Read Tunisian Arabic New Testament أَعْمَالْ 23 Bible Online

أَعْمَالْ 23 - Tunisian Arabic New Testament bible

أَعْمَالْ 23

¹خْزَرْ بُولُسْ لِلمَجْلِسْ مْتَاعْ اليْهُودْ وْقَالْ: «يَا إِخْوَة آنَا عِشْتْ بْضَمِيرْ صَالِحْ قُدَّامْ اللهْ حَتَّى لْتَوَّا.»

²لَكِنْ حَنَانِيَّا كُبِيرْ الكُهَّانْ أْمَرْ وَاحِدْ مِالوَاقْفِينْ مْعَاهْ بَاشْ يَضْرِبْ بُولُسْ عْلَى فُمُّو.

³قَالْ بُولُسْ: «يَضْرْبِكْ رَبِّي يَلِّي إِنْتِ كِيفْ الحِيطْ المَدْهُونْ بِالأَبْيِضْ! إِنْتِ قَاعِدْ غَادِي بَاشْ تُحْكُمْ عْلِيَّ كِيفْ مَا تْقُولْ الشَّرِيعَة، وْمِنْ بَعْدْ تْخَالِفْ الشَّرِيعَة وْتُأْمُرْ بَاشْ يَضْرْبُونِي؟»

⁴قَالُولُو النَّاسْ الوَاقْفِينْ بْجَنْبُو: «يَاخِي تْسِبْ فِي كْبِيرْ الكُهَّانْ مْتَاعْ اللهْ؟»

⁵جَاوِبْ بُولُسْ وْقَالْ: «يَا إِخْوَة مَا كُنْتِشْ نَعْرِفْ الِّي هُوَ كْبِيرْ الكُهَّانْ وْمَكْتُوبْ فِي الكْتَابْ: "مَا تْسَبِّشْ رَئِيسْ شَعْبِكْ."»

⁶وْبُولُسْ كَانْ يَعْرِفْ الِّي ثَمَّة جْمَاعَة مِنْ أَعْضَاءْ المَجْلِسْ مْتَاعْ اليْهُودْ صَدُّوقِيِّينْ وِالجْمَاعَة الأُخْرِينْ فَرِّيسِيِّينْ هَاذَاكَا عْلاَشْ صَاحْ وْقَالْ: «يَا إِخْوَة آنَا فِرِّيسِي وْبَابَا فِرِّيسِي وْآنَا قَاعْدِينْ يُحْكْمُوا عْلِيَّ تَوَّا عْلَى خَاطِرْنِي عِنْدِي أَمَلْ فِي القْيَامَة مْتَاعْ المُوتَى.»

⁷وْدُوبْ مَا قَالْ الكْلاَمْ هَاذَا بْدَاوْا الفَرِّيسِيِّينْ وِالصَّدُّوقِيِّينْ يِتْعَارْكُوا وِالنَّاسْ تْقِسْمُوا عْلَى ثْنِينْ.

⁸عْلَى خَاطِرْ الصَّدُّوقِيِّينْ مَا يِمّْنُوشْ بِالقْيَامَة مْتَاعْ المُوتَى وِالمْلاَيْكَة وِالأَرْوَاحْ، آمَا الفَرِّيسِيِّينْ يِمّْنُوا بِيهُمْ الكُلْ.

⁹وِبْدَاوْا يْصِيحُوا، يَاخِي وُقْفُوا جْمَاعَة مِالكُتَّابْ مْتَاعْ اليْهُودْ الفَرِّيسِيِّينْ وِبْدَاوْا يْنَاقْشُوا بْقُوَّة وْقَالُوا: «الرَّاجِلْ هَاذَا مَا عَنْدُو حَتَّى ذَنْبْ، بَالِكْشْ كَلّْمُو رُوحْ وِلاَّ مَلاَكْ؟»

¹⁰وْزَادْ كْبِرْ المُشْكُلْ. وْخَافْ قَايِدْ العَسْكِرْ لاَ يُقْتْلُوا بُولُسْ وِأْمَرْ العَسْكِرْ بَاشْ يَهْبْطُوا وِيْهِزُّوا بُولُسْ مِنْ بِينَاتْهُمْ وِيْرَجّْعُوهْ لِلقَازَرْنَة.

¹¹وْغُدْوَة فِي اللِّيلْ ظْهُرْ الرَّبْ لْبُولُسْ وْقَالُّو: «اتْشَجَّعْ! كِيمَا شْهِدْتْلِي فِي أُورْشَلِيمْ، لاَزِمْ تِشْهِدْلِي فِي رُومَا زَادَا.»

¹²وَقْتِلِّي طْلَعْ النْهَارْ تْفَاهْمُوا اليْهُودْ بَاشْ يُقْتْلُوا بُولُسْ، وْعَاهْدُوا رَبِّي بَاشْ مَا يَاكْلُوا وْمَا يُشْرْبُوا حَتَّى شَيْء حَتَّى لِينْ يُقْتْلُوهْ.

¹³وِلِّي تْعَاهْدُوا كَانُوا أَكْثِرْ مِنْ أَرْبْعِينْ وَاحِدْ.

¹⁴وِمْشَاوْ لْرُؤَسَاءْ الكُهَّانْ وِالشْيُوخْ وْقَالُوا: «تِحْرِمْ عْلِينَا المَاكْلَة وِالشْرَابْ حَتَّى لِينْ نُقْتْلُوا بُولُسْ.

¹⁵إِنْتُومَا بْصِيفِتْكُمْ أَعْضَاءْ المَجْلِسْ مْتَاعْ اليْهُودْ اطْلْبُوا مِنْ قَايِدْ العَسْكِرْ بَاشْ يْجِيبْ بُولُسْ، بْحُجِّةْ الِّي إِنْتُومَا بَاشْ تُحْكْمُوا عْلِيهْ مِنْ جْدِيدْ وْإِحْنَا مُسْتْعَدِّينْ بَاشْ نُقْتْلُوهْ قْبَلْ مَا يُوصِلْ لِلمَجْلِسْ.»

¹⁶آمَا وِلْدْ أُخْتْ بُولُسْ سْمَعْهُمْ وْهُومَا يِتْفَاهْمُوا عْلِيهْ وِمْشَالُو لِلقَازَرْنَة وْخَبّْرُوا بْكُلْ شَيْء.

¹⁷سْتَدْعَى بُولُسْ وَاحِدْ مِنْ القَادَة مْتَاعْ العَسْكِرْ وِطْلَبْ مِنُّو بَاشْ يْهِزْ وِلْدْ أُخْتُو لِلقَايِدْ الكْبِيرْ بَاشْ يْقُلُّو عْلَى خْبَرْ مُهِمْ.

¹⁸وْهَزُّو لِلقَايِدْ وْقَالْ: «رَاهُو بُولُسْ عَيِّطْلِي وِطْلَبْ مِنِّي بَاشْ نْجِيبْلِكْ الوْلِدْ هَاذَا عْلَى خَاطِرْ عَنْدُو خْبَرْ مُهِمْ يْحِبْ يْقُولْهُولِكْ.»

¹⁹شَدُّو مِنْ يِدُّو وْبَعّْدُو عْلَى النَّاسْ وْسِأْلُو: «شْنُوَّة الخْبَرْ المُهِمْ الِّي تْحِبْ تْقُولْهُولِي؟»

²⁰وْهُو قَالُّو: «اليْهُودْ تْفَاهْمُوا بَاشْ يُطْلْبُوا مِنِّكْ بَاشْ غُدْوَة تْجِيبْ بُولُسْ لِلمَجْلِسْ مْتَاعْ اليْهُودْ وْيِحْسْبُوا رْوَاحْهُمْ الِّي هُومَا بَاشْ يْثَبّْتُوا فِي مُشْكُلْتُو.

²¹مَا تْوَافِقْشْ عْلَى الشَّيْء الِّي بَاشْ يُطْلْبُوهْ مِنِّكْ، رَاهُو ثَمَّة أَكْثِرْ مِنْ أَرْبْعِينْ رَاجِلْ حَرّْمُوا عْلَى رْوَاحْهُمْ المَاكْلَة وِالشْرَابْ وْقَرَرُوا بَاشْ يُقْتْلُوهْ، وْهُومَا تَوَّا مْحَضّْرِينْ رْوَاحْهُمْ، وْقَاعْدِينْ يِسْتَنَّاوْ فِيكْ بَاشْ تْوَافِقْ عْلَى الشَّيْء الِّي بَاشْ يُطْلْبُوهْ مِنِّكْ.»

²²خَرِّجْ القَايِدْ الوْلَدْ بَعْدْ مَا قَالُّو: «مَا تْقُولْ لْحَتَّى حَدْ عْلَى الشَّيْء الِّي عْلِمْتْنِي بِيهْ.»

²³وْعَيِّطْ لْزُوزْ مِالقَادَة مْتَاعُو وِأْمَرْهُمْ وْقَالْ: «حَضّْرُوا مِيتِينْ عَسْكْرِي بَاشْ يِمْشِيوْ اليُومْ فِي التِّسْعَة مْتَاعْ اللِّيلْ لِمْدِينِةْ قَيْصَرِيَّة وِمْعَاهُمْ سَبْعِينْ فَارِسْ وْمِيتِينْ جُنْدِي هَازِّينْ الأَرْمَاحْ.

²⁴وِحْصُنَّة بَاشْ تْهِزُّوا بُولُسْ وِتْوَصّْلُوهْ سَالِمْ لِلوَالِي فِيلِكْسْ.»

²⁵وِكْتِبْ جْوَابْ لِلوَالِي وْقَالُّو فِيهْ:

²⁶«السَّلاَمْ مِنْ كْلُودْيُوسْ لِيسْيَاسْ للسَّيِّدْ الوَالِي فِيلِكْسْ.

²⁷الرَّاجِلْ هَاذَا شَدُّوهْ اليْهُودْ وْحَبُّوا يُقْتْلُوهْ وْكِعْرَفْتْ الِّي هُوَ مُوَاطِنْ رُومَانِي، هَزِّيتْ العَسْكِرْ وِمْشِيتْلُو وْمَنَّعْتُو.

²⁸وْحَبِّيتْ نَعْرِفْ التُّهْمَة الِّي تَاهْمِينُو بِيهَا، يَاخِي هَزِّيتُو لِلمَجْلِسْ مْتَاعْ اليْهُودْ.

²⁹وِعْرَفْتْ الِّي التُّهْمَة الِّي تَاهْمِينُو بِيهَا تْخُصْ الشَّرِيعَة مْتَاعْهُمْ وْمَا لْقِيتْ عْلِيهْ حَتَّى ذَنْبْ يِسْتْحَقْ عْلِيهْ المُوتْ وِلاَّ حَتَّى الحَبْسْ.

³⁰وْكِسْمَعْتْ الِّي جْمَاعَة مِاليْهُودْ تْفَاهْمُوا بَاشْ يُقْتْلُوهْ بْعَثْتْهُولِكْ فِيسَعْ وِأْمَرْتْ النَّاسْ الِّي شَاكِينْ بِيهْ بَاشْ يْجِيوْكْ إِنْتِ وْيِشْكِيوْلِكْ.»

³¹وْهَكَّا العَسْكِرْ هَزُّوا بُولُسْ فِي اللِّيلْ لِمْدِينِةْ أَنْتِيبَاتْرِيسْ كِيمَا طْلَبْ مِنْهُمْ القَايِدْ مْتَاعْهُمْ.

³²وْفِي الصْبَاحْ رَجْعُوا لِلقَازَرْنَة وْخَلَّاوْ الفُرْسَانْ يِمْشِيوْ مْعَ بُولُسْ

³³وْدَخْلُوا لْقَيْصَرِيَّة وِعْطَاوْ الجْوَابْ لِلوَالِي وْزَادَا سَلْمُولُو بُولُسْ.

³⁴قْرَى الوَالِي الجْوَابْ وِسْإِلْ بُولُسْ عْلَى البْلاَدْ الِّي جَايْ مِنْهَا؟ وْكِعْرَفْ الِّي هُوَ مِنْ كِيلِيكِيَّة.

³⁵قَالُّو: «بَاشْ نِسْمَعْ كْلاَمِكْ وَقْتِلِّي يَحْضْرُوا النَّاسْ الِّي شَاكِينْ بِيكْ.» وْحَطْ بُولُسْ فِي قْصَرْ هِيرُودُسْ وْحَطْ جُنُودْ يْعِسُّوا عْلِيهْ.