Read Tunisian Arabic New Testament أَعْمَالْ 2 Bible Online

أَعْمَالْ 2 - Tunisian Arabic New Testament bible

أَعْمَالْ 2

¹وَقْتِلِّي جَا عِيدْ يُومْ الخَمْسِينْ، كَانُوا المُؤْمْنِينْ الكُلْ مُجْتَمْعِينْ مْعَ بْعَضْهُمْ فِي بُقْعَة وَحْدَة.

²وِعْلَى غَفْلَة جَا صُوتْ مِالسْمَاءْ، كَإِنُّو صُوتْ رِيحْ قْوِي، وِمْلَى البِيتْ الِّي كَانُوا قَاعْدِينْ فِيهَا.

³مِنْ بَعْدْ ظُهْرْتِلْهُمْ لْسَانَاتْ مِتْفَرّْقَة كِيفْ النَّارْ، وْحَطِّتْ عْلَى كُلْ وَاحِدْ فِيهُمْ.

⁴وْتِمْلاَوْ الكُلْ بِالرُّوحْ القُدُسْ، وِبْدَاوْا يِتْكَلّْمُوا بْلُغَاتْ أُخْرَى، كِيمَا عْطَاهُمْ الرُّوحْ بَاشْ يَنْطْقُوا.

⁵وِالوَقْتْ هَاذَاكَا كَانُوا ثَمَّة جْمَاعَة مِاليْهُودْ الِّي يْخَافُوا رَبِّي فِي أُرْشَلِيمْ وِلِّي هُومَا جَاوْ مِنْ كُلْ أُمَّة فِي الأَرْضْ.

⁶وَقْتِلِّي تِسْمَعْ الصُّوتْ تْلَمُّوا النَّاسْ الكُلْ، وِتْعَجّْبُوا عْلَى خَاطِرْ كُلْ وَاحِدْ كَانْ يِسْمَعْ فِيهُمْ يِتْكَلّْمُوا بْلُوغْتُو هُوَ.

⁷تْعَجّْبُوا وِتْحَيّْرُوا وْوَلاَّوْ يِسْأْلُوا فِي بْعَضْهُمْ: «مُوشْ الِّي قَاعْدِينْ يِتْكَلّْمُوا، الكُلْهُمْ مِنْ بْلاَدْ الجَلِيلْ؟

⁸إِمَّالاَ كِيفَاشْ كُلْ وَاحِدْ مِنَّا قَاعِدْ يِسْمَعْ فِي لُوغِةْ البْلاَدْ الِّي تُولِدْ فِيهَا؟

⁹بَرْثِيِّينْ وْمَادِيِّينْ وْعِيلاَمِيِّينْ وْمِنَّا مِنْ سُكَّانْ مَنْطِقْةْ مَا بِينْ النَّهْرِينْ وِاليَهُودِيَّة وْكَبَّدُوكِيَّة، وْبُنْطُسْ وْأَسِيَّة.

¹⁰وْفَرِيجِيَّة وْبَمْفِيليَّة وْمَصْرْ وْمِنْ بْقَايِعْ مِنْ لِيبِيَّة مِنْ جِيهِةْ قِيرِينَة وِمْعَانَا بَرْشَة زُوَّارْ مِنْ رُومَا.

¹¹اليْهُودْ وِلِّي وَلاَّوْ يْهُودْ وِالكَرِيتِيِّينْ وِالعْرَبْ وْهَانَا الكُلْنَا نِسْمْعُوا فِيهُمْ يْكَلّْمُوا فِينَا بْلُوغِتْنَا عْلَى أَعْمَالْ اللهْ العْظِيمَة.»

¹²وِالكُلْهُمْ بْدَاوْا يِسْأْلُوا فِي بْعَضْهُمْ وْهُومَا مِسْتَغْرْبِينْ وْحَايْرِينْ: «آشْ مَعْنَاهَا هَاذَا الكُلْ؟»

¹³وْنَاسْ أُخْرِينْ تْمَسْخْرُوا عْلِيهُمْ وْقَالُوا: «النَّاسْ هَاذُومَا سْكَارَا.»

¹⁴آمَا بُطْرُسْ وْقُفْ مْعَ الأحْدَاشْ الرَّسُولْ وْقَالْ لِلحَاضْرينْ بْصُوتْ عَالِي: «يَا أَهْلْ اليَهُودِيَّة وِالسَّاكْنِينْ فِي أُورْشَلِيمْ الكُلْ، إِسْمْعُوا كْلاَمِي بَاشْ تَعْرْفُوا حْقِيقِةْ الِّي قَاعِدْ يْصِيرْ.

¹⁵هَاذُومَا مَا هُمْشْ سْكَارَا كِيمَا إِنْتُومَا تْظُنُّوا، النَّاسْ مَا يِسْكْرُوشْ فِي التِّسْعَة مْتَاعْ الصْبَاحْ.

¹⁶آمَا رَاهُو هَاذَا الِّي تْقَالْ عْلَى لْسَانْ النَّبِي يُوئِيلْ:

¹⁷يْقُولْ اللهْ: فِي آخِرْ الزْمَانْ بَاشْ نَعْطِي الرُّوحْ مْتَاعِي لِلنَّاسْ الكُلْهُمْ، وْيِتْنَبّْأُوا وْلاَدْكُمْ وِبْنَاتْكُمْ وِيْشُوفُوا رُؤْيَاتْ شَبَابْكُمْ وْأَحْلاَمْ يِحْلْمُوا كْبَارْكُمْ.

¹⁸وْنَعْطِي الرُّوحْ مْتَاعِي فِي الأَيَّامَاتْ هَاذُوكُمْ لِلخُدَّامْ مْتَاعِي رْجَالْ وِنْسَاء الكُلْهُمْ وْبِشْ يِتْنَبّْأُوا الكُلْهُمْ

¹⁹وْبِشْ نَعْمِلْ عْجَايِبْ الفُوقْ فِي السْمَاءْ والُّوطَا عْلَى الأَرْضْ بَاشْ نَعْطِي عَلاَمَاتْ بَرْشَة دُخَّانْ وْنَارْ وِدْمُومَاتْ.

²⁰وِقْبَلْ مَا يْجِي يُومْ الرَّبْ، هَاكَا النْهَارْ العْظِيمْ وِالمَجِيدْ تِظْلاَمْ الشَّمْسْ وِالقَمْرَة كِيفْ الدَّمْ تْوَلِّي حَمْرَا.

²¹وَقْتْهَا كُلْ مِنْ يِدْعِي بْإِسْمْ الرَّبْ يُخْلُصْ.

²²يَا رْجَالْ إِسْرَائِيلْ اسْمْعُوا الكْلاَمْ هَاذَا: يَسُوعْ النَّاصْرِي رَاجِلْ عْطَاهْ اللهْ مُعْجْزَاتْ وِعْجَايِبْ وْعَلاَمَاتْ عْمَلْهَا اللهْ عْلَى يِدُّو مَا بِينَاتْكُمْ كِيمَا تَعْرْفُوا.

²³وِالرَّاجِلْ هَاذَا سْمَحْ اللهْ بْإرَادْتُو القْوِيَّة، وْعِلْمُو السَّابِقْ بَاشْ تْشِدُّوهْ وِتْعَلّْقُوهْ عْلَى صَلِيبْ وْتُقْتْلُوهْ بْإِيدِينْ نَاسْ أَشْرَارْ.

²⁴آمَا اللهْ قَوّْمُو مِنْ بِينْ المُوتَى، وَقْتِلِّي سَيّْبُو مِالرْبَاطْ مْتَاعْ المُوتْ، عْلَى خَاطِرْ المُوتْ مَا كَانِشْ يْنَجِّمْ يِغْلْبُو.

²⁵وْقَالْ عْلِيهْ دَاوُدْ: دِيمَا نْشُوفْ فِي الرَّبْ قُدَّامِي، مَا نْخَافِشْ عْلَى خَاطْرُو دِيمَا عْلَى يْمِينِي،

²⁶هَاذَاكَا عْلاَشْ فْرَحْ قَلْبِي وِلْسَانِي سَبِّحْ رَبِّي، عْلَى أَمَلْ بَاشْ يْعِيشْ بَدْنِي

²⁷الِّي مَاكِشْ بَاشْ تْخَلِّينِي نْمُوتْ وْمَاكِشْ بَاشْ تْخَلِّي القُدُّوسْ مْتَاعِكْ يَاكْلُوا الدُّودْ.

²⁸هْدِيتْنِي لِطْرِيقْ الحَيَاةْ، وْتِمْلاَنِي بِالفَرْحَة وَقْتِلِّي نْكُونْ مْعَاكْ.

²⁹يَا إِخْوَة خَلِّينِي نْقُولِلْكُمْ بْصَرَاحَة الِّي بُونَا دَاوُدْ مَاتْ وْتِدْفِنْ وْقَبْرُو مُوجُودْ عِنْدْنَا حَتَّى لِليُومْ.

³⁰عْلَى خَاطْرُو كَانْ نَبِي وِعْرَفْ الِّي اللهْ حْلِفْلُو بِاليْمِينْ الِّي وَاحِدْ مِنْ ذُرِّيتُو بَاشْ يُقْعُدْ عْلَى عَرْشُو.

³¹وْهُوَ يِتْكَلِّمْ عْلَى قْيَامِةْ المَسِيحْ كِيمَا شَافْهَا قْبَلْ مَا تَاقَعْ، وْقَالْ عْلَى رُوحُو: هُوَ مُوشْ بَاشْ يْخَلِّيهْ يْمُوتْ وْمُوشْ بَاشْ يْخَلِّيهْ فِي القْبَرْ.

³²يَسُوعْ هَاذَا قَوّْمُو اللهْ مِنْ بِينْ المُوتَي وْإِحْنَا الكُلْ شْهُودْ عْلَى هَاذَا.

³³وْكِرَفْعُو اللهْ وِخْذَا الرُّوحْ القُدُسْ المَوْعُودْ بِيهْ مِنْ عِنْدْ الآبْ سِكْبُو عْلِينَا، وِلِّي تْشُوفُوا فِيهْ وْتِسْمْعُوا فِيهْ تَوَّا، رَاهُو بِسْبَبْ الشَّيْء هَاذَا.

³⁴دَاوُدْ مَا تِرْفَعْشْ بْبَدْنُو لِلسْمَاء، وْهُوَ بِيدُو يْقُولْ: رَبّْنَا يْقُولْ لْسِيدْنَا: أُقْعُدْ عْلَى يْمِينِي

³⁵حَتَّى لِينْ نْحُطْ الأَعْدَاءْ مْتَاعِكْ تَحْتْ سَاقِيكْ.

³⁶خَلِّي بَنِي إِسْرَائِيلْ الكُلْهُمْ يَعْرْفُوا وْيِتْأكّْدُوا الِّي يَسُوعْ هَاذَا الِّي إِنْتُومَا صْلَبْتُوهْ وِاللهْ رَدُّو رَبْ وْمَسِيحْ!»

³⁷وَقْتِلِّي سَمْعُوا الحَاضْرِينْ الكْلاَمْ هَاذَا أَنِّبْهُمْ ضَمِيرْهُمْ وْسِأْلُوا بُطْرُسْ وِبْقِيِّةْ الرُّسُلْ: «آشْ نَعْمْلُوا يَا إِخْوَة؟»

³⁸جَاوِبْهُمْ بُطْرُسْ: «تُوبُوا وْخَلِّي كُلْ وَاحِدْ فِيكُمْ يِتْعَمِّدْ بْإِسْمْ يَسُوعْ المَسِيحْ، وَقْتْهَا يِغْفْرِلْكُمْ اللهْ ذْنُوبْكُمْ وْتَاخْذُوا مَوْهِبْةْ الرُّوحْ القُدُسْ.

³⁹عْلَى خَاطِرْ الوَعْدْ هَاذَا رَاهُو لِيكُمْ وْلِوْلاَدْكُمْ وْلِلنَّاسْ البْعَادْ الكُلْ، يَاخْذُو كُلْ وَاحِدْ يْنَادِيهْ الرَّبْ إِلاَهْنَا.»

⁴⁰وْمِنْ بَعْدْ شْهِدِّلْهُمْ بْبَرْشَة كْلاَمْ وْشَدْ صْحِيحْ وْقَالِلْهُمْ: «إِبْعْدُوا عْلَى الجِيلْ الفَاسِدْ هَاذَا.»

⁴¹وِلِّي سَمْعُوهْ الكُلْهُمْ وْقِبْلُوا كْلاَمُو تْعَمّْدُوا، وِتْزَادُوا لِلمَجْمُوعَة فِي النْهَارْ هَاذَاكَا تَقْرِيبْ ثْلاَثَة آلاَفْ.

⁴²وِالكُلْهُمْ كَانُوا يْدَاوْمُوا عْلَى تَعْلِيمْ الرُّسُلْ وْكَانُوا عَايْشِينْ مْعَ بْعَضْهُمْ وْيَاكْلُوا فِي العْشَاء الرَّبَّانِي وِيْصَلِّيوْ.

⁴³وْكِصَارِتْ مُعْجْزَاتْ وِعْجَايِبْ عْلَى يْدِينْ الرُّسُلْ، النَّاسْ الكُلْ وَلاَّوْ خَايْفِينْ.

⁴⁴وِالمُؤْمْنِينْ الكُلْهُمْ كَانُوا مِتَّحْدِينْ مْعَ بْعَضْهُمْ، وْكَانُوا مِتْشَارْكِينْ فِي كُلْ مَا يِمْلْكُوا.

⁴⁵يْبِيعُوا حْوَايِجْهُمْ وْأَمْلاَكْهُمْ وْيِقْسْمُوا الفْلُوسْ عْلَى قَدْرْ حَاجِةْ كُلْ وَاحِدْ فِيهُمْ.

⁴⁶وِيْدَاوْمُوا عْلَى الحْضُورْ فِي الهَيْكِلْ كُلْ يُومْ بْقَلْبْ وَاحِدْ. وْيِقْسْمُوا خُبْزْ الْعْشاء الرّبّانِي فِي البْيُوتْ وْيَاكْلُوا مْعَ بْعَضْهُمْ بْفَرْحَة وْنِيَّة صَافْيَة.

⁴⁷وْهُومَا يْسَبّْحُوا فِي اللهْ، وْمَقْبُولِينْ عِنْدْ النَّاسْ الكُلْ، وْكَانْ الرَّبْ كُلْ يُومْ يْزِيدْ لِلمَجْمُوعَة النَّاسْ الِّي يُخْلْصُوا بِالمَسِيحْ.