Read Tunisian Arabic New Testament أَعْمَالْ 12 Bible Online

أَعْمَالْ 12 - Tunisian Arabic New Testament bible

أَعْمَالْ 12

¹فِي الوَقْتْ هَاذَاكَا بْدَا المَلِكْ هِيرُودُسْ يِضْطَهِدْ فِي جْمَاعَة مِالمُؤْمْنِينْ الِّي فِي الكَنِيسَة.

²وِقْتَلْ يَعْقُوبْ خُو يُوحَنَّا بْسِيفْ.

³وَقْتِلِّي شَافْ الِّي الشَّيْء هَاذَا يْرَضِّي اليْهُودْ قَرِّرْ بَاشْ يْزِيدْ يْشِدْ بُطْرُسْ، وِالشَّيْء هَاذَا وْقَعْ فِي أَيَّامَاتْ عِيدْ الفْطِيرْ مْتَاعْ اليْهُودْ.

⁴وَقْتِلِّي شَدُّو، حَطُّو فِي الحَبْسْ وْكَانُوا يْعِسُّوا عْلِيهْ أَرْبْعَة مَجْمُوعَاتْ، وْكُلْ مَجْمُوعَة فِيهَا أَرْبْعَة عَسَّاسَا، وْكَانْ نَاوِي بَاشْ يْسَلّْمُو لِليْهُودْ بَعْدْ عِيدْ الفِصْحْ.

⁵وْخَلاَّهْ فِي الحَبْسْ، آمَا الكَنِيسَة كَانِتْ تْصَلِّي للهْ بْقُوَّة مِنْ أَجْلْ بُطْرُسْ.

⁶وْفِي اللِّيلَة الِّي قْبَلْ النْهَارْ الِّي نْوَى فِيهْ هِيرُودُسْ بَاشْ يُحْكُمْ عْلِيهْ، كَانْ بُطْرُسْ رَاقِدْ بِينْ زُوزْ جُنُودْ وْمَرْبُوطْ بْزُوزْ سْلاَسِلْ، وْقُدَّامْ البَابْ عَسَّاسَا يْعِسُّوا عْلَى الحَبْسْ.

⁷يَاخِي جَا مَلاَكْ مِنْ عِنْدْ الرَّبْ، وْتِمْلاَتْ الزِّنْزَانَة بِالنُّورْ وِضْرَبْ المَلاَكْ بُطْرُسْ عْلَى جَنْبُو وْفَيّْقُو وْقَالُّو: «قُومْ فِيسَعْ!» وِالزُّوزْ سْلاَسِلْ طَاحُوا مِنْ يْدِيهْ.

⁸وْقَالُّو المَلاَكْ: «تْحَزِّمْ وْإِلْبِسْ صَنْدَالِكْ.» وِعْمَلْ بُطْرُسْ كِيمَا قَالُّو، مِنْ بَعْدْ قَالُّو: «إِلْبِسْ جِبّْتِكْ وْتَبِّعْنِي.»

⁹خْرَجْ بُطْرُسْ يْتَبَّعْ فِي المَلاَكْ، وْمَا كَانِشْ يَعْرِفْ الِّي الشَّيْء الِّي قَاعِدْ يَاقَعْ مْعَ المَلاَكْ حْقِيقَة. وْكَانْ مَاشِي فِي بَالُو الِّي هُوَ قَاعِدْ يْشُوفْ فِي رُؤْيَا.

¹⁰وِتْعَدَّى عْلَى بُقْعِةْ العَسَّة الأُولَى وْمِنْ بَعْدْ الثَّانْيَة، وَقْتِلِّي وُصْلُوا لِلبَابْ الحْدِيدْ الِّي يْوَصِّلْ لِلمْدِينَة، تْحِلِّلْهُمْ وَحْدُو وْخَرْجُوا، وْكِيفْ تْعَدَّاوْ الطْرِيقْ الأُوِّلْ خَلاَّهْ المَلاَكْ بِالوَقْتْ.

¹¹وَقْتْهَا فَاقْ بُطْرُسْ وْقَالْ: «تَوْ تْأَكِّدْتْ بِالحَقْ الِّي الرَّبْ بْعَثْ مَلاَكْ وْمَنَّعْنِي مِنْ يِدْ هِيرُودُسْ وْمِالشَّيْء الِّي بَاشْ يَعْمْلُوهْ فِيَّ اليْهُودْ.»

¹²وْبَعْدْ مَا فْهِمْ الشَّيْء هَاذَا مْشَى لْدَارْ مَرْيَمْ أُمْ يُوحَنَّا الِّي يْنَادِيوْلُو مَرْقُسْ، وْفِي الوَقْتْ هَاذَاكَا كَانُوا ثَمَّة بَرْشَة مُؤْمْنِينْ مُجْتَمْعِينْ يْصَلِّيوْ فِي الدَّارْ هَاذِيكَا.

¹³وَقْتِلِّي وْصُلْ دَقْ البَابْ البَرَّانِي، جَاتْ خْدِيمَة اسْمْهَا رُودَة بَاشْ تْشُوفْ شْكُونْ.

¹⁴وْكِيفْ عَرْفِتْ الِّي هُوَ صُوتْ بُطْرُسْ، مَا حَلِّتْشْ البَابْ مِالفَرْحَة، آمَا مْشَاتْ تِجْرِي لْدَاخِلْ تْخَبِّرْ فِي النَّاسْ المُوجُودِينْ بِلِّي بُطْرُسْ وَاقِفْ قُدَّامْ البَابْ.

¹⁵قَالُولْهَا: «إِنْتِ هْبِلْتْ!» آمَا هِيَ شَدِّتْ صْحِيحْ فِي كْلاَمْهَا، يَاخِي قَالُوا: «بَالِكْشْ هَاذَا مَلاَكْ بُطْرُسْ!»

¹⁶وِقْعَدْ بُطْرُسْ يْدُقْ فِي البَابْ حَتَّى لِينْ حَلُّولُو، وِلِّي شَافُوهْ بِهْتُوا.

¹⁷وْهَزْ ايدُو بَاشْ يُسْكْتُوا وِحْكَالْهُمْ كِيفَاشْ الرَّبْ خَرّْجُو مِالحَبْسْ وْقَالْ: «قُولُوا لْيَعْقُوبْ وِالإِخْوَة عْلَى الشَّيْء هَاذَا.» وْعَاوِدْ خْرَجْ وِمْشَى لْبُقْعَة أُخْرَى.

¹⁸وَقْتِلِّي طْلَعْ النْهَارْ، صَارِتْ خُوضَة كْبِيرَة بِينْ العَسْكِرْ وِبْدَاوْا يِسْأْلُوا فِي بْعَضْهُمْ: آشْ صَارْ لْبُطْرُسْ؟

¹⁹وَقْتِلِّي هِيرُودُسْ أْمَرْ بَاشْ يْجِيبُوهْ، وْمَا لْقَاهِشْ، حَقِّقْ مْعَ العَسْكِرْ وِأْمَرْ بَاشْ يِعْدْمُوهُمْ. مِنْ بَعْدْ نَقِّلْ هِيرُودُسْ مِنْ مَنْطِقْةْ اليَهُودِيَّة وِسْكِنْ فِي قَيْصَرِيَّة.

²⁰وْهِيرُودُسْ كَانْ نَاقِمْ عْلَى أَهْلْ صُورْ وْصَيْدَا. يَاخِي تْفَاهْمُوا مْعَ بْعَضْهُمْ وْجَاوْهْ، وْجَابُوا مْعَاهُمْ بْلاَسْتُسْ الحَاجِبْ مْتَاعْ المَلِكْ بَاشْ يَعْطِيهُمْ الأَمَانْ عْلَى خَاطِرْ المَنْطْقَة مْتَاعْهُمْ كَانِتْ عَايْشَة مِنْ مَمْلِكْةْ هِيرُودُسْ.

²¹وْفِي النْهَارْ الِّي بَاشْ يْقَابِلْ فِيهْ النَّاسْ هَاذُمْ، لْبِسْ هِيرُودُسْ الكِسْوَة المُلُوكِيَّة وِقْعَدْ عْلَى العَرْشْ وِخْطَبْ عْلِيهُمْ.

²²يَاخِي صَاحْ الشَّعْبْ وْقَالُوا: «هَاذَا صُوتْ إِلاَهْ، مُوشْ صُوتْ إِنْسَانْ.»

²³وْبِالوَقْتْ ضْرَبْ مَلاَكْ مِنْ عِنْدْ الرَّبْ هِيرُودُسْ عْلَى خَاطْرُو مَا عْطَاشْ المَجْدْ للهْ، وِكْلاَهْ الدُّودْ وْمَاتْ.

²⁴وْكِلْمِةْ اللهْ كَانِتْ قَاعْدَة تِكْبِرْ وِلِّي امّْنُوا بِيهَا مَاشِينْ وْيُكْثْرُوا.

²⁵وْبَعْدْ مَا بَرْنَابَا وْشَاوُلْ كَمّْلُوا خِدْمِتْهُمْ فِي أُورْشَلِيمْ، رَجْعُوا لأَنْطَاكِيَة وِمْعَاهُمْ يُوحَنَّا الِّي يْنَادِيوْلُو مَرْقُسْ.