Read Tunisian Arabic New Testament أَعْمَالْ 19 Bible Online

أَعْمَالْ 19 - Tunisian Arabic New Testament bible

أَعْمَالْ 19

¹وْكِيفْ أَبُلُّوسْ كَانْ فِي كُورِنْثُوسْ، وْصُلْ بُولُسْ لْأَفَسُسْ، بَعْدْ مَا تْعَدَّى عْلَى الجِيهَاتْ الِّي بْعِيدَة عْلَى البْحَرْ لْقَى فِيهَا مَجْمُوعَة مِالتْلاَمْذَة.

²سْإِلْهُمْ: «وَقْتِلِّي إِمِّنْتُوا خْذِيتُوا الرُّوحْ القُدُسْ وِلاَّ لاَ؟» جَاوْبُوهْ: «لاَ، أَحْنَا مَا سْمَعْنَاشْ حَتَّى بِلِّي الرُّوحْ القُدُسْ مُوجُودْ.»

³عَاوِدْ سْإِلْهُمْ: «إِمَّالاَ آنَا هِي المَعْمُودِيَّة الِّي تْعَمِّدْتُوا بِيهَا؟» جَاوْبُوا: «مَعْمُودِيِّةْ يُوحَنَّا.»

⁴قَالْ بُولُسْ: «يُوحَنَّا كَانْ يْعَمِّدْ بِالمَعْمُودِيَّة مْتَاعْ التَّوْبَة وْيِدْعِي فِي الشَّعْبْ بَاشْ يِمّْنُوا بِلِّي بَاشْ يْجِي بَعْدُو، الِّي هُوَ يَسُوعْ.»

⁵وْكِي سَمْعُوا الشَّيْء هَاذَا، تْعَمّْدُوا بْإِسْمْ الرَّبْ يَسُوعْ.

⁶وَقْتِلِّي حَطْ بُولُسْ يْدِيهْ عْلِيهُمْ، نْزِلْ عْلِيهُمْ الرُّوحْ القُدُسْ. وِبْدَاوْا يِتْكَلّْمُوا بْلُغَاتْ مُوشْ مَفْهُومَة وْيِتْنَبّْأُوا.

⁷وْكَانْ عْدَدْهُمْ تَقْرِيبْ اثْنَاشِنْ رَاجِلْ.

⁸وِمْشَى لِلمَجْمَعْ مْتَاعْ اليْهُودْ وِبْقَى لْمُدِّةْ ثْلاَثَة شْهُرْ يِتْكَلِّمْ جْهَارْ وِيْنَاقِشْ فِي الحَاضْرِينْ وِيْحَاوِلْ بَاشْ يَقْنِعْهُمْ بْمَمْلِكْةْ اللهْ.

⁹آمَا ثَمَّة شْكُونْ مِنْهُمْ الِّي عَارْضُوهْ وْمَا اقْتَنْعُوشْ وِبْدَاوْا يْسِبُّوا فِي التَّعْلِيمْ هَاذَا قُدَّامْ بَرْشَة نَاسْ، بْعِدْ عْلِيهُمْ بُولُسْ وْهَزْ مْعَاهْ التْلاَمْذَة، وْكَانْ كُلْ يُومْ يْنَاقِشْ فِي النَّاسْ فِي مَدْرْسَة مْتَاعْ وَاحِدْ إِسْمُو تِيرَانُّوسْ.

¹⁰وْدَاوِمْ عْلَى الشَّيْء هَاذَا لْمُدِّةْ عَامِينْ، وْهَكَّا وُصْلِتْ كِلْمِةْ الرَّبْ لِلنَّاسْ الِّي يُسْكْنُوا فِي جِيهِةْ أَسِيَّة الكُلْهُمْ يْهُودْ وْيُونَانِيِّينْ.

¹¹وِالله كَانْ يَعْمِلْ فِي مُعْجْزَاتْ كْبِيرَة عْلَى طْرِيقْ بُولُسْ.

¹²حَتَّى لِينْ النَّاسْ وَلاَّوْ يْهِزُّوا فِي المْنَادِلْ وِالبْشَاكِرْ الِّي سْتَعْمِلْهَا بُولُسْ وِيْحُطُّوهَا عْلَى المُرْضَى وْيَبْرَاوْ وِلاَّ تُخْرُجْ مِنْهُمْ الأَرْوَاحْ الشِّرِّيرَة.

¹³وْثَمَّة يْهُودْ دِيمَا يْدُورُوا فِي البْلاَدْ وْخِدْمِتْهُمْ هِيَ تَخْرِيجْ الأَرْوَاحْ الشِّرِّيرَة حَاوْلُوا بَاشْ يِسْتَعْمْلُوا اسْمْ الرَّبْ يَسُوعْ وِيْقُولُوا: «نْطَرّْدُوكُمْ بْإِسْمْ يَسُوعْ الِّي يْبَشِّرْ بِيهْ بُولُسْ.»

¹⁴وْثَمَّة كَاهِنْ يْهُودِي إِسْمُو سَكَاوَا وْهُوَ أَعْلَى وَاحِدْ فِي رُؤَسَاءْ الكُهَّانْ وْعِنْدُو سَبْعَة وْلاَدْ يَعْمْلُوا فِي نَفْسْ الشَّيْء.

¹⁵يَاخِي جَاوِبْهُمْ الرُّوحْ الشِّرِّيرْ: «يَسُوعْ آنَا نَعْرْفُو وْبُولُسْ زَادَا نَعْرْفُو، آمَا إِنْتُومَا شْكُونْ؟»

¹⁶هْجِمْ عْلِيهُمْ الرَّاجِلْ الِّي فِيهْ الرُّوحْ الشِّرِّيرْ وِقْدِرْ عْلِيهُمْ وِغْلِبْهُمْ، وْهَرْبُوا مِالدَّارْ عِرْيَانِينْ وْمَجْرُوحِينْ

¹⁷وِالشَّيْء هَاذَا وَلَّى مَعْرُوفْ بِينْ اليْهُودْ وِاليُونَانِيِّينْ الِّي سَاكْنِينْ فِي مْدِينِةْ أَفَسُسْ، وْخَافُوا بَرْشَة وْإِسْمْ الرَّبْ يَسُوعْ تْمَجِّدْ

¹⁸وْبَرْشَة مِالنَّاسْ مِلِّي امّْنُوا جَاوْ وْإِعْتَرْفُوا وْخَبّْرُوا عْلَى الحَاجَاتْ الخَايْبَة الِّي عَمْلُوهَا.

¹⁹وْبَرْشَة مِلِّي يَعْمْلُوا فِي السِّحْرْ جَابُوا مْعَاهُمْ كْتُبِّةْ السِّحْرْ مْتَاعْهُمْ، لَمُّوهَا وْحَرْقُوهَا قُدَّامْ النَّاسْ الكُلْ. وْكِي حِسْبُوا سُومْهَا لْقُوهَا تَسْوَى خَمْسِينْ أَلْفْ قَطْعَة مِالفِضَّة.

²⁰وْهَكَّا كَانِتْ كِلْمِةْ اللهْ تِكْبِرْ وْتِتِنْشَرْ بْقُوَّة.

²¹وْبَعْدْ مَا جْرَاتْ الحَاجَاتْ هَاذِي الكُلْهَا قَرِّرْ بُولُسْ بَاشْ يْسَافِرْ لْأُورْشَلِيمْ وْيِتْعَدَّى عْلَى جِيهِةْ مَقْدُونِيَّة وْأَخَائِيَة وْقَالْ: «لاَزِمْ بَعْدْ مَا نُقْعُدْ فِيهَا نْزُورْ رُومَا زَادَا.»

²²وِبْعَثْ لْمَقْدُونِيَّة زُوزْ مِلِّي يْعَاوْنُوا فِيهْ وْهُومَا تِيمُوثَاوُسْ وْأَرَسْطُوسْ وِقْعَدْ مُدَّة فِي جِيهِةْ أَسِيَّة.

²³وْفِي المُدَّة هَاذِيكَا وُقْعِتْ مُشْكْلَة كْبِيرَة فِي أَفَسُسْ بِسْبَبْ التَّعْلِيمْ هَاذَا.

²⁴ثَمَّة صَايْغِي إِسْمُو دِيمِتْرِيُوسْ كَانْ يَصْنَعْ فِي بَرْشَة تْمَاثِيلْ صْغِيرَة مِالفِضَّة لِلمَعَابِدْ مْتَاعْ الإِلاَهَة أَرْطَامِيسْ، وْهُوَ وِالصُّنَّاعْ مْتَاعُو كَانُوا يِرْبْحُوا فِي بَرْشَة فْلُوسْ.

²⁵الصَّايْغِي لَمْ الصُّنَّاعْ مْتَاعُو وِالنَّاسْ الأُخْرِينْ الِّي يِخْدْمُوا فِي الخِدْمَة هَاذِي وْقَالِلْهُمْ: «يَا رْجَالْ إِنْتُومَا تَعْرْفُوا الِّي أَحْنَا عَايْشِينْ بِالقْدَا مِالخِدْمَة هَاذِي.

²⁶وْإِنْتُومَا شُفْتُوا وِسْمَعْتُوا الِّي بُولُسْ خَلَّى بَرْشَة نَاسْ يْبَدّْلُوا رَايْهُمْ مُوشْ فِي أَفَسُسْ بَرْكْ، آمَا تَقْرِيبْ فِي جِيهِةْ أَسِيَّة الكُلْهَا وِقْنَعْ النَّاسْ الِّي الآلْهَة الِّي تِتْصْنَعْ بِاليِدْ مَاهِيشْ آلْهَة.

²⁷وْهَاذَا مُوشْ بَاشْ يْخَلِّي خِدْمِتْنَا تِفْسِدْ بَرْكْ. آمَا زَادَا بَاشْ يْخَلِّي المَعْبِدْ مْتَاعْ الإِلاَهَة العْظِيمَة مْتَاعْنَا أَرْطَامِيسْ اطِّيحْ قِيمْتُو وْتِخْسِرْ المَجْدْ مْتَاعْهَا بَعْدْ مَا كَانُوا يِعْبْدُوا فِيهَا النَّاسْ الكُلْ فِي أَسِيَّة وْفِي الدِّنْيَا الكُلْهَا.»

²⁸وْكِسَمْعُوا الصُّنَّاعْ الكْلاَمْ هَاذَا، تْغَشَشُوا وِبْدَاوْا يْصِيحُوا: «تَحْيَى أَرْطَامِيسْ الآلْهَة مْتَاعْ أَفَسُسْ!»

²⁹وْصَارِتْ خُوضَة كْبِيرَة فِي المْدِينَة الكُلْهَا، وْبَرْشَة نَاسْ هِجْمُوا عْلَى غَايُوسْ وْأَرِسْتَرْخُسْ الِّي مِنْ مَقْدُونِيَّة وِلِّي كَانُوا مْسَافْرِينْ مْعَ بُولُسْ وْهَزُّوهُمْ بِالقُوَّة لِلسَّاحَة مْتَاعْ المَلْعَبْ.

³⁰وْحَبْ بُولُسْ بَاشْ يْوَاجِهْ النَّاسْ آمَا التْلاَمْذَة مَا خَلاَّوْهْشْ.

³¹وْثَمَّة جْمَاعَة مِالمَسْؤُولِينْ الِّي فِي أَسِيَّة صْحَابْ بُولُسْ وَصُّولُو وِتْشَحّْتُوهْ بَاشْ مَا يْعَرِّضْشْ رُوحُو لِلخْطَرْ بْمَشْيَانُو لِلمَلْعَبْ.

³²وِالنَّاسْ كَانُوا دَاخْلِينْ بْعَضْهُمْ، ثَمَّة نَاسْ يْصِيحُوا عْلَى حَاجَة وْنَاسْ أُخْرِينْ يْصِيحُوا عْلَى حَاجَة أُخْرَى، وْأَكْثِرْهُمْ مَا كَانُوشْ عَارْفِينْ عْلَى رْوَاحْهُمْ عْلاَشْ هُومَا مُوجُودِينْ فِي المَلْعَبْ.

³³وْكَانْ مَا بِينَاتْهُمْ رَاجِلْ يْهُودِي إِسْمُو اسْكَنْدَرْ دَزُّوهْ اليْهُودْ القُدَّامْ وْطَلْبُوا مِنُّو بَاشْ يِتْكَلِّمْ، يَاخِي هَزْ ايدُو بَاشْ النَّاسْ يُسْكْتُوا عْلَى خَاطْرُو كَانْ يْحِبْ يِتْكَلِّمْ بَاشْ يْدَافِعْ عْلَى رُوحُو قُدَّامْ المَجْلِسْ

³⁴آمَا النَّاسْ كِيفْ عَرْفُوا الِّي هُوَ يْهُودِي الكُلْهُمْ بْدَاوْا يْصِيحُوا بْصُوتْ وَاحِدْ وِلْمُدِّةْ سَاعْتِينْ: «تَحْيَى أَرْطَامِيسْ الإِلاَهَة مْتَاعْ أَفَسُسْ!»

³⁵وْفِي الإِخِّرْ رَيِّضْهُمْ كَاتِبْ المْدِينَة وْقَالِلْهُمْ: «يَا أَهْلْ أَفَسُسْ، شْكُونْ مَا يَعْرِفْشْ الِّي أَفَسُسْ هِيَ المْدِينَة الِّي تُحْرُسْ فِي المَعْبِدْ مْتَاعْ أَرْطَامِيسْ، الإِلاَهَة القْوِيَّة وْتِمْثَالْ الحَجْرَة الِّي طَاحِتْ مِالسْمَاءْ؟

³⁶وْمَا دَامْهُمْ النَّاسْ الكُلْ يَعْرْفُوا الشَّيْء هَاذَا إِمَّالاَ يِلْزِمْكُمْ تْرِيضُوا وْمَا تَعْمْلُوا حَتَّى شَيْء بْزَرْبَة.

³⁷إِنْتُومَا جِبْتُوا الزُّوزْ رْجَالْ هَاذُمْ وْهُومَا لاَ سِرْقُوا المَعْبِدْ وْلاَ كُفْرُوا بِالإِلاَهَة مْتَاعْكُمْ.

³⁸آمَا إِذَا كَانْ دِيمِتْرِيُوسْ وِلِّي يِخْدْمُوا مْعَاهْ يْحِبُّوا يِشْكِيوْ، رَاهُو عِنْدْنَا مْحَاكِمْ وْحُكَّامْ يْنَجّْمُوا يِشْكُولْهُمْ.

³⁹وْإِذَا كَانْ عِنْدْكُمْ شْكَايَة أُخْرَى رَاهُو لاَزِمْنَا نُحْكْمُوا فِيهَا فِي جَلْسَة قَانُونِيَّة.

⁴⁰آمَا تَوَّا أَحْنَا الكُلْنَا مُمْكِنْ يِتْحْكَمْ عْلِينَا وْيِتْهْمُونَا بْعَمْلاَنْ المَشَاكِلْ فِي البْلاَدْ بِسْبَبْ الِّي صَارْ اليُومْ. أَحْنَا مَا عِنْدْنَاشْ حَتَّى شَيْء نْفَسّْرُوا بِيهْ المَشَاكِلْ الِّي قَاعْدَة تَجْرَى تَوَّا.»

⁴¹وْبِكْلاَمُو هَاذَا النَّاسْ الكُلْ مْشَاوْ.