Read Tunisian Arabic New Testament أَعْمَالْ 8 Bible Online

أَعْمَالْ 8 - Tunisian Arabic New Testament bible

أَعْمَالْ 8

¹وْكَانْ شَاوُلْ مْوَافِقْ عْلَى قَتْلاَنْ اسْتِفَانُوسْ. وْفِي نَفْسْ النْهَارْ هَاذَاكَا، وْقَعْ إِضْطِهَادْ كْبِيرْ عْلَى الكَنِيسَة الِّي فِي أُورْشَلِيمْ، وِالإِخْوَة الكُلْ تْفَرّْقُوا فِي اليَهُودِيَّة وِالسَّامْرَة. وْمَا بْقَاوْ فِي أُورْشَلِيمْ كَانْ الرُّسُلْ.

²وْكَانُوا ثَمَّة نَاسْ يْخَافُوا رَبِّي دِفْنُوا اسْتِفَانُوسْ وِبْكَاوْ عْلِيهْ بَرْشَة.

³آمَا شَاوُلْ كَانْ يْحَاوِلْ بَاشْ يِقْضِي عْلَى الكَنِيسَة، وْكَانْ يْدُورْ مِنْ دَارْ لْدَارْ وِيْهِزْ فِي الرْجَالْ وِالنْسَاء وِيْحُطْ فِيهُمْ فِي الحَبْسْ.

⁴وِلِّي تْفَرّْقُوا كَانُوا يِمْشِيوْ مِنْ بُقْعَة لْبُقْعَة يْبَشّْرُوا بِالكِلْمَة.

⁵مْشَى فِيلِبُّسْ لِمْدِينَة فِي السَّامْرَة وِبْدَا يْبَشِّرْ فِي أَهْلْهَا بِالمَسِيحْ.

⁶وِالنَّاسْ الكُلْهُمْ بْدَاوْا يِسْمْعُوا فِي كْلاَمْ فِيلِبُّسْ كِسَمْعُوا بِالمُعْجْزَاتْ الِّي عْمَلْهَا وِلِّي شَافُوهَا زَادَا.

⁷وْكَانْ يُأْمُرْ فِي الأَرْوَاحْ المَنْزُوسَة، وْكَانُوا يُخْرْجُوا مِالنَّاسْ الِّي سَاكْنِينْ فِيهُمْ وْهُومَا يْصِيحُوا بْصُوتْ عَالِي، كِيمَا زَادْ شْفَى بَرْشَة مَشْلُولِينْ وْعَايْبِينْ.

⁸يَاخِي امَّالِي المْدِينَة هَاذِيكَا فَرْحُوا بَرْشَة.

⁹وِقْبَلْ الوَقْتْ هَاذَاكَا كَانْ فِي المْدِينَة هَاذِيكَا، رَاجِلْ إِسْمُو سِيمُونْ يَعْمِلْ فِي السِّحْرْ وِالنَّاسْ الِّي فِي السَّامْرَة كَانُوا مِتْعَجّْبِينْ، وْكَانْ يْقُولْ عْلَى رُوحُو الِّي هُوَ رَاجِلْ عْظِيمْ.

¹⁰وْكَانُوا بَرْشَة نَاسْ كْبَارْ وِصْغَارْ يِسْمْعُوا فِي كْلاَمُو وْكَانُوا يْقُولُوا: «الرَّاجِلْ هَاذَا هُوَ قُدْرِةْ اللهْ العْظِيمَة.»

¹¹وْكَانُوا يْقُولُوا فِي الكْلاَمْ هَاذَا عْلَى خَاطِرْ السِّحْرْ مْتَاعُو عْجِبْهُمْ لْمُدَّة طْوِيلَة.

¹²وَقْتِلِّي امّْنُوا بِكْلاَمْ فِيلِبُّسْ الِّي بَشِّرْهُمْ بْيَسُوعْ المَسِيحْ وِبْمَمْلِكْةْ اللهْ، تْعَمّْدُوا رْجَالْ وِنْسَاء.

¹³وْسِيمُونْ بِيدُو إِمِّنْ وِتْعَمِّدْ وْكَانْ دِيمَا مْعَ فِيلِبُّسْ عْلَى خَاطْرُو تْعَجِّبْ وَقْتِلِّي شَافْ العْجَايِبْ وِالمُعْجْزَاتْ الكْبِيرَة الِّي كَانْ فِيلِبُّسْ يَعْمِلْ فِيهُمْ.

¹⁴وْكِسَمْعُوا الرُّسُلْ فِي أُورْشَلِيمْ الِّي أَهْلْ السَّامْرَة قِبْلُوا كِلْمِةْ اللهْ، بَعْثُولْهُمْ بُطْرُسْ وْيُوحَنَّا.

¹⁵وَقْتِلِّي وُصْلُوا صَلاَّوْ مِنْ أَجْلْهُمْ بَاشْ يِتْعْطَالْهُمْ الرُّوحْ القُدُسْ.

¹⁶عْلَى خَاطْرُو الوَقْتْ هَاذَاكَا مَازَالْ مَا تِعْطَى لْحَتَّى حَدْ، آمَا تْعَمّْدُوا بْإِسْمْ الرَّبْ يَسُوعْ بَرْكْ.

¹⁷مِنْ بَعْدْ حَطُّوا عْلِيهُمْ بُطْرُسْ وْيُوحَنَّا يْدِيهُمْ وِخْذَاوْ الرُّوحْ القُدُسْ.

¹⁸وْكِي شَافْ سِيمُونْ الِّي الرُّوحْ القُدُسْ تِعْطَى لِلمُؤْمْنِينْ وَقْتِلِّي حَطُّوا عْلِيهُمْ الرُّسُلْ يْدِيهُمْ عْرَضْ عْلَى بُطْرُسْ وْيُوحَنَّا فْلُوسْ

¹⁹وْقَالِلْهُمْ: «أَعْطِيوْنِي آنَا زَادَا السُّلْطَة هَاذِي بَاشْ كِنْحُطْ إِيدِي عْلَى وَاحِدْ يَاخُذْ الرُّوحْ القُدُسْ.»

²⁰قَالُّو بُطْرُسْ: «خَلِّي فْلُوسِكْ لِهْلاَكِكْ، يَاخِي مَاشِي فِي بَالِكْ الِّي إِنْتِ تِقْدِرْ تِشْرِي المَوْهْبَة مْتَاعْ اللهْ بِالفْلُوسْ.

²¹لاَ عِنْدِكْ قْسَمْ وْلاَ عِنْدِكْ نْصِيبْ فِي الشَّيْء هَاذَا عْلَى خَاطْرِكْ قَلْبِكْ مُوشْ صَافِي مْعَ اللهْ.

²²يِلْزْمِكْ اتُّوبْ عْلَى أَفْكَارِكْ هَاذُومَا وْتُطْلُبْ رَبِّي، بَالِكْشِي يِغْفِرْلِكْ النِّيَّة الخَايْبَة مْتَاعْ قَلْبِكْ

²³نْشُوفْ فِيكْ قَلْبِكْ مَلْيَانْ بالشَّهْوَة المُرَّة وْمَرْبُوطْ بِسْلاَسِلْ الذْنُوبْ.»

²⁴يَاخِي جَاوِبْ سِيمُونْ: «صَلِّيوْ إِنْتُومَا لْرَبِّي بَاشْ الشَّيْء الِّي تْقُولُوا فِيهْ مَا يْصِيرِشْ.»

²⁵وْبَعْدْ مَا بُطْرُسْ وْيُوحَنَّا شِهْدُوا بْكِلْمِةْ الرَّبْ وْخَبّْرُوا بِيهَا الغَادِي، رَجْعُوا لْأُورْشَلِيمْ وْكَانُوا يْبَشّْرُوا فِي بَرْشَة قُرَى فِي مَنْطِقْةْ السَّامْرَة.

²⁶وْمِنْ بَعْدْ كَلِّمْ مَلاَكْ مِنْ عِنْدْ الرَّبْ فِيلِبُّسْ وْقَالُّو: «قُومْ! إِمْشِي فِي الطْرِيقْ الصَّحْرَاوِي فِي الجَنُوبْ الِّي بِينْ أُورْشَلِيمْ وْغَزَّة.»

²⁷وَلَّى قَامْ وِمْشَى وْإِذَا بْرَاجِلْ مِالحَبَشَة كَانْ وْزِيرْ المَاليَّة عِنْدْ كِنْدَاكَة المَلِكَة مْتَاعْ الحَبَشَة وْجَا لْأُورْشَلِيمْ بَاشْ يِعْبِدْ رَبِّي.

²⁸وْهُوَ رَاجِعْ للحَبَشَة رَاكِبْ فِي كَالِيسْ وْيَقْرَى فِي كْتَابْ النَّبِي إِشَعْيَاءْ.

²⁹قَالْ الرُّوحْ لْفِيلِبُّسْ: «إِمْشِي بِجْنَبْ الكَالِيسْ هَاذَا.»

³⁰مْشَالُو فِيلِبُّسْ وْسَمْعُو يَقْرَى فِي كْتَابْ النَّبِي إِشَعْيَاءْ، سِأْلُو: «تِفْهِمْ فَاشْ قَاعِدْ تَقْرَى؟»

³¹جَاوْبُو: «كِيفَاشْ انَّجِّمْ نِفْهِمْ وْمَا ثَمَّة حَتَّى حَدْ يْفَسِّرْلِي؟» وِطْلَبْ مِنْ فِيلِبُّسْ بَاشْ يِرْكِبْ وْيُقْعُدْ بْجَنْبُو.

³²وْكَانْ الوْزِيرْ وْصُلْ فِي قْرَايْتُو لْوِينْ يْقُولْ الكْتَابْ: كِيفْ النَّعْجَة الِّي هَازِّينْهَا لِلذْبِيحَة، وْكِيفْ خَرُوفْ سَاكِتْ بِينْ يْدِينْ الِّي يْجِزْ فِيهْ وْهَكَّا مَا نْطَقْشْ بْكِلْمَة.

³³تْهَانْ وْحَدْ مَا دَافِعْ عْلِيهْ. شْكُونْ بَاشْ يْخَبِّرْ عْلَى ذُرِّيتُو؟ رَاهِي مِالأَرْضْ تْنَحَّاتْ حْيَاتُو.

³⁴وِسْإِلْ الوْزِيرْ فِيلِبُّسْ: «قُلِّي فِي شْكُونْ يُقْصُدْ النَّبِي بِالكْلاَمْ هَاذَا؟ يُقْصُدْ فِي رُوحُو وِلاَّ فِي وَاحِدْ آخَرْ؟»

³⁵يَاخِي تْكَلِّمْ فِيلِبُّسْ وِبْدَا يْبَشِّرْ فِيهْ بْيَسُوعْ مِنْ الآيَاتْ الِّي قَالْهَا النَّبِي هَاذَا.

³⁶وَقْتِلِّي كَانْ الكَالِيسْ مَاشِي وُصْلُوا لْبُقْعَة فِيهَا مَاء، قَالْ الوْزِيرْ: «هَاوْ المَاء، يَاخِي عْلاَشْ مَا نِتْعَمِّدْشْ؟»

³⁷[جَاوْبُو فِيلِبُّسْ: «هَاذَا مُمْكِنْ إِذَا كَانْ تِمِّنْ بْكُلْ قَلْبِكْ.» يَاخِي قَالْ: «آنَا نِمِّنْ بِلِّي يَسُوعْ المَسِيحْ هُوَ إِبْنْ اللهْ.»]

³⁸وِأْمَرْ بَاشْ يْوَقّْفُوا الكَالِيسْ وْهَبْطُوا مْعَ بْعَضْهُمْ لِلمَاءْ، وْفِيلِبُّسْ عَمِّدْ الوْزِيرْ.

³⁹وْهُومَا مَا زَالُوا كِطَلْعُوا مِالمَاء، خْطَفْ رُوحْ رَبِّي فِيلِبُّسْ وِالوْزِيرْ مَا عَادِشْ يْشُوفْ فِيهْ وَلّى مْشَى كَمِّلْ طْرِيقُو.

⁴⁰آمَا فِيلِبُّسْ شَافُوهْ فِي مْدِينِةْ أَشْدُودْ وِمْبَاعِدْ وَلَّى يْبَشِّرْ فِي المُدُنْ الكُلْ حَتَّى لِينْ وْصُلْ لِمْدِينِةْ قَيْصَرِيَّة.