Read Tunisian Arabic New Testament أَعْمَالْ 5 Bible Online

أَعْمَالْ 5 - Tunisian Arabic New Testament bible

أَعْمَالْ 5

¹آمَا ثَمَّة رَاجِلْ إِسْمُو حَنَانِيَّا تْفَاهِمْ مْعَ مَرْتُو سَفِيرَة وْبَاعْ سَانْيَة كَانْ يِمْلِكْهَا.

²وْخَلَّى عَنْدُو شْوَيَّة فْلُوسْ، وْكَانِتْ مَرْتُو فِي بَالْهَا. وْجَابْ الفْلُوسْ الِّي بْقَاوْ وْحَطّْهُمْ قُدَّامْ الرُّسُلْ.

³يَاخِي قَالُّو بُطْرُسْ: «يَا حَنَانِيَّا! عْلاَشْ خَلِّيتْ الشِّيطَانْ يِمْلَى قَلْبِكْ، وِكْذِبْتْ عْلَى الرُّوحْ القُدُسْ؟ وْخَلِّيتْ شْوَيَّة مِنْ سُومْ السَّانْيَة عِنْدِكْ.

⁴يَاخِي مَا كَانِتْشْ بَاشْ تَبْقَالِكْ الكُلْهَا لُوكَانْ مَا بِعْتْهَاشْ؟ عْلاَشْ فَكِّرْتْ بَاشْ تْغُشْ. إِنْتِ مَا كْذِبْتِشْ عْلَى النَّاسْ آمَا رَاكْ كْذِبْتْ عْلَى اللهْ.»

⁵دُوبْ مَا سْمَعْ حَنَانِيَّا الكْلاَمْ هَاذَا طَاحْ عْلَى الأَرْضْ وْمَاتْ، وِالنَّاسْ الِّي عَرْفُوا الشَّيْء هَاذَا خَافُوا بَرْشَة.

⁶يَاخِي ثَمَّة وْلاَدْ شَبَابْ قَامُوا وْكَفّْنُوا حَنَانِيَّا وْهَزُّوهْ وْدِفْنُوهْ.

⁷وْبَعْدْ ثْلاَثَة سْوَايَعْ جَاتْ مَرْةْ حَنَانِيَّا وْهِيَ مَا تِعْلِمْشْ بِلِّي صَارْ.

⁸سْأَلْهَا بُطْرُسْ: «قُلِّي يَاخِي بِالفْلُوسْ هَاذِي بِعْتُوا السَّانْيَة؟» جَاوْبِتْ: «إِي نْعَمْ بِالفْلُوسْ هَاذِي.»

⁹قَالِلْهَا بُطْرُسْ: «عْلاَشْ تْفَاهِمْتْ مْعَ رَاجْلِكْ بَاشْ تْجَرّْبُوا رُوحْ رَبِّي؟ آهُومَا الشَّبَابْ الِّي دِفْنُوا رَاجْلِكْ وَاقْفِينْ فِي البَابْ بَاشْ يْهِزُّوكْ إِنْتِ زَادَا.»

¹⁰يَاخِي طَاحِتْ قُدَّامْ بُطْرُسْ وْمَاتِتْ بِالوَقْتْ. وَقْتِلِّي دَخْلُوا الشَّبَابْ وِلْقَاوْهَا مِيتَة، هَزُّوهَا وْدِفْنُوهَا بِحْذَا رَاجِلْهَا.

¹¹يَاخِي النَّاسْ الِّي فِي الكَنِيسَة وِالنَّاسْ الِّي سَمْعُوا الخْبَرْ الكُلْهُمْ خَافُوا.

¹²وْصَارِتْ عْلَى يْدِينْ الرُّسُلْ بَرْشَة مُعْجْزَاتْ وِعْجَايِبْ بِينْ الشَّعْبْ. وْكَانُوا الكُلْهُمْ يِجْتَمْعُوا بْقَلْبْ وَاحِدْ فِي مْزَازْ سُلَيْمَانْ الِّي فِي الهَيْكِلْ.

¹³وْحَتَّى وَاحِدْ مِالنَّاسْ الأُخْرِينْ مَا تْشَجَّعْ وِدْخَلْ بِحْذَاهُمْ. آمَا الشَّعْبْ كَانْ يْقَدِّرْهُمْ.

¹⁴وِعْدَدْ المُؤْمْنِينْ بِالرَّبْ كَانْ مَاشِي وِيْزِيدْ بَعْدْ مَا جَاوْ رْجَالْ وِنْسَاء أُخْرِينْ لِلمَجْمُوعَة.

¹⁵وِالنَّاسْ كَانُوا يْهِزُّوا فِي المُرْضَى عْلَى فْرُوشَاتْهُمْ لِلشَّارِعْ وَقْتِلِّي يِتْعَدَّى بُطْرُسْ بَاشْ عْلَى الأَقَلْ يْجِي الظُّلْ مْتَاعُو عْلَى جْمَاعَة مِنْهُمْ وْيَبْرَاوْ.

¹⁶وْزِيدْ عْلَى هَاذَا بَرْشَة نَاسْ كَانُوا يْجِيوْ مِالمُدُنْ وِالقُرَى لْأُورْشَلِيمْ هَازِّينْ المُرْضَى وِلِّي مْعَذّْبِتْهُمْ الأَرْوَاحْ المَنْزُوسَة وْكَانُوا الكُلْهُمْ يَبْرَاوْ.

¹⁷كْبِيرْ الكُهَّانْ وِجْمَاعْتُو الِّي يْتَبّْعُوا فِي الصَّدُّوقِيِّينْ كَانُوا يْغِيرُوا مِالرُّسُلْ.

¹⁸شَدُّوهُمْ وْحَطُّوهُمْ فِي الحَبْسْ.

¹⁹آمَا مَلاَكْ مِنْ عِنْدْ الرَّبْ حَلْ بِيبَانْ الحَبْسْ فِي اللِّيلْ وْسَيِّبْهُمْ وْقَالِلْهُمْ:

²⁰«إِمْشِيوْ لِلهَيْكِلْ وْآقْفُوا وْإِحْكِيوْ لِلنَّاسْ عْلَى الحَيَاةْ الجْدِيدَة.»

²¹طَاعُوا كْلاَمُو وِمْشَاوْ بِكْرِي مْعَ الفَجْرْ لِلهَيْكِلْ وِبْدَاوْا يْعَلّْمُوا. وِطْلَبْ كْبِيرْ الكُهَّانْ وِجْمَاعْتُو بَاشْ يِتْعْمَلْ إِجْتِمَاعْ المَجْلِسْ مْتَاعْ اليْهُودْ وْيَحْضْرُوا فِيهْ شْيُوخْ إِسْرَائِيلْ الكُلْهُمْ وْأَمْرُوا بَاشْ يْجِيبُوا الرُّسُلْ مِالحَبْسْ.

²²آمَا الحُرَّاسْ مْتَاعْ الهَيْكِلْ مَا لْقَاوْهُمْشْ، وَلَّاوْا رَجْعُوا وْخَبّْرُوا المَجْلِسْ.

²³وْقَالُوا: «لْقِينَا بِيبَانْ الحَبْسْ مْسَكّْرَة، وِالعَسَّاسَة وَاقْفِينْ قُدَّامْ البَابْ آمَا وَقْتِلِّي حَلِّينَا البَابْ مَا لْقِينَا حَتَّى حَدْ لْدَاخِلْ.»

²⁴وَقْتِلِّي سْمَعْ قَايِدْ حَرَسْ الهَيْكِلْ، وْكْبِيرْ الكُهَّانْ الكْلاَمْ هَاذَا بِهْتُوا وِبْدَاوْا يِسْأْلُوا فِي بْعَضْهُمْ: زَعْمَة شْنُوَّة الِّي جْرَى؟

²⁵مِنْ بَعْدْ جَا وَاحِدْ لِلمَجْلِسْ وْقَالْ: «الرْجَالْ الِّي إِنْتُومَا حَطِّيطُوهُمْ فِي الحَبْسْ هُومَا تَوْ وَاقْفِينْ يْعَلّْمُوا فِي النَّاسْ فِي الهَيْكِلْ.»

²⁶وَلّى مْشَى قَايِدْ الحُرَّاسْ مْتَاعْ الهَيْكِلْ وِالجُنُودْ مْتَاعُو وْجَابُوا الرُّسُلْ مِنْ غِيرْ مَا سْتَعْمْلُوا القُوَّة، عْلَى خَاطِرْهُمْ خَافُوا مِالشَّعْبْ لَيُرْجُمْهُمْ.

²⁷وْكِجَابُوهُمْ وُقْفُوا قُدَّامْ المَجْلِسْ مْتَاعْ اليْهُودْ وِسْإِلْهُمْ كْبِيرْ الكُهَّانْ

²⁸وْقَالْ: «نَبِّهْنَا عْلِيكُمْ بَاشْ مَا تْعَلّْمُوشْ بِالإِسْمْ هَاذَا، آمَا إِنْتُومَا مْلِيتُوا أُورْشَلِيمْ بِالتَّعْلِيمْ مْتَاعْكُمْ، وِتْحِبُّوا تْحَمّْلُونَا أَحْنَا المَسْؤُولِيَّة مْتَاعْ دَمْ الإِنْسَانْ هَاذَا!»

²⁹يَاخِي جَاوِبْ بُطْرُسْ وِالرُّسُلْ وْقَالْ: «يِلْزِمْنَا نْطِيعُوا اللهْ مُوشْ النَّاسْ.

³⁰إِلاَهْ جْدُودْنَا قَوِّمْ يَسُوعْ الِّي إِنْتُومَا قْتَلْتُوهْ وْعَلِّقْتُوهْ عْلَى لُوحَة.

³¹آمَا اللهْ رَفْعُو وْحَطُّو عْلَى يْمِينُو رَئِيسْ وْمُخَلِّصْ بَاشْ يَعْطِي لْبَنِي إِسْرَائِيلْ التَّوْبَة وْغُفْرَانْ الذْنُوبْ

³²وْإِحْنَا شْهُودْ عْلَى الكْلاَمْ هَاذَا، وْزَادَا يِشْهِدْ الرُّوحْ القُدُسْ الِّي عْطَاهْ اللهْ لِلنَّاسْ الِّي يْطِيعُوهْ.»

³³وَقْتِلِّي النَّاسْ الِّي فِي المَجْلِسْ سَمْعُوا الكْلاَمْ هَاذَا تْغَشَشُوا بَرْشَة وْحَبُّوا بَاشْ يُقْتْلُوا الرُّسُلْ.

³⁴آمَا ثَمَّة وَاحِدْ مِنْ أَعْضَاءْ المَجْلِسْ مْتَاعْ اليْهُودْ وْإِسْمُو غَمَالاَئِيلْ، وْهُوَ مُعَلِّمْ مْتَاعْ الشَّرِيعَة وْتَابِعْ لِلفَرِّيسِيِّينْ، وِالنَّاسْ الكُلْ يِحْتَرْمُوهْ، وْقُفْ وِطْلَبْ بَاشْ الرُّسُلْ يُخْرْجُوا شْوَيَّة البَرَّة.

³⁵مِنْ بَعْدْ قَالْ لِلنَّاسْ المُجْتَمْعِينْ: «يَا بَنِي إِسْرَائِيلْ: رُدُّوا بَالْكُمْ تَعْمْلُوا الِّي نَاوِينْ بَاشْ تَعْمْلُوهْ فِي الرْجَالْ هَاذُمْ.

³⁶رَاهُو قْبَلْ المُدَّة هَاذِي جَا وَاحِدْ إِسْمُو ثُودَاسْ وِادَّعَى الِّي هُوَ إِنْسَانْ عْظِيمْ يَاخِي تَبّْعُوهْ أَرْبْعَة مْيَاةْ رَاجِلْ، آمَا هُوَ تِقْتَلْ وِلِّي يْتَبّْعُوا فِيهْ الكُلْهُمْ تْفَرّْقُوا وِوْفَى كُلْ شَيْء.

³⁷وْمِنْ بَعْدْ جَا يَهُوذَا الجَلِيلِي فِي وَقْتْ إِحْصَاءْ الشَّعْبْ وْجَابْ مْعَاهْ بَرْشَة نَاسْ بَاشْ يْتَبّْعُوهْ يَاخِي تِقْتَلْ وِالنَّاسْ الِّي يْتَبّْعُوا فِيهْ تْفَرّْقُوا.

³⁸وْآنَا نَنْصَحْكُمْ تَوْ بَاشْ تِبْعْدُوا عْلَى الرْجَالْ هَاذُومَا وِتْخَلِّيوْهُمْ عْلَى رْوَاحْهُمْ. إِذَا كَانِتْ الخُطَّة هَاذِي وِلاَّ الخِدْمَة هَاذِي مِنْ عِنْدْ النَّاسْ رَاهِي مَا اتِّمِّشْ.

³⁹آمَا إِذَا كَانْ الشَّيْء هَاذَا مِنْ عِنْدْ اللهْ، إِنْتُومَا مَا تْنَجّْمُوشْ تَاقْفُوا ضِدُّو وْرَاكُمْ تْوَلِّيوْا زَادَا أَعْدَاءْ اللهْ.»

⁴⁰يَاخِي عَمْلُوا أَعْضَاءْ المَجْلِسْ بِالنْصِيحَة هَاذِي وِاسْتَدْعَاوْ الرُّسُلْ وْضَرْبُوهُمْ بِالسُّوطْ وْأَمْرُوهُمْ بَاشْ مَا يَعَلّْمُوشْ بْإِسْمْ يَسُوعْ، وْسَيّْبُوهُمْ.

⁴¹آمَا الرُّسُلْ خَرْجُوا مِالمَجْلِسْ مْتَاعْ اليْهُودْ فَرْحَانِينْ عْلَى خَاطِرْهُمْ تْحِسْبُوا الِّي هُومَا يِسْتْحَقُّوا بَاشْ يِتْهَانُوا مِنْ أَجْلْ اسْمْ يَسُوعْ.

⁴²وْكَانُوا كُلْ يُومْ فِي الهَيْكِلْ وْيِمْشِيوْ مِنْ بِيتْ لْبِيتْ بَاشْ يْعَلّْمُوا وِيْبَشّْرُوا بْيَسُوعْ وِيْقُولُوا لِلنَّاسْ الِّي هُوَ المَسِيحْ.