Read Tunisian Arabic New Testament أَعْمَالْ 28 Bible Online

أَعْمَالْ 28 - Tunisian Arabic New Testament bible

أَعْمَالْ 28

¹وْبَعْدْ مَا مْنَعْنَا عْرَفْنَا الِّي الشَّطْ الِّي وْصُلْنَالُو هُوَ جَزِيرِةْ مَالْطَة.

²وْأُمَّالِيهَا كَانُوا بَاهِينْ مْعَانَا بَرْشَة، وْفَرْحُوا بِينَا وْشَعّْلُولْنَا النَّارْ عْلَى خَاطِرْ المْطَرْ كَانِتْ قْوِيَّة وِالطَّقْسْ بَارِدْ.

³لَمْ بُولُسْ الحْطَبْ وِرْمَاهْ فِي النَّارْ، وْمِنْ كَثْرِةْ السْخَانَة خَرْجِتْلُو لَفْعَى وْعَضِّتُّو مِنْ يِدُّو.

⁴وْشَافُوا أَهْلْ مَالْطَة اللَّفْعَى لاَصْقَة فِي يِدُّو وْقَالُوا: «الرَّاجِلْ هَاذَا مَا يْكُونْ كَانْ قَاتِلْ رُوحْ وِالعَدْلْ مَا خَلاَّهِشْ يْعِيشْ حَتَّى بَعْدْ مَا مْنَعْ مِالبْحَرْ.»

⁵آمَا بُولُسْ رْمَى اللَّفْعَى فِي النَّارْ مِنْ غِيرْ مَا تَعْمِلُّو حَتَّى شَيْء.

⁶وْقَعْدُوا يِسْتَنَّاوْ فِيهْ بَاشْ يِتْنْفَخْ وِلاَّ يْطِيحْ يْمُوتْ. آمَا بَعْدْ مَا سْتَنَّاوْ وَقْتْ طْوِيلْ مِنْ غِيرْ مَا جْرَالُو حَتَّى شَيْء بَدّْلُوا رَايْهُمْ وْقَالُوا: «هَاذَا إِلاَهْ.»

⁷وِقْريبْ مِنْ البُقْعَة هَاذِيكَا كَانِتْ ثَمَّة سْوَانِي تَابْعَة لْبُوبْلْيُوسْ الوَالِي الِّي يُحْكُمْ فِي الجَزِيرَة، سْتَدْعَانَا وِفْرَحْ بِينَا لْمُدِّةْ ثْلاَثَة أَيَّامْ.

⁸وْكَانْ بُوبْلْيُوسْ رَاقِدْ فِي الفَرْشْ مْرِيضْ بِالسْخَانَة وْعِنْدُو جَرْيَانْ الجُّوفْ قْوِي، مْشَالُو بُولُسْ وْصَلَّى مِنْ أَجْلُو وْحَطْ عْلِيهْ ايدُو وْتِشْفَى.

⁹وَقْتْهَا جَاوْ المُرْضَى الِّي فِي الجَزِيرَة لْبُولُسْ وْهُوَ شْفَاهُمْ.

¹⁰وِعْطَاوْنَا بَرْشَة هْدَايَا وْكِجِينَا بَاشْ نْسَافْرُوا زَادُوا عْطَاوْنَا الِّي نِحْتَاجُوهْ الكُلْ وْإِحْنَا مْسَافْرِينْ.

¹¹وْبَعْدْ ثْلاَثَة شْهُرْ سَافِرْنَا فِي سْفِينَة جَايَة مِالإِسْكَنْدَرِيَّة فِيهَا العَلاَمَة مْتَاعْ «الزُّوزْ آلْهَة التْوَامَا»، بَعْدْ مَا عَدِّتْ الشْتَاء فِي مَالْطَة.

¹²وْكِوْصُلْنَا لِمْدِينِةْ سَرقُسْطة عَدِّينَا فِيهَا ثْلاَثَة أَيَّامْ.

¹³مِنْ بَعْدْ سَافِرْنَا وِوْصُلْنَا لِمْدِينِةْ رِيغِيُونْ وْبَعْدْهَا بِنْهَارْ هَبِّتْ رِيحْ مِالجَنُوبْ وْفِي النْهَارْ الثَّانِي وْصُلْنَا لِمْدِينِةْ بُوطْيُولِي.

¹⁴وِلْقِينَا جْمَاعَة مِالإِخْوَة وْطَلْبُوا مِنَّا بَاشْ نُقْعْدُوا مْعَاهُمْ سَبْعَة أَيَّامْ، وْبَعْدْهَا وْصُلْنَا لْرُومَا.

¹⁵وَقْتِلِّي سَمْعُوا الإِخْوَة الِّي أَحْنَا وْصُلْنَا خَرْجُوا وِاسْتَقْبْلُونَا فِي سُوقْ أَبِيُّوسْ وِالثْلاَثَة وْكَالاَتْ. وْكِشَافْهُمْ بُولُسْ شْكَرْ اللهْ وتْشَجَّعْ.

¹⁶وْكِدْخَلْنَا لْرُومَا القَايِدْ سْمَحْ لْبُولُسْ بَاشْ يُسْكُنْ وَحْدُو فِي دَارْ وِمْعَاهْ العَسْكْري الِّي يْعِسْ عْلِيهْ

¹⁷وْبَعْدْ ثْلاَثَة أَيَّامْ اسْتَدْعَى بُولُسْ الشْيُوخْ مْتَاعْ اليْهُودْ وْقَالِلْهُمْ: «يَا إِخْوَة رَاهُمْ اليْهُودْ كَتّْفُونِي فِي أُورْشَلِيمْ وْسَلّْمُونِي لِلرُّومَانْ رَغْمِلِّي آنَا مَاعْمَلْتْ حَتَّى شَيْء خَايِبْ لِلشَّعْبْ وِلاَّ حَتَّى لِعْوَايِدْ جْدُودْنَا.

¹⁸إِسْتَجْوْبُونِي وْحَبُّوا يْسَيّْبُونِي عْلَى خَاطِرْ مَا ثَمَّة حَتَّى سْبَبْ بَاشْ يِعْدْمُونِي.

¹⁹آمَا اليْهُودْ جَاوْ ضِدِّي وِتْلَزِّيتْ بَاشْ نَرْفَعْ القَضِيَّة مْتَاعِي لِلقَيْصَرْ وْهَاذَا مَا يِعْنِيشْ الِّي آنَا قَاعِدْ نِتْهِمْ فِي شَعْبِي.

²⁰هَاذَاكَا عْلاَشْ آنَا حَبِّيتْ نْشُوفْكُمْ وْنِحْكِي مْعَاكُمْ وْآنَا مَرْبُوطْ بالسِّلْسْلَة هَاذِي عْلَى خَاطِرْ الرّجَاءْ مْتَاعْ إِسْرَائِيلْ.»

²¹يَاخِي قَالُوا: «لاَ جَانَا فِيكْ جْوَابْ مِاليَهُودِيَّة وْلاَ جَانَا وَاحِدْ مِنْ عِنْدْ الإِخْوَة وْقَلْنَا عْلِيكْ حَاجَاتْ خَايْبَة.

²²آمَا هَاذِي فُرْصَة بَاشْ نِسْمْعُوا رَايِكْ، عْلَى خَاطِرْنَا نَعْرْفُوا الِّي النَّاسْ فِي كُلْ بُقْعَة جَايِينْ ضِدْ التَّعْلِيمْ هَاذَا.»

²³وِتْفَاهْمُوا عْلَى نْهَارْ بَاشْ يِتْقَابْلُوا فِيهْ، وْجَاوْ لْدَارْ بُولُسْ وِمْعَاهُمْ بَرْشَة نَاسْ، وِبْقَى مِالصْبَاحْ لِلعْشِيَّة وْهُوَ يِشْهِدْ لْمَمْلِكْةْ اللهْ قُدَّامْهُمْ وِيْفَسّْرِلْهُمْ فِيهَا وْيَقْنِعْ فِيهُمْ بْيَسُوعْ مِالشَّرِيعَة مْتَاعْ مُوسَى وِالأَنْبِيَاءْ.

²⁴ثَمَّة شْكُونْ فِيهُمْ الِّي تِقْنَعْ بِكْلاَمُو وْثَمَّة شْكُونْ الِّي مَا امِّنْشْ،

²⁵وْمَا تْفَاهْمُوشْ مَا بِينَاتْ بْعَضْهُمْ وِمْشَاوْ بَعْدْ مَا قَالِلْهُمْ بُولُسْ: «صْدَقْ الرُّوحْ القُدُسْ وَقْتِلِّي قَالْ لِجْدُودْكُمْ عْلَى لْسَانْ النَّبِي إِشَعْيَاءْ:

²⁶إِمْشِي لِلشَّعْبْ هَاذَا وْقُلُّو: السَّمْعَانْ بَاشْ تِسْمْعُوا آمَا مَا كُمْشْ بَاشْ تِفْهْمُوا والخَزْرَانْ بَاشْ تُخْزْرُوا آمَا مَا كُمْشْ بَاشْ تْشُوفُوا

²⁷رَاهُمْ الشَّعْبْ هَاذَا كَسّْحُوا قْلُوبْهُمْ وْوَلاَّوْ صْعِيبْ بَاشْ يِسْمْعُوا بْوِذْنِيهُمْ وْغَمّْضُوا عِينِيهُمْ بَاشْ مَا يْشُوفُوشْ بْعِينِيهُمْ وْيِسْمْعُوا بْوِذْنِيهُمْ وْيِفْهْمُوا بِقْلُوبْهُمْ وْيَرْجْعُولِي وْآنَا نِشْفِيهُمْ.»

²⁸وْكَمِّلْ بُولُسْ كْلاَمُو وْقَالْ: «يْكُونْ فِي عِلْمْكُمْ الِّي اللهْ بْعَثْ الخَلاَصْ مْتَاعُو لِلأُمَمْ الأُخْرَى. وْهُومَا بَاشْ يِسْمْعُوهْ.»

²⁹[وَقْتِلِّي سَمْعُوا اليْهُودْ الكْلاَمْ هَاذَا خُرْجُوا وْهُومَا يِتْنَاقْشُوا بْقُوَّة.]

³⁰وِقْعَدْ بُولُسْ عَامِينْ كَامْلِينْ فِي الدَّارْ الِّي كْرَاهَا وْكَانْ يَفْرَحْ بِالنَّاسْ الِّي يْزُورُوا فِيهْ.

³¹وِيْبَشِّرْ فِيهُمْ بْمَمْلِكْةْ اللهْ وِيْعَلِّمْ فِيهُمْ فِي الحَاجَاتْ الِّي تْخُصْ الرَّبْ يَسُوعْ المَسِيحْ جْهَارْ وْحَتَّى حَدْ مَا مِنْعُو.