Read Tunisian Arabic New Testament أَعْمَالْ 7 Bible Online

أَعْمَالْ 7 - Tunisian Arabic New Testament bible

أَعْمَالْ 7

¹وِسْإِلْ كْبِيرْ الكُهَّانْ اسْتِفَانُوسْ: «يَاخِي التُّهَمْ هَاذِي صْحِيحَة؟»

²جَاوِبْ: «يَا الشْيُوخْ وْيَا الإِخْوَة، إِسْمْعُونِي! ظْهُرْ إِلاَهْ المَجْدْ لْبُونَا إِبْرَاهِيمْ وْهُوَ فِي بْلاَدْ مَا بِينْ النَّهْرِينْ قْبَلْ مَا رْحَلْ وِسْكِنْ فِي مْدِينِةْ حَارَانْ.

³وْقَالُّو: "خَلِّي أَرْضِكْ وْأَهْلِكْ وْأَرْحِلْ لِلأَرْضْ الِّي بَاشْ نْوَرِّيهَالِكْ."

⁴وِرْحَلْ مِنْ بْلاَدْ الكِلْدَانِيِّينْ وِسْكِنْ فِي مْدِينِةْ حَارَانْ وِبْقَى فِيهَا حَتَّى لِينْ مَاتْ بُوهْ، يَاخِي جَابُو اللهْ لِلبْلاَدْ هَاذِي الِّي تُسْكْنُوا فِيهَا إِنْتُومَا تَوَّا.

⁵وْفِي البْلاَدْ هَاذِي مَا عْطَاهِشْ مِلْكْ وْمَا كَانِشْ عَنْدُو وِينْ يْحُطْ سَاقِيهْ. آمَا اللهْ وَعْدُو بَاشْ يَعْطِيهْ البْلاَدْ هَاذِي لِيهْ وِلْذُرِّيتُو مِنْ بَعْدُو رَغْمِلِّي مَا كَانِشْ عَنْدُو وْلاَدْ.

⁶وْقَالْ اللهْ: "ذُرِّيتِكْ بَاشْ يْقَاسُوا مِالغُرْبَة فِي بْلاَدْ مَا هِيشْ بْلاَدْهُمْ مُدِّةْ أَرْبْعَة مْيَاةْ سْنَة وْأُمَّالِيهَا يْرُدُّوهُمْ عَبِيدْ وْيَعْمْلُوا مْعَاهُمْ الخَايِبْ.

⁷آمَا آنَا بَاشْ نُحْكُمْ عْلَى الشَّعْبْ الِّي رَدّْهُمْ عَبِيدْ، وْمِنْ بَعْدْ يُخْرْجُوا وِيْجِيوْ لِلبْلاَدْ هَاذِي بَاشْ يِعْبْدُونِي."

⁸وِعْطَى اللهْ العَهْدْ مْتَاعْ الطْهُورْ لْإِبْرَاهِيمْ وْهَكَّا وَقْتِلِّي تُولِدْ إِسْحَاقْ طَهّْرُو إِبْرَاهِيمْ فِي النْهَارْ الثَّامِنْ وْطَهِّرْ إِسْحَاقْ وِلْدُو يَعْقُوبْ وْيَعْقُوبْ طَهِّرْ وْلاَدُو الأَثْنَاشْ الِّي هُومَا جْدُودْنَا لُولاَنِينْ.

⁹وِجْدُودْنَا لُولاَنِينْ حِسْدُوا يُوسُفْ وْبَاعُوهْ لْمَصْرْ. آمَا اللهْ كَانْ مْعَاهْ.

¹⁰وْخَرّْجُو مِالمَشَاكِلْ الِّي وُقْعِتْلُو الكُلْهَا، وِعْطَاهْ نِعْمَة وْحِكْمَة عِنْدْ فَرْعُونْ مَلِكْ مَصْرْ يَاخِي رَدُّو وَالِي عْلَى مَصْرْ وْمَسْؤُولْ عْلَى القْصَرْ مْتَاعُو.

¹¹وْبَعْدْ هَاذَا الكُلْ جَاتْ مَجَاعَة فِي مَصْرْ الكُلْهَا وْفِي أَرْضْ كَنْعَانْ، وْعَانُوا جْدُودْنَا مِنْ ضِيقْ كْبِيرْ وْمَا لْقُوشْ مَا يَاكْلُوا.

¹²وَقْتِلِّي سْمَعْ يَعْقُوبْ الِّي ثَمَّة قَمْحْ فِي مَصْرْ بْعَثْ جْدُودْنَا لْأَوِّلْ مَرَّة.

¹³وْكِبْعَثْهُمْ فِي المَرَّة الثَّانْيَة عَرِّفْهُمْ يُوسُفْ بْرُوحُو. وِعْرَفْ فَرْعُونْ العَايْلَة مْتَاعْ يُوسُفْ.

¹⁴وِاسْتَدْعَى يُوسُفْ بُوهْ يَعْقُوبْ وْإِخْوْتُو وْعَايْلاَتْهُمْ لْمَصْرْ وْكَانُوا خَمْسَة وْسَبْعِينْ وَاحِدْ.

¹⁵وِهْبَطْ يَعْقُوبْ وِجْدُودْنَا لْمَصْرْ وْقَعْدُوا فِيهَا حَتَّى لِينْ مَاتُوا.

¹⁶وْهَزُّوهُمْ لْمَنْطِقْةْ شَكِيمْ وْدِفْنُوهُمْ فِي القْبَرْ الِّي شْرَاهْ إِبْرَاهِيمْ مِنْ عِنْدْ قَبِيلِةْ بَنِي حَمُورْ فِي مَنْطِقْةْ شَكِيمْ بِشْوَيَّة فِضَّة.

¹⁷كِبْدَا يُقْرُبْ الوَقْتْ الِّي اللهْ بَاشْ يْتَمِّمْ فِيهْ الوَعْدْ الِّي وْعِدْ بِيهْ إِبْرَاهِيمْ كْثُرْ الشَّعْبْ وِالعْدَدْ مْتَاعْهُمْ زَادْ فِي مَصْرْ.

¹⁸حَتَّى لِينْ جَا مَلِكْ جْدِيدْ عْلَى مَصْرْ مَا كَانِشْ يَعْرِفْ حَتَّى حَاجَة عْلَى يُوسُفْ.

¹⁹يَاخِي تْحَيِّلْ عْلَى شَعْبْنَا وْمَا عْمَلْشْ البَاهِي مْعَ جْدُودْنَا، حَتَّى لِينْ خَلاَّهُمْ تْلَزُّوا بَاشْ يْسَلّْمُوا فِي وْلاَدْهُمْ بَاشْ يْمُوتُوا.

²⁰وْفِي الوَقْتْ هَاذَاكَا تُولِدْ مُوسَى وْكَانْ مِزْيَانْ بَرْشَة. وِبْقَى مْعَ أُمُّو وْبُوهْ لْمُدِّةْ ثْلاَثَة شْهُورْ.

²¹آمَا تْلَزُّوا بَاشْ يْسَلّْمُوا فِيهْ، يَاخِي مَنّْعِتُّو بِنْتْ فَرْعُونْ وِتْبَنَّاتُو وْرَبَّاتُو كِيفْ وِلْدْهَا.

²²وِتْعَلِّمْ مُوسَى العُلُومْ مْتَاعْ المَصْرِيِّينْ الكُلْهَا وْوَلَّى قْوِي فِي كْلاَمُو وْفِي فِعْلُو.

²³وْوَقْتِلِّي وْصُلْ عُمْرُو أَرْبْعِينْ سْنَة، جَا عْلَى بَالُو بَاشْ يِتْفَقِّدْ إِخْوْتُو الِّي مِنْ بَنِي إِسْرَائِيلْ.

²⁴يَاخِي شَافْ وَاحِدْ مِنْهُمْ قَاعِدْ يِتْضْرَبْ، ادَّخِّلْ بَاشْ يْدَافِعْ عْلَى المَظْلُومْ وِقْتَلْ المَصْرِي.

²⁵عْمَلْ الشَّيْء هَاذَا وْحَبْ الِّي إِخْوْتُو يِفْهْمُوا الِّي اللهْ بَاشْ يْمَنَّعْهُمْ عْلَى يْدِيهْ، آمَا هُومَا مَا فَهْمُوشْ.

²⁶وْمِنْ غُدْوَة لْقَى زُوزْ مِنْ إِخْوْتُو يِتْعَارْكُوا، يَاخِي حَاوِلْ يْصَلِّحْ مَا بِينَاتْهُمْ وْقَالِلْهُمْ: "إِنْتُومَا إِخْوَة عْلاَشْ تَعْمْلُوا فِي الخَايِبْ مْعَ بْعَضْكُمْ؟"

²⁷الِّي كَانْ يَعْمِلْ فِي الخَايِبْ مْعَ الآخَرْ دَزُّو وْقَالْ: "شْكُونْ حَطِّكْ قَايِدْ وْقَاضِي مَا بِينَاتْنَا؟

²⁸تْحِبْ تُقْتُلْنِي كِيمَا قْتَلْتْ المَصْرِي البَارِحْ؟"

²⁹وْوَقْتْهَا هْرَبْ مُوسَى مِنْ مَصْرْ لْأَرْضْ مِدْيَانْ وْعَاشْ فِيهَا غْرِيبْ وِتْوِلْدُولُو فِيهَا، زُوزْ وْلاَدْ.

³⁰وْبَعْدْ مَا عَدَّى أَرْبْعِينْ سْنَة وْوَقْتِلِّي كَانْ فِي جْبَلْ سِينَاءْ فِي الصَّحْرَاء ظْهُرْلُو مَلاَكْ فِي وُسْطْ شَجْرَة مْتَاعْ عِلِّيقْ شَاعْلَة فِيهَا النَّارْ.

³¹وِتْعَجِّبْ مُوسَى مِالمَنْظِرْ هَاذَا وِبْدَا يُقْرُبْ وِيْشُوفْ، يَاخِي نَادَاهْ الرَّبْ وْقَالُّو:

³²"آنَا إِلاَهْ جْدُودِكْ، إِلاَهْ إِبْرَاهِيمْ وْإِلاَهْ إِسْحَاقْ وْإِلاَهْ يَعْقُوبْ." لَكِنْ مُوسَى خَافْ بَرْشَة وْمَا حَاوِلْشْ حَتَّى بَاشْ يُخْزُرْ.

³³قَالُّو الرَّبْ: "نَحِّي صَنْدَالِكْ، رَاهِي الأَرْضْ الِّي إِنْتِ وَاقِفْ عْلِيهَا هِيَ أَرْضْ مُقَدّْسَة.

³⁴آنَا رِيتْ العْذَابْ مْتَاعْ شَعْبِي فِي مَصْرْ، وِسْمَعْتْ نْوَاحْهُمْ، وْآنَا هْبَطْتْ بَاشْ نْخَلِّصْهُمْ، وْتَوَّا هَيَّا نَبْعْثِكْ لْمَصْرْ."

³⁵هَاذَا هُوَ مُوسَى الِّي شَعْبُو رَفْضُوهْ وْقَالُولُو: "شْكُونْ الِّي حَطِّكْ قَايِدْ وْقَاضِي عْلِينَا." هُوَ بِيدُو بَعْثُو اللهْ بَاشْ يْكُونْ قَايِدْ عْلِيهُمْ وْبَاشْ يْحَرِّرْهُمْ، وَقْتِلِّي اللهْ كَلّْمُو عْلَى طْرِيقْ المَلاَكْ الِّي ظْهُرْلُو فِي شَجْرِةْ العِلِّيقْ.

³⁶وْخَرِّجْ الشَّعْبْ وْهُوَ يَعْمِلْ فِي عْجَايِبْ وْمُعْجْزَاتْ فِي مَصْرْ وْفِي البْحَرْ الأَحْمَرْ وْفِي الصَّحْرَاء لْمُدِّةْ أَرْبْعِينْ سْنَة

³⁷وْمُوسَى هُوَ الِّي قَالْ لْبَنِي إِسْرَائِيلْ: "بَاشْ يْقَيّْمِلْكُمْ اللهْ نَبِي كِيفِي مِنْ بِينْ خْوَاتْكُمْ."

³⁸وْهُوَ الرَّاجِلْ الِّي كَانْ مْعَ الشَّعْبْ فِي الصَّحْرَاء وَقْتِلِّي كَلّْمُو المَلاَكْ فِي جْبَلْ سِينَاءْ هُوَ وِجْدُودْنَا وِخْذَا كْلاَمْ الحَيَاةْ بَاشْ يْوَصِّلْهُولْنَا أَحْنَا.

³⁹آمَا جْدُودْنَا رَفْضُوا بَاشْ يْطِيعُوا مُوسَى وْمَا اعْتَرْفُوشْ بِيهْ الِّي هُوَ قَايِدْ عْلِيهُمْ، وْفِي قْلُوبْهُمْ حَبُّوا يَرْجْعُوا لْمَصْرْ.

⁴⁰وْقَالُوا لْهَارُونْ: "أَعْمْلِلْنَا آلْهَة تْوَرِّينَا الطْرِيقْ، عْلَى خَاطِرْ مُوسَى الِّي خَرِّجْنَا مِنْ أَرْضْ مَصْرْ مَا نَعْرْفُوشْ شْنُوَّة الِّي جْرَالُو."

⁴¹وْفِي النْهَارَاتْ هَاذُوكُمْ صَنْعُوا عْجِلْ وْعَمْلُوهْ صَنْبَة وْقَدّْمُولُو ضْحِيَّة وْفَرْحُوا بِالشَّيْء الِّي عَمْلُوهْ.

⁴²بْعِدْ عْلِيهُمْ اللهْ وْخَلاَّهُمْ يِعْبْدُوا فِي نْجُومْ السْمَاءْ، كِيفْ مَا تْقَالْ فِي كْتَابْ الأَنْبِيَاءْ: يَا بَنِي إِسْرَائِيلْ! وْإِنْتُومَا فِي الصَّحْرَاء أَرْبْعِينْ عَامْ يَاخِي جِبْتُولِي ذْبِيحَة وِلاَّ قُرْبَانْ؟

⁴³لاَ، رَاكُمْ هَزِّيتُوا لِلصَّنْبَة مُولَكْ الخْيَامْ وْنِجْمِةْ الإِلاَهْ رَمْفَانْ الصْنَبْ الِّي صْنَعْتُوهُمْ وِعْبَدْتُوهُمْ. هَاذَاكَا عْلاَشْ بَاشْ نِنْفِيكُمْ لِبْلاَصَة أَكْثِرْ مِنْ بَابِلْ بْعِيدَة عْلِيكُمْ.»

⁴⁴«وْهَزُّوا جْدُودْنَا مْعَاهُمْ خِيمِةْ الشّْهَادَة فِي الصَّحْرَاء، وْوَصَّي اللهْ مُوسَى بَاشْ يَعْمِلْهَا بِالضَّبْطْ كِيفْ مَا قَالُّو.

⁴⁵بَعْدْ مَا دَخْلُوا بِيهَا لِلبْلاَدْ هَاذِي الِّي مِلْكُوهَا وَقْتِلِّي كَانْ يْقُودْ فِيهُمْ يَشُوعْ بَعْدْ مَا طَرِّدْ اللهْ مِنْ قُدَّامْهُمْ الشْعُوبْ الِّي سَاكْنِينْ فِيهَا، وِالخِيمَة بْقَاتْ لْغَادِي حَتَّى لِزْمَانْ دَاوُدْ.

⁴⁶الِّي اللهْ كَانْ رَاضِي عْلِيهْ وِلِّي حَبْ يَعْمِلْ بِيتْ لْإِلاَهْ يَعْقُوبْ.

⁴⁷وِالحَاجَة هَاذِي تَمِّتْ عْلَى يْدِينْ سُلَيْمَانْ الِّي بْنَى الهَيْكِلْ.

⁴⁸آمَا اللهْ العَالِي مَا يُسْكُنْشْ فِي بْيُوتْ تِبْنِيهَا يْدِينْ البَشَرْ كِيفْ مَا يْقُولْ النَّبِي:

⁴⁹الرَّبْ يْقُولْ: السْمَاءْ عَرْشِي وِعْلَى الأَرْضْ نْحُطْ سَاقَيَّا آنَاهِي البِيتْ الِّي بَاشْ تِبْنِيوْهَالِي؟ وِالبُقْعَة الِّي نَلْقَى فِيهَا رَاحْتِي؟

⁵⁰مُوشْ الحَاجَاتْ هَاذِي الكُلْهَا صَنْعِتْهَا يِدِّي؟»

⁵¹«يَلِّي رُوسْكُمْ صْحَاحْ، وِقْلُوبْكُمْ كَاسْحَة وْوِذْنِيكُمْ مْسَكّْرَة. إِنْتُومَا دِيمَا تْقَاوْمُوا فِي الرُّوحْ القُدُسْ، وْكِيمَا عَمْلُوا جْدُودْكُمْ، إِنْتُومَا زَادَا قَاعْدِينْ تَعْمْلُوا.

⁵²شْكُونُو النَّبِي الِّي جْدُودْكُمْ مَا اضْطَهْدُوهِشْ؟ وْهُومَا قَتْلُوا الِّي سِبْقُوا وْخَبّْرُوا عْلَى جَيَّانْ البَارْ الِّي إِنْتُومَا خُنْتُوهْ وِقْتَلْتُوهْ.

⁵³إِنْتُومَا خْذِيتُوا الشَّرِيعَة مِنْ عِنْدْ المْلاَيْكَة آمَا مَا طَبِّقْتُوهَاشْ!»

⁵⁴وَقْتِلِّي النَّاسْ الِّي فِي المَجْمَعْ سَمْعُوا كْلاَمْ اسْتِفَانُوسْ تِمْلاَتْ قْلُوبْهُمْ بِالحِقْدْ وِتْغَشَشُوا بَرْشَة وِتْحَلّْفُوا فِيهْ.

⁵⁵هَزْ اسْتِفَانُوسْ عِينِيهْ لِلسْمَاء وْهُوَ مَلْيَانْ بِالرُّوحْ القُدُسْ، وْشَافْ مَجْدْ اللهْ وْيَسُوعْ وَاقِفْ عْلَى يْمِينْ اللهْ.

⁵⁶قَالْ: «آنَا نْشُوفْ فِي السْمَاءْ مَحْلُولَة وْإِبْنْ الإِنْسَانْ وَاقِفْ عْلَى يْمِينْ اللهْ.»

⁵⁷يَاخِي صَاحُوا بِالقْوِي وْسَدُّوا وِذْنِيهُمْ وْهِجْمُوا عْلِيهْ الكُلْهُمْ فِي وَقْتْ وَاحِدْ.

⁵⁸وْخَرّْجُوهْ البَرَّا مِالمْدِينَة وِبْدَاوْا يُرْجْمُوا فِيهْ بِالحْجَرْ. وْنَحَّاوْ الشْهُودْ جْبَايِبْهُمْ وْخَلاَّوْهُمْ عِنْدْ وَاحِدْ إِسْمُو شَاوُلْ بَاشْ يْعِسْ عْلِيهُمْ.

⁵⁹وَقْتِلِّي هُومَا كَانُوا يُرْجْمُوا فِي اسْتِفَانُوسْ، كَانْ يِدْعِي: «يَا رَبِّي يَسُوعْ، إِقْبِلْ رُوحِي!»

⁶⁰مِنْ بَعْدْ رْكَعْ وْصَاحْ بْصُوتْ عَالِي: «يَا رَبْ مَا تِحْسِبْشْ عْلِيهُمْ الذَّنْبْ هَاذَا!» بَعْدْ مَا قَالْ الكْلاَمْ هَاذَا مَاتْ.