Read Tunisian Arabic New Testament أَعْمَالْ 17 Bible Online

أَعْمَالْ 17 - Tunisian Arabic New Testament bible

أَعْمَالْ 17

¹وْصُلْ بُولُسْ وْسِيلاَ لِمْدِينِةْ تْسَالُونِيكِي بَعْدْ مَا تْعَدَّاوْ عْلَى مْدِينِةْ أَمْفِيبُولِيسْ وِمْدِينِةْ أَبُولُونِيَّة. وْكَانْ ثَمَّة مَجْمَعْ مْتَاعْ يْهُودْ فِي مْدِينِةْ تْسَالُونِيكِي.

²مْشَالْهُمْ بُولُسْ كِيفْ العَادَة وِقْعَدْ يْكَلِّمْ فِيهُمْ مِالكْتَابْ المُقَدَّسْ لْمُدِّةْ ثْلاَثَة سْبَاتْ.

³وْفَسّْرِلْهُمْ وْوَرَّاهُمْ الِّي المَسِيحْ كَانْ لاَزْمُو يِتْعَذِّبْ وِيْقُومْ مِنْ بِينْ المُوتَي، وْقَالِلْهُمْ: «المَسِيحْ الِّي تِسْتَنَّاوْ فِيهْ هُوَ يَسُوعْ الِّي آنَا تَوْ قَاعِدْ نْبَشِّرْ فِيكُمْ بِيهْ.»

⁴يَاخِي ثَمَّة شْكُونْ مِالحَاضْرِينْ اقْتَنْعُوا وْوَلاَّوْ مْعَ بُولُسْ وْسِيلاَ، وْكَانُوا مَا بِينَاتْهُمْ بَرْشَة يُونَانِيِّينْ يِعْبْدُوا فِي رَبِّي وْبَرْشَة نْسَاء رْجَالْهُمْ مَعْرُوْفِينْ فِي المْدِينَة.

⁵آمَا اليْهُودْ الِّي مَا امّْنُوشْ ثَارُوا عْلَى خَاطِرْهُمْ غَارُوا مِنْهُمْ وْلَمُّوا نَاسْ مِتْشَرّْدِينْ وْأَشْرَارْ وْعَمْلُوا مَشَاكِلْ فِي البْلاَدْ وْمِنْ بَعْدْ هِجْمُوا عْلَى دَارْ يَاسُونْ، وْطَلْبُوا مِنُّو بَاشْ يْخَرّْجِلْهُمْ بُولُسْ وْسِيلاَ بَاشْ يْسَلْمُوهُمْ لِلمَحْكْمَة.

⁶وْكِمَا لْقَاوْهُمْشْ جَابُوا يَاسُونْ وِجْمَاعَة مِالإِخْوَة وْهَزُّوهُمْ لْحُكَّامْ المْدِينَة، وِشْكَاوْ بِيهُمْ وْهُومَا يْصِيحُوا: «النَّاسْ هَاذُمْ قِلْبُوا الدِّنْيَا، وْتَوْ جَاوْ لِلمْدِينَة مْتَاعْنَا.

⁷يَاسُونْ ضَيِّفْهُمْ فِي دَارُو وْهُومَا الكُلْهُمْ يْخَالْفُوا فِي الأَوَامِرْ مْتَاعْ القَيْصَرْ وِيْقُولُوا الِّي ثَمَّة مَلِكْ آخَرْ إِسْمُو يَسُوعْ.»

⁸وِالكْلاَمْ هَاذَا قَلِّقْ النَّاسْ وِالحُكَّامْ.

⁹وْمَا سَيّْبُوا يَاسُونْ وِبْقِيِّةْ الإِخْوَة كَانْ بَعْدْ مَا خْذَاوْ كَفَالَة مِنْ عِنْدْ يَاسُونْ.

¹⁰وْفِي اللِّيلْ بَعْثُوا الإِخْوَة بُولُسْ وْسِيلاَ لِمْدِينِةْ بِيرِيَّة، وَقْتِلِّي وُصْلُوا مْشَاوْ لِلمَجْمَعْ مْتَاعْ اليْهُودْ الِّي فِيهَا.

¹¹وِاليْهُودْ مْتَاعْ بِيرِيَّة كَانُوا خِيرْ مِاليْهُودْ الِّي فِي تْسَالُونِيكِي وْقِبْلُوا كِلْمِةْ الرَّبْ وْحَبُّوهَا بَرْشَة وِبْدَاوْا يَقْرَاوْ فِي الكْتَابْ كُلْ يُومْ بَاشْ يِتْأَكّْدُوا الِّي التَّعْلِيمْ الِّي يِسْمْعُوا فِيهْ صْحِيحْ وِلاَّ لاَ.

¹²وْبَرْشَة مِنْهُمْ إِمّْنُوا وْزَادَا ثَمَّة نْسَاء يُونَانِيَّاتْ مَعْرُوفِينْ إِمّْنُوا وْبَرْشَة رْجَالْ يُونَانِيِّينْ زَادَا.

¹³وْعَرْفُوا اليْهُودْ الِّي فِي تْسَالُونِيكِي الِّي بُولُسْ يْبَشِّرْ بْكِلْمِةْ اللهْ فِي مْدِينِةْ بِيرِيَّة. خَلْطُوا عْلِيهْ وِبْدَاوْا يْهَيّْجُوا عْلِيهْ فِي النَّاسْ.

¹⁴وْفِي الوَقْتْ هَاذَاكَا ثَمَّة جْمَاعَة مِالمُؤْمْنِينْ هَزُّوا بُولُسْ لِلبْحَرْ بَاشْ يْسَافِرْ، وِقْعَدْ سِيلاَ وْتِيمُوثَاوُسْ الغَادِي.

¹⁵وِمْشَاوْ المُؤْمْنِينْ مْعَ بُولُسْ وْوَصّْلُوهْ لْأَثِينَا. وْمِنْ بَعْدْ رَجْعُوا بَعْدْ مَا وَصَّاهُمْ بُولُسْ بَاشْ يَبْعْثُولُو سِيلاَ وْتِيمُوثَاوُسْ فِي أَقْرِبْ وَقْتْ مُمْكِنْ.

¹⁶وَقْتِلِّي بُولُسْ كَانْ يِسْتَنَّى فِيهُمْ فِي أَثِينَا، شَافْ المْدِينَة مِلْيَانَة بِالصْنَبْ. تْحَرّكِتْ رُوحُو.

¹⁷وِبْدَا يْكَلِّمْ فِي اليْهُودْ، وِالنَّاسْ الِّي دِيمَا يُقْعْدُوا فِي المَجْمَعْ بَاشْ يِعْبْدُوا رَبِّي وِالنَّاسْ الِّي يَلْقَاهُمْ كُلْ يُومْ فِي السُّوقْ.

¹⁸وِتْنَاقِشْ مْعَ الفَلاَسْفَة الأَبِيقُورِيِّينْ وِالرِّوَاقِيِّينْ، وَقْتِلِّي لْقَاوْهْ يْبَشِّرْ بْيَسُوعْ وِالقْيَامَة مِالمُوتْ قَالُوا: «آشْ يُقْصُدْ بِكْلاَمُو الرَّاجِلْ هَاذَا الِّي يْخَرِّفْ؟» وْنَاسْ أُخْرِينْ قَالُوا: «ظَاهِرْ الِّي هُوَ يِدْعِي فِي النَّاسْ بَاشْ يِعْبْدُوا آلْهَة أُخْرَى.»

¹⁹مِنْ بَعْدْ هَزُّوهْ لْمَجْلِسْ المْدِينَة الِّي يِتْسَمَّى الأَرْيُوبَاغُوسْ وْسِأْلُوهْ: «انَّجّْمُوشْ نَعْرْفُوا التَّعْلِيمْ الجْدِيدْ الِّي تْنَادِي بِيهْ؟

²⁰أَحْنَا قَاعْدِينْ نِسْمْعُوا فِي كْلاَمْ غْرِيبْ وِنْحِبُّوا نَعْرْفُوا آشْ مَعْنَاهْ.»

²¹(وْكَانُوا أَهْلْ أَثِينَا وِالبْرَايْنِيَّة الِّي السَّاكْنِينْ فِيهَا يْعَدِّيوْ أَوْقَاتْ فَرَاغْهُمْ يِتْنَاقْشُوا فِي الأَفْكَارْ الجْدِيدَة.)

²²وْقُفْ بُولُسْ فِي وُسْطْ المَجْلِسْ وْقَالْ: «يَا أَهْلْ أَثِينَا، آنَا قَاعِدْ نْشُوفْ الِّي إِنْتُومَا الكُلْكُمْ مِدَّيْنِينْ بَرْشَة.

²³وَقْتِلِّي كُنْتْ نْدُورْ فِي مْدِينِتْكُمْ وْنُخْزُرْ لِلمَعَابِدْ مْتَاعْكُمْ لْقِيتْ مَذْبَحْ مَكْتُوبْ عْلِيهْ: لْإِلاَهْ مَجْهُولْ. آنَا رَانِي قَاعِدْ نْبَشِّرْ فِيكُمْ بِالإِلاَهْ المَجْهُولْ هَاذَا الِّي إِنْتُومَا تِعْبْدُوا فِيهْ وْمَا تَعْرْفُوهِشْ.

²⁴اللهْ الِّي خْلَقْ العَالَمْ وْكُلْ مَا فِيهْ، الِّي مَا يُسْكُنْشْ فِي مَعَابِدْ بْنَاتْهَا يْدِينْ البَشَرْ عْلَى خَاطْرُو هُوَ الِّي يِمْلِكْ السْمَاءْ وِالأَرْضْ.

²⁵وْمَا يِحْتَاجِشْ لِيْدِينْ النَّاسْ بَاشْ تِخْدْمُو، عْلَى خَاطْرُو هُوَ بِيدُو يَعْطِي لِلنَّاسْ الكُلْ الحَيَاةْ وِالنْفَسْ وْكُلْ شَيْء.

²⁶وِخْلَقْ النَّاسْ الكُلْهُمْ مِنْ إِنْسَانْ وَاحِدْ وْسَكِّنْهُمْ فِي الأَرْضْ الكُلْهَا وْحَطِّلْهُمْ الوَقْتْ الِّي بَاشْ يْعِيشُوا فِيهْ وِالحْدُودْ مْتَاعْ البْلاَدْ الِّي بَاشْ يُسْكْنُوا فِيهَا.

²⁷بَاشْ يْلَوّْجُوا عْلَى رَبِّي، بَالِكْشِي يَلْقَاوْهْ وْيِقْبْلُوهْ، وْهُوَ، مُوشْ بْعِيدْ عْلَى كُلْ وَاحِدْ فِينَا.

²⁸رَانَا نَحْيَاوْ وْنِتْحَرّْكُوا وْنِتْوِجْدُوا بِيهْ هُوَ. وْكِيمَا قَالْ وَاحِدْ مِنْ الشُّعَرَاءْ مْتَاعْكُمْ: "أَحْنَا زَادَا ذُرِّيتُو."

²⁹وْمَا دَامْنَا أَحْنَا ذُرِّيِّةْ اللهْ إِمَّالاَ مَا يِلْزِمْنَاشْ نْفَكّْرُوا الِّي اللهْ كِيفْ صَنْبَة مِالذّْهَبْ وِلاَّ مِالفِضَّة وِلاَّ حَجْرَة يُنْقُشْهَا الإِنْسَانْ كِيفْ مَا يْحِبْ.

³⁰اللهْ قْبَلْ نْسَى أَيَّامَاتْ الجَهْلْ الِّي فَاتِتْ وْتَوْ يُأْمُرْ فِي النَّاسْ الكُلْ الِّي فِي الدِّنْيَا بَاشْ يْتُوبُوا.

³¹وِعْلَى خَاطْرُو حَطْ نْهَارْ بَاشْ يْحَاسِبْ فِيهْ العَالَمْ بِالعَدْلْ عْلَى طْرِيقْ رَاجِلْ خْتَارُو لِلشَّيْء هَاذَا وِعْطَى لِلنَّاسْ الكُلْ الدَّلِيلْ الِّي هُوَ بَاشْ يَعْمِلْ الشَّيْء هَاذَا وَقْتِلِّي قَوّْمُو مِنْ بِينْ المُوتَى.»

³²وْكِي سَمْعُوهْ يَحْكِي عْلَى قْيَامِةْ المُوتَى ثَمَّة شْكُونْ مِنْهُمْ بْدَاوْا يَضْحْكُوا. آمَا نَاسْ أُخْرِينْ قَالُوا لْبُولُسْ: «مَاذَا بِينَا تْزِيدْ تَحْكِيلْنَا عْلَى الأُمُورْ هَاذِي مَرَّة أُخْرَى.»

³³وْهَكَّا خْرَجْ بُولُسْ مِنْ بِحْذَاهُمْ.

³⁴آمَا ثَمَّة جْمَاعَة مِنْهُمْ وَلاَّوْ مْعَ بُولُسْ وِامّْنُوا، وْمِنْهُمْ دْيُونِيسْيُوسْ الِّي كَانْ عُضْوْ فِي المَجْلِسْ مْتَاعْهُمْ وِمْرَا اسْمْهَا دَامَارِيسْ، وْنَاسْ أُخْرِينْ.