Read Tunisian Arabic New Testament أَعْمَالْ 26 Bible Online

أَعْمَالْ 26 - Tunisian Arabic New Testament bible

أَعْمَالْ 26

¹وْقَالْ أَغْرِيبَاسْ لْبُولُسْ: «أَحْنَا نِسْمْحُولِكْ بَاشْ ادَّافِعْ عْلَى رُوحِكْ.» يَاخِي شَارْ بُولُسْ بْيِدُّو وِبْدَا يْدَافِعْ وْقَالْ:

²«يَا المَلِكْ أَغْرِيبَاسْ آنَا فَرْحَانْ الِّي نْدَافِعْ عْلَى رُوحِي فِي حَضْرْتِكْ وِنْرُدْ عْلَى التُّهَمْ الِّي تِهْمُونِي بِيهَا اليْهُودْ.

³وْبِالأَخَصْ الِّي إِنْتِ تَعْرِفْ بِالقْدَا العِبَادَاتْ مْتَاعْهُمْ وْنِقَاشَاتْهُمْ وْآنَا نُطْلُبْ مِنِّكْ بَاشْ تِسْمَعْنِي وِتْوَسِّعْ بَالِكْ مْعَايَا.

⁴اليْهُودْ الكُلْ يَعْرْفُوا سِيرْتِي مِالأُوِّلْ وْآنَا عِشْتْ فِي وُسْطْ شَعْبِي مِلِّي كُنْتْ صْغِيرْ فِي أُورْشَلِيمْ.

⁵وْمَادَامْهُمْ يَعْرْفُونِي مِالأُوِّلْ، لُوكَانْ حَبُّوا رَاهُمْ شِهْدُوا الِّي آنَا فَرِّيسِي تَابِعْ لأَكْثِرْ فِرْقَة مِتْشَدَدَة وِصْعِيبَة فِي الدِّينْ مْتَاعْنَا.

⁶وْآنَا اليُومْ قَاعِدْ يِتْحْكَمْ عْلِيَّ عْلَى خَاطِرْنِي عِنْدِي رجَاءْ فِي الْوَعْدْ الِّي اللّهْ وْعِدْ بِيهْ جْدُودْنَا.

⁷وِالعْرُوشَاتْ الأَثْنَاشْ مْتَاعْ شَعْبْنَا مَازَالُوا يْدَاوْمُوا عْلَى العِبَادَة لِيلْ مْعَ نْهَارْ وْعِنْدْهُمْ رَجَاءْ انُّو الوَعْدْ هَاذَا بَاشْ يْتِمْ وْبِسْبَبْ الرَّجَاءْ هَاذَا، يَا سِيدْنَا المَلِكْ، اليْهُودْ قَاعْدِينْ يِتْهْمُوا فِيَّ.

⁸عْلاَشْ مَا تْصَدّْقُوشْ الِّي اللهْ يْقَوِّمْ المُوتَي؟

⁹آنَا كَانْ مَاشِي فِي بَالِي الِّي يِلْزِمْنِي نَعْمِلْ الِّي نِقْدِرْ عْلِيهْ بَاشْ نْقَاوِمْ إِسْمْ يَسُوعْ النَّاصْرِي.

¹⁰وِعْمَلْتْ الشَّيْء هَاذَا فِي أُورْشَلِيمْ وْحَطِّيتْ بَرْشَة مُؤْمْنِينْ فِي الحَبْسْ بَعْدْ مَا خْذِيتْ الإِذْنْ مِنْ عِنْدْ رُؤَسَاءْ الكُهَّانْ، وْكُنْتْ دِيمَا مْوَافِقْ وَقْتِلِّي المَجْلِسْ يُحْكُمْ عْلِيهُمْ بِالإِعْدَامْ.

¹¹وْعَذِّبْتْهُمْ بَرْشَة فِي المَجَامِعْ وِجْبَرْتْهُمْ بَاشْ يَكْفْرُوا، وُوْصُلْتْ نَحْقِدْ عْلِيهُمْ لْدَرْجِةْ انِّي وَلِّيتْ نْتَبِّعْ فِيهُمْ فِي المُدُنْ الِّي البَرَّا مِالبْلاَدْ.»

¹²«وِمْشِيتْ لِمْدِينِةْ دِمَشْقْ بَعْدْ مَا خْذِيتْ الإِذْنْ مِنْ عِنْدْ رُؤَسَاءْ الكُهَّانْ.

¹³وْآنَا فِي الطْرِيقْ مْعَ وَقْتْ الظُّهْرْ، يَا سِيدْنَا المَلِكْ، شُفْتْ نُورْ مِالسْمَاء، أَقْوَى مِنْ نُورْ الشَّمْسْ، ضْوَى عْلِيَّ وْعَلِّي مْعَايَا.

¹⁴طُحْنَا الكُلْنَا عْلَى الأَرْضْ وِسْمَعْتْ صُوتْ يْنَادِيلِي بِاللُّغَة العِبْرِيَّة وْقَالْ: "شَاوُلْ! شَاوُلْ! عْلاَشْ تِضْطَهِدْ فِيَّ؟ صْعِيبْ عْلِيكْ بَاشْ تِمْشِي فُوقْ الْأَبَارِي!"

¹⁵وِسْإِلْتْ: "شْكُونْ إِنْتِ يَا سِيدِي؟" يَاخِي جَاوِبْنِي الرَّبْ: "آنَا يَسُوعْ الِّي إِنْتِ قَاعِدْ تِضْطَهِدْ فِيهْ.

¹⁶قُومْ آقِفْ عْلَى رِجْلِيكْ، آنَا ظْهُرْتْلِكْ بَاشْ نْرُدِّكْ خَادِمْ لِيَّ وْشَاهِدْ بِالرُّؤْيَا الِّي تْشُوفْ فِيَّ بِيهَا تَوَّا وْبِالرُّؤْيَاتْ الِّي بَاشْ تْشُوفْنِي فِيهُمْ مِنْ بَعْدْ.

¹⁷وْبِشْ انَّجِّيكْ مِنْ شَعْبِكْ وْمِالأُمَمْ الِّي بَاشْ نَبْعْثِكْ لِيهُمْ تَوَّا.

¹⁸وْبِشْ تْحِلِّلْهُمْ عِينِيهُمْ وْيَرْجْعُوا مِالظْلاَمْ لِلنُّورْ، وْمِنْ حُكْمْ الشِّيطَانْ لْحُكْمْ اللهْ وِذْنُوبْهُمْ تِتْغْفِرْ ويَاخْذُوا نْصِيبْ بِينْ الِّي تْقَدّْسُوا كِإِمّْنُوا بِيَّ."»

¹⁹«وْمِنْ الوَقْتْ هَاذَاكَا، يَا سِيدْنَا المَلِكْ أَغْرِيبَاسْ، الرُّؤْيَا الِّي مِالسْمَاءْ هَاذِيكَا مَا تْعَاوْدِتْشْ مَرَّة أُخْرَى.

²⁰فِي الأُوِّلْ بَشِّرْتْ أَهْلْ دِمَشْقْ وْمِنْ بَعْدْ أَهْلْ أُورْشَلِيمْ وْجِيهِةْ اليَهُودِيَّة الكُلْ وِالشْعُوبْ الأُخْرِينْ الكُلْهُمْ وِدْعِيتْهُمْ بَاشْ يْتُوبُوا وْيَرْجْعُوا للهْ وْيَعْمْلُوا أَعْمَالْ تْوَرِّي الِّي هُومَا تَابُوا.

²¹وْبِسْبَبْ التَّبْشِيرْ شَدُّونِي اليْهُودْ فِي الهَيْكِلْ وْحَبُّوا يُقْتْلُونِي.

²²آمَا اللهْ حْفَظْنِي حَتَّى لِليُومْ هَاذَا، وِبْعَوْنْ اللهْ نَاقِفْ قُدَّامْ الصْغِيرْ وِالكْبِيرْ وْنِشْهِدْلُو وْمَا نْخَالِفْشْ الشَّيْء الِّي تْنَبَّأْ بِيهْ مُوسَى وِالأَنْبِيَاءْ.

²³الِّي المَسِيحْ بَاشْ يِتْأَلِّمْ وِيْكُونْ أَوِّلْ وَاحِدْ يْقُومْ مِنْ بِينْ المُوتَي. وِيْبَشِّرْ شَعْبْنَا وِالشْعُوبْ الأُخْرَى بِالنُّورْ.»

²⁴وَقْتِلِّي وْصُلْ بُولُسْ فِي كْلاَمُو لِلحَاجَة هَاذِي قَصْ عْلِيهْ فَسْتُوسْ وْقَالْ بْصُوتْ عَالِي: «إِنْتِ هْبِلْتْ يَا بُولُسْ! كَثْرِةْ العِلْمْ الِّي عِنْدِكْ هَبّْلِتِّكْ!»

²⁵قَالْ بُولُسْ: «مَانِيشْ مَهْبُولْ يَا حَضْرِتْ الحَاكِمْ فَسْتُوسْ. آنَا نْقُولْ فِي كْلاَمْ الحَقْ وِالصْوَابْ.

²⁶وِالمَلِكْ الِّي آنَا نْكَلِّمْ فِيهْ تَوَّا، بْصَرَاحَة يَعْرِفْ الحَاجَاتْ هَاذُمْ الِّي آنَا قَاعِدْ نْقُولْ فِيهُمْ، وْآنَا مِتْأَكِّدْ الِّي مَا يِتْخَبَّى عْلِيهْ حَتَّى شَيْء عْلَى خَاطِرْهُمْ مَا تْعَمْلُوشْ فِي الظْلاَمْ.

²⁷يَا سِيدْنَا المَلِكْ أَغْرِيبَاسْ، إِنْتِ تْصَدِّقْ كْلاَمْ الأَنْبِيَاءْ؟ آنَا نَعْرِفْ الِّي إِنْتِ تْصَدّْقُو.»

²⁸جَاوِبْ أَغْرِيبَاسْ بُولُسْ: «شْوَيَّة آخَرْ تَقْنِعْنِي وِتْرُدّْنِي مَسِيحِي؟»

²⁹قَالْ بُولُسْ: «شْوَيَّة وِلاَّ بَرْشَة آنَا رَانِي نْصَلِّي للهْ عْلَى خَاطْرِكْ إِنْتِ وِالحَاضْرِينْ هْنَا الكُلْهُمْ، بَاشْ تْوَلِّيوْا كِيفِي، آمَا مِنْ غِيرْ مَا تِتْرُبْطُوا بِالسْلاَسِلْ.»

³⁰وْبَعْدْ هَاذَا قَامْ المَلِكْ وِالحَاكِمْ وْبَرْنِيكِي وِالحَاضْرِينْ.

³¹وْخَرْجُوا مِالقَاعَة وْهُومَا يْقُولُوا: «الرَّاجِلْ هَاذَا مَا عْمَلْشْ حَاجَة يِسْتْحَقْ عْلِيهَا المُوتْ وِلاَّ الحَبْسْ.»

³²وْقَالْ أَغْرِيبَاسْ لْفَسْتُوسْ: «لُوكَانْ مَا سْتَأْنِفْشْ شْكَايْتُو لِلقَيْصَرْ تَالِي رَاكْ نَجِّمْتْ تْسَيّْبُو.»