Read Tunisian Arabic New Testament أَعْمَالْ 15 Bible Online

أَعْمَالْ 15 - Tunisian Arabic New Testament bible

أَعْمَالْ 15

¹وْجَاوْ جْمَاعَة مِاليْهُودْ الِّي امّْنُوا بِالمَسِيحْ مِنْ مَنْطِقْةْ اليَهُودِيَّة لأَنْطَاكِيَة وِبْدَاوْا يْعَلّْمُوا فِي الإِخْوَة وْقَالُوا: «مَا تْنَجّْمُوشْ تُخْلْصُوا إِذَا كَانْ مَا تِطَّهْرُوشْ كِيفْ مَا تْقُولْ الشَّرِيعَة مْتَاعْ مُوسَى.»

²يَاخِي نَاقِشْهُمْ بُولُسْ وْبَرْنَابَا بْقُوَّة، وْبَعْدْ مَا تْنَاقْشُوا قَرِرُوا المُؤْمْنِينْ الِّي فِي أَنْطَاكْيَة بَاشْ يِمْشِي بُولُسْ وْبَرْنَابَا مْعَ مُؤْمْنِينْ أُخْرِينْ بَاشْ يْقَابْلُوا الرُّسُلْ وِالشْيُوخْ الِّي فِي أُورْشَلِيمْ وْيَحْكِيوْ مْعَاهُمْ فِي المَوْضُوعْ هَاذَا.

³وْبَعْدْ مَا سَلّْمِتْ عْلِيهُمْ الكَنِيسَة سَافْرُوا لْأُورْشَلِيمْ وِتْعَدَّاوْ عْلَى فِينِيقْيَة وِالسَّامْرَة يْخَبّْرُوا فِي المُؤْمْنِينْ الكُلْ الِّي النَّاسْ الِّي مَاهُمْشْ يْهُودْ زَادَا وَلاَّوْ مَسِيحِيِّينْ وِالخْبَرْ فَرَّحْ الإِخْوَة الكُلْ فَرْحَة كْبِيرَة.

⁴وَقْتِلِّي وُصْلُوا لْأُورْشَلِيمْ، رَحّْبِتْ بِيهُمْ الكَنِيسَة وِالرُّسُلْ وِالشْيُوخْ الِّي فِيهَا وْخَبّْرُوهُمْ بِالحَاجَاتْ الكُلْهَا الِّي رَبِّي عْمَلْهَا عْلَى طْرِيقْهُمْ.

⁵آمَا ثَمَّة شْكُونْ مِالمُؤْمْنِينْ الِّي كَانُوا فَرِّيسِيِّينْ وُقْفُوا وْقَالُوا: «المُؤْمْنِينْ الِّي مَا هُمْشْ يْهُودْ يِلْزِمْهُمْ يِطَّهّْرُوا وِيْطَبّْقُوا شَرِيعِةْ مُوسَى.»

⁶وْعَمْلُوا الرُّسُلْ وِالشْيُوخْ اجْتِمَاعْ بَاشْ يَحْكِيوْ فِي الحَاجَة هَاذِي.

⁷وْبَعْدْ مَا تْنَاقْشُوا بَرْشَة وْقُفْ بُطْرُسْ وْقَالْ: «يَا إِخْوَة إِنْتُومَا تَعْرْفُوا الِّي مِنْ مُدَّة طْوِيلَة اللهْ خْتَارْنِي بَاشْ النَّاسْ الِّي مَا هُمْشْ يْهُودْ يِسْمْعُوا كِلْمِةْ الإِنْجِيلْ مِنْ عِنْدِي وْيِمّْنُوا.

⁸وِالله الِّي يِعْلِمْ بِلِّي فِي القْلُوبْ شْهِدِّلْهُمْ وَقْتِلِّي عْطَاهُمْ الرُّوحْ القُدُسْ كِيفْ مَا عْطَانَا أَحْنَا.

⁹وْهُوَ مَا فَرِّقْشْ بِينَّا وْبِينْهُمْ، وْطَهِّرْ قْلُوبْهُمْ بِالإِيمَانْ.

¹⁰إِمَّالاَ تَوْ عْلاَشْ تْجَرّْبُوا فِي اللهْ وِتْحُطُّوا عْلَى تْلاَمِذْةْ الرَّبْ فِي حِمْلْ جْدُودْنَا مَا نَجّْمُوشْ يْهِزُّوهْ وْإِحْنَا زَادَا مَا نَاشْ قَادْرِينْ عْلِيهْ.

¹¹أَحْنَا نِمّْنُوا الِّي أَحْنَا نُخْلْصُوا بْنِعْمِةْ الرَّبْ يَسُوعْ بِالضَّبْطْ كِيفْ مَا هُومَا زَادَا يُخْلْصُوا بْنِعْمْتُو.»

¹²وْسِكْتُوا النَّاسْ الكُلْ وِبْدَاوْا يِسْمْعُوا فِي بَرْنَابَا وْبُولُسْ الِّي يَحْكِيوْلْهُمْ عْلَى الحَاجَاتْ الِّي عْمَلْهَا رَبِّي عْلَى طْرِيقْهُمْ مِنْ مُعْجْزَاتْ وِعْجَايِبْ بِينْ النَّاسْ الِّي مَا هُمْشْ يْهُودْ.

¹³وْبَعْدْ مَا كَمّْلُوا بُولُسْ وْبَرْنَابَا كْلاَمْهُمْ قَالْ يَعْقُوبْ: «يَا إِخْوْتِي، إِسْمْعُونِي:

¹⁴حْكَالْكُمْ سِمْعَانْ كِيفَاشْ اللهْ لْأَوِّلْ مَرَّة تْفَقِّدْ النَّاسْ الِّي مَاهُمْشْ يْهُودْ وِخْذَا مِنْ بِينَاتْهُمْ شَعْبْ وْرَدُّو لِيهْ.

¹⁵وِالشَّيْء هَاذَا يْوَافِقْ كْلاَمْ الأَنْبِيَاءْ كِيمَا جَا فِي الكْتَابْ المُقَدَّسْ.

¹⁶بَاشْ نَرْجَعْ بَعْدْ هَاذَا وْخِيمِةْ دَاوُدْ الِّي طَاحِتْ مِنْ جْدِيدْ نِبْنِيهَا مِنْ جْدِيدْ نْوَقِّفْهَا وْمِنْ خْرَابْهَا نْعَلِّيهَا.

¹⁷بَاشْ بْقِيِّةْ النَّاسْ يْلَوّْجُوا عْلَى رَبِّي وْزَادَا الشْعُوبْ الِّي تْسَمَّاوْ بْإِسْمِي. وِالشَّيْء هَاذَا اللهْ هُوَ الِّي قَالُو

¹⁸وْمِنْ أَوِّلْ الدِّنْيَا لِلنَّاسْ ظَهّْرُو.

¹⁹إِمَّالاَ آنا نْرَى إِنُّو لاَزِمْنَا مَا نْثَقّْلُوشْ عْلَى النَّاسْ الِّي مَا هُمْشْ يْهُودْ وِلِّي هُومَا رَاجْعِينْ لْرَبِّي.

²⁰آمَا نِكْتْبُولْهُمْ جْوَابْ وِنْوَصِّيوْهُمْ فِيهْ بَاشْ مَا يَاكْلُوشْ مِالضْحِيَّة المَنْزُوسَة المَذْبُوحَة لِلصْنَبْ وْبَاشْ مَا يَزْنَاوْشْ وْمَا يَاكْلُوشْ لْحَمْ الحَيَوَانَاتْ المَخْنُوقَة وِالدَّمْ.

²¹مِنْ قْبَلْ مُوسَى كَانُوا عَنْدُو نَاسْ يَحْكِيوْ عْلِيهْ فِي كُلْ مْدِينَة، كُلْ مَا يِتْقْرَى كْتَابْ الشَّرِيعَة فِي المَجَامِعْ نْهَارْ السِّبْتْ.»

²²وْفِي الوَقْتْ هَاذَاكَا قَرَرُوا الرُّسُلْ وِالشْيُوخْ وِالنَّاسْ الكُلْ الِّي فِي الكَنِيسَة بَاشْ يِخْتَارُوا رْجَالْ مِالإِخْوَة وْيَبْعْثُوهُمْ مْعَ بُولُسْ وْبَرْنَابَا لْأَنْطَاكْيَة، وْإِخْتَارُوا يَهُوذَا الِّي يِتْسَمَّى بَارْسَابَا وْسِيلاَ، وِلِّي كَانِتْ عِنْدْهُمْ قِيمَة كْبِيرَة فِي وُسْطْ التْلاَمْذَة.

²³وِعْطَاوْهُمْ الجْوَابْ هَاذَا: «مِنْ الرُّسُلْ وِالشْيُوخْ وِالإِخْوَة لِلإِخْوَة المُؤْمْنِينْ الِّي مَا هُمْشْ يْهُودْ فِي مْدِينِةْ أَنْطَاكْيَة وْسُورْيَة وْكِيلِيكِيَّة. السَّلاَمْ عْلِيكُمْ:

²⁴سْمَعْنَا الِّي ثَمَّة نَاسْ جُوكُمْ مِنْ عِنْدْنَا، مِنْ غِيرْ مَا شَاوْرُونَا، وْقَالُوا كْلاَمْ عِمْلُولْكُمْ بِيهْ مَشَاكِلْ وْخَلَّاوْكُمْ حَايْرِينْ.

²⁵يَاخِي شُفْنَا الِّي بَاهِي كِنِخْتَارُوا رْجَالْ وْنَبْعْثُوهُمْلْكُمْ مْعَ إخْوِتْنَا الِّي يْعِزُّوا عْلِينَا بَرْنَابَا وْبُولُسْ

²⁶وِلِّي حَطُّوا حْيَاتْهُمْ الكُلْ فِي الخْطَرْ بَاشْ يْبَشّْرُوا بْإِسْمْ يَسُوعْ المَسِيحْ.

²⁷وْمِنْ بَعْدْ بْعَثْنَالْكُمْ يَهُوذَا وْسِيلاَ بَاشْ يْقُولُوا الكْلاَمْ هَاذَا قُدَّامْكُمْ.

²⁸الرُّوحْ القُدُسْ يْشُوفْ وْإِحْنَا زَادَا نْشُوفُوا الِّي مُوشْ لاَزِمْ نْحُطُّوا عْلِيكُمْ حِمْلْ غِيرْ الحَاجَاتْ اللاَّزْمَة.

²⁹آمَا لاَزِمْ تْبَطّْلُوا مَاكِلْةْ الذْبَايِحْ المِعْطِيَّة لِلصْنَبْ، وْزَادَا الدَّمْ وِلْحَمْ الحَيَوَانَاتْ المَخْنُوقَة وِالزْنَى، وْبَاهِي لُوكَانْ تْرُدُّوا بَالْكُمْ مِالحَاجَاتْ هَاذِي الكُلْهَا، وْبِالسْلاَمَة.»

³⁰وِمْشَاوْ الِّي هَزُّوا الجْوَابْ وْسَافْرُوا لْأَنْطَاكْيَة وِالغَادِي لَمُّوا المُؤْمْنِينْ الكُلْ في إِجْتِمَاعْ وِعْطَاوْهُمْ الجْوَابْ.

³¹وَقْتِلِّي قْرَاوْهْ فَرْحُوا عْلَى خَاطْرُو شَجَّعْهُمْ بَرْشَة.

³²وْيَهُوذَا وْسِيلاَ زَادَا كَانُوا أَنْبِيَاءْ وْشَجّْعُوا الإِخْوَة بَرْشَة.

³³وْبَعْدْ مُدَّة الإِخْوَة الِّي فِي أَنْطَاكْيَا رَجّْعُوهُمْ سَالْمِينْ لِلِّي بَعْثُوهُمْ.

³⁴[آمَا سِيلاَ حَبْ يَبْقَى لْغَادِي، وَلَّى يَهُوذَا رْجَ عْ وَحْدُو.]

³⁵وْبُولُسْ وْبَرْنَابَا زَادَا بْقَاوْ مُدَّة فِي أَنْطَاكْيَة الغَادِي يْعَلّْمُوا وِيْبَشّْرُوا بْكِلْمِةْ رَبِّي وْبَرْشَة نَاسْ أُخْرِينْ كَانُوا يْعَاوْنُوا فِيهُمْ.

³⁶وْبَعْدْ أَيَّامَاتْ قَالْ بُولُسْ لْبَرْنَابَا: «هَيَّا نَرْجْعُوا وِنْزُورُوا الإِخْوَة الِّي فِي المُدُنْ الكُلْهَا الِّي بَشِّرْنَا فِيهَا بْكِلْمِةْ رَبِّي ونِطْمَانُوا عْلَى حْوَالْهُمْ.»

³⁷يَاخِي إِقْتَرَحْ بَرْنَابَا بَاشْ يْهِزُّوا مْعَاهُمْ يُوحَنَّا الِّي يْنَادِيوْلُو مَرْقُسْ.

³⁸آمَا بُولُسْ رْفَضْ بَاشْ يْهِزُّوهْ مْعَاهُمْ عْلَى خَاطْرُو خَلاَّهُمْ فِي بَمْفِيلِيَّة وْمَا مْشَاشْ مْعَاهُمْ فِي خِدْمِةْ اللهْ.

³⁹وْوُقْعُتْ عَرْكَة بِالكْلاَمْ مَا بِينَاتْهُمْ وْبِعْدُوا عْلَى بْعَضْهُمْ، وَلّى بَرْنَابَا هَزْ مَرْقُسْ مْعَاهْ وْسَافْرُوا عْلَى البْحَرْ لْقُبْرُصْ.

⁴⁰وْبُولُسْ خْتَارْ سِيلاَ بَاشْ يِمْشِي مْعَاهْ. وِالمُؤْمْنِينْ طَلْبُوا رَبِّي بَاشْ يِنْعِمْ عْلِيهُمْ.

⁴¹وْسَافْرُوا فِي مُدُنْ سُورْيَة وْكِيلِيكِيَّة وْهُومَا يْشَجّْعُوا فِي الكَنَايِسْ.