Read Tunisian Arabic New Testament أَعْمَالْ 18 Bible Online

أَعْمَالْ 18 - Tunisian Arabic New Testament bible

أَعْمَالْ 18

¹وْبَعْدْ هَاذَا سَافِرْ بُولُسْ مِنْ أَثِينَا لِمْدِينِةْ كُورِنْثُوسْ.

²وِتْلاَقَى مْعَ يْهُودِي إِسْمُو أَكِيلاَ مُولُودْ فِي مْدِينِةْ بُنْطُسْ. مَازَالْ كِجَا مْعَ مَرْتُو بْرِيسْكِلَّة مِنْ إِيطَالْيَا عْلَى خَاطِرْ القَيْصِرْ كْلُودْيُوسْ أْمَرْ بَاشْ يْطَرِّدْ اليْهُودْ الِّي فِي رُومَا الكُلْهُمْ، يَاخِي مْشَالْهُمْ بُولُسْ.

³قْعَدْ عِنْدْهُمْ وِخْدِمْ مْعَاهُمْ عْلَى خَاطِرْهُمْ كَانُوا يَصْنْعُوا فِي الخْيَامْ كِيفُو

⁴وْكَانْ فِي كُلْ سِبْتْ يِتْنَاقِشْ مْعَ النَّاسْ الِّي يْجِيوْ لِلمَجْمَعْ، وْيَقْنِعْ فِي اليْهُودْ وِاليُونَانِيِّينْ.

⁵وَقْتِلِّي وُصْلُوا سِيلاَ وْتِيمُوثَاوُسْ مِنْ جِيهِةْ مَقْدُونِيَّة عْطَى بُولُسْ وَقْتُو الكُلْ لِلتَّبْشِيرْ وِبْقَى يِشْهِدْ لِليْهُودْ الِّي يَسُوعْ هُوَ المَسِيحْ.

⁶آمَا هُومَا عَارْضُوهْ وِبْدَاوْا يَكْفْرُوا بِيهْ، يَاخِي نْفَضْ حْوَايْجُو وْقَالِلْهُمْ: «دَمّْكُمْ عْلَى رُوسْكُمْ، آنَا بَرِيءْ مِنْ ذْنُوبْكُمْ. وْمِنْ تَوَّا آنَا بَاشْ نِمْشِي وِنْبَشِّرْ النَّاسْ الِّي مَا هُمْشْ يْهُودْ.»

⁷وْمِنْ بَعْدْ خْرَجْ بُولُسْ مِنْ المَجْمَعْ وِمْشَى ضِيفْ لْدَارْ رَاجِلْ يِعْبِدْ فِي رَبِّي إِسْمُو تِيطُسْ يُوسْتُسْ، ودَارُو كَانِتْ لاَصْقَة فِي المَجْمَعْ.

⁸وْإِمِّنْ كْرِيسْبُسْ رَئِيسْ المَجْمَعْ بِالرَّبْ هُوَ وْعَايِلْتُو الكُلْ، وْبَرْشَة مِنْ أَهْلْ كُورِنْثُوسْ سَمْعُوا بِالتَّبْشِيرْ مْتَاعْ بُولُسْ وِامّْنُوا وِتْعَمّْدُوا.

⁹وْفِي لِيلَة ظْهُرْ الرَّبْ لْبُولُسْ فِي رُؤْيَا وْقَالُّو: «مَا تْخَافِشْ، آمَا تْكَلِّمْ وْمَا تُسْكُتْشْ.

¹⁰آنَا مْعَاكْ وْحَتَّى حَدْ مَا يِقْدِرْ يَعْمِلِّكْ حَتَّى حَاجَة خَايْبَة عْلَى خَاطِرْ عِنْدِي بَرْشَة نَاسْ فِي المْدِينَة هَاذِي.»

¹¹وِقْعَدْ بُولُسْ فِي كُورِنْثُوسْ عَامْ وْسِتَّة شْهُورْ يْعَلِّمْ فِي النَّاسْ فِي كْلاَمْ اللهْ.

¹²وَقْتِلِّي كَانْ غَالْيُونْ وَالِي عْلَى مَنْطِقْةْ أَخَائِيَة جَاوْ اليْهُودْ كِلْمَة وَحْدَة عْلَى بُولُسْ وْهَزُّوهْ لِلمَحْكْمَة.

¹³وِشْكَاوْ بِيهْ وْقَالُوا: «الرَّاجِلْ هَاذَا يْحَاوِلْ يَقْنِعْ النَّاسْ بَاشْ يِعْبْدُوا اللهْ بْطَرِيقَة تْخَالِفْ الشَّرِيعَة مْتَاعْنَا.»

¹⁴وَقْتِلِّي بُولُسْ حَبْ يْدَافِعْ عْلَى رُوحُو، تْكَلِّمْ الوَالِي غَالْيُونْ وْقَالْ لِليْهُودْ: «كَانْ جَاتْ القَضِيَّة هَاذِي فِيهَا جْرِيمَة وِلاَّ تُهْمَة تَالِي رَانِي سْمَعْتْ كْلاَمْكُمْ.

¹⁵آمَا مَا دَامِتْ القَضِيَّة هَاذِي السْبَبْ مْتَاعْهَا كْلاَمْ وْأَسَامِي وْحَاجَاتْ تْخُصْ الشَّرِيعَة مْتَاعْكُمْ مَا عْلِيكُمْ كَانْ تْحِلُّوهَا مَا بِينَاتْكُمْ، آنَا مَا نْحِبِّشْ نُحْكُمْ فِي القَضَايَا هَاذُمْ.»

¹⁶وْمِنْ بَعْدْ طَرِّدْهُمْ مِالمَحْكْمَة.

¹⁷يَاخِي هَزُّوا سُوسْتَانِيسْ رَئِيسْ المَجْمَعْ وْضَرْبُوهْ قُدَّامْ المَحْكْمَة آمَا غَالْيُونْ مَا ادَّخِّلْشْ.

¹⁸قْعَدْ بُولُسْ فِي كُورِنْثُوسْ مُدَّة طْوِيلَة، مِنْ بَعْدْ وَدِّعْ الإِخْوَة وْسَافِرْ عْلَى البْحَرْ وِمْشَى لْسُورْيَة وِمْعَاهْ بْرِيسْكِلَّة وْأَكِيلاَ بَعْدْ مَا حَجِّمْ شَعْرُو فِي مْدِينِةْ كَنْخَرِيَّة عْلَى خَاطْرُو كَانْ وَاعِدْ وِعْدَة لْرَبِّي.

¹⁹وَقْتِلِّي وُصْلُوا لْأَفَسُسْ خَلاَّهُمْ بُولُسْ الغَادِي وِدْخَلْ لِلمَجْمَعْ مْتَاعْ اليْهُودْ وِتْنَاقِشْ مْعَاهُمْ.

²⁰وْطَلْبُوا مِنُّو بَاشْ يَبْقَى مْعَاهُمْ مُدَّة أَطْوِلْ، آمَا هُوَ مَا قْبِلْشْ.

²¹وَدِّعْهُمْ وْقَالْ: «إِنْ شَاءْ اللهْ نَرْجْعِلْكُمْ.» مِنْ بَعْدْ سَافِرْ عْلَى البْحَرْ مِنْ أَفَسُسْ.

²²وِهْبَطْ فِي قَيْصَرِيَّة وِطْلَعْ وْسَلِّمْ عْلَى الكَنِيسَة، مِنْ بَعْدْ هْبَطْ لِمْدِينِةْ أَنْطَاكْيَة.

²³وْعَدَّى فِيهَا مُدَّة، وْبَعْدْ بْدَا يِتْنَقِّلْ فِي جِيهِةْ غَلاَطْيَة وْفَرِيجِيَّة مِنْ بْلاَصَة لِبْلاَصَة وْهُوَ يْشَجَّعْ فِي التْلاَمْذَة الكُلْهُمْ.

²⁴وْجَا لْأَفَسُسْ يْهُودِي إِسْمُو أَبُلُّوسْ، أَصْلُو مِنْ الإِسْكَنْدَرِيَّة وْهُوَ رَاجِلْ يِتْكَلِّمْ بِالقْدَا وْيَعْرِفْ الكْتَابْ المُقَدَّسْ.

²⁵وْيِتْعَلِّمْ فِي طْرِيقْ الرَّبْ، وِبْدَا يُخْطُبْ بْقُوَّة كْبِيرَة وِيْعَلِّمْ فِي النَّاسْ بِالضَّبْطْ فِي الحَاجَاتْ الِّي تْخُصْ يَسُوعْ تَعْلِيمْ صْحِيحْ رَغْمِلِّي هُوَ مَا كَانْ يَعْرِفْ كَانْ مَعْمُودِيِّةْ يُوحَنَّا.

²⁶وِبْدَا يِتْكَلِّمْ جْهَارْ فِي المَجْمَعْ، يَاخِي سَمْعُوهْ أَكِيلاَ وِبْريسْكِلَّة وْهَزُّوهْ مْعَاهُمْ وْزَادُوا وَضّْحُولُو طْرِيقْ اللهْ.

²⁷وْحَبْ أَبُلُّوسْ بَاشْ يْسَافِرْ لِبْلاَدْ أَخَائِيَة وْشَجّْعُوهْ الإِخْوَة عْلَى الشَّيْء هَاذَا وْكِتْبُوا جْوَابْ لِلتْلاَمْذَة الِّي غَادِي بَاشْ يْرَحّْبُوا بِيهْ، وَقْتِلِّي وْصُلْ عَاوِنْ المُؤْمْنِينْ بَرْشَة بِالنِّعْمَة الِّي عْطَاهَالُو رَبِّي.

²⁸وْكَانْ يْنَاقِشْ فِي اليْهُودْ بْقُوَّة وِجْهَارْ وْيَقْنِعْ فِيهُمْ بْأَدِلَّة مِالكْتَابْ المُقَدَّسْ الِّي يَسُوعْ هُوَ المَسِيحْ.