Read Tunisian Arabic New Testament أَعْمَالْ 9 Bible Online

أَعْمَالْ 9 - Tunisian Arabic New Testament bible

أَعْمَالْ 9

¹آمَا شَاوُلْ كَانْ دِيمَا يِتْحَلِّفْ فِي تْلاَمِذْةْ يَسُوعْ وِيْهَدِّدْ فِيهُمْ بِالقَتْلْ، وِمْشَى لِكْبِيرْ الكُهَّانْ.

²وِطْلَبْ مِنُّو جْوَابَاتْ لِلمَجَامِعْ مْتَاعْ اليْهُودْ فِي دِمَشْقْ بَاشْ يْعَاوْنُوهْ عْلَى شَدَّانْ الرْجَالْ وِالنْسَاء الِّي يْتَبّْعُوا فِي الطْرِيقْ هَاذَا وِينْ يَلْقَاهُمْ، وْمِنْ بَعْدْ يْهِزّْهُمْ مْكَتّْفِينْ لْأُورْشَلِيمْ.

³وْوَقْتِلِّي هُوَ مَاشِي لْدِمَشْقْ وِقْريبْ يُوصِلْ، عْلَى غَفْلَة ضْوَى عْلِيهْ نُورْ مِالسْمَاءْ.

⁴يَاخِي طَاحْ عْلَى الأَرْضْ وِسْمَعْ صُوتْ يْقُلُّو: «شَاوُلْ! شَاوُلْ! عْلاَشْ تِضْطَهِدْ فِيَّ؟»

⁵سِأْلُو شَاوُلْ: «شْكُونْ إِنْتِ يَا سِيدِي؟» جَاوْبُو: «آنَا يَسُوعْ الِّي إِنْتِ تِضْطَهِدْ فِيهْ.

⁶قُومْ! وْأُدْخُلْ لِلمْدِينَة وْتَوْ يْقُولُولِكْ شْنُوَّة يِلْزْمِكْ تَعْمِلْ.»

⁷آمَا النَّاسْ الِّي كَانُوا مْسَافْرِينْ مْعَ شَاوُلْ بْقَاوْ بَاهْتِينْ وْمَا نَجّْمُوشْ يَنْطْقُوا بْحَتَّى كِلْمَة، سَمْعُوا الصُّوتْ، آمَا مَا شَافُوا حَتَّى حَدْ.

⁸وَقْتِلِّي قَامْ شَاوُلْ مِالأَرْضْ حَلْ عِينِيهْ وْمَا نَجِّمْشْ يْشُوفْ حَتَّى شَيْء، هَزُّوهْ مِنْ يِدُّو. وْدَخّْلُوهْ لِمْدِينِةْ دِمَشْقْ.

⁹وِقْعَدْ ثْلاَثَة أَيَّامْ لاَ يْشُوفْ وْلاَ يَاكُلْ وْلاَ يُشْرُبْ.

¹⁰وْكَانْ ثَمَّة تِلْمِيذْ فِي دِمَشْقْ إِسْمُو حَنَانِيَّا نَادَاهْ الرَّبْ فِي رُؤْيَا: «حَنَانِيَّا!» قَالْ: «نْعَمْ يَا رَبْ.»

¹¹قَالُّو الرَّبْ: «قُومْ! وْإِمْشِي فِي الشَّارِعْ المَعْرُوفْ بِالمِسْتْوِي، وْإِسْإِلْ فِي دَارْ يَهُوذَا عْلَى رَاجِلْ مِنْ طَرْسُوسْ إِسْمُو شَاوُلْ. وْرَاهُو تَوَّا قَاعِدْ يْصَلِّي.

¹²وْرَاهُو شَافْ فِي حِلْمْ الِّي ثَمَّة رَاجِلْ إِسْمُو حَنَانِيَّا بَاشْ يُدْخُلْ وِيْحُطْ عْلِيهْ ايدُو وْهُوَ يَرْجَعْ يْشُوفْ.»

¹³قَالْ حَنَانِيَّا لِلرَّبْ: «آمَا آنَا يَا رَبْ سْمَعْتْ مِنْ بَرْشَة نَاسْ قَدَّاشْ هُوَ عْمَلْ الشَّرْ فِي المُؤْمْنِينْ الِّي فِي أُورْشَلِيمْ.

¹⁴وْرُؤَسَاءْ الكُهَّانْ عْطَاوْهْ السُّلْطَة بَاشْ يْشِدْ النَّاسْ الِّي يِدْعِيوْ بْإِسْمِكْ.»

¹⁵يَاخِي أَمْرُو الرَّبْ وْقَالُّو: «إِمْشِي! آنَا رَانِي خْتَرْتْ الرَّاجِلْ هَاذَا بَاشْ يْخَبِّرْ الأُمَمْ وِالمُلُوكْ وْبَنِي إِسْرَائِيلْ عْلَى إِسْمِي.

¹⁶وْبَاشْ نْوَرِّيهْ قَدَّاشْ يِلْزْمُو يِتْعَذِّبْ عْلَى خَاطِرْ إِسْمِي.»

¹⁷مْشَى حَنَانِيَّا وِدْخَلْ لْدَارْ يَهُوذَا وْحَطْ يْدِيهْ عْلَى شَاوُلْ وْقَالْ: «يَا خُويَا شَاوُلْ، الرَّبْ يَسُوعْ الِّي ظْهُرْلِكْ فِي الطْرِيقْ الِّي جِيتْ مِنْهَا، بْعَثْنِي لِيكْ بَاشْ تَرْجِعْ تْشُوفْ وتِتْمْلَى بِالرُّوحْ القُدُسْ.»

¹⁸وْبِالوَقْتْ طَاحْ مِنْ عِينِيهْ شَيْء كِيفْ القْشُورْ، وِرْجَعْ يْشُوفْ، مِنْ بَعْدْ قَامْ وِتْعَمِّدْ.

¹⁹وِكْلَى المَاكْلَة وْرَجْعِتْلُو قُوتُو. وِقْعَدْ أَيَّامَاتْ مْعَ التْلاَمْذَة فِي دِمَشْقْ.

²⁰وْمِنْ الوَقْتْ هَاذَاكَا بْدَا يْبَشِّرْ فِي المَجَامِعْ بِلِّي يَسُوعْ هُوَ إِبْنْ اللهْ.

²¹الِّي سَمْعُوا كْلاَمُو الكُلْهُمْ تْعَجّْبُوا وْقَالُوا: «مُوشْ هَاذَا الِّي كَانْ يْشِدْ فِي النَّاسْ الِّي يِدْعِيوْ لإِسْمْ يَسُوعْ فِي أُورْشَلِيمْ؟ مُوشْ جَا لِهْنَا بَاشْ يْشِدّْهُمْ وِيْهِزّْهُمْ مْكَتّْفِينْ لْرُؤَسَاءْ الكُهَّانْ.»

²²آمَا شَاوُلْ وَلاَّتْ عَنْدُو قُوَّة فِي الوَعْظْ وْكَانْ يْسَكِّتْ فِي اليْهُودْ السَّاكْنِينْ فِي دِمَشْقْ وْيَقْنِعْ فِيهُمْ بِالدَّلِيلْ الِّي يَسُوعْ هُوَ المَسِيحْ.

²³وْبَعْدْ أَيَّامَاتْ تْفَاهْمُوا اليْهُودْ مْعَ بْعَضْهُمْ بَاشْ يُقْتْلُوا شَاوُلْ.

²⁴آمَا هُوَ فَاقْ بِيهُمْ، وْكَانُوا يْعِسُّوا عْلَى بِيبَانْ المْدِينَة لِيلْ وِنْهَارْ بَاشْ يُقْتْلُوهْ وَقْتِلِّي يْجِي خَارِجْ مِنْهَا.

²⁵هَزُّوهْ التْلاَمْذَة فِي اللِّيلْ وْحَطُّوهْ فِي قُفَّة كْبِيرَة وْهَبّْطُوهْ بِالحْبَالْ مِنْ فُوقْ سُورْ المْدِينَة.

²⁶وَقْتِلِّي وْصُلْ شَاوُلْ لْأُورْشَلِيمْ حَبْ يْوَلِّي مْعَ التْلاَمْذَة، آمَا الكُلْهُمْ خَافُوا مِنُّو وْمَا صَدّْقُوشْ الِّي هُوَ وَلَّى وَاحِدْ مِنْ تْلاَمِذْةْ الرَّبْ.

²⁷يَاخِي بَرْنَابَا جَابُو مْعَاهْ وِحْكَى لِلرُّسُلْ كِيفَاشْ الرَّبْ ظْهُرْ لْبُولُسْ فِي الطْرِيقْ وْكَلّْمُو وْكِيفَاشْ بَشِّرْ بْإِسْمْ يَسُوعْ جْهَارْ فِي دِمَشْقْ.

²⁸وِقْعَدْ مْعَاهُمْ يْدُورْ فِي أُورْشَلِيمْ وْكَانْ يْبَشِّرْ بْإِسْمْ الرَّبْ جْهَارْ.

²⁹وْكَانْ يِتْكَلِّمْ مْعَ اليْهُودْ الِّي يِتْكَلّْمُوا بِاليُونَانِيَّة وِيْنَاقِشْ فِيهُمْ. وْحَاوْلُوا بَاشْ يُقْتْلُوهْ.

³⁰وَقْتِلِّي الإِخْوَة عَرْفُوا الشَّيْء هَاذَا، هَبّْطُوهْ لِمْدِينِةْ قَيْصَرِيَّة وْبَعْدْ بَعْثُوهْ لْطَرْسُوسْ.

³¹وْفِي الوَقْتْ هَاذَاكَا كَانِتْ الكَنِيسَة فِي اليَهُودِيَّة وِالجَلِيلْ وِالسَّامْرَة عَايْشَة فِي سَلاَمْ وْقَاعْدَة تِكْبِرْ وِالنَّاسْ الِّي فِيهَا يْخَافُوا رَبِّي وِالرُّوحْ القُدُسْ قَاعِدْ يْشَجَّعْ فِيهَا.

³²وَقْتِلِّي كَانْ بُطْرُسْ يِتْنَقِّلْ مِنْ بُقْعَة لْبُقْعَة، زَارْ المُؤْمْنِينْ السَّاكْنِينْ فِي مْدِينِةْ لُدَّة.

³³وِلْقَى وَاحِدْ مَشْلُولْ إِسْمُو إِينْيَاسْ تْعَدَّاوْ عْلِيهْ ثْمَنْيَة سْنِينْ وْهُوَ رَاقِدْ عْلَى الفْرَاشْ.

³⁴قَالُّو بُطْرُسْ: «يَا إِينْيَاسْ، يَسُوعْ المَسِيحْ شْفَاكْ، قُومْ وْلِمْ فْرَاشِكْ بِيدِكْ.» وْبِالوَقْتْ قَامْ.

³⁵وْشَافُوهْ سُكَّانْ لُدَّة وْشَارُونْ الكُلْهُمْ وْرَجْعُوا لْرَبِّي.

³⁶وْكَانِتْ ثَمَّة فِي مْدِينِةْ يَافَا تِلْمِيذَة اسْمْهَا طَابِيثَة الِّي مَعْنَاهَا غْزَالَة وْكَانِتْ دِيمَا تَعْمِلْ فِي الخِيرْ وِتْعَاوِنْ فِي الفُقَرَاءْ.

³⁷وْفِي الوَقْتْ هَاذَاكَا مُرْضِتْ وْمَاتِتْ. غَسّْلُوهَا وْحَطُّوهَا فِي بِيتْ فِي العْلِي.

³⁸وْيَافَا قْرِيبَة مِنْ لُدَّة وْكِسَمْعُوا التْلاَمْذَة المُوجُودِينْ فِي يَافَا الِّي بُطْرُسْ مُوجُودْ فِي لُدَّة، بَعْثُولُوا زُوزْ رْجَالْ يْعَيّْطُولُو وْقَالُولُو: «إِيجَانَا وْمَا تْوَخِّرْشْ.»

³⁹يَاخِي قَامْ بُطْرُسْ وْجَاهُمْ وْكِوْصُلْ طَلّْعُوهْ لِلعْلِي، وْجَاوْ النْسَاء الِّي رْجَالْهُمْ مُوتَى الكُلْهُمْ يِبْكُوا وْوَرَّاوهْ اللْبَاسِي وِالحْوَايِجْ مْتَاعْ غْزَالَة الِّي كَانِتْ تْخَيِّطْ فِيهُمْ وَقْتِلِّي كَانِتْ حَيَّة.

⁴⁰طْلَبْ بُطْرُسْ مِنْ الحَاضْرِينْ الكُلْ بَاشْ يُخْرْجُوا مِالبِيتْ وِهْبَطْ عْلَى رْكَايْبُو وِطْلَبْ رَبِّي، مِنْ بَعْدْ تْلَفِّتْ لِلجُثَّة وْقَالْ: «يَا طَابِيثَة قُومِي!»، وْحَلِّتْ عِينِيهَا، وَقْتِلِّي شَافِتْ بُطْرُسْ قَامِتْ وْقَعْدِتْ.

⁴¹مَدْ بُطْرُسْ يِدُّو وْعَاوِنْهَا بَاشْ تْقُومْ وِمْبَاعِدْ عَيِّطْ لِلمُؤْمْنِينْ وِالنْسَاء الِّي رْجَالْهُمْ مُوتَى وْرَجَّعْهَالْهُمْ حَيَّة.

⁴²وْتِسْمَعْ خْبَرْ المُعْجْزَة هَاذِي فِي يَافَا الكُلْهَا. وْبَرْشَة نَاسْ امّْنُوا بِالرَّبْ يَسُوعْ.

⁴³وِقْعَدْ بُطْرُسْ أَيَّامَاتْ فِي يَافَا عِنْدْ وَاحِدْ دَبَّاغْ إِسْمُو سِمْعَانْ.