Read Tunisian Arabic New Testament أَعْمَالْ 4 Bible Online

أَعْمَالْ 4 - Tunisian Arabic New Testament bible

أَعْمَالْ 4

¹وَقْتِلِّي كَانْ بُطْرُسْ وْيُوحَنَّا يِتْكَلّْمُوا مْعَ الحَاضْرِينْ، جَاوْهُمْ جْمَاعَة مِنْ الكُهَّانْ وْقَايِدْ حَرَسْ الهَيْكِلْ وِجْمَاعَة مِالصَّدُّوقِيِّينْ.

²وْهُومَا مِتْغَشَشِينْ عْلَى خَاطِرْ بُطْرُسْ وْيُوحَنَّا كَانُوا يْعَلّْمُوا فِي النَّاسْ وِيْقُولُوا الِّي قْيَامِةْ الأَمْوَاتْ صْحِيحَة وِالدَّلِيلْ هُوَ الِّي يَسُوعْ قَامْ مِالمُوتْ.

³يَاخِي شَدُّوهُمْ وْحَطُّوهُمْ فِي الحَبْسْ حَتَّى الغُدْوَة عْلَى خَاطِرْ الدِّنْيَا ظْلاَمِتْ.

⁴آمَا بَرْشَة مِالنَّاسْ الِّي كَانُوا يِسْمْعُوا فِي الكْلاَمْ هَاذَا امّْنُوا. وِالرْجَالْ الِّي امّْنُوا تَقْرِيبْ وَلاَّوْ خَمْسَة آلاَفْ.

⁵وْمِنْ غُدْوَة فِي الصْبَاحْ تْلَمُّوا رُؤَسَاءْ اليْهُودْ وِالشْيُوخْ وِالكُتَّابْ مْتَاعْ اليْهُودْ فِي أُورْشَلِيمْ.

⁶وِمْعَاهُمْ حَنَّانْ كْبِيرْ الكُهَّانْ وْقِيَافَا وْيُوحَنَّا وِاسْكَنْدَرْ وِالنَّاسْ الِّي كَانُوا تَابْعِينْ لْرُؤَسَاءْ الكُهَّانْ.

⁷جَابُوا بُطْرُسْ وْيُوحَنَّا وْسِأْلُوهُمْ: «بْأَيْ قُوَّة وِبْإِسْمْ شْكُونْ عْمَلْتُوا الشَّيْء هَاذَا؟»

⁸يَاخِي تِمْلَى بُطْرُسْ بِالرُّوحْ القُدُسْ وْجَاوِبْهُمْ: «يَا رُؤَسَاءْ الشَّعْبْ وْيَا الشْيُوخْ.

⁹إِذَا كَانْكُمْ اليُومْ تَبْحْثُوا فِينَا كِعْمَلْنَا الخِيرْ مْعَ وَاحِدْ مْرِيضْ، وِتْحِبُّوا تَعْرْفُوا كِيفَاشْ بْرَى.

¹⁰إِمَّالاَ نِعْلِمْكُمْ وْخَلِّي شَعْبْ إِسْرَائِيلْ الكُلُّو يَعْرِفْ الِّي يَسُوعْ المَسِيحْ النَّاصْرِي الِّي إِنْتُومَا عَلِّقْتُوهْ عْلَى الصَّلِيبْ وِلِّي اللهْ قَوّْمُو مِنْ بِينْ المُوتَي بْإِسْمُو يَاقِفْ المَشْلُولْ هَاذَا وْيِتْشْفَى بْكُلُّو.

¹¹يَسُوعْ هَاذَا، هُوَ الحَجْرَة الِّي إِنْتُومَا البَنَّايَا رْفَضْتُوهَا، هُوَ بِيدُو وَلَّى حَجْرِةْ السَّاسْ.

¹²وْمَا ثَمَّاشْ خَلاَصْ كَانْ عْلَى طْرِيقُو هُوَ عْلَى خَاطِرْ مَا ثَمَّاشْ إِسْمْ آخَرْ تِعْطَى لِلنَّاسْ انَّجّْمُوا نُخْلْصُوا بِيهْ.»

¹³يَاخِي تْعَجّْبُوا المِتْجَمّْعِينْ مِنْ الشَّجَاعَة مْتَاعْ بُطْرُسْ وْيُوحَنَّا وَقْتِلِّي شَافُوا الِّي هُومَا مَا هُمْشْ مِتْعَلْمينْ وِلِّي هُومَا نَاسْ عَادِيِّينْ، عَرْفُوا الِّي هُومَا كَانُوا مْعَ يَسُوعْ.

¹⁴آمَا وَقْتِلِّي شَافُوا المَشْلُولْ الِّي تِشْفَى وَاقِفْ مْعَاهُمْ مَا لْقَاوْ مَا يْقُولُوا

¹⁵يَاخِي أُمْرُوهُمْ بَاشْ يُخْرْجُوا مِنْ اجْتِمَاعْ المَجْلِسْ مْتَاعْ اليْهُودْ بَاشْ يِتْشَاوْرُوا مْعَ بْعَضْهُمْ.

¹⁶وْقَالُوا: «شْنُوَّة بَاشْ نَعْمْلُوا مْعَ الرْجَالْ هَاذُمْ، أَهْلْ أُورْشَلِيمْ يَعْرْفُوا الِّي ثَمَّة مُعْجْزَة كْبِيرَة صَارِتْ عْلَى يْدِيهُمْ وْإِحْنَا مَا انَّجّْمُوشْ نُنْكْرُوا هَاذَا.

¹⁷آمَا بَاشْ مَا يْزيدِشْ الشَّيْء هَاذَا يُكْثُرْ، نْهَدَدُوهُمْ بَاشْ مَاعَادُوشْ يَحْكِيوْ عْلَى الإِسْمْ هَاذَا لْحَتَّى وَاحِدْ آخَرْ.»

¹⁸مِنْ بَعْدْ جَابُوهُمْ وْأَمْرُوهُمْ بَاشْ مَا عَادِشْ يَنْطْقُوا بْإِسْمْ يَسُوعْ وِلاَّ يْعَلّْمُوهْ لِلنَّاسْ.

¹⁹آمَا بُطْرُسْ وْيُوحَنَّا جَاوْبُوا: «شْنُوَّة الصْحِيحْ عِنْدْ اللهْ، يَاخِي نْطِيعُوكُمْ إِنْتُومَا وْمَا نْطِيعُوشْ اللهْ؟ تْرَى احْكْمُوا إِنْتُومَا!

²⁰مَا انَّجّْمُوشْ نْبَطّْلُوا الكْلاَمْ عْلَى الشَّيْء الِّي رِينَاهْ وِسْمَعْنَاهْ.»

²¹زَادُوا هَدَدُوهُمْ وْمَا لْقَاوْشْ كِيفَاشْ بَاشْ يْعَاقْبُوهُمْ، وَلُّوا سَيّْبُوهُمْ، عْلَى خَاطِرْهُمْ خَافُوا مِالشَّعْبْ الِّي الكُلْهُمْ كَانُوا يِحْمْدُوا فِي اللهْ عْلَى الشَّيْء هَاذَا.

²²وِالرَّاجِلْ الِّي بْرَى بِالمُعْجْزَة عُمْرُو مَا فَاتِشْ الأَرْبْعِينْ سْنَة.

²³وَقْتِلِّي سَيّْبُوهُمْ، رَجْعُوا بُطْرُسْ وْيُوحَنَّا لِصْحَابْهُمْ وِحْكَاولْهُمْ عْلَى كُلْ الِّي قَالُوهُولْهُمْ رُؤَسَاءْ الكُهَّانْ وِالشْيُوخْ.

²⁴كِسَمْعُوا الشَّيْء هَاذَا بْدَاوْا يْعَلِّيُوا فِي صْوَاتْهُمْ وِيْصَلِّيوْ بْقَلْبْ وَاحِدْ: «يَا رَبِّي، يَا خَالِقْ الأَرْضْ وِالسْمَاءْ وِالبْحَرْ وْكُلْ مَا فِيهُمْ.

²⁵يَلِّي قُلْتْ بِالرُّوحْ القُدُسْ عْلَى لْسَانْ عَبْدِكْ بُونَا دَاوُدْ: عْلاَشْ النَّاسْ هَاجُوا؟ وِالشْعُوبْ مِنْ غِيرْ فَايْدَة تْآمْرُوا؟

²⁶مُلُوكْ الأَرْضْ قَامُوا وْرُؤَسَاءْهَا تْلَمُّوا وِمْعَ بْعَضْهُمْ تْعَاوْنُوا بَاشْ يْقَاوْمُوا رَبِّي وْمَسِيحُو.

²⁷وْبِالحَقْ الكْلاَمْ هَاذَا وْقَعْ اليُومْ. هِيرُودُسْ يِتْعَاوِنْ مْعَ بِيلاَطُسْ البُنْطِي وِالشْعُوبْ الأُخْرِينْ وْشَعْبْ إِسْرَائِيلْ الِّي جَاوْ مِنْ بَرْشَة بْلاَيِصْ بَاشْ يْقَاوْمُوا الخَادِمْ القُدُّوسْ يَسُوعْ الِّي إِنْتِ اخْتَرْتُو بَاشْ يْكُونْ هُوَ المَسِيحْ.

²⁸وْعَمْلُوا فِيهْ الشَّيْء الِّي إِنْتِ قَدِّرْتْهُولُو الكُلْ بْقُدْرْتِكْ وْحِكْمْتِكْ.

²⁹وْتَوْ يَا رَبْ أُخْزْرُلْهُمْ كِيفَاشْ يْهَدَدُوا فِينَا، وْأَعْطِينَا أَحْنَا خُدَّامِكْ بَاشْ نْقُولُوا كْلاَمِكْ جْهَارْ.

³⁰وْمِدْ يِدِّكْ بَاشْ تِشْفِي، بَاشْ تْصِيرْ مُعْجْزَاتْ وِعْجَايِبْ بْإِسْمْ ابْنِكْ القُدُّوسْ يَسُوعْ.»

³¹وَقْتِلِّي كَانُوا يْصَلِّيوْ تْحَرّْكِتْ البُقْعَة الِّي مُوجُودِينْ فِيهَا وْتِمْلُوا الكُلْهُمْ بِالرُّوحْ القُدُسْ وِبْدَاوْا يْقُولُوا فِي كْلاَمْ اللهْ مِنْ غِيرْ مَا يْخَافُوا.

³²وِالمُؤْمْنِينْ كَانُوا عَايْشِينْ بْقَلْبْ وَاحِدْ وِبْنَفْسْ وَحْدَة، وِلِّي عَنْدُو حَاجَة مَا كَانِشْ يْقُولْ هَاذِي مْتَاعِي آمَا كَانُوا مِتْشَارْكِينْ فِي كُلْ شَيْء.

³³وْكَانُوا الرُّسُلْ يِشْهْدُوا بِقْيَامِةْ الرَّبْ يَسُوعْ بْقُوَّة عْظِيمَة وِالله نْعِمْ عْلِيهُمْ الكُلْهُمْ.

³⁴وْمَا كَانِشْ ثَمَّة حَتَّى وَاحِدْ مِحْتَاجْ عْلَى خَاطِرْ الِّي عِنْدْهُمْ دْيَارْ وِلاَّ أَرْضْ الكُلْهُمْ يْبِيعُوهُمْ وِيْجِيبُوا فْلُوسْهُمْ.

³⁵وِيْحُطُّوهُمْ قُدَّامْ الرُّسُلْ. وْهُومَا يْوَزّْعُوا عْلَى كُلْ مِحْتَاجْ حَسْبْ حَاجْتُو.

³⁶وْمِنْهُمْ يُوسُفْ الِّي الرُّسُلْ سَمَّاوْهْ بَرْنَابَا (مَعْنَاهَا إِبْنْ التَّشْجِيعْ) وْهُوَ مِنْ عَرْشْ لاَوِي وْمُولُودْ فِي قُبْرُصْ.

³⁷كَانْ يِمْلِكْ سَانْيَة بَاعْهَا وْجَابْ سُومْهَا وْحَطُّو قُدَّامْ الرُّسُلْ.