Read Tunisian Arabic New Testament أَعْمَالْ 21 Bible Online

أَعْمَالْ 21 - Tunisian Arabic New Testament bible

أَعْمَالْ 21

¹وْبَعْدْ مَا تْفَارِقْنَا سَافِرْنَا، فِي البْحَرْ وِمْشِينَا لْجِيهِةْ كُوسْ، وْمِنْ غُدْوَة وْصُلْنَا لْجَزِيِرةْ رُودُسْ وْمِنْ غَادِي مْشِينَا لْبُرْطْ بَاتْرَا.

²وِلْقِينَا سْفِينَة مَاشْيَة لْفِينِيقْيَة، رْكِبْنَا فِيهَا وْسَافِرْنَا.

³وْظُهْرْتِلْنَا جَزِيرِةْ قُبْرُصْ، خَلِّينَاهَا عْلَى يْسَارْنَا وْكَمِّلْنَا السْفَرْ مَاشِينْ لْجِيهِةْ سُورْيَة. وْصُلْنَا لْبُرْطْ مْدِينِةْ صُورْ وِهْبَطْنَا فِيهْ بَاشْ السْفِينَة تْهَبِّطْ السِّلْعَة الِّي فِيهَا.

⁴لَوِّجْنَا عْلَى التْلاَمْذَة، وِقْعَدْنَا عِنْدْهُمْ سَبْعَة أَيَّامْ وِالرُّوحْ القُدُسْ خَلاَّهُمْ يْقُولُوا لْبُولُسْ الِّي مَا يِلْزْمُوشْ يِمْشِي لْأُورْشَلِيمْ.

⁵وَقْتِلِّي وْفَاتْ مُدِّةْ قْعَادْنَا عِنْدْهُمْ، خْرَجْنَا بَاشْ نْكَمّْلُوا السْفَرْ مْتَاعْنَا وِمْشَاوْ مْعَانَا هُومَا وِنْسَاهُمْ وِوْلاَدْهُمْ حَتَّى لِينْ خْرَجْنَا البَرَّة مِنْ المْدِينَة بَاشْ يْوَدّْعُونَا، وْكِقْرُبْنَا مِالشَّطْ هْبَطْنَا عْلَى رْكَايِبْنَا وِطْلَبْنَا رَبِّي.

⁶مِنْ بَعْدْ سَلِّمْنْا عْلِيهُمْ وِرْكِبْنَا فِي السْفِينَة، وْهُومَا رَجْعُوا لِدْيَارْهُمْ.

⁷وْكَمِّلْنَا السْفَرْ عْلَى البْحَرْ مِنْ صُورْ لِبْتُولِمَايِسْ، سَلِّمْنَا عْلَى الإِخْوَة المُوجُودِينْ الغَادِي وْعَدِّينَا مْعَاهُمْ نْهَارْ وَاحِدْ.

⁸وْمِنْ غُدْوَة مْشِينَا لِمْدِينِةْ قَيْصَرِيَّة وِمْشِينَا ضْيُوفْ لْدَارْ وَاحِدْ مُبَشِّرْ إِسْمُو فِيلِبُّسْ وْهُوَ وَاحِدْ مِالسَّبْعَة رْجَالْ الِّي خْتَارُوهُمْ فِي أُورْشَلِيمْ.

⁹وْعِنْدُو أَرْبْعَة بْنَاتْ صْبَايَا كَانُوا يِتْنَبّْأُوا.

¹⁰وِقْعَدْنَا عَنْدُو أَيَّامَاتْ، وَقْتِلِّي أَحْنَا الغَادِي جَانَا نَبِي إِسْمُو أَغَابُوسْ مِنْ جِيهِةْ اليَهُودِيَّة.

¹¹خْذَا حْزَامْ بُولُسْ وِرْبَطْ بِيهْ يْدِيهْ وْسَاقِيهْ وْقَالْ: «الرُّوحْ القُدُسْ يْقُولْ الِّي مُولَى الحْزَامْ هَاذَا بَاشْ يَرْبْطُوهْ اليْهُودْ كِيمَا هَكَّا فِي أُورْشَلِيمْ وِيْسَلّْمُوهْ لِلنَّاسْ الِّي مَا هُمْشْ يْهُودْ.»

¹²وَقْتِلِّي سْمَعْنَا الكْلاَمْ هَاذَا، أَحْنَا صْحَابْ بُولُسْ وِالنَّاسْ الِّي مِنْ غَادِي وَلِّينَا الكُلْنَا نِتْشَحّْتُوا فِي بُولُسْ بَاشْ مَا يِمْشِيشْ لْأُورْشَلِيمْ

¹³آمَا بُولُسْ قَلْنَا: «عْلاَشْ تِبْكِيوْ وِتْوَجّْعُولِي فِي قَلْبِي؟ آنَا مُوشْ مُسْتْعَدْ بَرْكْ بَاشْ يْكَتّْفُونِي فِي أُورْشَلِيمْ، رَانِي مُسْتْعَدْ حَتَّى بَاشْ نْمُوتْ عْلَى خَاطِرْ اسْمْ الرَّبْ يَسُوعْ.»

¹⁴وَقْتِلِّي مَا نَجِّمْنَاشْ نَقْنْعُوهْ سْكِتْنَا وْقُلْنَا: «خَلِّي مَشيئَة رَبّي هِي اللِّي تْتِمْ.»

¹⁵وْبَعْدْ أَيَّامَاتْ حَضِّرْنَا رْوَاحْنَا لِلسْفَرْ وِمْشِينَا لْأُورْشَلِيمْ

¹⁶وِمْشَاوْ مْعَانَا تْلاَمْذَة مِنْ قَيْصَرِيَّة وْهَزُّونَا لْدَارْ وَاحِدْ مِنْ قُبْرُصْ إِسْمُو مَنَاسُونْ وِلِّي هُوَ تِلْمِيذْ قْدِيمْ بَاشْ نُقْعْدُوا عَنْدُو.

¹⁷وَقْتِلِّي وْصُلْنَا لْأُورْشَلِيمْ رَحّْبُوا بِينَا الإِخْوَة وْهُومَا فَرْحَانِينْ

¹⁸وْمِنْ غُدْوَة مْشَى مْعَانَا بُولُسْ لْدَارْ يَعْقُوبْ، وْكَانُوا شْيُوخْ الكَنِيسَة الكُلْهُمْ عَنْدُو فِي دَارُو.

¹⁹سَلِّمْ عْلِيهُمْ بُولُسْ وِبْدَا يَحْكِيلْهُمْ بِالتَّفْصِيلْ عْلَى الحَاجَاتْ الِّي رَبِّي عْمَلْهُمْ عْلَى طْرِيقْ خِدْمْتُو لِلنَّاسْ الِّي مَا هُمْشْ يْهُودْ.

²⁰وَقْتِلِّي سَمْعُوا أَخْبَارُو حِمْدُوا رَبِّي وْقَالُوا: «إِنْتِ تَعْرِفْ يَا خُونَا بُولُسْ الِّي ثَمَّة آلاَفْ مِاليْهُودْ امّْنُوا بِالرَّبْ وْهُومَا تَوَّا مِتْحَمّْسِينْ بَرْشَة لِلشَّرِيعَة.

²¹وْسَمْعُوا الِّي إِنْتِ تْعَلِّمْ فِي اليْهُودْ الِّي يُسْكْنُوا مْعَ الأَجَانِبْ بَاشْ مَا عَادِشْ يْتَبّْعُوا مُوسَى وِتْوَصِّي فِيهُمْ بَاشْ مَا يْطَهّْرُوشْ وْلاَدْهُمْ وْمَا يْتَبّْعُوشْ عْوَايِدْهُمْ.

²²شْنُوَّة بَاشْ نَعْمْلُوا تَوَّا؟ أَكِيدْ رَاهُمْ بَاشْ يِسْمْعُوا الِّي إِنْتِ جِيتْ.

²³أَعْمِلْ الشَّيْء الِّي بَاشْ نْقُولُولِكْ عْلِيهْ. عِنْدْنَا أَرْبْعَة رْجَالْ وَاعْدِينْ وِعْدَة.

²⁴هِزّْهُمْ لِلهَيْكِلْ وْأَعْمِلْ مْعَاهُمْ الحَاجَاتْ الِّي لاَزْمَة فِي العَادَة مْتَاعْ التَّطْهِيرْ وْأَعْطِيهُمْ فْلُوسْ بَاشْ يْحَجّْمُوا شْعُورَاتْهُمْ وْهَكَّا النَّاسْ الكُلْ بَاشْ يَعْرْفُوا الِّي الشَّيْء الِّي سَمْعُوهْ عْلِيكْ مُوشْ صْحِيحْ وِلِّي إِنْتِ قَاعِدْ تْحَافِظْ عْلَى الشَّرِيعَة كِيفْهُمْ

²⁵وِالمُؤْمْنِينْ الِّي مَا هُمْشْ يْهُودْ بْعَثْنَالْهُمْ جْوَابْ وْوَصِّينَاهُمْ بَاشْ مَا يَاكْلُوشْ مِالضْحِيَّاتْ المَذْبُوحَة لِلصْنَبْ وِالدَّمْ وِلْحَمْ الحَيَوَانَاتْ المَخْنُوقَة وْيِبْعْدُوا عْلَى الزْنَى.»

²⁶وْهَاذَا الِّي صَارْ، مِنْ غُدْوَة هَزْ بُولُسْ الأَرْبْعَة رْجَالْ وْبَعْدْ مَا عْمَلْ هُوَ زَادَا الحَاجَاتْ الِّي لاَزْمَة فِي العْوَايِدْ مْتَاعْ التَّطْهِيرْ، دْخَلْ لِلهَيْكِلْ بَاشْ يْقيِّدْ النْهَارْ الِّي يُوفَى فِيهْ الأُسْبُوعْ مْتَاعْ التَّطْهِيرْ وْكُلْ وَاحِدْ مِنْهُمْ يْقَدِّمْ القُرْبَانْ المَطْلُوبْ مِنُّو.

²⁷وْكِقْرِيبْ تُوفَي السَّبْعَة أَيَّامْ ثَمَّة جْمَاعَة مِاليْهُودْ مِنْ جِيهِةْ أَسِيَّة شَافُوا بُولُسْ قَاعِدْ فِي الهَيْكِلْ. يَاخِي هَيّْجُوا عْلِيهْ النَّاسْ وْشَدُّوهْ.

²⁸وْهُومَا يْصِيحُوا: «عَاوْنُونَا يَا بَنِي إِسْرَائِيلْ، هَاذَا هُوَ الرَّاجِلْ الِّي يِدْعِي فِي النَّاسْ فِي كُلْ بُقْعَة لْتَعْلِيمْ ضِدْ شَعْبْنَا وْشَرِيعِتْنَا وْضِدْ البْلاَصَة هَاذِي زَادَا، وْزَادْ دَخِّلْ اليُونَانِيِّينْ لِلهَيْكِلْ وْنَجِّسْ البْلاَصَة المُقَدّْسَة هَاذِي.»

²⁹عْلَى خَاطِرْهُمْ شَافُوا تُرُوفِيمُسْ الِّي مِنْ أَفَسُسْ مْعَ بُولُسْ فِي المْدِينَة يَاخِي مْشَى فِي بَالْهُمْ الِّي هُوَ دَخّْلُو مْعَاهْ لِلهَيْكِلْ.

³⁰وَقْتْهَا امَّالِي المْدِينَة الكُلْهُمْ هَاجُوا وْجَرُّوا بُولُسْ لْبَرَّة مِالهَيْكِلْ وْفِي الوَقْتْ هَاذَاكَا البِيبَانْ تْسَكّْرِتْ.

³¹وَقْتِلِّي حَاوْلُوا بَاشْ يُقْتْلُوهْ وْصُلْ الخْبَرْ لْقَايِدْ العَسْكِرْ الِّي أُورْشَلِيمْ الكُلْهَا خَايْضَة.

³²وْبِالوَقْتْ هَزْ مْعَاهْ العَسْكِرْ وِالقَادَة مْتَاعْ المِئَاتْ وْجَا فِيسَعْ، وْكِي اليْهُودْ شَافُوا العَسْكِرْ وِالقَايِدْ مْتَاعْهُمْ جَايِينْ بَطّْلُوا مَا عَادِشْ يَضْرْبُوا فِي بُولُسْ.

³³قْرُبْ القَايِدْ وْشَدْ بُولُسْ وِأْمَرْ العَسْكِرْ مْتَاعُو بَاشْ يَرْبْطُوهْ بْزُوزْ سْلاَسِلْ وِبْدَا يِسْإِلْ: شْكُونُو هَاذَا وْآشْ عْمَلْ؟

³⁴يَاخِي بْدَاوْا جْمَاعَة مِنْهُمْ يْصِيحُوا وِيْقُولُوا فِي شَيْء وِجْمَاعَة أُخْرِينْ يْقُولُوا فِي شَيْء آخَرْ. وْكِمَا نَجِّمْشْ يَعْرِفْ شْنُوَّة الِّي وْقَعْ بِالضَّبْطْ بِسْبَبْ الهِيجَة مْتَاعْ النَّاسْ أْمَرْ بَاشْ يْهِزُّوا بُولُسْ لِلقَازَرْنَة.

³⁵وَقْتِلِّي وُصْلُوا بِيهْ لِلدْرُوجْ مْتَاعْ القَازَرْنَة تْلَزُّوا العَسْكِرْ بَاشْ يْهِزُّوهْ الفُوقْ وِيْبَعّْدُوهْ عْلَى النَّاسْ بَاشْ مَا يَضْرْبُوهِشْ.

³⁶عْلَى خَاطِرْهُمْ كَانُوا يْتَبّْعُوا فِيهْ وْكَانُوا يْصِيحُوا: «أُقْتْلُوهْ!»

³⁷وِقْبَلْ مَا يُدْخُلْ بُولُسْ لِلقَازَرْنَة قَالْ لِلقَايِدْ بِاللُّغَة اليُونَانِيَّة: «انَّجِّمْشِي نْقُلِّكْ حَاجَة؟» قَالْ القَايِدْ: «تِتْكَلِّمْ بِاليُونَانِيَّة؟

³⁸إِمَّالاَ إِنْتِ مَاكِشْ هَاكَا المَصْرِي الِّي عْمَلْ ثَوْرَة فِي المْدِينَة المُدَّة الِّي فَاتِتْ وْخَرِّجْ مْعَاهْ أَرْبْعَة آلاَفْ مِنْ قَتَّالِينْ الأَرْوَاحْ لِلصَّحْرَاء وْحَطْ رُوحُو قَايِدْ عْلِيهُمْ؟»

³⁹قَالْ بُولُسْ: «آنَا يْهُودِي مِنْ طَرْسُوسْ المْدِينَة المَشْهُورَة الِّي فِي جِيهِةْ كِيلِيكِيَّة وْنُطْلُبْ مِنِّكْ بَاشْ تْخَلِّينِي نْكَلِّمْ الشَّعْبْ.»

⁴⁰آذِنْلُو القَايِدْ، ووْقُفْ بُولُسْ فُوقْ الدْرُوجْ وْشَارْ بِيدُو لِلشَّعْبْ، وْكِسِكْتُوا بْدَا يْكَلِّمْ فِيهُمْ بِاللُّغَة العِبْرِيَّة وْقَالْ: