Read Tunisian Arabic New Testament أَعْمَالْ 20 Bible Online

أَعْمَالْ 20 - Tunisian Arabic New Testament bible

أَعْمَالْ 20

¹بَعْدْ مَا وْفَاتْ الخُوضَة، عَيِّطْ بُولُسْ لِلتْلاَمْذَة وْشَجِّعْهُمْ وْمِنْ بَعْدْ وَدِّعْهُمْ وْسَافِرْ لْجِيهِةْ مَقْدُونِيَّة

²وِقْعَدْ يْدُورْ فِيهَا وِيْشَجَّعْ فِي التْلاَمْذَة فِي كُلْ بُقْعَة وْفِي الإِخِّرْ وْصُلْ لِليُونَانْ

³وْعَدَّى فِيهَا ثْلاَثَة شْهُرْ، وَقْتِلِّي جَا بَاشْ يْسَافِرْ لْسُورْيَة عْرَفْ الِّي اليْهُودْ قَاعْدِينْ يَعْمْلُوا فِي خُطَّة بَاشْ يُقْتْلُوهْ، يَاخِي قَرِّرْ بَاشْ يَرْجَعْ عْلَى طْرِيقْ مَقْدُونِيَّة.

⁴وْسَافِرْ مْعَاهْ سُوبَاتْرُسْ وِلْدْ بِرُّسْ مِنْ مْدِينِةْ بِيرِيَّة، وْأَرِسْتَرْخُسْ وْسَكُونْدُسْ مِنْ مْدِينِةْ تْسَالُونِيكِي، وْغَايُوسْ وْتِيمُوثَاوُسْ مِنْ مْدِينِةْ دَرْبَة وْتِيخِيكُسْ وْتُرُوفِيمُسْ مِنْ جِيهِةْ أَسِيَّة.

⁵هَاذُمْ سِبْقُونَا وْقَعْدُوا يِسْتَنَّاوْ فِينَا فِي مْدِينِةْ تَرُوَاسْ.

⁶وْبَعْدْ عِيدْ الفْطِيرْ مْتَاعْ اليْهُودْ سَافِرْنَا مِنْ مْدِينِةْ فِيلِبِّي عْلَى البْحَرْ وِوْصُلْنَا لِمْدِينِةْ تَرُوَاسْ بَعْدْ خَمْسَة أَيَّامْ وِخْلَطْنَا عْلِيهُمْ وِقْعَدْنَا الغَادِي سَبْعَة أَيَّامْ.

⁷وْفِي أَوِّلْ الجِّمْعَة وَقْتِلِّي تْلَمِّينَا بَاشْ نَاكْلُوا الخُبْزْ مْعَ بْعَضْنَا بْدَا بُولُسْ يُوعِظْ فِي النَّاسْ المُوجُودِينْ وْطَوِّلْ فِي الخُطْبَة حَتَّى لْنُصْفْ اللِّيلْ عْلَى خَاطْرُو كَانْ نَاوِي مِالغُدْوَة بَاشْ يْسَافِرْ.

⁸وِالبِيتْ الِّي تْلَمِّينَا فِيهَا كَانِتْ فِي العْلِي وْكَانُوا فِيهَا بَرْشَة فْنَارَاتْ.

⁹وْكَانْ ثَمَّة وْلِدْ إِسْمُو أَفْتِيخُوسْ قَاعِدْ عْلَى حَرْفْ الشِّبَّاكْ غَلْبُو النُّومْ، وْبُولُسْ مَازَالْ يِتْكَلِّمْ يَاخِي طَاحْ أَفْتِيخُوسْ مِالطَّاقْ الثَّالِثْ وْكِهَزُّوهْ لْقَاوْهْ مَاتْ.

¹⁰هْبَطْ بُولُسْ وْتِرْمَي عْلِيهْ وْهَزُّو بِينْ يْدِيهْ وْقَالْ: «مَا تْخَافُوشْ رَاهُو مَازَالْ حَيْ.»

¹¹وِمْبَاعِدْ طْلَعْ بُولُسْ لِلعْلِي وِقْسِمْ الخُبْزْ وِكْلَى مْعَ المُؤْمْنِينْ وِبْقَى يَحْكِي حَتَّى لِينْ طْلَعْ النْهَارْ وْسَافِرْ.

¹²وْرَوّْحُوا بِالوْلِدْ حَيْ وِالنَّاسْ كَانُوا مِتْشَجّْعِينْ بَرْشَة.

¹³آمَا أَحْنَا سْبِقْنَا بُولُسْ لِلسْفِينَة وِمْشِينَا لْأَسُّوسْ عْلَى البْحَرْ وِسْتَنِّينَاهْ كِيفْ مَا قَالِلْنَا وْحَبْ يْجِينَا مَاشِي عْلَى رِجْلِيهْ.

¹⁴وَقْتِلِّي خْلَطْ عْلِينَا طَلِّعْنَاهْ مْعَانَا فِي السْفِينَة وِمْشِينَا لِمْدِينِةْ مِيتْلِينِي.

¹⁵وْكَمِّلْنَا السْفَرْ وْمِنْ غُدْوَة وْصُلْنَا قُدَّامْ جَزِيرِةْ خِيُوسْ. وْفِي النْهَارْ الثَّالِثْ تْعَدِّينَا قْرِيبْ مِنْ جَزِيرِةْ سَامُوسْ. وِوْصُلْنَا لِمْدِينِةْ مِيلِيتُسْ فِي النْهَارْ الرَّابِعْ.

¹⁶قَرِّرْ بُولُسْ بَاشْ مَا يَهْبِطْشْ فِي أَفَسُسْ عْلَى خَاطْرُو مَا حَبِّشْ يْضَيِّعْ الوَقْتْ فِي مَنْطِقْةْ أَسِيَّة، عْلَى خَاطْرُو حَبْ يُوصِلْ فِيسَعْ لْأُورْشَلِيمْ بَاشْ يَحْضِرْ فِي عِيدْ يُومْ الخَمْسِينْ.

¹⁷وْمِنْ مِيلِيتُسْ بْعَثْ بُولُسْ شْكُونْ يِسْتَدْعَى شْيُوخْ الكَنِيسَة لْأَفَسُسْ

¹⁸وَقْتِلِّي جُوهْ قَالِلْهُمْ: «إِنْتُومَا تَعْرْفُوا كِيفَاشْ كَانِتْ تَصَرُّفَاتِي مْعَاكُمْ طْوَالْ المُدَّة الِّي عَدِّيتْهَا بِينَاتْكُمْ مِالنْهَارْ الأُوِّلْ الِّي دْخَلْتْ فِيهْ لْجِيهِةْ أَسِيَّة.

¹⁹كُنْتْ نِخْدِمْ فِي الرَّبْ بْكُلْ تَوَاضُعْ وِابَّرْشَة دْمُوعْ. كُنْتْ نْعَانِي فِي بَرْشَة مَشَاكِلْ عَمْلُوهَالِي اليْهُودْ الِّي كَانُوا يِتْآمْرُوا عْلِيَّ.

²⁰مَا قَصِّرْتِشْ فِي حَتَّى حَاجَة فِيهَا فَايْدَة لِيكُمْ. كُنْتْ نْخَبِّرْ فِيكُمْ وِنْعَلِّمْ فِيكُمْ فِي الحَاجَاتْ الِّي تْفِيدْكُمْ قُدَّامْ النَّاسْ وْزَادَا فِي دْيَارْكُمْ.

²¹كُنْتْ انَّبَّهْ فِي اليْهُودْ وِاليُونَانِيِّينْ بَاشْ يْتُوبُوا لْرَبِّي وْيِمّْنُوا بِالرَّبْ يَسُوعْ.

²²وْآنَا تَوَّا بَاشْ نْطِيعْ الرُّوحْ القُدُسْ وْنِمْشِي لْأُورْشَلِيمْ وْمَا نَعْرِفْشْ شْنُوَّة الِّي يِسْتَنَّى فِيَّ.

²³آمَا رَاهُو فِي كُلْ مْدِينَة نِمْشِيلْهَا الرُّوحْ القُدُسْ كَانْ يْقُلِّي الِّي الحَبْسْ وِالمَشَاكِلْ يِسْتَنَّاوْ فِيَّ.

²⁴وْآنَا مَا نَعْطِيشْ قِيمَة لِحْيَاتِي مَادَامْنْي قَاعِدْ نَسْعَى بَاشْ نْتَمِّمْ المُهِمَّة مْتَاعِي وِنْكَمِّلْ الخِدْمَة الِّي كَلِّفْنِي بِيهَا الرَّبْ يَسُوعْ، وْنِشْهِدْ بِالإِنْجِيلْ مْتَاعْ نِعْمِةْ اللهْ.

²⁵وْآنَا نَعْرِفْ الِّي إِنْتُومَا مَا عَادِشْ بَاشْ تْشُوفُونِي. وْآنَا كُنْتْ مْعَاكُمْ الكُلْكُمْ وْبَشِّرْتْكُمْ بْمَمْلِكْةْ اللهْ.

²⁶وِاليُومْ نِشْهْدِلْكُمْ بِلِّي آنَا بَرِيءْ مِنْ دَمّْكُمْ.

²⁷عْلَى خَاطِرْنِي قُلْتِلْكُمْ عْلَى الشَّيْء الِّي يْحِبُّو رَبِّي الكُلُّو.

²⁸رُدُّوا بَالْكُمْ عْلَى رْوَاحْكُمْ وِعْلَى النَّاسْ الِّي الرُّوحْ القُدُسْ حَطّْكُمْ مَسْؤُولِينْ عْلِيهُمْ بَاشْ تَرْعَاوْ كَنِيسِةْ اللهْ الِّي خْذَاهَا بْدَمْ ابْنُو.

²⁹وْآنَا نَعْرِفْ الِّي بَعْدْ مَا نْسَافِرْ بَاشْ يُدْخْلُوا بِينَاتْكُمْ ذْيُوبَة مِتْوَحّْشِينْ وْمَا يَرْحْمُوشْ الغْنَمْ.

³⁰وْزِيدْ عْلَى هَاذَا بَاشْ يُخْرْجُوا مِنْ بِينَاتْكُمْ إِنْتُومَا نَاسْ يْعَلّْمُوا فِي حَاجَاتْ مْعَوْجَة وْبِشْ يْخَلُّوا التْلاَمْذَة يْتَبّْعُوهُمْ

³¹هَاذَاكَا عْلاَشْ يِلْزِمْكُمْ تْرُدُّوا بَالْكُمْ، وِتْذَكّرُوا كِيفَاشْ قْعَدْتْ ثْلاَثَة سْنِينْ لِيلْ مْعَ نْهَارْ انَّبَّهْ فِيكُمْ بِالوَاحِدْ وْآنَا نِبْكِي بِالدْمُوعْ.

³²وْآنَا تَوَّا نْسَلِّمْكُمْ للهْ وِلْكِلْمِةْ نِعْمْتُو الِّي هِيَ قَادْرَة بَاشْ تِبْنِيكُمْ وْتَعْطِيكُمْ مِيرَاثْ تِتْشَارْكُوا فِيهْ مْعَ القِدِّيسِينْ مْتَاعْ اللهْ الكُلْهُمْ.

³³عُمْرِي مَا شْتْهِيتْ الفِضَّة وْلاَ الذْهَبْ وْلاَ اللِّبْسَة مْتَاعْ وَاحِدْ مِنْكُمْ.

³⁴وْإِنْتُومَا تَعْرْفُوا الِّي آنَا خْدِمْتْ بِيْدَيَّ هَاذُمْ بَاشْ نُصْرُفْ عْلَى رُوحِي وِعْلَى النَّاسْ الِّي مْعَايَا.

³⁵وْوَرِّيتْكُمْ كِيفَاشْ يِلْزِمْنَا نِتْعْبُوا بَاشْ نْعَاوْنُوا المِحْتَاجِينْ، ونِتْذَكّْرُوا كْلاَمْ الرَّبْ يَسُوعْ وَقْتِلِّي قَالْ: "الِّي يَعْطِي مُبَارَكْ أَكْثِرْ مِلِّي يَاخُذْ."»

³⁶وْبَعْدْ مَا قَالْ الكْلاَمْ هَاذَا هْبَطْ عْلَى رْكَايْبُو مْعَاهُمْ الكُلْ وْصَلَّى.

³⁷وِبْكَاوْ النَّاسْ الكُلْهُمْ وْعَنّْقُوا بُولُسْ وْبَاسُوهْ.

³⁸وْحِزْنُوا بَرْشَة عْلَى خَاطْرُو قَالِلْهُمْ: «مَا عَادِشْ بَاشْ تْشُوفُونِي مَرَّة أُخْرَى.» وْشَيّْعُوهْ لِلسْفِينَة وْوَدّْعُوهْ.