Read Tunisian Arabic New Testament أَعْمَالْ 13 Bible Online

أَعْمَالْ 13 - Tunisian Arabic New Testament bible

أَعْمَالْ 13

¹وْكَانُوا ثَمَّة جْمَاعَة مِالأَنْبِيَاءْ وِالمُعَلّْمِينْ فِي كَنِيسِةْ أَنْطَاكْيَة، وْمِنْهُمْ بَرْنَابَا وْسِمْعَانْ الِّي مْسَمِّينُو نِيجَر، وْلُوكْيُوسْ الْقِيرِينِي، وْمَنَايَنْ الِّي تْرَبَّى مْعَ المَلِكْ هِيرُودُسْ وَقْتِلِّي كَانْ صْغِيرْ، وْشَاوُلْ.

²وْفِي نْهَارْ مِنْ النْهَارَاتْ وَقْتِلِّي هُومَا يِعْبْدُوا فِي رَبِّي وْصَايْمِينْ. قَالِلْهُمْ الرُّوحْ القُدُسْ: «خَلِّيوْلِي بَرْنَابَا وْشَاوُلْ لِلخِدْمَة الِّي خْتَرْتْهُمْ لِيهَا.»

³بَعْدْ مَا صَامُوا وْصَلاَّوْ مِنْ أَجْلْهُمْ حَطُّوا عْلِيهُمْ يْدِيهُمْ، وْبَعْثُوهُمْ.

⁴وْكِبْعَثْ الرُّوحْ القُدُسْ بَرْنَابَا وْشَاوُلْ، مْشَاوْ لْبُرْطْ سَلُوكِيَة، وْسَافْرُوا عْلَى البْحَرْ لْقُبْرُصْ.

⁵وَقْتِلِّي كَانُوا فِي مْدِينِةْ سَلاَمِيسْ بْدَاوْا يْبَشّْرُوا بْكِلْمِةْ اللهْ فِي المَجَامِعْ مْتَاعْ اليْهُودْ وْيُوحَنَّا كَانْ يْعَاوِنْ فِيهُمْ.

⁶وِتْعَدَّاوْ عْلَى الجَزِيرَة الكُلْهَا حَتَّى لِينْ وُصْلُوا لْبَافُوسْ. وِالغَادِي قَابْلُوا سَحَّارْ يْهُودِي نَبِي كَذَّابْ إِسْمُو بَرْيَشُوعْ.

⁷وِقْريبْ مِنْ سَرْجِيُوسْ بُولُسْ الِّي يُحْكُمْ فِي قُبْرُصْ، وْكَانْ وَالِي ذْكِي، اسْتَدْعَى بَرْنَابَا وْشَاوُلْ وِطْلَبْ مِنْهُمْ بَاشْ يَحْكِيوْلُو عْلَى كِلْمِةْ اللهْ.

⁸يَاخِي السَّحَّارْ الِّي إِسْمُو مَعْنَاهْ «عَلِيمْ» جَا ضِدّْهُمْ، وْحَاوِلْ بَاشْ مَا يْخَلِّيشْ الوَالِي يِمِّنْ.

⁹آمَا شَاوُلْ الِّي وَلَّى إِسْمُو بُولُسْ تِمْلَى بِالرُّوحْ القُدُسْ وِخْزَرْ لِلسَّحَّارْ.

¹⁰وْقَالْ: «يَا غَشَّاشْ وْيَا خْبِيثْ، يَا وِلْدْ بْلِيسْ، يَا عْدُو الحَقْ، مَاكِشْ بَاشْ تْبَطِّلْ مِنْ تَعْويجْ الثْنَايَا الْمِسْتْوِيَّة مْتَاعْ رَبِّي؟

¹¹تَوْ بَاشْ تِتْمَدْ عْلِيكْ يِدْ رَبِّي وِتْوَلِّي أَعْمَى وْمَا عَادِشْ تْشُوفْ الضَّوْ لْمُدَّة مِالزْمَانْ.» وْبِالوَقْتْ طَاحْ عْلَى عِينِيهْ ضْبَابْ وِظْلاَمْ وِبْدَا يْدُورْ وِيْلَوِّجْ عْلَى شْكُونْ يْدِلُّو عْلَى الطْرِيقْ.

¹²وَقْتِلِّي شَافْ الوَالِي شْنُوَّة الِّي صَارْ، إِمِّنْ وْهُوَ بَاهِتْ فِي تَعْلِيمْ الرَّبْ.

¹³وْسَافِرْ بُولُسْ وِلِّي مْعَاهْ فِي البْحَرْ مِنْ بَافُوسْ لْبُقْعَة اسْمْهَا بَرْجَة فِي بَمْفِيلِيَّة، وِالغَادِي رْجَعْ يُوحَنَّا لْأُورْشَلِيمْ وْخَلَّى بُولُسْ وِلِّي مْعَاهْ وَحَّدْهُمْ.

¹⁴آمَا هُومَا سَافْرُوا مِنْ بَرْجَة لْأَنْطَاكْيَة التَّابْعَة لِبْلاَدْ بِيسِيدِيَّة، وْدَخْلُوا لِلمَجْمَعْ مْتَاعْ اليْهُودْ فِي نْهَارْ السِّبْتْ وْقَعْدُوا.

¹⁵وْبَعْدْ مَا تِقْرَى مِنْ كْتَابْ الشَّرِيعَة مْتَاعْ مُوسَى وِالكْتُبْ المُقَدّْسَة، بَعْثُولْهُمْ رُؤَسَاءْ المَجْمَعْ وْقَالُوا: «يَا خْوَاتْنَا إِذَا كَانْ عِنْدْكُمْ كْلاَمْ تْشَجّْعُوا بِيهْ النَّاسْ المُوجُودِينْ اتْفَضّْلُوا.»

¹⁶وْقُفْ بُولُسْ وْشَارْ بِيدُو وْقَالْ: «يَا إِخْوَة الِّي مِنْ إِسْرَائِيلْ وْيَا رْجَالْ الِّي تْخَافُوا اللهْ إِسْمْعُوا.

¹⁷إِلاَهْ أُمِّةْ إِسْرَائِيلْ، خْتَارْ جْدُودْنَا وْعَلَّى مِنْ قِيمِة شَعْبْنَا فِي غُرْبِتْهُمْ فِي أَرْضْ مَصْرْ وْمِنْ بَعْدْ خَرِّجْهُمْ مِنْهَا بْقُدْرْتُو العْظِيمَة.

¹⁸وِتْحَمِّلْهُمْ فِي الصَّحْرَاء لْمُدِّةْ أَرْبْعِينْ سْنَة.

¹⁹وْبَعْدْ مَا فْنَى سَبْعَة شْعُوبْ فِي أَرْضْ كَنْعَانْ، عْطَاهُمْ الأَرْضْ بَاشْ يُورْثُوهَا

²⁰أَرْبْعَة مْيَة وْخَمْسِينْ سْنَة مِالوَقْتْ هَاذَاكَا وْبَعْدْ عْمَلِّلْهُمْ قُضَاةْ وْكَانْ آخِرْ وَاحِدْ فِيهُمْ النَّبِي صَمُوئِيلْ.

²¹وِمْبَاعِدْ طَلْبُوا مِنُّو بَنِي إِسْرَائِيلْ بَاشْ يْحُطِّلْهُمْ مَلِكْ. يَاخِي حَطْ اللهْ شَاوُلْ وِلْدْ قَيْسْ مِنْ عَرْشْ بِنْيَامِينْ مَلِكْ عْلِيهُمْ لْمُدِّةْ أَرْبْعِينْ سْنَة.

²²وْمِنْ بَعْدْ نَحَّاهْ وْحَطْ فِي بُقْعْتُو دَاوُدْ مَلِكْ عْلِيهُمْ وِاللهْ شْهِدْلُو وْقَالْ: "آنَا لْقِيتْ دَاوُدْ وِلْدْ يَسَّى رَاجِلْ يْفَرَّحْ قَلْبِي وْبِشْ يَعْمِلْ الِّي نْحِبْ عْلِيهْ."

²³وْمِنْ ذُرِّيِّةْ الرَّاجِلْ هَاذَا بْعَثْ اللهْ مُخَلِّصْ لْشَعْبْ إِسْرَائِيلْ كِيفْ مَا وْعِدْهُمْ وِلِّي هُوَ يَسُوعْ.

²⁴وْجَا يُوحَنَّا قْبَلْ يَسُوعْ وِدْعَى أُمِّةْ إِسْرَائِيلْ الكُلْهَا لِلمَعْمُودِيَّة مْتَاعْ التَّوْبَة.

²⁵وَقْتِلِّي يُوحَنَّا قْرِيبْ يْكَمِّلْ المُهِمَّة مْتَاعُو قَالْ: "حَسْبْ رَايْكُمْ آنَا شْكُونْ؟ مَا نِيشْ آنَا المُخَلِّصْ آمَا رَاهُو جَايْ بَعْدِي وْمَا نِسْتْحَقِّشْ بَاشْ نْحِلْلُو خْيُوطْ صَنْدَالُو."

²⁶يَا خْوَاتِي، يَا ذُرِّيِّةْ إِبْرَاهِيمْ وْيَا كُلْ الِّي يْخَافُوا رَبِّي مِالنَّاسْ الحَاضْرِينْ رَاهُو لِينَا أَحْنَا تْبَعْثِتْ كِلْمِةْ الخَلاَصْ.

²⁷وْآهُومَا أَهْلْ أُورْشَلِيمْ وِالرُّؤَسَاءْ مْتَاعْهُمْ مَا عُرْفُوهِشْ وْمَا عَرْفُوشْ كْلاَمْ الأَنْبِيَاءْ الِّي يَقْرَاوْ فِيهْ نْهَارْ السِّبْتْ وْتَمَمُوهُمْ كِحُكْمُوا عْلِيهْ بِالمُوتْ.

²⁸وْطَلْبُوا مِنْ بِيلاَطُسْ بَاشْ يُقْتْلُو رَغْمِلِّي مَا لْقَاوْ عْلِيهْ حَتَّى سْبَبْ يِسْتَاهِلْ عْلِيهْ المُوتْ.

²⁹وْبَعْدْ مَا عَمْلُوا فِيهْ الحَاجَاتْ الِّي تْكِتْبِتْ عْلِيهْ الكُلْهَا، هَبّْطُوهْ مِنْ فُوقْ الصَّلِيبْ وْدِفْنُوهْ فِي قْبَرْ.

³⁰آمَا اللهْ قَوّْمُو مِنْ بِينْ المُوتَى.

³¹وِظْهُرْ بَرْشَة نْهَارَاتْ لِلنَّاسْ الِّي مْشَاوْ مْعَاهْ مِنْ الجَلِيلْ حَتَّى لْأُورْشَلِيمْ، وْهُومَا تَوَّا الشْهُودْ مْتَاعُو قُدَّامْ الشَّعْبْ.

³²وْإِحْنَا تَوَّا نْبَشّْرُوا فِيكُمْ بِالشَّيْء الِّي اللهْ وْعِدْ بِيهْ جْدُودْنَا.

³³وْتَمَمُو لِوْلاَدْهُمْ الِّي هُومَا أَحْنَا. وَقْتِلِّي قَوِّمْ يَسُوعْ مِالمُوتْ كِيفْ مَا هُو مَكْتُوبْ فِي المَزْمُورْ الثَّانِي: إِنْتِ ابْنِي وْآنَا اليُومْ جِبْتِكْ.

³⁴وْمَا دَامُو اللهْ قَوِّمْ يَسُوعْ مِنْ بِينْ المُوتَى. وْمَا خَلاَّشْ بَدْنُو يِفْسِدْ، قَالْ فِي كْلاَمُو: بَاشْ نَعْطِيكُمْ البَرَكَاتْ المُقَدّْسَة وِالصَّادْقَة الِّي وْعِدْتْ بِيهَا دَاوُدْ.

³⁵وِيْقُولْ دَاوُدْ فِي مَزْمُورْ آخَرْ: وْمَاكِشْ بَاشْ تْخَلِّي القُدُّوسْ مْتَاعِكْ يَاكْلُوا الدُّودْ.

³⁶وْدَاوُدْ مَاتْ فِي الوَقْتْ هَاذَاكَا بَعْدْ مَا خْدِمْ الشَّعْبْ كِيفْ مَا حَبْ رَبِّي وْتِدْفِنْ مْعَ جْدُودُو وْبَدْنُو فْسِدْ فِي القْبَرْ.

³⁷آمَا الِّي قَوّْمُو اللهْ، بَدْنُو مَا فْسِدْشْ فِي القْبَرْ بِالكُلْ.

³⁸يِلْزِمْكُمْ تَعْرْفُوا يَا خْوَاتِي الِّي بْفَضْلْ يَسُوعْ أَحْنَا نْبَشّْرُوا فِيكُمْ بْغُفْرَانْ الذْنُوبْ.

³⁹وِلِّي يِمِّنْ بِيهْ يْوَلِّي بَرِيءْ مِالذْنُوبْ، الِّي شَرِيعِةْ مُوسَى مَا قَدْرِتْشْ بَاشْ تْرُدُّو بَرِيءْ مِالذْنُوبْ هَاذِي

⁴⁰رُدُّوا بَالْكُمْ لَيْصِيِرلْكُمْ الِّي تْقَالْ فِي كْتُبْ الأَنْبِيَاءْ:

⁴¹أُخْزْرُوا، يَلِّي إِنْتُومَا عْلَى رَبِّي تِتْمَسْخْرُوا! اتْعَجْبُوا وِاتْهِلْكُوا. رَاهُو الِّي فِي أَيَّامْكُمْ بَاشْ نَعْمْلُو اللّي لُوكَانْ وَاحِدْ حْكَالْكُمْ عْلِيهْ مَا كُنْتُوشْ بَاشْ تْصَدّْقُوا.»

⁴²وَقْتِلِّي بُولُسْ وْبَرْنَابَا خَارْجِينْ مِالمَجْمَعْ طَلْبُوا مِنْهُمْ النَّاسْ بَاشْ يَرْجْعُوا نْهَارْ السِّبْتْ الجَّايْ وِيْكَلّْمُوهُمْ عْلَى الشَّيْء هَاذَاكَا بِيدُو.

⁴³وْبَعْدْ مَا وْفَى الإِجْتِمَاعْ بَرْشَة نَاسْ أَصْلْهُمْ يْهُودْ وْنَاسْ أُخْرِينْ وَلاَّوْ يْهُودْ وْمِتْدَيّْنِينْ تَبّْعُوا بُولُسْ وْبَرْنَابَا وِبْدَاوْا يْكَلّْمُوا فِيهُمْ وِيْشَجّْعُوا فِيهُمْ بَاشْ يِثْبْتُوا فِي نِعْمِةْ اللهْ.

⁴⁴وْفِي السِّبْتْ الِّي مْبَعْدُو تَقْرِيبْ امَّالِي البْلاَدْ الكُلْهُمْ تْلَمُّوا بَاشْ يِسْمْعُوا كِلْمِةْ الرَّبْ.

⁴⁵وَقْتِلِّي اليْهُودْ شَافُوا النَّاسْ مَلْمُومِينْ تِمْلاَتْ قْلُوبْهُمْ بِالغِيرَة وِبْدَاوْا يْعَارْضُوا فِي بُولُسْ وِيْسِبُّوا فِيهْ.

⁴⁶يَاخِي كَلِّمْهُمْ بُولُسْ وْبَرْنَابَا جْهَارْ وْقَالُوا: «كَانْ وَاجِبْ عْلِينَا نكَلّْمُوكُمْ إِنْتُومَا لُولاَنِينْ عْلَى كِلْمِةْ اللهْ آمَا إِنْتُومَا رْفَضْتُوهَا وْوَرِّيتُوا الِّي إِنْتُومَا مَا تِسْتْحَقُّوشْ الحَيَاةْ الأَبَدِيَّة، وْهَانَا تَوَّا بَاشْ نْكَلّْمُوا النَّاسْ الِّي مَاهُمْشْ يْهُودْ.

⁴⁷الرَّبْ وَصَّانَا وْقَالْ: حَطِّيتِكْ نُورْ لِلأُمَمْ بَاشْ تْوَصِّلْ خَلاَصِي لْإِخْرْ الأَرْضْ.»

⁴⁸وَقْتِلِّي النَّاسْ الِّي مَا هُمْشْ يْهُودْ سَمْعُوا الكْلاَمْ هَاذَا، فَرْحُوا بَرْشَة وْمَجّْدُوا كِلْمِةْ اللهْ وِالنَّاسْ الِّي حَضِّرْهُمْ رَبِّي لِلحَيَاةْ الأَبَدِيَّة امّْنُوا.

⁴⁹وْهَكَّا تْنُشْرُتْ كِلْمِةْ اللهْ فِي المَنْطْقَة الكُلْهَا.

⁵⁰آمَا اليْهُودْ حَرّْشُوا النْسَاء المِتْدَيْنَاتْ، وِالنَّاسْ الِّي يُحْكْمُوا فِي المْدِينَة بَاشْ يِضْطَهْدُوا بُولُسْ وْبَرْنَابَا حَتَّى لِينْ طَرّْدُوهُمْ مِنْ بْلاَدْهُمْ.

⁵¹آمَا هُومَا نُفْضُوا التْرَابْ مِنْ سَاقِيهُمْ، وِمْشَاوْ لِمْدِينِةْ إِيقُونْيَة.

⁵²وْكَانُوا التْلاَمْذَة مِلْيَانِينْ بِالفَرْحَة وْبِالرُّوحْ القُدُسْ.