Read Tunisian Arabic New Testament رُومِيَة 1 Bible Online

رُومِيَة 1 - Tunisian Arabic New Testament bible

رُومِيَة 1

¹مِنْ بُولُسْ عَبْدْ يَسُوعْ المَسِيحْ، الِّي اللهْ نَادَاهْ بَاشْ يْكُونْ رَسُولْ، وخْتَارُو بَاشْ يْخَبِّرْ بِالبْشَارَة مْتَاعُو،

²الِّي سْبِقْ وِوْعِدْ بِيهَا عْلَى طْرِيقْ الأَنْبِيَاءْ مْتَاعُو فِي الكْتُبْ المُقَدّْسَة،

³فِي مَا يْخُصْ ابْنُو الِّي جَا مِنْ ذُرِّيِّةْ دَاوُدْ مِنْ شِيرِةْ الْجَسَدْ،

⁴وِظْهُرْ الِّي هُوَ إِبْنْ اللهْ بِالقُدْرَة مِنْ شِيرِةْ الرُّوحْ القُدُسْ كِقَامْ مِنْ بِينْ المُوتَى، رَبّْنَا يَسُوعْ المَسِيحْ،

⁵الِّي بِيهْ هُوَ خْذِينَا نِعْمَة وْوَلِّينَا رُسُلْ بَاشْ نْخَلِّيوا الشْعُوبْ الكُلْهُمْ يْطِيعُوا الإِيمَانْ وْيِكْرْمُوا إِسْمُو،

⁶وْإِنْتُومَا زَادَا مِنْهُمْ، تِدْعِيتُوا بَاشْ تْوَلِّيوْا تَابْعِينْ لْيَسُوعْ المَسِيحْ،

⁷لْأَحْبَابْ اللهْ الكُلْهُمْ الِّي فِي رُومَا، الِّي تْنَادَالْهُمْ بَاشْ يْكُونُوا مُؤْمْنِينْ: النِّعْمَة وِالسَّلاَمْ لِيكُمْ مِنْ عِنْدْ اللهْ بُونَا وْرَبّْنَا يَسُوعْ المَسِيحْ.

⁸قْبَلْ كُلْ شَيْء نُشْكُرْ اللهْ عْلَى طْرِيقْ يَسُوعْ المَسِيحْ عْلَى جَالْكُمْ الكُلْ، عْلَى خَاطِرْ إِيمَانْكُمْ تْخَبِّرْ بِيهْ فِي العَالَمْ الكُلُّو.

⁹وِالله الِّي نِعْبِدْ فِيهْ بْرُوحِي وِنْبَشِّرْ بِالإِنْجِيلْ مْتَاعْ إِبْنُو يِشْهِدْلِي الِّي آنَا دِيمَا نْفَكِّرْ فِيكُمْ.

¹⁰وْنُطْلُبْ دِيمَا فِي صْلاَتِي إِنِّي، إِنْ شَاءْ اللهْ، انَّجِّمْ نْجِيكُمْ

¹¹رَانِي مِسْتَاحِجْ نْشُوفْكُمْ، بَاشْ انَّجِّمْ نَعْطِيكُمْ مَوْهْبَة رُوحِيَّة تْقَوِّيكُمْ،

¹²بَاشْ كُلْ وَاحِدْ مِنَّا يِتْشَجَّعْ بِالإِيمَانْ مْتَاعْ الآخَرْ، الإِيمَانْ مْتَاعْكُمْ وِالإِيمَانْ مْتَاعْنَا.

¹³مَا نْحِبّْكُمْشْ تِجْهْلُوا، يَا الإِخْوَة، الِّي آنَا حَاوِلْتْ بَاشْ نْجِيكُمْ بَرْشَة مَرَّاتْ. آمَا رَانِي لْتَوَّا مَا انَّجِّمْشْ وْنِتْمَنَّى نْجِيكُمْ بَاشْ يْكُونْ عِنْدِي ثَمَرْ فِي وُسْطْكُمْ كِيفْ مَا كَانْ عِنْدِي ثَمَرْ فِي وُسْطْ الشْعُوبْ الكُلْهُمْ.

¹⁴رَانِي مَدْيُونْ لِلِّي يِتْكَلّْمُوا بِاليُونَانِيَّة وِلِّي يِتْكَلّْمُوا بْلُغَة أُخْرَى، وْلِلقَارِينْ وِالمُوشْ قَارِينْ الكُلْهُمْ.

¹⁵إِمَّالاَ آنَا نْحَاوِلْ أَكْثِرْ مَا يُمْكِنْ بَاشْ إِنْتُومَا زَادَا الِّي فِي رُومَا نَحْكِيلْكُمْ عْلَى الإِنْجِيلْ.

¹⁶آنَا مَا نِحْشِمْشْ بِالإِنْجِيلْ. رَاهُو قُوِّةْ اللهْ بَاشْ الِّي يِمّْنُوا الكُلْهُمْ يُخْلْصُوا، لِليْهُودْ فِي الأُوِّلْ وِمْبَاعِدْ لِليُونَانِيِّينْ،

¹⁷فِيهْ تِكْشِفْ البِرْ مْتَاعْ اللهْ بِالإِيمَانْ وْلِلإِيمَانْ، كِيفْ مَا تِكْتِبْ فِي الكْتَابْ المُقَدَّسْ: «البَارْ بِالإِيمَانْ بَاشْ يَحْيَى.»

¹⁸رَاهُو الغَضَبْ مْتَاعْ اللهْ تِكْشِفْ مِالسْمَاءْ ضِدْ كُلْ فْسَادْ وْكُلْ شَرْ مْتَاعْ النَّاسْ الِّي بِالشَّرْ مْتَاعْهُمْ يْغَطِّيوْ الحْقِيقَة،

¹⁹وْمَعْرْفِتْهُمْ للهْ ظَاهْرَة فِيهُمْ، عْلَى خَاطِرْ اللهْ وَرَّاهَالْهُمْ،

²⁰وْمِلِّي تْخَلْقِتْ الدِّنْيَا الحَاجَاتْ مْتَاعْ اللهْ الِّي مَا تِتْشَافِشْ وْقُدْرْتُو الِّي تَبْقَى لِلأَبَدْ وِاللاَّهُوتْ مْتَاعُو ظَاهْرِينْ فِي مَخْلُوقَاتُو. هَاذَاكَا عْلاَشْ النَّاسْ مَا عِنْدْهُمْشْ حَتَّى عُذْرْ.

²¹رَاهُمْ رَغْمِلِّي عَرْفُوا اللهْ مَا مَجّْدُوهِشْ بْصِيفْتُو اللهْ وْمَا شُكْرُوهِشْ، آمَا وَلاَّوْ يْفَكّْرُوا بِالغَالِطْ وْقَلْبْهُمْ الجَاهِلْ ظْلاَمْ.

²²وْوَقْتِلِّي هُومَا يِدَّعِيُوا الِّي هُومَا حُكَمَاءْ، وَلاَّوْ جُهَّالْ.

²³وْبَدّْلُوا المَجْدْ الِّي مَا يَفْنَاشْ مْتَاعْ اللهْ بِتْصَاوِرْ تِشْبِهْ لِلبَشَرْ الفَانِينْ وِلاَّ الطّْيُورْ وِلاَّ الحَيَوَانَاتْ الِّي تِمْشِي وِلاَّ الِّي تَزْحِفْ.

²⁴هَاذَاكَا عْلاَشْ اللهْ خَلاَّهُمْ لِلنْجَاسَة بِالشْهَاوِي مْتَاعْ قْلُوبْهُمْ بَاشْ يْهِينُوا بْدُونَاتْهُمْ.

²⁵بَدّْلُوا الحَقْ مْتَاعْ اللهْ بِالكِذْبْ وْعِبْدُوا الخْلِيقَة وْخِدْمُوهَا فِي بْلاَصِةْ الخَالِقْ، الِّي هُوَ مُبَارَكْ لِلأَبَدْ. آمِينْ.

²⁶هَاذَاكَا عْلاَشْ اللهْ خَلاَّهُمْ لِلشْهَاوِي الِّي مَا تْشَرِّفْشْ، نْسَاهُمْ وَلَّاوْا يَعْمْلُوا فِي حَاجَاتْ فَاسْدَة مَاهِيشْ عَادِيَّة،

²⁷وِالرْجَالْ زَادَا بَطّْلُوا مَا عَادِشْ يَعْمْلُوا عَلاَقَاتْ عَادِيَّة مْعَ النْسَاء وْهَاجُوا وِشْتْهَاوْ بْعَضْهُمْ. وِالرْجَالْ عَمْلُوا الفَاحْشَة مْعَ الرْجَالْ وِخْذَاوْ العِقَابْ الِّي يِسْتْحَقُّوهْ عْلَى فْسَادْهُمْ.

²⁸وْمَا دَامْهُمْ مَا حَبُّوشْ يَبْقَاوْ يَعْرْفُوا اللهْ، خَلاَّهُمْ لْتَفْكِيرْهُمْ الِّي مُوشْ مَقْبُولْ وِلْتَصَرُّفَاتْهُمْ الِّي مَا تْلِيقِشْ.

²⁹تِمْلاَوْ بْأَنْوَاعْ الظُّلْمْ وِالشَّرْ وِالطْمَعْ وِالنْجَاسَة، تِمْلاَوْ بالحُسْدْ وِالقَتْلْ وِالعَرْكْ وِالغَشَّة وِالخُبْثْ. مِلْيَانِينْ بِالنَّمِيمَة

³⁰يِحْكُوا بِالخَايِبْ عْلَى بْعَضْهُمْ، يَكْرْهُوا اللهْ، يْعَايْرُوا فِي النَّاسْ، مِتْكَبّْرِينْ مِتْفُوخْرِينْ، يْبَدّْعُوا فِي عَمْلاَنْ الشَّرْ، عَاصِينْ وَالْدِيهُمْ،

³¹مَا يِفْهْمُوشْ وْمَا عِنْدْهُمْشْ كِلْمَة وْمَا يْحِنُّوشْ وْمَا يَرْحْمُوشْ،

³²رَغْمِلِّي يَعْرْفُوا الحُكْمْ مْتَاعْ اللهْ إِنّْهُمْ الِّي يَعْمْلُوا الحَاجَاتْ الِّي كِيفْ هَكَّا يِسْتَاهْلُوا بَاشْ يْمُوتُوا، مُوشْ مَا يَعْمْلُوهُمْشْ آكَاهُو آمَا يَفْرْحُوا بِلِّي يَعْمْلُوهُمْ.