Read Tunisian Arabic New Testament أَعْمَالْ 25 Bible Online

أَعْمَالْ 25 - Tunisian Arabic New Testament bible

أَعْمَالْ 25

¹ثْلاَثَة أَيَّامْ بَعْدْ مَا وَلَّى فَسْتُوسْ وَالِي، مْشَى مِنْ مْدِينِةْ قَيْصَرِيَّة لْأُورْشَلِيمْ.

²وْجَاوْهْ رُؤَسَاءْ الكُهَّانْ وْأَعْيَانْ اليْهُودْ وْقَدّْمُوا وِشْكَاوْ بْبُولُسْ وْأَكّْدُوا عْلِيهْ

³بَاشْ يِكْرِمْهُمْ وِيْرَجَّعْ بُولُسْ لْأُورْشَلِيمْ، وْعَمْلُولُو حِيلَة بَاشْ يُقْتْلُوهْ فِي الثْنِيَّة.

⁴جَاوِبْهُمْ فَسْتُوسْ بِلِّي بُولُسْ بَاشْ يَبْقَى مَحْطُوطْ فِي الحَبْسْ فِي قَيْصَرِيَّة وِلِّي هُوَ بَاشْ يِمْشِي الغَادِي عْلَى قْرِيبْ.

⁵وْقَالْ: «خَلِّي يِمْشِيوْ مْعَايَا المَسْؤُولِينْ مْتَاعْكُمْ وْإِذَا كَانْ الرَّاجِلْ هَاذَا عَامِلْ أَيْ حَاجَة غَالْطَة مَا عْلِيكُمْ كَانْ تِتْهْمُوهْ قُدَّامِي.»

⁶وْعَدَّى فَسْتُوسْ ثْمَنْيَة وِلاَّ عَشْرَة أَيَّامْ فِي أُورْشَلِيمْ وْمِنْ بَعْدْ رْجَعْ لِمْدِينِةْ قَيْصَرِيَّة وْمِنْ الغُدْوَة قْعَدْ فِي المَحْكْمَة، وِأْمَرْ بَاشْ يْجِيبُوا بُولُسْ.

⁷وْكِجَا بُولُسْ دَارُوا بِيهْ اليْهُودْ الِّي جَاوْ مِنْ أُورْشَلِيمْ وتِهْمُوهْ بْبَرْشَة حَاجَاتْ خْطِيرَة آمَا مَا كَانِشْ عِنْدْهُمْ دَلِيلْ.

⁸وْدَافِعْ بُولُسْ عْلَى رُوحُو وْقَالْ: «آنَا مَا عْمَلْتْ حَتَّى ذَنْبْ ضِدْ الشَّرِيعَة مْتَاعْ اليْهُودْ وِلاَّ الهَيْكِلْ وِلاَّ القَيْصِرْ.»

⁹وِبْرَغْمْ الشَّيْء هَاذَا فَسْتُوسْ حَبْ يْرَضِّي اليْهُودْ، وِسْإِلْ بُولُسْ: «تْحِبِّشْ تِمْشِي لْأُورْشَلِيمْ وْيِتْحْكَمْ عْلِيكْ فِيهَا قُدَّامِي عْلَى التُّهَمْ هَاذُمْ؟»

¹⁰جَاوِبْ بُولُسْ: «آنَا مُوجُودْ فِي المَحْكْمَة مْتَاعْ القَيْصَرْ وْيِلْزِمْ يِتْحْكَمْ عْلِيَّ فِيهَا. مَا عْمَلْتْ حَتَّى حَاجَة غَالْطَة فِي حَقْ اليْهُودْ وْإِنْتِ تَعْرِفْ الشَّيْء هَاذَا بِالقْدَا.

¹¹كَانْ جِيتْ عْمَلْتْ حَاجَة غَالْطَة نِسْتْحَقْ عْلِيهَا بَاشْ تِعْدْمُونِي تَالِي رَانِي مَا نُهْرُبْشْ مِالمُوتْ، آمَا إِذَا كَانْ التُّهَمْ مْتَاعْ النَّاسْ هَاذُومَا مَا هِيشْ صْحِيحَة، حَتَّى حَدْ مَا عَنْدُو الحَقْ بَاشْ يْسَلِّمْنِي لِيهُمْ بَاشْ يُحْكْمُوا عْلِيَّ وْآنَا نُطْلُبْ بَاشْ تَبْعْثُونِي لِلقَيْصَرْ.»

¹²بَعْدْهَا تْنَاقِشْ فَسْتُوسْ مْعَ المَجْلِسْ مْتَاعُو وْقَالْ لْبُولُسْ: «عْلَى خَاطْرِكْ طْلَبْتْ بَاشْ نَبْعْثُوكْ لِلقَيْصَرْ إِمَّالاَ بَاشْ تِمْشِي لِلقَيْصَرْ.»

¹³وْبَعْدْ أَيَّامَاتْ جَا المَلِكْ أَغْرِيبَاسْ وْأُخْتُو بَرْنِيكِي لِمْدِينِةْ قَيْصَرِيَّة بَاشْ يْسَلْمُوا عْلَى فَسْتُوسْ.

¹⁴بَعْدْ مَا قَعْدُوا أَيَّامَاتْ، حْكَى فَسْتُوسْ لِلمَلِكْ عْلَى القَضِيَّة مْتَاعْ بُولُسْ وْقَالْ: «عِنْدْنَا رَاجِلْ خَلاَّهْ فِيلِكْسْ فِي الحَبْسْ.

¹⁵وَقْتِلِّي مْشِيتْ لْأُورْشَلِيمْ شْكَاوْ بِيهْ رُؤَسَاءْ الكُهَّانْ وِالشْيُوخْ مْتَاعْ اليْهُودْ وْطَلْبُوا مِنِّي بَاشْ نُحْكُمْ عْلِيهْ.

¹⁶وْقُلْتُلْهُمْ الِّي مُوشْ مِنْ عَادِةْ الرُّومَانْ بَاشْ يُحْكْمُوا عْلَى وَاحِدْ قْبَلْ مَا يِتْقَابِلْ مْعَ النَّاسْ الِّي شَاكِينْ بِيهْ بَاشْ تْكُونْ عَنْدُو الفُرْصَة بَاشْ يْدَافِعْ عْلَى رُوحُو.

¹⁷وْوَقْتِلِّي جاوْ هْنَا مَا ضَيَّعْتِشْ الوَقْتْ وْمِنْ غُدْوَة عْمَلْتْ جَلْسَة في المَحْكْمَة وِأْمَرْتْ بَاشْ يْجِيبُوا المُتَّهَمْ.

¹⁸وْوَقْتِلِّي حَضْرُوا النَّاسْ الِّي شَاكِينْ بِيهْ مَا قَالُوا حَتَّى شَيْء مِالحَاجَاتْ الخَايْبَة الِّي مْشَى فِي بَالِي الِّي هُومَا بَاشْ يِتْهْمُوهْ بِيهَا.

¹⁹آمَا نَاقْشُوهْ فِي حَاجَاتْ تْخُصْ الدِّينْ مْتَاعْهُمْ وِعْلَى رَاجِلْ إِسْمُو يَسُوعْ مَاتْ وْبُولُسْ يْقُولْ الِّي هُوَ حَيْ.

²⁰يَاخِي حِرْتْ، وِسْإِلْتْ بُولُسْ إِذَا كَانْ هُوَ يْحِبْ يِمْشِي لْأُورْشَلِيمْ بَاشْ يِتْحْكَمْ عْلِيهْ الغَادِي.

²¹آمَا بُولُسْ طْلَبْ بَاشْ القَضِيَّة مْتَاعُو تِتْرْفَعْ لِلقَيْصَرْ بَاشْ هُوَ الِّي يُحْكُمْ عْلِيهْ وَلِّيتْ أْمَرْتْ بَاشْ يِتْحَطْ تَحْتْ العَسَّة حَتَّى لِينْ نَبْعْثُو لِلقَيْصَرْ.»

²²يَاخِي قَالْ أَغْرِيبَاسْ لْفَسْتُوسْ: «نْحِبْ نِسْمَعْ كْلاَمْ الرَّاجِلْ هَاذَا.» جَاوْبُو: «غُدْوَة تِسْمْعُو.»

²³وِالغُدْوَة جَا المَلِكْ أَغْرِيبَاسْ وْأُخْتُو بَرْنِيكِي، وِسْتَقْبْلُوهُمْ إِسْتِقْبَالْ كْبِيرْ وْدُخْلُوا لِلقَاعَة مْتَاعْ الإِجْتِمَاعَاتْ وِمْعَاهُمْ القَادَة الكْبَارْ مْتَاعْ العَسْكِرْ وْأَعْيَانْ المْدِينَة. وِأْمَرْ فَسْتُوسْ بَاشْ يْجِيبُوا بُولُسْ.

²⁴وْكِجَابُوهْ قَالْ فَسْتُوسْ: «يَا المَلِكْ أَغْرِيبَاسْ وْيَا الحَاضْرِينْ هْنَا الكُلْكُمْ الرَّاجِلْ هَاذَا الِّي قُدَّامْكُمْ شْكَاوْ بِيهْ شَعْبْ اليْهُودْ الكُلْ الِّي فِي أُورْشَلِيمْ وِلِّي سَاكْنِينْ هْنَا وْهُومَا يْصِيحُوا: "مَا يِسْتْحَقِّشْ يْعِيشْ."

²⁵وِفْهِمْتْ الِّي هُوَ مَا عْمَلْ حَتَّى شَيْء يِسْتْحَقْ عْلِيهْ بَاشْ نِعْدْمُوهْ. آمَا هُوَ طْلَبْ بَاشْ يُحْكُمْ عْلِيهْ حَضْرِةْ القَيْصِرْ وْآنَا قَرِرْتْ بَاشْ نَبْعْثُو لِيهْ.

²⁶آمَا مَا عِنْدِيشْ حَتَّى شَيْء وَاضِحْ بَاشْ نِكْتْبُو لِلقَيْصَرْ. هَاذَاكَا عْلاَشْ آنَا جِبْتُو قُدَّامْكُمْ الكُلْ وْبِالأَخَصْ قُدَّامِكْ إِنْتِ يَا المَلِكْ أَغْرِيبَاسْ، بَاشْ بَعْدْ التَّحْقِيقْ مْعَاهْ نَلْقَى شْنُوَّة بَاشْ نِكْتِبْ.

²⁷رَاهُو مُوشْ مَعْقُولْ بَاشْ نَبْعِثْ وَاحِدْ مَحْبُوسْ لِلقَيْصَرْ مِنْ غِيرْ مَا نِكْتِبْ شْنُوَّة التُّهَمْ مْتَاعُو بِالضَّبْطْ.»