ حَاجَة مَنْزُوسَة وِلاَّ مْحَرّْمَة فِي فُمِّي."

⁹يَاخِي زَادْ قَالِّي الصُّوتْ الِّي مِالسْمَاءْ: "الِّي اللهْ طَهّْرُو مَا تْقُولِشْ عْلِيهْ الِّي هُوَ مَنْزُوسْ."

¹⁰وِالشَّيْء هَاذَا تْعَاوِدْ ثْلاَثَة مَرَّاتْ، مِنْ بَعْدْ تِرْفَعْ المَاعُونْ بِلِّي فِيهْ لِلسْمَاء.

¹¹وْإِذَا بِثْلاَثَة رْجَالْ مَبْعُوثِينْ لِيَّا مِنْ مْدِينِةْ قَيْصَرِيَّة وُصْلُوا لِلدَّارْ الِّي كُنَّا فِيهَا.

¹²وِأْمَرْنِي الرُّوحْ القُدُسْ بَاشْ نِمْشِي مْعَاهُمْ مِنْ غِيرْ مَا نِتْرَدِدْ. وِمْشِيتْ وِمْعَايَا السِّتَّة إِخْوَة هَاذُمْ. وْكِدْخَلْنَا لْدَارْ الرَّاجِلْ

¹³قَالِلْنَا كِيفَاشْ شَافْ المَلاَكْ وَاقِفْ فِي دَارُو وْقَالُّو: "أَبْعِثْ رْجَالْ لْيَافَا بَاشْ يْجِيبُوا سِمْعَانْ الِّي يْنَادِيوْلُو بُطْرُسْ.

¹⁴وْهُوَ بَاشْ يْكَلّْمِكْ بِكْلاَمْ تُخْلُصْ بِيهْ إِنْتِ وْعَايِلْتِكْ الكُلْ."

¹⁵وَقْتِلِّي بْدِيتْ نِتْكَلِّمْ نْزِلْ عْلِيهُمْ الرُّوحْ القُدُسْ كِيمَا نْزِلْ عْلِينَا أَحْنَا فِي الأُوِّلْ.

¹⁶يَاخِي تْذَكِّرْتْ الكِلْمَة الِّي قَالْهَا الرَّبْ يَسُوعْ: "يُوحَنَّا عَمِّدْ بِالمَاء، آمَا إِنْتُومَا بَاشْ تِتْعَمّْدُوا بِالرُّوحْ القُدُسْ."

¹⁷إِذَا كَانْ اللهْ عْطَاهُمْ نَفْسْ المَوْهْبَة الِّي عْطَاهَالْنَا وَقْتِلِّي امِّنَّا بِالرَّبْ يَسُوعْ المَسِيحْ، شْكُونْ آنَا بَاشْ نَمْنِعْ اللهْ؟»

¹⁸وَقْتِلِّي الإِخْوَة الِّي عَارْضُوهْ سَمْعُوا الكْلاَمْ هَاذَا سِكْتُوا وْحِمْدُوا اللهْ وْقَالُوا: «إِمَّالاَ اللهْ نْعِمْ زَادَا عَلِّي مَا هُمْشْ يْهُودْ بِالتَّوْبَة بَاشْ يَاخْذُوا الحَيَاةْ.»

¹⁹آمَا المُؤْمْنِينْ الِّي تْفَرّْقُوا بِسْبَبْ الإِضْطِهَادْ الِّي عَانُوا مِنُّو بَعْدْ مَا مَاتْ اسْتِفَانُوسْ تْعَدَّاوْ عْلَى فِينِيقْيَة وْقُبْرُصْ وْأَنْطَاكْيَة وْهُومَا يْبَشّْرُوا بِالكِلْمَة فِي اليْهُودْ آكَاهُو.

²⁰آمَا ثَمَّة شْكُونْ مِنْهُمْ مِنْ قُبْرُصْ وْقِيرِينَة وُصْلُوا لْأَنْطَاكْيَة وِبْدَاوْا يَحْكِيوْ مْعَ اليُونَانِيِّينْ وِيْبَشّْرُوا فِيهُمْ بِالرَّبْ يَسُوعْ.

²¹وِالرَّبْ كَانْ يْعَاوِنْ فِيهُمْ، وْبَرْشَة نَاسْ مِنْهُمْ امّْنُوا وْرَجْعُوا لِلرَّبْ يَسُوعْ.

²²وْصُلْ الخْبَرْ هَاذَا لِلكَنِيسَة المُوجُودَة فِي أُورْشَلِيمْ، يَاخِي بَعْثُوا بَرْنَابَا لْأَنْطَاكْيَة.

²³وَقْتِلِّي وْصُلْ وْشَافْ نِعْمِةْ اللهْ فْرَحْ بَرْشَة وْوَصَّاهُمْ بَاشْ يِثْبْتُوا فِي الرَّبْ بْكُلْ قْلُوبْهُمْ.

²⁴وْبَرْنَابَا كَانْ رَاجِلْ صَالِحْ، مِلْيَانْ بِالرُّوحْ القُدُسْ وِالإِيمَانْ، وْبَرْشَة نَاسْ وَلاَّوْ مُؤْمْنِينْ.

²⁵وِمْشَى بَرْنَابَا لْطَرْسُوسْ يْلَوِّجْ عْلَى شَاوُلْ.

²⁶وَقْتِلِّي لْقَاهْ رْجَعْ بِيهْ لْأَنْطَاكْيَة وْقَعْدُوا يِجْتَمْعُوا مْعَ الكَنِيسَة عَامْ كَامِلْ وِيْعَلّْمُوا فِي مَجْمُوعَة كْبِيرَة مِالمُؤْمْنِينْ. وْفِي أَنْطَاكْيَة تْلاَمِذْةْ الرَّبْ لْأَوِّلْ مَرَّة تْسَمَّاوْ المَسِيحِيِّينْ.

²⁷وْفِي الوَقْتْ هَاذَاكَا ثَمَّة أَنْبِيَاءْ مِنْ أُورْشَلِيمْ جَاوْ لْأَنْطَاكْيَة.

²⁸وْبِينَاتْهُمْ نَبِي إِسْمُو أَغَابُوسْ، الرُّوحْ القُدُسْ وْحَالُو الِّي بَاشْ تَاقَعْ مَجَاعَة كْبِيرَة فِي الدِّنْيَا الكُلْهَا، وِالمَجَاعَة هَاذِي وُقْعِتْ فِي زْمَانْ القَيْصَرْ كْلُودْيُوسْ.

²⁹إِمَّالاَ قَرِرُوا التْلاَمْذَة فِي أَنْطَاكْيَة بَاشْ كُلْ وَاحِدْ مِنْهُمْ يْعَاوِنْ بِلِّي يِقْدِرْ عْلِيهْ، لِلإِخْوَة السَّاكْنِينْ فِي اليَهُودِيَّة.

³⁰وْهَاذَا الِّي صَارْ وْبَعْثُوا الإِعَانَة لِلشْيُوخْ مْعَ بَرْنَابَا وْشَاوُلْ.