Read Tunisian Arabic New Testament أَعْمَالْ 6 Bible Online

أَعْمَالْ 6 - Tunisian Arabic New Testament bible

أَعْمَالْ 6

¹وْفِي الأَيَّامَاتْ هَاذُوكُمْ كِكُثْرُوا التْلاَمْذَة وِتْشَكَّاوْ اليْهُودْ الِّي يِتْكَلّْمُوا بِاليُونَانِيَّة عْلَى اليْهُودْ الِّي يِتْكَلّْمُوا بِالعِبْرِي عْلَى خَاطِرْالْأَرَامِلْ مْتَاعْهُمْ مَا كَانُوشْ يَاخْذُوا فِي بَايْهُمْ مِالإِعَانَة مْتَاعْ كُلْ يُومْ.

²يَاخِي الرُّسُلْ الأَثْنَاشْ سْتَدْعَاوْا التْلاَمْذَة الكُلْ وْقَالُولْهُمْ: «مُوشْ بَاهِي أَحْنَا نْخَلِّيوا كِلْمِةْ اللهْ مَا نْبَشّْرُوشْ بِيهَا وْنَبْقَاوْا نْوَزّْعُوا فِي المَاكْلَة

³يَا إخْوِتْنَا إِخْتَارُوا سَبْعَة رْجَالْ مِنْكُمْ مَشْهُودْ لِيهُمْ بِالسُّمْعَة البَاهْيَة وْمِلْيَانِينْ بِالرُّوحْ القُدُسْ وِالحِكْمَة بَاشْ نْكَلّْفُوهُمْ وْيَعْمْلُوا الخِدْمَة هَاذِي.

⁴وْإِحْنَا نْدَاوْمُوا عْلَى الصَّلاَةْ وْخِدْمِةْ الكِلْمَة.»

⁵الرَّايْ هَاذَا عْجِبْ التْلاَمْذَة الكُلْ وِخْتَارُوا اسْتِفَانُوسْ الِّي هُوَ رَاجِلْ مَلْيَانْ بِالإِيمَانْ وْبِالرُّوحْ القُدُسْ، وْفِيلِبُّسْ، وْبُرُوخُورُسْ وْنِيكَانُورْ، وْتِيمُونْ، وْبَرْمِينَاسْ ونِيقُولاَوُسْ الأَنْطَاكِي الِّي وَلَّى يْهُودِي قْبَلْ مَا يْوَلِّي مَسِيحِي.

⁶وْجَابُوهُمْ وْوَقّْفُوهُمْ قُدَّامْ الرُّسُلْ. يَاخِي صَلُّوا مِنْ أَجْلْهُمْ وْحَطُّوا عْلِيهُمْ يْدِيهُمْ.

⁷وِتْنُشْرُتْ كِلْمِةْ اللهْ أَكْثِرْ، وْكُثْرُوا التْلاَمْذَة فِي أُورْشَلِيمْ، وِجْمَاعَة كْبِيرَة مِالكُهَّانْ طَاعُوا اللهْ وْقِبْلُوا الإِيمَانْ بْيَسُوعْ المَسِيحْ.

⁸وْكَانْ اسْتِفَانُوسْ مَلْيَانْ بِالنِّعْمَة وِالقُوَّة وْكَانْ يَعْمِلْ فِي عْجَايِبْ وْمُعْجْزَاتْ كْبِيرَة بِينْ الشَّعْبْ.

⁹يَاخِي جَاوْ ضِدُّو جْمَاعَة فِي المَجْمَعْ كَانُوا عَبِيدْ وِمْبَاعِدْ وَلاَّوْ أَحْرَارْ وْثَمَّة يْهُودْ مِنْ قِيرِينَة وِالإِسْكَنْدَرِيَّة وْغِيرْهُمْ مِنْ جِيهِةْ كِيلِيكِيَّة وْأَسِيَّة قَاعْدِينْ يْحَرّْشُوا فِيهُمْ وِبْدَاوْا يْنَاقْشُوا فِي اسْتِفَانُوسْ.

¹⁰مَا قِدْرُوشْ يْعَارْضُوا الحِكْمَة وِالرُّوحْ الِّي كَانْ يِتْكَلِّمْ بِيهُمْ.

¹¹وَلاَّوْ دِفْعُوا الرَّشْوَة لِجْمَاعَة بَاشْ يْقُولُوا: «سْمَعْنَا اسْتِفَانُوسْ يِتْكَلِّمْ بِكْلاَمْ كُفْرْ عْلَى مُوسَى وِعْلَى اللهْ.»

¹²التُّهْمَة هَاذِي هَيّْجِتْ الشَّعْبْ وِالشْيُوخْ وِالكُتَّابْ مْتَاعْ اليْهُودْ عْلَى اسْتِفَانُوسْ، وْشَدُّوهْ وْجَابُوهْ قُدَّامْ المَجْلِسْ مْتَاعْ اليْهُودْ.

¹³وْجَابُوا نَاسْ شِهْدُوا بِالكِذْبْ وْقَالُوا: «الرَّاجِلْ هَاذَا دِيمَا يِتْكَلِّمْ بِكْلاَمْ كُفْرْ عْلَى البْلاَصَة المُقَدّْسَة هَاذِي وِعْلَى الشَّرِيعَة مْتَاعْ مُوسَى.

¹⁴وِسْمَعْنَاهْ يْقُولْ الِّي يَسُوعْ النَّاصْرِي بَاشْ يْطَيِّحْ الهَيْكِلْ وِيْبَدِّلْ العَادَاتْ الِّي خْذِينَاهَا مِنْ عِنْدْ مُوسَى.»

¹⁵وَقْتِلِّي النَّاسْ الِّي فِي المَجْلِسْ مْتَاعْ اليْهُودْ الكُلْهُمْ ثَبّْتُوا فِي اسْتِفَانُوسْ، شَافُوا وِجْهُو كِيفْ وِجْهْ المَلاَكْ.