Read Tunisian Arabic New Testament رُومِيَة 12 Bible Online

رُومِيَة 12 - Tunisian Arabic New Testament bible

رُومِيَة 12

¹هَاذَاكَا عْلاَشْ نُطْلُبْ مِنْكُمْ، يَا إِخْوْتِي، بْرَحْمِةْ اللهْ إِنّْكُمْ تْقَدّْمُوا أجْسَادْكُمْ كِيفْ ذْبِيحَة حَيَّة مُقَدّْسَة وْمَقْبُولَة عِنْدْ اللهْ، وْهَاذِي هِيَ عْبَادِتْكُمْ بالْعْقَلْ.

²مَا تْقَلّْدُوشْ الحَاجَاتْ الِّي فِي العَالَمْ هَاذَا. آمَا اتْبَدّْلُوا كِتْجَدَدُوا عْقُولْكُمْ بَاشْ تَعْرْفُوا شْنُوَّة هِيَ الإِرَادَة مْتَاعْ اللهْ: الِّي هِيَ صَالْحَة وْمَقْبُولَة وْكَامْلَة.

³رَانِي بِالنِّعْمَة الِّي عْطَاهَالِي رَبِّي نْوَصِّي كُلْ وَاحِدْ فِيكُمْ بَاشْ مَا يَعْمِلْشْ قِيمَة لْرُوحُو أَكْثِرْ مِاللاَّزِمْ، آمَا يَعْطِي لْرُوحُو القِيمَة الِّي يِسْتْحَقّْهَا، كُلْ وَاحِدْ عْلَى قَدْرْ الإِيمَانْ الِّي عْطَاهُولُو رَبِّي.

⁴رَاهُو كِيفْ مَا فِي جَسَدْ وَاحِدْ عِنْدْنَا بَرْشَة أَعْضَاءْ وِالكُلْهُمْ مَا عِنْدْهُمْشْ الخِدْمَة هِيَ بِيدْهَا،

⁵هَكَّا أَحْنَا زَادَا رَغْمِلِّي أَحْنَا بَرْشَة رَانَا جَسَدْ وَاحِدْ فِي المَسِيحْ، وْأَعْضَاءْ مْتَاعْ بْعَضْنَا،

⁶وْعَنْدْنَا مَوَاهِبْ مَا هُمْشْ كِيفْ كِيفْ عْلَى قَدْرْ النِّعْمَة الِّي تِعْطَاتِلْنَا: الِّي عَنْدُو مَوْهِبْةْ النُّبُوَّة خَلِّيهْ يِتْنَبَّأ بِالإِيمَانْ،

⁷وِلِّي عَنْدُو مَوْهِبْةْ الخِدْمَة فِي الخِدْمَة، وِلِّي عَنْدُو مَوْهِبْةْ التَّعْلِيمْ فِي التَّعْلِيمْ،

⁸وِلِّي عَنْدُو مَوْهِبْةْ الوَعْظْ خَلِّيهْ فِي الوَعْظْ، وِلِّي هُوَ كْرِيمْ خَلِّيهْ يَعْطِي مِنْ غِيرْ مَا يِحْسِبْ، وِلِّي هُوَ يْقُودْ خَلِّيهْ يْقُودْ بِالقْدَا، وِلِّي عَنْدُو مَوْهِبْةْ الرَّحْمَة خَلِّيهْ يَرْحِمْ وْهُوَ فَرْحَانْ.

⁹المْحَبَّة يِلْزِمْهَا تْكُونْ صَادْقَة. أَكْرْهُوا الشَّرْ وْشِدُّوا صْحِيحْ فِي الخِيرْ.

¹⁰حِبُّوا بْعَضْكُمْ كِيفْ الإِخْوَة، وْإِكْرْمُوا بْعَضْكُمْ.

¹¹إِخْدْمُوا بَرْشَة وْمَا تَبْخْلُوشْ، كُونُوا حَارِّينْ فِي الرُّوحْ، إِخْدْمُوا الرَّبْ.

¹²أَفْرْحُوا فِي الأَمَلْ مْتَاعْكُمْ، أُصْبْرُوا فِي الضِّيقْ، وْدَاوْمُوا عْلَى الصَّلاَةْ.

¹³شَارْكُوا فِي الإِحْتِيَاجْ مْتَاعْ المُؤْمْنِينْ، وْضَيّْفُوا البْرَايْنِيَّة.

¹⁴بَارْكُوا الِّي يِضْطَهْدُوا فِيكُمْ، بَارْكُوا وْمَا تِلْعْنُوشْ.

¹⁵أَفْرْحُوا مْعَ الفَرْحَانِينْ وْإِبْكِيوْ مْعَ الِّي الْبَاكينْ.

¹⁶عِيشُوا عَلاَقِتْكُمْ بَاهْيَة مْعَ بْعَضْكُمْ، مَا تِتْكَبّْرُوشْ آمَا خَالْطُوا المِتْوَاضْعِينْ. مَا تِحْسْبُوشْ رْوَاحْكُمْ حُكَمَاءْ.

¹⁷مَا تْكَافْؤُوشْ حَتَّى وَاحِدْ عْلَى الشَّرْ بِالشَّرْ آمَا أَحْرْصُوا بَاشْ تَعْمْلُوا الخِيرْ قُدَّامْ النَّاسْ الكُلْ.

¹⁸أَعْمْلُوا قَدْ مَا تْنَجّْمُوا بَاشْ تْعِيشُوا فِي سَلاَمْ مْعَ النَّاسْ الكُلْهُمْ.

¹⁹يَا حْبَابِي مَا تِنْتَقْمُوشْ، آمَا خَلُّوا الغَضَبْ للهْ، رَاهُو الكْتَابْ المُقَدَّسْ يْقُولْ: «آنَا الِّي نِنْتَقَمْ، يْقُولْ الرَّبْ، وْآنَا الِّي نْجَازِي.»

²⁰آمَا «إِذَا كَانْ عْدُوِّكْ جَاعْ وَكّْلُو، وْإِذَا كَانْ عْطُشْ شَرّْبُو، رَاكْ كِتَعْمِلْ الشَّيْء هَاذَا تْحُطْ جْمَرْ مْتَاعْ نَارْ فُوقْ رَاسُو.»

²¹مَا تْخَلِّيشْ الشَّرْ يِغْلْبِكْ آمَا إِغْلِبْ الشَّرْ بِالخِيرْ.