Read Tunisian Arabic New Testament أَعْمَالْ 16 Bible Online

أَعْمَالْ 16 - Tunisian Arabic New Testament bible

أَعْمَالْ 16

¹وْصُلْ بُولُسْ لِمْدِينِةْ دَرْبَة، وْمِنْ بَعْدْ لِمْدِينِةْ لِسْتْرَة، وْكَانْ فِيهَا تِلْمِيذْ إِسْمُو تِيمُوثَاوُسْ، أُمُّو يْهُودِيَّة امّْنِتْ بِالمَسِيحْ وْبُوهْ يُونَانِي.

²وِالإِخْوَة فِي مُدُنْ إِيقُونْيَة وْلِسْتْرَة كَانُوا يَحْكِيوْ عْلِيهْ فِي حَاجَاتْ بَاهْيَة.

³وْحَبْ بُولُسْ بَاشْ يْهِزُّو مْعَاهْ وْهَزُّو وْطَهّْرُو عْلَى خَاطِرْ اليْهُودْ الِّي سَاكْنِينْ فِي المَنْطْقَة هَاذِيكَا يَعْرْفُوا الِّي بُوهْ يُونَانِي.

⁴وِمْشَى بُولُسْ وِصْحَابُو مِنْ بْلاَدْ لِبْلاَدْ يْبَلّْغُوا لِلمُؤْمْنِينْ فِي القَرَارَاتْ الِّي خْذَاوْهَا الرُّسُلْ وِالشْيُوخْ فِي أُورْشَلِيمْ بَاشْ يْطَبّْقُوهَا.

⁵وِالكَنَايِسْ كَانِتْ تِتْقَوَّى فِي الإِيمَانْ وِعْدَدْهَا مَاشِي وْيِكْبِرْ نْهَارْ بَعْدْ نْهَارْ.

⁶وِمْنَعْهُمْ الرُّوحْ القُدُسْ بَاشْ يْبَشّْرُوا فِي جِيهِةْ أَسِيَّة، يَاخِي سَافْرُوا لْجِيهِةْ فَرِيجِيَّة وْغَلاَطْيَة.

⁷وَقْتِلِّي وُصْلُوا لِلحَدْ مْتَاعْ جِيهِةْ مِيسِيَّة، حَاوْلُوا بَاشْ يُدْخْلُوا لْجِيهِةْ بِثِينِيَّة، آمَا الرّوح القُدسْ مَا سْمَحِّلْهُمْشْ بَاشْ يُدْخْلُولْهَا.

⁸وَلّاوْ مْشَاوْ لِمْدِينِةْ تَرُوَاسْ وِتْعَدَّاوْ عْلَى مْدِينِةْ مِيسِيَّة.

⁹وْفِي اللِّيلَة هَاذِيكَا بِيدْهَا شَافْ بُولُسْ فِي رُؤْيَا، رَاجِلْ مِنْ مَقْدُونِيَّة يِتْشَحِّتْ فِيهْ وِيْقُولْ: «تْعَدَّى لْمَقْدُونِيَّة وْعَاوِنَّا.»

¹⁰وَقْتِلِّي بُولُسْ شَافْ الرُّؤْيَا بِالوَقْتْ حَاوِلْنَا بَاشْ نِمْشِيوْا لْمَقْدُونِيَّة عْلَى خَاطِرْنَا تْأَكِّدْنَا الِّي اللهْ يْحِبّْنَا نْبَشّْرُوا بِالإِنْجِيلْ الغَادِي.

¹¹وْسَافِرْنَا مِنْ بُرْطْ تَرُوَاسْ لْجَزِيرِةْ سَامُوثْرَاكِي. وْفِي النْهَارْ الثَّانِي كَمِّلْنَا السْفَرْ لْبُرْطْ مْدِينِةْ نِيَابُولِيسْ.

¹²وْمِنْ وِلاَيِةْ مَقْدُونِيَّة تْعَدِّينَا لِمْدِينِةْ فِيلِبِّي الِّي هِيَ مِنْ أَكْبِرْ المُدُنْ الِّي مِسْتَعْمْرِينْهَا الرُّومَانْ وِبْقِينَا الغَادِي أَيَّامَاتْ.

¹³وْفِي نْهَارْ السِّبْتْ مْشِينَا بِحْذَا الوَادْ الِّي قْرِيبْ مِالمْدِينَة وِالبْلاَصَة هَاذِيكَا تْعَوّْدُوا اليْهُودْ بَاشْ يْصَلِّيوْ فِيهَا. وِقْعَدْنَا نْكَلّْمُوا فِي النْسَاء المُوجُودِينْ غَادِي.

¹⁴وْمِنْ بِينْهُمْ مْرَا تِعْبِدْ فِي رَبِّي اسْمْهَا لِيدِيَّة مِنْ مْدِينِةْ ثِيَاتِيرَا كَانِتْ تْبِيعْ فِي القْمَاشْ الغَالِي وْرَبِّي نَوّْرِلْهَا قَلْبْهَا بَاشْ تِسْمَعْ كْلاَمْ بُولُسْ بِالقْدَا.

¹⁵وَقْتِلِّي تْعَمّْدِتْ هِيَ وعَايْلِتْهَا سْتَدْعَاتْنَا وْقَالْتِلْنَا: «إِذَا كَانْكُمْ حَاسْبِينِّي مُؤْمْنَة بِالرَّبْ لاَزِمْكُمْ تْجِيوْ لْدَارِي.» وْقَنْعِتْنَا بَاشْ نِمْشِيوْا ضْيَافْ عِنْدْهَا.

¹⁶وْفِي نْهَارْ مِنْ النْهَارَاتْ وَقْتِلِّي كُنَّا مَاشِينْ لِلصْلاَة، عَرْضِتْنَا خْدِيمَة سَاكِنْهَا رُوحْ عَرَّافْ. وْكَانِتْ تْرَبِّحْ فِي سْيَادْهَا الِّي مَالْكِينْهَا فِي بَرْشَة فْلُوسْ مَالتْقَازَة مْتَاعْهَا.

¹⁷يَاخِي بْدَاتْ اتَّبَّعْ فِي بُولُسْ وِاتَّبَّعْ فِينَا الكُلْنَا وِتْصِيحْ: «النَّاسْ هَاذُمْ هُومَا عَبِيدْ اللهْ العَالِي وِيْخَبّْرُوا فِيكُمْ عْلَى طْرِيقْ الخَلاَصْ.»

¹⁸وْقَعْدِتْ عْلَى الحَالَة هَاذِي أَيَّامَاتْ حَتَّى لِينْ قْلَقْ مِنْهَا بُولُسْ وِتْلَفِّتْ وْقَالْ لِلرُّوحْ الِّي فِيهَا: «بْإِسْمْ يَسُوعْ المَسِيحْ نُأْمْرِكْ بَاشْ تُخْرُجْ مِنْهَا.» وْبِالوَقْتْ خْرَجْ مِنْهَا.

¹⁹وَقْتِلِّي أَسْيَادْ الخْدِيمَة مَا عَادِشْ عِنْدْهُمْ أَمَلْ الِّي هِيَ بَاشْ تْجِيبِلْهُمْ فْلُوسْ، شَدُّوا بُولُسْ وْسِيلاَ وْهَزُّوهُمْ لِلحُكَّامْ فِي السَّاحَة مْتَاعْ المْدِينَة بَاشْ يُحْكْمُوا عْلِيهُمْ.

²⁰وَقّْفُوهُمْ قُدَّامْ الحُكَّامْ وْقَالُوا: «الزُّوزْ رْجَالْ هَاذُومَا يْهُودْ وْيَعْمْلُوا فِي المَشَاكِلْ فِي المْدِينَة.

²¹وِيْعَلّْمُوا فِي النَّاسْ فِي عْوَايِدْ الِّي أَحْنَا الرُّومَانْ مَا انَّجّْمُوشْ نِقْبْلُوهَا وْمَا انَّجّْمُوشْ نَعْمْلُوا بِيهَا.»

²²يَاخِي ثَارُوا عْلِيهُمْ النَّاسْ، وْقَطّْعُولْهُمْ الحُكَّامْ حْوَايِجْهُمْ وْأَمْرُوا بَاشْ يَضْرْبُوهُمْ بِالسُّوطْ.

²³وْضَرْبُوهُمْ بِالسُّوطْ بَرْشَة وْحَطُّوهُمْ فِي الحَبْسْ وْأَمْرُوا الحَارِسْ بَاشْ يْعِسْ عْلِيهُمْ بِالقْدَا.

²⁴عْمَلْ كِيفْ مَا أَمْرُوهْ وْحَطّْهُمْ فِي الحَبْسْ الدَّخْلاَنِي وْحَطِّلْهُمْ سَاقِيهُمْ فِي لُوحَة.

²⁵وِمْعَ نُصْفْ اللِّيلْ كَانُوا بُولُسْ وْسِيلاَ يْصَلِّيوْ وِيْسَبّْحُوا فِي اللهْ وِالمَرْبُوطِينْ مْعَاهُمْ فِي الحَبْسْ يِسْمْعُوا فِيهُمْ.

²⁶وْإِذَا بِيهْ زِلْزَالْ قْوِي حَرِّكْ سِيسَانْ الحَبْسْ، وْفِي نَفْسْ الوَقْتْ تْحَلِّتْ البِيبَانْ الكُلْهَا وِالمْرَابِيطْ الكُلْهُمْ سْلاَسِلْهُمْ تْحَلِّتْ.

²⁷وِالزِّلْزَالْ فَيِّقْ الحَارِسْ وْكِشَافْ البِيبَانْ مَحْلُولَة، مْشَى فِي بَالُو الِّي المْرَابِيطْ هَرْبُوا يَاخِي جْبِدْ سِيفُو بَاشْ يُقْتُلْ رُوحُو.

²⁸آمَا بُولُسْ عَيِّطْلُو عْلَى طُولْ صُوتُو: «مَا تْضُرُّشْ رُوحِكْ! أَحْنَا الكُلْنَا هْنَا.»

²⁹أْمَرْ بَاشْ يْجِيبُولُو ضَوْ، وِدْخَلْ يِجْرِي لْدَاخِلْ وْتِرْمَي قُدَّامْ بُولُسْ وْسِيلاَ وْهُوَ يِتْرْعِدْ.

³⁰مِنْ بَعْدْ خَرِّجْهُمْ لْبَرَّة وِسْإِلْهُمْ: «يَا سْيَادِي آشْ يِلْزِمْنِي نَعْمِلْ بَاشْ نُخْلُصْ؟»

³¹جَاوْبُوهْ: «إِمِّنْ بِالرَّبْ يَسُوعْ، تَوْ تُخْلُصْ إِنْتِ وْعَايِلْتِكْ.»

³²مِنْ بَعْدْ بَشّْرُوهْ هُوَ وْعَايِلْتُو الكُلْهُمْ بْكِلْمِةْ اللهْ.

³³وْفِي اللِّيلَة هَاذِيكَا بِيدْهَا هَزّْهُمْ فِي الوَقْتْ هَاذَاكَا وْنَظّْفِلْهُمْ جْرُوحْهُمْ وِتْعَمِّدْ هُوَ وْعَايِلْتُو الكُلْهَا.

³⁴وْهَزّْهُمْ لْدَارُو وْحَطِّلْهُمْ المَاكْلَة وِفْرَحْ مْعَ عَايِلْتُو الكُلْهَا عْلَى خَاطْرُو إِمِّنْ بِالله.

³⁵وَقْتِلِّي طْلَعْ النْهَارْ بَعْثُوا الحُكَّامْ مَسْؤُولِينْ فِي الشُّرْطَة بَاشْ يْقُولُوا لِلحَارِسْ: «سَيِّبْ الزُّوزْ رْجَالْ.»

³⁶وْقَالْ الحَارِسْ لْبُولُسْ: «الحُكَّامْ بَعْثُوا وآمْرُونِي بَاشْ نْسَيِّبْكُمْ، إِمْشِيوْ تَوَّا بِالسْلاَمَة.»

³⁷آمَا بُولُسْ رْفَضْ وْقَالْ: «ضَرْبُونَا بِالسُّوطْ قُدَّامْ النَّاسْ مِنْ غِيرْ مَا يُحْكْمُوا عْلِينَا رَغْمِلِّي أَحْنَا عِنْدْنَا الجِنْسِيَّة الرُّومَانِيَّة، وْزَادُوا حَطُّونَا فِي الحَبْسْ، كِيفَاشْ تَوَّا يْحِبُّوا يْسَيّْبُونَا مِنْ غِيرْ مَا حَدْ يِعْلِمْ. لاَ، لاَزِمْ يْجُوا هُومَا وِيْسَيّْبُونَا!»

³⁸وْخَبّْرُوا المَسْؤُولِينْ مْتَاعْ الشُّرْطَة الحُكَّامْ بِالشَّيْء هَاذَا، يَاخِي خَافُوا وَقْتِلِّي سَمْعُوا بِيهُمْ الِّي هُومَا رُومَانْ.

³⁹وْجَاوْ وْطَلْبُوا مِنْهُمْ السْمَاحْ وْسَيّْبُوهُمْ وْطَلْبُوا مِنْهُمْ بَاشْ يُخْرْجُوا مِالمْدِينَة.

⁴⁰خْرَجْ بُولُسْ وْسِيلاَ مِالحَبْسْ وِمْشَاوْ لْدَارْ لِيدِيَّة وِالغَادِي قَابْلُوا الإِخْوَة وْشَجّْعُوهُمْ وْمِنْ بَعْدْ خَرْجُوا مِالمْدِينَة.