Read Tunisian Arabic New Testament أَعْمَالْ 3 Bible Online

أَعْمَالْ 3 - Tunisian Arabic New Testament bible

أَعْمَالْ 3

¹فِي وَقْتْ صْلاَةْ الثْلاَثَة مْتَاعْ العْشِيَّة مْشَى بُطْرُسْ وْيُوحَنَّا لِلهَيْكِلْ.

²وْكَانْ بِحْذَا بَابْ الهَيْكِلْ الِّي يِتْسَمَّي بَابْ جْمِيلْ رَاجِلْ مَشْلُولْ مِلِّي تُولِدْ، يْجِيبُوهْ النَّاسْ كُلْ يُومْ وِيْحُطُّوهْ الغَادِي وْيُقْعُدْ يُطْلُبْ فِي الصُّدْقَة مِنْ عِنْدْ النَّاسْ الِّي يُدْخْلُوا لِلهَيْكِلْ.

³وَقْتِلِّي شَافْ بُطْرُسْ وْيُوحَنَّا دَاخْلِينْ لِلهَيْكِلْ، طْلَبْ مِنْهُمْ صُدْقَة.

⁴يَاخِي خْزَرْلُو بُطْرُسْ وْيُوحَنَّا بِلْقْدَا وْقَالُّو بُطْرُسْ: «أُخْزْرُلْنَا!»

⁵خْزَرِّلْهُمْ وِقْعَدْ يِسْتَنَّى بَاشْ يِتْصَدّْقُوا عْلِيهْ.

⁶قَالُّو بُطْرُسْ: «مَا عِنْدِيشْ لاَ فِضَّة وْلاَ ذْهَبْ، آمَا نَعْطِيكْ الِّي عِنْدِي: بْإِسْمْ يَسُوعْ المَسِيحْ النَّاصْرِي قُومْ وْإِمْشِي!»

⁷شَدُّو مِنْ يِدُّو اليْمِينْ وْقَوّْمُو. وْبِالوَقْتْ رَجْعِتْ القُوَّة فِي سَاقِيهْ وِقْدَامُو.

⁸وْنَقِّزْ وِوْقُفْ وِمْبَاعِدْ مْشَى وِدْخَلْ مْعَاهُمْ لِلهَيْكِلْ وْهُوَ طَايِرْ مِالفَرْحَة وْيِحْمِدْ فِي اللهْ.

⁹وْشَافُوهْ الحَاضْرِينْ الكُلْ يِمْشِي وْيِحْمِدْ فِي رَبِّي.

¹⁰وْكِعَرْفُوا الِّي هُوَ الرَّاجِلْ المَشْلُولْ الِّي يُطْلُبْ وِلِّي تْعَوِّدْ يُقْعُدْ قُدَّامْ «بَابْ جْمِيلْ» فِي الهَيْكِلْ تْعَجّْبُوا وِتْحَيّْرُوا مِالشَّيْء الِّي صَارْلُو.

¹¹الرَّاجِلْ المَشْلُولْ كَانْ مُوجُودْ فِي مْزَازْ الهَيْكِلْ المَعْرُوفْ بِمْزَازْ سُلَيْمَانْ شَادِدْ جْنَبْ بُطْرُسْ وْيُوحَنَّا. وْجَاوْ بَرْشَة نَاسْ وِتْلَمُّوا قُدَّامْهُمْ وْهُومَا بَاهْتِينْ.

¹²قَالِلْهُمْ بُطْرُسْ وَقْتِلِّي شَافْ الشَّيْء هَاذَا: «يَا بَنِي إِسْرَائِيلْ عْلاَشْ تِتْعَجّْبُوا مِالشَّيْء الِّي صَارْلُو وِعْلاَشْ تُخْزْرُولْنَا تْقُولِشْ عْلِينَا بْقُدْرِتْنَا وِلاَّ بِالتَّقْوَى مْتَاعْنَا رَدِّينَا الرَّاجِلْ هَاذَا يِمْشِي؟

¹³رَاهُو إِلاَهْ إِبْرَاهِيمْ وْإِسْحَاقْ وْيَعْقُوبْ، إِلاَهْ جْدُودْنَا هُوَ الِّي مَجِّدْ الخَادِمْ مْتَاعُو يَسُوعْ الِّي إِنْتُومَا سَلِّمْتُوهْ لِلمُوتْ وِنْكَرْتُوهْ قُدَّامْ بِيلاَطُسْ فِي وَقْتْ الِّي هُوَ قَرِرْ بَاشْ يْسَيّْبُو.

¹⁴آمَا إِنْتُومَا نْكَرْتُوا القُدُّوسْ وِالبَارْ وِطْلَبْتُوا مِنُّو بَاشْ يْسَامِحْ رَاجِلْ قَاتِلْ.

¹⁵قْتَلْتُوا الِّي يَعْطِي الحَيَاةْ، آمَا اللهْ قَوّْمُو مِنْ بِينْ المُوتَى وْإِحْنَا شْهُودْ عْلَى هَاذَا.

¹⁶وِالرَّاجِلْ هَاذَا الِّي تْشُوفُوا فِيهْ وِلِّي تَعْرْفُوهْ رَجْعِتْلُو قُوتُو عْلَى خَاطْرُو إِمِّنْ بْإِسْمُو. الإِيمَانْ بْيَسُوعْ هُوَ الِّي عْطَاهْ الصَّحَّة الكَامْلَة هَاذِي قُدَّامْكُمْ الكُلْ.

¹⁷آنَا نَعْرِفْ يَا إِخْوَة الِّي إِنْتُومَا وِالشْيُوخْ مْتَاعْكُمْ مَا كُنْتُوشْ عَارْفِينْ الشَّيْء الِّي عْمَلْتُوهْ فِي المَسِيحْ.

¹⁸آمَا اللهْ عْمَلْ الشَّيْء الِّي وْحَى بِيهْ قْبَلْ لِلأَنْبِيَاءْ الكُلْهُمْ، الِّي المَسِيحْ بَاشْ يِتْعَذِّبْ.

¹⁹إِمَّالاَ تُوبُوا وْأَرْجْعُوا بَاشْ اللهْ يِغْفْرِلْكُمْ ذْنُوبْكُمْ.

²⁰وَقْتِلِّي رَبِّي يَبْعْثِلْكُمْ مَرَّة ثَانْيَة يَسُوعْ المَسِيحْ الِّي اخْتَارُو لِيكُمْ مِنْ قْبَلْ وِتْجِيكُمْ أَيَّامَاتْ الفْرَجْ.

²¹وْهُوَ لاَزِمْ يَبْقَي فِي السْمَاءْ حَتَّى لِينْ يْجِي الوَقْتْ الِّي يِتْصَلِّحْ فِيهْ كُلْ شَيْء كِيمَا وْحَى اللهْ لِلأَنْبِيَاءْ القِدِّيسِينْ مْتَاعُو مِنْ قْدِيمْ الزْمَانْ.

²²وْمُوسَى قَالْ: "رَبِّي الِّي هُوَ اللهْ بَاشْ يْقَيّْمِلْكُمْ نَبِي كِيفِي مِنْ بِينْ إِخْوِتْكُمْ وْتِسْمْعُوا الِّي يْقُلْكُمْ عْلِيهْ الكُلْ.

²³آمَا الِّي مَا يِسْمَعْشْ كْلاَمُو رَاهُو بَاشْ يِفْنَى مِنْ بِينْ الشَّعْبْ."

²⁴وْزَادَا الأَنْبِيَاءْ الكُلْهُمْ تْنَبّْأُوا بِالأَيَّامَاتْ هَاذِي، مِنْ صَمُوئِيلْ حَتَّى لِلأَنْبِيَاءْ الِّي جاوْ بَعْدُو.

²⁵وْإِنْتُومَا وْلاَدْ الأَنْبِيَاءْ هَاذُمْ وِوْلاَدْ العَهْدْ الِّي عَمْلُو اللهْ مْعَ جْدُودْنَا، وَقْتِلِّي قَالْ لْإِبْرَاهِيمْ: "بْذُرِّيتِكْ تِتْبَارِكْ شْعُوبْ الأَرْضْ الكُلْهَا."

²⁶وْبِالأَخَصْ عْلَى خَاطِرْكُمْ إِنْتُومَا، اخْتَارْ اللهْ الخَادِمْ مْتَاعُو وْبَعْثُو بَاشْ يْبَارِكْكُمْ. كِكُلْ وَاحِدْ فِيكُمْ يَرْجَعْ عْلَى عْمَايْلُو الخَايْبَة.»