Read Tunisian Arabic New Testament أَعْمَالْ 14 Bible Online

أَعْمَالْ 14 - Tunisian Arabic New Testament bible

أَعْمَالْ 14

¹وْفِي إِيقُونْيَة دْخَلْ بُولُسْ وْبَرْنَابَا لِلمَجْمَعْ مْتَاعْ اليْهُودْ كِالعَادَة وِبْدَاوْا يِتْكَلّْمُوا حَتَّى لِينْ امّْنُوا بَرْشَة مِاليْهُودْ وِاليُونَانِيِّينْ.

²آمَا اليْهُودْ الِّي مَا امّْنُوشْ حَرّْشُوا النَّاسْ الِّي مَا هُمْشْ يْهُودْ فِي الإِخْوَة وْفَسّْدُولْهُمْ عْقُولْهُمْ.

³آمَا بُولُسْ وْبَرْنَابَا قَعْدُوا مُدَّة طْوِيلَة فِي البُقْعَة هَاذِيكَا، يْبَشّْرُوا جْهَارْ بِالمَسِيحْ الِّي عَاوِنْهُمْ وِشْهِدْ لْكِلْمِةْ نِعْمْتُو بْمُعْجْزَاتْ وِعْجَايِبْ عْمَلْهَا عْلَى يْدِينْ الرُّسُلْ.

⁴وِاتْقِسْمُوا أَهْلْ إِيقُونِيَّة لْفِرْقْتِينْ: جْمَاعَة مْعَ اليْهُودْ وِالأُخْرِينْ مْعَ الرُّسُلْ.

⁵وْقَرَرُوا اليْهُودْ وِالشْيُوخْ مْتَاعْهُمْ وِالنَّاسْ الِّي مَا هُمْشْ يْهُودْ بَاشْ يْهِينُوا الرُّسُلْ وْيُرْجْمُوهُمْ.

⁶يَاخِي عِلْمُوا بِيهُمْ وْهَرْبُوا لِمْدِينِةْ لِسْتْرَة وْدَرْبَة الِّي فِي مَنْطِقْةْ لِيكَأُونِيَّة وِالمَنَاطِقْ الِّي دَايْرَة بِيهُمْ.

⁷وْكَمّْلُوا يْبَشّْرُوا الغَادِي.

⁸وْثَمَّة رَاجِلْ مَشْلُولْ يُسْكُنْ فِي مْدِينِةْ لِسْتْرَة كَانْ قَاعِدْ غَادِي، وْمِلِّي تُولِدْ عُمْرُو مَا مْشَى.

⁹كَانْ يِسْمَعْ فِي كْلاَمْ بُولُسْ، ثَبِّتْ فِيهْ بُولُسْ وْشَافْ الِّي هُوَ عَنْدُو إِيمَانْ بَاشْ يَبْرَى.

¹⁰نَادَاهْ بْصُوتْ عَالِي: «قُومْ آقِفْ عْلَى سَاقِيكْ!» وِالرَّاجِلْ قَامْ وِبْدَا يْنَقِّزْ وْيِمْشِي.

¹¹وَقْتِلِّي الحَاضْرِينْ شَافُوا الشَّيْء الِّي عَمْلُو بُولُسْ صَاحُوا بِاللَّهْجَة اللِّيكَأُونِيَّة: «هَاوْ الآلْهَة ظُهْرُوا فِي هَيْئِةْ عْبَادْ وْهُبْطُوا عِنْدْنَا.»

¹²وْسَمَّاوْ بَرْنَابَا زَفْسْ، وْبُولُسْ هَرْمَسْ عْلَى خَاطْرُو هُوَ الِّي كَانْ يِتْكَلِّمْ

¹³وِالكَاهِنْ مْتَاعْ زَفْسْ الِّي المَعْبِدْ مْتَاعْهَا البَرَّا مِالمْدِينَة جَابْ تِيجَانْ مِنْ النُّوَّارْ وْثِيرَانْ لْوِينْ البَابْ بَاشْ يْقَدِّمْهُمْلْهُمْ ذْبِيحَة.

¹⁴وَقْتِلِّي الرُّسُلْ بُولُسْ وْبَرْنَابَا سَمْعُوا بِالشَّيْء هَاذَا قَطّْعُوا حْوَايِجْهُمْ وِمْشَاوْ لِلنَّاسْ المُجْتَمْعِينْ وْهُومَا

¹⁵يْصِيحُوا: «يَا نَاسْ، عْلاَشْ تَعْمْلُوا فِي الشَّيْء هَاذَا، رَانَا بَشَرْ ضْعَافْ كِيفْكُمْ وِنْبَشّْرُوا فِيكُمْ بَاشْ تْبَطّْلُوا الحَاجَاتْ الفَارْغَة هَاذِي وْتَرْجْعُوا للهْ الحَيْ الِّي خْلَقْ الأَرْضْ وِالسْمَاءْ وِالبْحَرْ وْكُلْ مَا فِيهُمْ.

¹⁶وْخَلَّى الشْعُوبْ القْدِيمَة يِمْشِيوْ فِي الطْرِيقْ الِّي خْتَارُوهْ.

¹⁷وْفِي نَفْسْ الوَقْتْ مَاخَلاَّهُمْشْ بْلاَشْ شَاهِدْ يْدِلّْهُمْ لِلخِيرْ، وْهُوَ مَازَالْ لْتَوَّا يِنْعِمْ عْلِيكُمْ بِالخِيرْ وْيَعْطِيكُمْ المْطَرْ مِالسْمَاءْ وِمْوَاسِمْ صَابَة وِيْشَبِّعْكُمْ بِالمَاكْلَة وِيْفَرَّحْ قْلُوبْكُمْ.»

¹⁸وْبِصْعُوبَة قِدْرُوا بِالكْلاَمْ هَاذَا انّْهُمْ يَقْنْعُوا النَّاسْ بَاشْ مَا يْقَدّْمُولْهُمْشْ ذْبَايِحْ.

¹⁹وْبَعْدْ هَاذَا جَاوْ جْمَاعَة مِاليْهُودْ مِنْ أَنْطَاكْيَة وْإِيقُونْيَة وْحَرّْشُوا النَّاسْ، يَاخِي رُجْمُوا بُولُسْ وْجَرُّوهْ البَرَّة مِالمْدِينَة مَاشِي فِي بَالْهُمْ الِّي هُوَ مَاتْ.

²⁰آمَا كِدَارُوا بِيهْ التْلاَمْذَة قَامْ وِرْجَعْ لِلمْدِينَة. وْمِنْ غُدْوَة سَافِرْ مْعَ بَرْنَابَا لْدَرْبَة.

²¹وْبَشِّرْ أَهْلْ دَرْبَة بِالمَسِيحْ وْبَرْشَة مِنْهُمْ وَلاَّوْ مِنْ تْلاَمِذْةْ الرَّبْ، وْمِنْ بَعْدْ رُجْعُوا الِّسْتْرَة وْمِنْهَا هِيَ لْإِيقُونِيَّة وْفِي الإِخِّرْ لْأَنْطَاكْيَة.

²²كَانُوا يْقَوِّيوْ فِي عَزِيمِةْ التْلاَمْذَة وِيْشَجّْعُوا فِيهُمْ بَاشْ يِثْبْتُوا فِي الإِيمَانْ وِيْأَكّْدُوا عْلِيهُمْ: «لاَزِمْنَا نْعَانُوا مِنْ بَرْشَة مَشَاكِلْ وْأَوْقَاتْ صْعِيبَة بَاشْ نُدْخْلُوا لْمَمْلِكْةْ اللهْ.»

²³وِخْتَارُوا التْلاَمْذَة شْيُوخْ حَطُّوهُمْ فِي كُلْ كَنِيسَة وْصَلاَّوْ وْصَامُوا وْخَلاَّوْهُمْ فِيدْ رَبِّي الِّي امّْنُوا بِيهْ.

²⁴وْمِنْ بَعْدْ قَصُّوا عْلَى مَنْطِقْةْ بِيسِيدِيَّة وْوُصْلُوا لْبَمْفِيلِيَّة.

²⁵وْبَشّْرُوا بْكِلْمِةْ اللهْ فِي بَرْجَة، وْمِنْ بَعْدْ هَبْطُوا لْأَتَّالِيَة.

²⁶وْمِنْ الغَادِي رَجْعُوا عْلَى البْحَرْ لِمْدِينِةْ أَنْطَاكْيَة، وِينْ المُؤْمْنِينْ طَلْبُوا مِنْ اللهْ بَاشْ يْعَاوِنْهُمْ عْلَى الخِدْمَة الِّي تَوَّا كَمّْلُوهَا.

²⁷وَقْتِلِّي وُصْلُوا سْتَدْعَاوْا الكَنِيسَة وْعَمْلُوا اجْتِمَاعْ، وِحْكُولْهُمْ عْلَى الحَاجَاتْ الِّي اللهْ عْمَلْهَا عْلَى طْرِيقْهُمْ وْكِيفَاشْ حَلْ بَابْ الإِيمَانْ حَتَّى لِلنَّاسْ الِّي مَا هُمْشْ يْهُودْ.

²⁸وْقَعْدُوا مْعَ التْلاَمْذَة لْمُدَّة طْوِيلَة.