Read Tunisian Arabic New Testament رُومِيَة 10 Bible Online

رُومِيَة 10 - Tunisian Arabic New Testament bible

رُومِيَة 10

¹يَا إِخْوْتِي آنَا نِتْمَنَّى وْنُطْلُبْ مِنْ رَبِّي إِنُّو بَنِي إِسْرَائِيلْ يُخْلْصُوا.

²آنَا نِشْهْدِلْهُمْ الِّي هُومَا عِنْدْهُمْ غِيرَة عْلَى رَبِّي. آمَا مِنْ غِيرْ فَهْمْ.

³مَا قِبْلُوشْ البِرْ مْتَاعْ اللهْ عْلَى خَاطِرْهُمْ مَا عَرْفُوشْ البِرْ الِّي يْجِي مِنْ عِنْدْ رَبِّي وِسْعَاوْ هُومَا بَاشْ يْوَلِّيوْ أَبْرَارْ.

⁴رَاهُو المَسِيحْ هُوَ الكَمَالْ مْتَاعْ الشَّرِيعَة وْكُلْ مِنْ يِمِّنْ بِيهْ يْوَلِّي بَارْ.

⁵مُوسَى كْتِبْ عْلَى البِرْ الِّي يْجِي بِالشَّرِيعَة وْقَالْ: «أَيْ وَاحِدْ يْطِيعْ الوْصَايَا مْتَاعْ الشَّرِيعَة بَاشْ يَحْيَى.»

⁶آمَا البِرْ الِّي يْجِي مِالإِيمَانْ تْقَالْ عْلِيهْ فِي الكْتَابْ المُقَدَّسْ: «مَا تْقُولِشْ فِي قَلْبِكْ: شْكُونْ بَاشْ يَطْلِعْ لِلسْمَاء؟ (مَعْنَاهَا بَاشْ يْهَبِّطْ المَسِيحْ)

⁷وِلاَّ شْكُونْ بَاشْ يَهْبِطْ لِلهَاوْيَة؟ (مَعْنَاهَا بَاشْ يْخَرِّجْ المَسِيحْ مِنْ بِينْ المُوتَى)»

⁸آمَا شْنُوَّة الِّي تْقَالْ فِي الكْتَابْ المُقَدَّسْ: الكِلْمَة قْرِيبَة مِنِّكْ، عْلَى لْسَانِكْ وْفِي قَلْبِكْ. (الِّي هِيَ كِلْمِةْ الإِيمَانْ الِّي نْبَشّْرُوا بِيهَا.)

⁹إِذَا كَانْ تِعْتَرِفْ بِلْسَانِكْ الِّي يَسُوعْ هُوَ الرَّبْ وْتِمِّنْ فِي قَلْبِكْ الِّي اللهْ قَيّْمُو مِنْ بِينْ المُوتَى، رَاكْ بَاشْ تُخْلُصْ.

¹⁰رَاهُو الِّي يِمِّنْ بْقَلْبُو يْوَلِّي بَارْ، وِلِّي يِعْتَرِفْ بِلْسَانُو يُخْلُصْ.

¹¹وِالكْتَابْ المُقَدَّسْ يْقُولْ: «الِّي يِمِّنْ بِيهْ مَا يْخِيبِشْ.»

¹²رَاهُو مَا ثَمَّاشْ حَتَّى فَرْقْ بِينْ اليْهُودْ وِالشْعُوبْ الأُخْرِينْ، عْلَى خَاطِرْ اللهْ رَبّْهُمْ الكُلْهُمْ، يْفِيضْ بْخِيرُو عَلِّي يُطْلْبُوهْ الكُلْهُمْ.

¹³رَاهُو «كُلْ مِنْ يِدْعِي بْإِسْمْ الرَّبْ يُخْلُصْ.»

¹⁴آمَا كِيفَاشْ النَّاسْ بَاشْ يُطْلْبُوا الِّي مَا يِمّْنُوشْ بِيهْ؟ وْكِيفَاشْ بَاشْ يِمّْنُوا بِلِّى عْمُرْهُمْ مَا سَمْعُوا بِيهْ؟ وْكِيفَاشْ بَاشْ يِسْمْعُوا بِيهْ وْحَتَّى وَاحِدْ مَا بَشِّرْهُمْ؟

¹⁵وْكِيفَاشْ النَّاسْ يْبَشّْرُوا إِذَا كَانْ مَا تْبَعْثُوشْ؟ كِيفْ مَا تِكْتِبْ فِي الكْتَابْ المُقَدَّسْ: «مَحْلاَهُمْ سَاقِينْ الِّي يْبَشّْرُوا بِالخِيرْ.»

¹⁶آمَا مَا هُمْشْ الكُلْهُمْ قِبْلُوا البْشَارَة. رَاهُو إِشَعْيَاءْ يْقُولْ: «يَا رَبْ، شْكُونْ الِّي إِمِّنْ بِالشَّيْء الِّي سَمْعُو مِنْ عِنْدْنَا؟»

¹⁷إِمَّالاَ الإِيمَانْ يْجِي مِالسَّمْعَانْ، وِالسَّمْعَانْ يْجِي مِالتَّبْشِيرْ بِالمَسِيحْ.

¹⁸آمَا آنَا نْقُولْ: يَاخِي سَمْعُوا؟ إِي نْعَمْ، سَمْعُوا وْرَاهُو الكْتَابْ المُقَدَّسْ يْقُولْ: صُوتْهُمْ وْصُلْ لِلأَرْضْ الكُلْهَا، وِكْلاَمْهُمْ وْصُلْ لْإِخْرْ الدِّنْيَا.

¹⁹وِنْقُولْ مَرَّة أُخْرَى: يَاخِي شَعْبْ إِسْرَائِيلْ مَا فَهْمُوشْ؟ فِي الأُوِّلْ قَالْ مُوسَى: بَاشْ نْخَلِّيكُمْ تْغِيرُوا مِنْ شَعْبْ مُوشْ شَعْبْ، وْتِتْغَشَشُوا بِسْبَبْ شَعْبْ جَاهِلْ.

²⁰آمَا إِشَعْيَاءْ يْقُولْ بْصَرَاحَة: لْقَاوْنِي الِّي مَا لَوّْجُوشْ عْلِيَّ، وْظَهِّرْتْ رُوحِي لِلِّي مَا طُلْبُونِيشْ.

²¹آمَا يْقُولْ عْلَى شَعْبْ إِسْرَائِيلْ: «النْهَارْ الكُلُّو مَدِّيتْ يِدِّي لْشَعْبْ عَاصِي وْرَاسُو صْحِيحْ.»