Read Tunisian Arabic New Testament أَعْمَالْ 22 Bible Online

أَعْمَالْ 22 - Tunisian Arabic New Testament bible

أَعْمَالْ 22

¹«يَا الإِخْوَة وْيَا الآبَاءْ اسْمْعُونِي، آنَا بَاشْ نْدَافِعْ عْلَى رُوحِي قُدَّامْكُمْ.»

²وكِسَمْعُوهْ يْكَلِّمْ فِيهُمْ بِاللُّغَة العِبْرِيَّة زَادُو سِكْتُوا، وْهُو قَالْ:

³«آنَا يْهُودِي تُولِدْتْ فِي طَرْسُوسْ المُوجُودَة فِي كِيلِيكِيَّة آمَا تْرَبِّيتْ فِي المْدِينَة هَاذِي وْكُنْتْ تِلْمِيذْ عِنْدْ غَمَالاَئِيلْ وِتْعَلِّمْتْ كِيفَاشْ نْطِيعْ الشَّرِيعَة مْتَاعْ جْدُودْنَا بِالضَّبْطْ وْكُنْتْ مِتْحَمِّسْ لْخِدْمِةْ اللهْ كِيفْكُمْ إِنْتُومَا بِالضَّبْطْ.

⁴وْإِضْطَهِدْتْ النَّاسْ الِّي يْتَبّْعُوا فِي التَّعْلِيمْ هَاذَا لْحَدْ المُوتْ، وْكُنْتْ نْشِدْ فِيهُمْ رْجَالْ وِنْسَاء وْحَطِّيتْهُمْ فِي الحَبْسْ.

⁵وْزَادَا كْبِيرْ الكُهَّانْ وِالمَجْلِسْ مْتَاعْ الشْيُوخْ يِشْهْدُوا الِّي كْلاَمِي هَاذَا صْحِيحْ، وْآنَا خْذِيتْ مِنْ عِنْدْهُمْ جْوَابَاتْ وْهَزِّيتْهُمْ لِخْوَاتْهُمْ فِي دِمَشْقْ بَاشْ يْعَاوْنُونِي عْلَى شَدَّانْهُمْ بَاشْ انَّجِّمْ نْرَجَّعْهُمْ لْأُورْشَلِيمْ وِيِتْعَاقْبُوا.»

⁶«وْوَقْتِلِّي قْرِيبْ نُوصِلْ لْدِمَشْقْ مْعَ نُصْفْ النْهَارْ ضْوَى عْلَيَّ نُورْ عْظِيمْ مِالسْمَاءْ.

⁷يَاخِي طُحْتْ عْلَى الأَرْضْ وِسْمِعْتْ صُوتْ يْقُلِّي: "شَاوُلْ! شَاوُلْ! عْلاَشْ تِضْطَهِدْ فِيَّ؟"

⁸جَاوِبْتْ: "شْكُونْ إِنْتِ يَا سِيدِي؟" قَالْ: "آنَا يَسُوعْ النَّاصْرِي الِّي إِنْتِ تِضْطَهِدْ فِيهْ."

⁹وِالنَّاسْ الِّي مْعَايَ شَافُوا النُّورْ آمَا مَا سَمْعُوشْ الصُّوتْ الِّي يْكَلِّمْ فِيَّ.

¹⁰وِسْأَلْتْ: "شْنُوَّة نَعْمِلْ يَا رَبْ؟" جَاوِبْنِي الرَّبْ وْقَالْ: "قُومْ وْأُدْخُلْ لْدِمَشْقْ، وْغَادِي يْقُولُولِكْ شْنُوَّة يِلْزْمِكْ تَعْمِلْ."

¹¹وْهَزُّونِي النَّاسْ الِّي مْعَايَ مِنْ يْدَيَّا حَتَّى لِينْ وَصّْلُونِي لْدِمَشْقْ عْلَى خَاطِرْنِي مَا عَادِشْ نْشُوفْ مِنْ كَثْرِةْ مَا النُّورْ مَاهُو قْوِي.

¹²وْكَانْ ثَمَّة رَاجِلْ فِي دِمَشْقْ إِسْمُو حَنَانِيَّا يْخَافْ رَبِّي وْعَايِشْ كِيفْ مَا تْقُولْ الشَّرِيعَة، وِاليْهُودْ الِّي فِي دِمَشْقْ الكُلْهُمْ يِشْهْدُولُو الِّي هُوَ بَاهِي.

¹³جَانِي وِوْقُفْ بْجَنْبِي وْقَالْ: "يَا خُويَا شَاوُلْ، شُوفْ." يَاخِي رْجَعْتْ نْشُوفْ بِالوَقْتْ، وْرِيتُو قُدَّامِي.

¹⁴وْقَالْ: "إِلاَهْ جْدُودْنَا خْتَارِكْ مِنْ قْبَلْ بَاشْ تَعْرِفْ إِرَادْتُو وِتْشُوفْ الخَادِمْ البَارْ مْتَاعُو وْتِسْمَعْ صُوتْ خَارِجْ مِنْ فُمُّو.

¹⁵إِنْتِ بَاشْ تْكُونْ شَاهِدْ لِيهْ قُدَّامْ النَّاسْ الكُلْ بِلِّي سْمَعْتْ وْرِيتْ.

¹⁶وْتَوَّا فَاشْ تِسْتَنَّى قُومْ تْعَمِّدْ وْطَهِّرْ رُوحِكْ مِالذْنُوبْ وِادْعِي بْإِسْمْ الرَّبْ."»

¹⁷«وْبَعْدْ مَا وْقَعْ الشَّيْء هَاذَا، رْجَعْتْ لْأُورْشَلِيمْ، وْكِكُنْتْ نْصَلِّي فِي الهَيْكِلْ شُفْتْ رُؤْيَا.

¹⁸وْشُفْتْ الرَّبْ وْقَالِّي: "ازْرِبْ وْأُخْرُجْ تَوَّا مِنْ أُورْشَلِيمْ عْلَى خَاطِرْ نَاسْهَا مَا يِقْبْلُوشْ بَاشْ تِشْهِدْلِي فِيهَا."

¹⁹يَاخِي قُلْتْ: "يَا رَبْ رَاهُمْ يَعْرْفُوا الِّي آنَا كُنْتْ نْلَوِّجْ عَلِّي يِمّْنُوا بِيكْ فِي المَجَامِعْ الكُلْهَا بَاشْ نَضْرِبْهُمْ وِنْحُطّْهُمْ فِي الحَبْسْ.

²⁰وْآنَا كُنْتْ مُوجُودْ وَقْتِلِّي قِتْلُوا شَهِيدِكْ اسْتِفَانُوسْ، آنَا كُنْتْ مْوَافِقْ عْلَى قَتْلاَنُو وْكُنْتْ نْعِسْ عْلَى حْوَايِجْ النَّاسْ الِّي قَتْلُوهْ"

²¹آمَا هُوَ قَالِّي: "إِمْشِي بَاشْ نَبْعْثِكْ بْعِيدْ لِلنَّاسْ الِّي مَا هُمْشْ يْهُودْ."»

²²وْقَعْدُوا النَّاسْ يِسْمْعُوا فِيهْ حَتَّى لِينْ وْصُلْ للكِلْمَة هَاذِي، يَاخِي صَاحُوا وْقَالُوا لْقَايِدْ العَسْكِرْ: «إِمْحِي الرَّاجِلْ هَاذَا مِالأَرْضْ عْلَى خَاطْرُو مَا يِسْتْحَقِّشْ بَاشْ يْعِيشْ.»

²³مِنْ بَعْدْ بْدَاوْا يْصِيحُوا وْيَرْمِيوْ فِي حْوَايِجْهُمْ وِيْذَرُّوا فِي التْرَابْ فِي الهْوَاء.

²⁴يَاخِي أْمَرْ قَايِدْ العَسْكِرْ بَاشْ يْدَخّْلُوا بُولُسْ لِلقَازَرْنَة وْيِسْتَجْوْبُوهْ وْيَضْرْبُوهْ بِالسُّوطْ بَاشْ يَعْرِفْ شْنُوَّة الشّيْء الِّي خَلَّى النَّاسْ يْهِيجُوا عْلِيهْ.

²⁵وْوَقْتِلِّي العَسْكِرْ كَتّْفُوا بُولُسْ بَاشْ يَضْرْبُوهْ بِالسُّوطْ، قَالْ لْقَايِدْ العَسْكِرْ الِّي كَانْ وَاقِفْ بْجَنْبُو: «يَاخِي القَانُونْ يِسْمْحِلْكُمْ بَاشْ تَضْرْبُوا مُوَاطِنْ رُومَانِي بِالسُّوطْ قْبَلْ مَا تُحْكْمُوا عْلِيهْ؟»

²⁶وْكِسْمَعْ قَايِدْ العَسْكِرْ الكْلاَمْ هَاذَا مْشَى لِلقَايِدْ الكْبِيرْ مْتَاعُو وْخَبّْرُو بِالشَّيْء هَاذَا وْقَالْ: «شْنُوَّة بَاشْ تَعْمِلْ تَوَّا؟ رَاهُو الرَّاجِلْ هَاذَا رُومَانِي.»

²⁷وِمْشَى القَايِدْ الكْبِيرْ بِيدُو وْسِأْلُو: «بِالحَقْ إِنْتِ مُوَاطِنْ رُومَانِي؟» جَاوْبُو: «إِي نْعَمْ.»

²⁸قَالْ القَايِدْ: «آنَا دْفَعْتْ بَرْشَة فْلُوسْ بَاشْ وَلِّيتْ مُوَاطِنْ رُومَانِي.» قَالْ بُولُسْ: «آنَا رُومَانِي مِلِّي تُولِدْتْ.»

²⁹وْبِالوَقْتْ بَعِّدْ عْلِيهْ العَسْكِرْ الِّي كَانُوا يِسْتَجْوْبُوا فِيهْ وْيَضْرْبُوا فِيهْ وِالقَايِدْ الكْبِيرْ خَافْ بَرْشَة عْلَى خَاطْرُو عْرَفْ الِّي هُوَ كَتِّفْ مُوَاطِنْ رُومَانِي.

³⁰وْمِنْ غُدْوَة حَبْ القَايِدْ يَعْرِفْ حْقِيقِةْ التُّهْمَة الِّي تِهْمُوهْ بِيهَا اليْهُودْ، وْنَحَّالُو السْلاَسِلْ وِأْمَرْ بَاشْ يِسْتَدْعَاوْ رُؤَسَاءْ الكُهَّانْ ومَجْلِسْ الشْيُوخْ وِاسْتَدْعَى بُولُسْ زَادَا وْوَقّْفُو قُدَّامْهُمْ.