Read Tunisian Arabic New Testament أَعْمَالْ 27 Bible Online

أَعْمَالْ 27 - Tunisian Arabic New Testament bible

أَعْمَالْ 27

¹وْفِي الإِخِّرْ تْقَرَّرْ بَاشْ نْسَافْرُوا لْإِيطَالْيَا عْلَى البْحَرْ، وْثَمَّة قَايِدْ مْتَاعْ عَسْكِرْ إِسْمُو يُولْيُوسْ تَابِعْ لْفِرْقِةْ أُوغُسْطُسْ هُوَ الِّي حَطُّوهْ بَاشْ يْعِسْ عْلَى بُولُسْ وِعْلَى مْرَابِيطْ أُخْرِينْ.

²وِرْكِبْنَا فِي سْفِينَة جَايَة مِنْ بُرْطْ أَدْرَامِيتْ ومَاشْيَة لْبُرْطْ فِي جِيهِةْ أَسِيَّة، وِمْشَى مْعَانَا فِي الرِّحْلَة هَاذِي أَرِسْتَرْخُسْ مِنْ مْدِينِةْ تْسَالُونِيكِي الِّي فِي جِيهِةْ مَقْدُونِيَّة.

³وْمِنْ غُدْوَة وْصُلْنَا لِمْدِينِةْ صَيْدَا وْيُولْيُوسْ عْمَلْ البَاهِي مْعَ بُولُسْ وْخَلاَّهْ يْزُورْ صْحَابُو فِي مْدِينِةْ صَيْدَا بَاشْ يَاخُذْ مِنْ عِنْدْهُمْ الشَّيْء الِّي يِحْتَاجُو.

⁴وْسَافِرْنَا مِنْ بُرْطْ صَيْدَا وْجِبْنَا عْلَى الشَّطْ مْتَاعْ قُبْرُصْ عْلَى خَاطِرْ الرِّيحْ كَانِتْ عَاكْسِتْنَا.

⁵وِتْعَدِّينَا فِي البْحَرْ الِّي بِجْنَبْ جِيهِةْ كِيلِيكِيَّة وْبَمْفِيليَّة وِوْصُلْنَا لْبُرْطْ مِيرَا فِي جِيهِةْ لِيكِيَّة.

⁶وِالغَادِي لْقَى القَايِدْ مْتَاعْ العَسْكِرْ سْفِينَة جَايَة مِنْ مْدِينِةْ الإِسْكَنْدَرِيَّة ومَاشْيَة لْإِيطَالْيَا، وِطْلَعْنَا فِيهَا.

⁷وْقَعْدِتْ السْفِينَة تِمْشِي بِالشْوَيَّة لْمُدَّة طْوِيلَة وِقْرُبْنَا مِنْ شَطْ كِنِيدُسْ بِصْعُوبَة كْبِيرَة آمَا الرِّيحْ مَا خَلاَّتْنَاشْ نُدْخْلُوا لِلبُرْطْ، وَلّينَا سَافِرْنَا قْرِيبْ مِنْ شَطْ جَزِيرِةْ كْرِيتْ وِتْعَدِّينَا قْرِيبْ مِنْ رَاسْ سَلْمُونِي.

⁸وْبِصْعُوبَة كْبِيرَة وْصُلْنَا لْبُقْعَة تِتْسَمَّي «المَوانِي الجْمِيلَة» القْرِيبَة مِنْ مْدِينِةْ لَسَائيَّة.

⁹وْعَدِّينَا مُدَّة طْوِيلَة فِي البُقْعَة هَاذِيكَا حَتَّى لِينْ تْعَدَّى الصِّيفْ وْوَلَّي السْفَرْ فِي البْحَرْ مُخْطِرْ وْزَادَا وَقْتْ الصْيَامْ تْعَدَّى، يَاخِي نْصَحْ بُولُسْ البَحَّارَة الِّي فِي السْفِينَة.

¹⁰وْقَالْ: «يَا رْجَالْ آنَا نْرَى الِّي السْفَرْ تَوَّا مُخْطِرْ وْفِيهْ خْسَارَة كْبِيرَة، مُوشْ عْلَى السْفِينَة وِلِّي فِيهَا بَرْكْ، آمَا زَادَا عْلَى حْيَاتْنَا.»

¹¹آمَا القَايِدْ مْتَاعْ العَسْكِرْ سْمَعْ كْلاَمْ رُيَّاسْ السْفِينَة وْمَا سْمَعْشْ كْلاَمْ بُولُسْ.

¹²وِالبُرْطْ مَا كَانِشْ صَالِحْ بَاشْ نْشَتِّيوْ فِيهْ هَاذَاكَا عْلاَشْ قَرِرُوا مُكْثِرْ البَحَّارَة بَاشْ نُخْرْجُوا مِالبُرْطْ مْعَمّْلِينْ بَاشْ يْعَدِّيوْ الشْتَاء فِي بُرْطْ فِينِكْسْ، وْكَانْ البُرْطْ هَاذَا فِي جَزِيرِةْ كْرِيتْ مْقَابِلْ الجَنُوبْ الغَرْبِي وِالشَّمَالْ الْغَرْبِي.

¹³وْهَبِّتْ رِيحْ خْفِيفَة مِالجَنُوبْ، مْشَى فِي بَالْ البَحَّارَة الِّي الرِّيحْ بَاشْ تْهِزّْهُمْ لْبُرْطْ فِينِكْسْ وْطَلّْعُوا المُخْطَافْ مْتَاعْ السْفِينَة وْبَحّْرُوا بِجْنَبْ شَطْ كْرِيتْ.

¹⁴بَعْدْ شْوَيَّة هَبِّتْ رِيحْ قْوِيَّة يْسَمِّيوْهَا الشَّمَاليَّة الشَّرْقِيَّة.

¹⁵وِالرِّيحْ ضَرْبِتْ السْفِينَة بْقُوَّة حَتَّى لِينْ مَا عَادِشْ تْنَجِّمْ تْقَاوِمْهَا يَاخِي سَلِّمْنْا وْخَلِّينَا الرِّيحْ تْهِزّْنَا،

¹⁶لْبُقْعَة قْرِيبَة مِنْ جَزِيرَة صْغِيرَة اسْمْهَا كُودَا، وْبِصْعُوبَة كْبِيرَة نَجِّمْنَا نْطَلّْعُوا فْلُوكِةْ النْجَاةْ فُوقْ السْفِينَة.

¹⁷وِبْسُرْعَة البَحَّارَة عَمْلُوا اللاَّزِمْ وْرُبْطُوا وُسْطْ السْفِينَة بِالحْبَالْ، وْهَبّْطُوا القْلاَعَاتْ وِالحْبَالْ وْخَلَّاوْ السْفِينَة هَازْهَا المُوجْ عْلَى خَاطِرْهُمْ خَافُوا لاَ يُصْدْمُوا فِي الرْمَلْ الِّي قَاعِدْ يِتْحَرِّكْ مِنْ شَطْ سِيرْتِسْ.

¹⁸وْفِي النْهَارْ الثَّانِي قْوَاتْ عْلِينَا الرِّيحْ وِبْدَاوْا يْنَقّْصُوا مِالسِّلْعَة الِّي هَازِّتْهَا السْفِينَة

¹⁹وْفِي النْهَارْ الثَّالِثْ رْمَاوْ مَاعُونْ السْفِينَة فِي البْحَرْ بِيدِيهُمْ.

²⁰وِالعَاصْفَة كَانِتْ تَقْوَى نْهَارْ بَعْدْ نْهَارْ حَتَّى لِينْ وَلِّينَا مَا عَادِشْ نْشُوفُوا لاَ شَمْسْ وْلاَ نْجُومْ لْمُدِّةْ أَيَّامَاتْ وْفِي الإِخِّرْ مَا عَادِشْ عِنْدْنَا حَتَّى أَمَلْ الِّي أَحْنَا بَاشْ نِمْنْعُوا.

²¹وِالمْسَافْرينْ بَطّْلُوا المَاكْلَة لْمُدِّةْ طْوِيلَة، يَاخِي وْقُفْ بُولُسْ فِي وُسْطْهُمْ وْقَالْ: «يَا رْجَالْ كَانْ لاَزِمْ عْلِيكُمْ تِسْمْعُوا كْلاَمِي وْمَا تْسَافْرُوشْ مِنْ كْرِيتْ تَالِي رَاكُمْ مَنَّعْتُوا رْوَاحْكُمْ مِالظُّرُوفْ الصْعِيبَة وْمِالخْسَايِرْ هَاذِي.

²²آمَا تَوَّا نُطْلُبْ مِنْكُمْ بَاشْ تِطْمَانُوا. حَتَّى حَدْ مَاهُو بَاشْ يْمُوتْ. آمَا السْفِينَة بَرْكْ بَاشْ تِتْكَسِّرْ.

²³رَاهُو فِي اللِّيلَة الِّي فَاتِتْ ظْهُرْلِي مَلاَكْ مِنْ عِنْدْ اللهْ الِّي آنَا نِعْبِدْ فِيهْ وِلِّي آنَا زَادَا نِخْدِمْ فِيهْ.

²⁴وْقَالِّي: "مَا تْخَافِشْ يَا بُولُسْ، لاَزِمْ تَاقِفْ قُدَّامْ القَيْصَرْ، وِعْلَى خَاطْرِكْ، اللهْ بَاشْ يْمَنَّعْ المْسَافْرِينْ الِّي مْعَاكْ الكُلْهُمْ."

²⁵إِطْمَانُوا يَا رْجَالْ عْلَى خَاطِرْنِي نِمِّنْ بِالله، وِالشَّيْء الِّي قَالْهُولِي بَاشْ يْصِيرْ.

²⁶آمَا لاَزِمْ السْفِينَة تَاقِفْ فِي جَزِيرَة مِالجُزُرْ.»

²⁷وْفِي نُصْ اللِّيلِةْ رَقْمْ أَرْبَعْطَاشْ كَانِتْ الرِّيحْ هَازِّتْنَا فِي بْحَرْ إِسْمُو أَدْرِيَا وْمَا كُنَّاشْ عَارْفِينْ لْوِينْ مَاشِينْ وِمْشَى فِي بَالْ البَحَّارَة الِّي هُومَا قُرْبُوا مِالبَرْ.

²⁸قَاسُوا غُرْقْ المَاء لْقَاوْهْ أَرْبْعِينْ مِيتْرُو، وْبَعْدْ مُدَّة قَاسُوا مَرَّة أُخْرَى الغُرْقْ لْقَاوْهْ ثْلاَثِينْ مِيتْرُو.

²⁹وْخَافُوا لَلسْفِينَة تُضْرُبْ الحْجَرْ وَلُّوا رْمَاوْ أَرْبْعَة مْخَاطِفْ مِنْ وْرَاهَا وْقَعْدُوا يُطْلْبُوا فِي رَبِّي بَاشْ يَطْلِعْ النْهَارْ.

³⁰وْحَاوْلُوا البَحَّارَة بَاشْ يُهْرْبُوا مِالسْفِينَة، وْهَبّْطُوا فْلُوكِةْ النْجَاةْ وْقَالُوا الِّي هُومَا بَاشْ يَرْمِيوْ المْخَاطِفْ مِالقُدَّامْ.

³¹يَاخِي قَالْ بُولُسْ لِلقَايِدْ مْتَاعْ المْيَا وْلِلعَسْكَرْ: «إِذَا كَانْ هَاذُومَا مَا يَبْقُوشْ فِي السْفِينَة مَا كُمْشْ بَاشْ تِمْنْعُوا.»

³²يَاخِي قَصُّوا العَسْكِرْ الحْبَالْ مْتَاعْ الفْلُوكَة وْخَلاَّوْهَا اطِّيحْ فِي المَاء.

³³وْوَقْتِلِّي قْرِيبْ يَطْلِعْ النْهَارْ طْلَبْ بُولُسْ مِنْ النَّاسْ الكُلْ بَاشْ يَاكْلُوا وْقَالْ: «تْعَدُّوا أَرْبَعْطَاشِنْ يُومْ وْإِنْتُومَا مَا كْلِيتُوا حَتَّى شَيْء.

³⁴وْآنَا نُطْلُبْ مِنْكُمْ بَاشْ تَاكْلُوا عْلَى خَاطِرْ هَاذَا بَاشْ يْعَاوِنْكُمْ بَاشْ تِمْنْعُوا وْحَتَّى وَاحِدْ مِنْكُمْ مَا هُو بَاشْ اطِّيحْ شَعْرَة مِنْ رَاسُو.»

³⁵مِنْ بَعْدْ خْذَا الخُبْزْ وْشْكَرْ اللهْ قُدَّامْ النَّاسْ الكُلْ وْقَسْمُوا وِبْدَا يَاكُلْ.

³⁶يَاخِي الكُلْهُمْ طْمَانُوا وِكْلاَوْ.

³⁷وْكُنَّا مِيتِينْ وْسِتَّة وْسَبْعِينْ وَاحِدْ فِي السْفِينَة.

³⁸وْبَعْدْ مَا شَبْعُوا رْمَاوْ القَمْحْ فِي البْحَرْ بَاشْ يْخَفَفُوا عْلَى السْفِينَة.

³⁹وْكِطْلَعْ النْهَارْ البَحَّارَة مَا عَرْفُوشْ البُقْعَة، آمَا شَافُوا شَطْ وْحَبُّوا يْخَرّْجُولُو السْفِينَة كَانْ نَجّْمُوا.

⁴⁰وْقَصُّوا المْخَاطِفْ وْخَلاَّوْهُمْ يُغْرْقُوا. وْحَلُّوا الحْبَالْ الِّي تُرْبِطْ الدْمَانْ، وْطَلّْعُوا القْلاَعْ القُدَّامِي لِلرِّيحْ وِمْشَاوْ بِيهَا لِلشَّطْ.

⁴¹وْجَاوْ لِبْلاَصَة فِي الشَّطْ فِيهَا بَرْشَة رْمَلْ وْتِرْكِزْ النُّصْ القُدَّامِي مْتَاعْ السْفِينَة فِي الرْمَلْ وْمَا عَادِشْ يِتْحَرِّكْ وِالنُّصْ التَّالاَنِي قَاعِدْ يِتْكَسِّرْ مِنْ قُوِّةْ المُوجْ.

⁴²وِالعَسْكِرْ حَبُّوا يُقْتْلُوا المْرَابِيطْ بَاشْ حَتَّى وَاحِدْ مِنْهُمْ مَا يُهْرُبْ لِلشَّطْ.

⁴³آمَا القَايِدْ مْتَاعْ العَسْكِرْ كَانْ يْحِبْ يْمَنَّعْ بُولُسْ، وْمَا خَلاَّشْ العَسْكِرْ يَعْمْلُوا الِّي فِي بَالْهُمْ وِأْمَرْ الِّي يَعْرْفُوا يْعُومُوا بَاشْ يُخْرْجُوا هُومَا اللْوَالَى لِلبَرْ.

⁴⁴وِالبْقِيَّة يْحَاوْلُوا بَاشْ يُوصْلُوا لِلبَرْ عْلَى اللُّوحْ وِلاَّ عْلَى الطْرُوفْ الِّي بْقَاتْ مِالسْفِينَة وْهَكَّا الكُلْهُمْ وُصْلُوا لِلبَرْ سَالْمِينْ.