Read Tunisian Arabic New Testament رُومِيَة 11 Bible Online

رُومِيَة 11 - Tunisian Arabic New Testament bible

رُومِيَة 11

¹إِمَّالاَ آنَا نِسْإِلْ يَاخِي اللهْ رْفَضْ شَعْبُو؟ حَاشَا! آنَا بِيدِي مِنْ بَنِي إِسْرَائِيلْ، مِنْ ذُرِّيِّةْ إِبْرَاهِيمْ وْمِنْ عَرْشْ بِنْيَامِينْ.

²اللهْ مَا رْفَضْشْ شَعْبُو الِّي عْرَفْهُمْ مِنْ قْبَلْ. يَاخِي مَا تَعْرْفُوشْ الِّي قَالُو الكْتَابْ المُقَدَّسْ عْلَى إِيلِيَّا وَقْتِلِّي شْكَى بْشَعْبْ إِسْرَائِيلْ للهْ؟ وْقَالْ:

³«يَا رَبْ، قَتْلُوا الأَنْبِيَاءْ مْتَاعِكْ وْكسْرُو المَذَابِحْ مْتَاعِكْ وْمَا بْقِيتْ كَانْ آنَا وْآهُومَا يْحِبُّوا يُقْتْلُونِي.»

⁴آمَا شْنُوَّة جَاوْبُو اللهْ؟ «خَلِّيتْ لْرُوحِي سَبْعَة آلاَفْ رُكْبة مَا تِثْنَاتِشْ قُدَّامْ البَعْلْ.»

⁵وْفِي الوَقْتْ الحَاضِرْ زَادَا قَعْدُوا بْقِيَّة مِالنَّاسْ خْتَارْهُمْ اللهْ بِالنِّعْمَة.

⁶وْإِذَا كَانْ الإِخْتِيَارْ بِالنِّعْمَة، رَاهُو مُوشْ بِالأَعْمَالْ، مَا كَانِشْ النِّعْمَة تْوَلِّي مَا هِيشْ نِعْمَة.

⁷شْنُوَّة مَالاَ؟ شَعْبْ إِسْرَائِيلْ مَا نَجّْمُوشْ يَاخْذُوا الشَّيْء الِّي يْحِبُّوا عْلِيهْ، آمَا المُخْتَارِينْ خْذَاوْهْ. وِالبْقِيَّة قْلُوبْهُمْ وَلاَّتْ قَاسْيَة،

⁸كِيفْ مَا تِكْتِبْ فِي الكْتَابْ المُقَدَّسْ: اللهْ عْطَاهُمْ رُوحْ بْخِيلَة وْعِينِينْ مَا تْشُوفِشْ وْوِذْنِينْ مَا تِسْمَعْشْ حَتَّى لِليُومْ.

⁹وْدَاوُدْ يْقُولْ: خَلِّي طَاوْلِتْهُمْ تْوَلِّيلْهُمْ مِنْدَافْ وْشَرْكَة وْحَجْرَة اطَّيَّحْهُمْ وْعِقَابْ

¹⁰خَلِّي عِينِيهُمْ تِظْلاَمْ بَاشْ مَا يْنَجّْمُوشْ يْشُوفُوا وْخَلِّيهُمْ ظْهُورَاتْهُمْ تْكُونْ دِيمَا مْعَوّْجَة.

¹¹إِمَّالاَ نْقُولْ: يَاخِي ادَّعْثْرُوا بَاشْ يْطِيحُوا؟ حَاشَا! آمَا عْلَى طْرِيقْ الغَلْطَة مْتَاعْهُمْ جَا الخَلاَصْ لِلشْعُوبْ الأُخْرِينْ بَاشْ شَعْبْ إِسْرَائِيلْ يْغِيرْ.

¹²إِذَا كَانْ تَوَّا الغَلْطَة مْتَاعْهُمْ فِيهَا بَرْكَة كْبِيرَة لِلعَالَمْ وْإِذَا كَانْ الخْسَارَة مْتَاعْهُمْ فِيهَا بَرْكَة كْبِيرَة لِلشْعُوبْ الأُخْرِينْ، إِمَّالاَ آشْ بَاشْ يَاقَعْ كِيْكُونُوا كَامْلِينْ؟

¹³وْتَوَّا نْقُولْ لِلشْعُوبْ الأُخْرِينْ: مَا دَامْنِي رَسُولْ لِلشْعُوبْ الأُخْرِينْ، رَانِي نْمَجِّدْ الخِدْمَة مْتَاعِي

¹⁴بَاشْ نْخَلِّي وْلاَدْ بْلاَدِي اليْهُودْ يْغِيرُوا وْهَكَّا نْخَلِّصْ جْمَاعَة مِنْهُمْ.

¹⁵إِذَا كَانْهُمْ هُومَا كِتْرَفْضُوا خَلُّوا العَالَمْ يِتْصَالَحْ مْعَ اللهْ، يَاخِي كِيِتْقِبْلُوا مُوشْ بَاشْ تْكُونْ ثَمَّة حَيَاةْ مِنْ بِينْ المُوتَى؟

¹⁶إِذَا كَانْ أَوِّلْ الخْمِيرَةْ تِعْطَى لْرَبِّي، إِمَّالاَ رَاهُو العْجِينْ الكُلُّو تِعْطَى لْرَبِّي. وْإِذَا كَانْ العْرُوقْ تِعْطَاوْ لْرَبِّي، إِمَّالاَ العْرَافْ الكُلْهُمْ مُقَدّْسِينْ.

¹⁷إِذَا كَانْ ثَمَّة عْرَافْ تْقَصُّوا، وْإِنْتِ زِيتُونَة جَالْيَة وِتْلَقِّمْتْ فِي بْلاَصِتْهُمْ بَاشْ تْشَارِكْ فِي أَصْلْ الشَّجْرَة وْلِّي تِتْغَذَّى بِيهْ،

¹⁸مَا تِتْفُوخْرُوشْ عْلَى العْرَافْ. إِذَا كَانْ تِتْفُوخْرُوا اذَّكّْرُوا الِّي مَا كُمْشْ إِنْتُومَا الِّي جِبْتُوا العْرُوقْ، آمَا العْرُوقْ هِيَ الِّي جَابِتْكُمْ؟

¹⁹وْبِشْ تْقُولْ: «العْرَافْ تْقَصِّتْ بَاشْ آنَا نِتْلَقِّمْ.»

²⁰صْحِيحْ! هُومَا تْقَصُّوا بِسْبَبْ قِلِّةْ الإِيمَانْ مْتَاعْهُمْ، آمَا إِنْتِ ثَابِتْ بِسْبَبْ الإِيمَانْ، إِمَّالاَ مَا تِتْكَبِّرْشْ آمَا خَافْ.

²¹رَاهُو إِذَا كَانْ اللهْ مَا خَلاَّشْ العْرَافْ الأَصْلاَنِينْ يَاخِي بَاشْ يْخَلِّيكْ إِنْتِ؟

²²حُطْ فِي بَالِكْ رَحْمِةْ رَبِّي وِالقَسْوَة مْتَاعُو، قَاسِي عَلِّي طَاحُوا، آمَا يَرْحْمِكْ إِنْتِ إِذَا كَانْ تَعْمِلْ قِيمَة لِلرَّحْمَة مْتَاعُو، مَا كَانِشْ رَاكْ إِنْتِ زَادَا تِتْقَصْ.

²³وْحَتَّى الِّي طَاحُوا، إِذَا كَانْ مَا يْشِدُّوشْ صْحِيحْ فِي قِلِّةْ الإِيمَانْ مْتَاعْهُمْ بَاشْ يِتْلَقّْمُوا، رَاهُو اللهْ قَادِرْ بَاشْ يْلَقِّمْهُمْ مِنْ جْدِيدْ.

²⁴وْإِذَا كَانْ إِنْتِ تْقَصِّيتْ مِنْ زِيتُونَة جَالْيَة بِطْبِيعِتْهَا، وِتْلَقّْمِتْ فِي زِيتُونَة حُرَّة، قَدَّاشْ أسْهِلْ بَاشْ العْرَافْ هَاذُومَا الِّي هُومَا مِنْ زِيتُونَة حُرَّة بَاشْ يِتْلَقّْمُوا مِنْ جْدِيدْ فِي الزِّيتُونَة الِّي جَابِتْهُمْ.

²⁵آنَا نْحِبّْكُمْ تَعْرْفُوا السِّرْ الغَامِضْ هَاذَا، يَا إِخْوْتِي، بَاشْ مَا يِمْشِيشْ فِي بَالْكُمْ الِّي إِنْتُومَا عَارْفِينْ، الِّي ثَمَّة جْمَاعَة مِنْ بَنِي إِسْرَائِيلْ قْلُوبْهُمْ وَلاَّتْ قَاسْيَة بَاشْ يِكْمِلْ العْدَدْ مْتَاعْ النَّاسْ الِّي حَطّْهُمْ رَبِّي مِالشْعُوبْ الأُخْرِينْ.

²⁶وْهَكَّا بَنِي إِسْرَائِيلْ الكُلْهُمْ بَاشْ يُخْلْصُوا، كِيفْ مَا تِكْتِبْ فِي الكْتَابْ المُقَدَّسْ: المُخَلِّصْ بَاشْ يْجِي مِنْ صِهْيُونْ وْبِشْ يْنَحِّي الكُفْرْ مِنْ يَعْقُوبْ.

²⁷وْهَاذَا بَاشْ يْكُونْ عَهْدِي مْعَاهُمْ وَقْتِلِّي انَّحِّيلْهُمْ ذْنُوبْهُمْ.

²⁸مِنْ جِيهِةْ الإِنْجِيلْ اليْهُودْ هُومَا الأَعْدَاءْ مْتَاعْ اللهْ لْمَصْلْحِتْكُمْ إِنْتُومَا. آمَا فِي مَا يْخُصْ الإِخْتِيَارْ مْتَاعْ اللهْ هُومَا حْبَابْ رَبِّي عْلَى خَاطِرْ جْدُودْهُمْ.

²⁹رَاهُو اللهْ مَا يِنْدِمْشْ بَعْدْ مَا يِخْتَارْ وَاحِدْ وْيَعْطِيهْ حَاجَة.

³⁰بِالضَّبْطْ كِيفْ مَا إِنْتُومَا قْبَلْ كُنْتُوا عَاصِينْ الله وْتَوَّا تِرْحَمْتُوا بِسْبَبْ المَعْصْيَة مْتَاعْهُمْ،

³¹هَكَّا هُومَا زَادَا تَوَّا عْصَاوْ اللهْ بَاشْ يَرْحِمْهُمْ كِيفْ مَا يَرْحِمْكُمْ،

³²رَاهُو اللهْ خَلَّى النَّاسْ مَرْبُوطِينْ فِي المَعْصْيَة بَاشْ يَرْحِمْهُمْ الكُلْهُمْ.

³³قَدَّاشُو عْظِيمْ الغْنَى مْتَاعْ اللهْ! وْقَدَّاشْهَا غَارْقَة الحِكْمَة وِالمَعْرْفَة مْتَاعُو! وْقَدَّاشْهَا الأَحْكَامْ مْتَاعُو صْعِيبَة بَاشْ تِتْعْرَفْ! وِالثْنَايَا مْتَاعُو بَاشْ تِتْفْهِمْ!

³⁴شْكُونْ يَعْرِفْ الفِكْرْ مْتَاعْ اللهْ؟ وِشْكُونْ يْنَجِّمْ يَنْصْحُو؟

³⁵وِلاَّ شْكُونْ الِّي عْطَى حَاجَة للهْ بَاشْ اللهْ يْرَجَّعْهَالُو

³⁶رَاهُو كُلْ شَيْء مِنُّو هُوَ وْبِيهْ هُوَ وْلِيهْ هُوَ. المَجْدْ لِيهْ لِلأَبَدْ. آمِينْ.