Read Tunisian Arabic New Testament رُومِيَة 13 Bible Online

رُومِيَة 13 - Tunisian Arabic New Testament bible

رُومِيَة 13

¹خَلِّي النَّاسْ الكُلْ يْطِيعُوا السُّلُطَاتْ العُلْيَا. رَاهُو مَا ثَمَّاشْ سُلْطة مَا حَطّْهَاشْ اللهْ، وِالشّلاطِينْ الِّي مُوجُودِينْ رَاهُمْ حَطّْهُمْ اللهْ

²هَاذَاكَا عْلاَشْ الِّي يْجِيوْ ضِدْ السُّلْطَانْ هُومَا ضِدْ الشَّيْء الِّي حَطُّو اللهْ، وِلِّي يْجِيوْ ضِدّْو يِسْتْحَقُّوا العِقَابْ.

³رَاهُمْ الِّي يَعْمْلُوا فِي الخِيرْ مَا يْخَافُوشْ مِالحُكَّامْ، آمَا يْخَافُوا مِنْهُمْ الِّي يَعْمْلُوا فِي الشَّرْ. يَاخِي تْحِبْ مَا تْخَافِشْ مِالسُّلْطَان؟ إِمَّالاَ أَعْمِلْ الخِيرْ تَوْ يَرْضَى عْلِيكْ.

⁴هُومَا الخُدَّامْ مْتَاعْ اللهْ لْمَصْلْحِتْكُمْ. آمَا إِذَا كَانْ تَعْمْلُوا الشَّرْ يِلْزِمْكُمْ تْخَافُوا عْلَى خَاطِرْهُمْ عِنْدْهُمْ السُّلْطَة بَاشْ يْعَاقْبُوا. هُومَا الخُدَّامْ مْتَاعْ اللهْ الِّي يْعَاقْبُوا الِّي يَعْمْلُوا الشَّرْ.

⁵هَاذَاكَا عْلاَشْ يِلْزِمْنَا نْطِيعُوا السُّلْطَة، مُوشْ بَاشْ نِمْنْعُوا مِالغَضَبْ مْتَاعْ اللهْ آكَاهُو، آمَا زَادَا عْلَى خَاطِرْ الضَّمِيرْ.

⁶هَاذَاكَا عْلاَشْ زَادَا إِنْتُومَا تَدْفْعُوا فِي الضَّرَايِبْ. رَاهُمْ الحُكَّامْ هُومَا خُدَّامْ مْتَاعْ اللهْ كيَعْمْلُوا الشَّيْء هَاذَا بِيدُو.

⁷أَعْطِيوْ لْكُلْ وَاحِدْ حَقُّو: الضَّرَايِبْ لِلِّي يِلْزِمْكُمْ تِدْفْعُولُو الضَّرَايِبْ، وِالأَدَاءَاتْ لِلِّي يِلْزِمْكُمْ تِدْفْعُولُو الأَدَاءَاتْ، وِالقْدَرْ لِلِّي يِلْزِمْكُمْ تْقَدّْرُوهْ، وِالكَرَامَة لِلِّي يِلْزِمْكُمْ تِكْرْمُوهْ.

⁸مَا تْكُونُوشْ مَدْيُونِينْ لْحَتَّى حَدْ كَانْ بِالمْحَبَّة، رَاهُو الِّي يْحِبْ غِيرُو يْتَمِّمْ الشَّرِيعَة.

⁹الوْصَايَا الِّي تْقُولْ: «مَا تَزْنَاشْ، مَا تُقْتُلْشْ، مَا تِسْرِقْشْ، مَا تِشْتْهَاشْ» وِالوْصَايَا الأُخْرِينْ الكُلْهُمْ يِتْلَمُّوا فِي الوْصِيَّة هَاذِي: «حِبْ قْرِيبِكْ كِيفْ مَا تْحِبْ رُوحِكْ.»

¹⁰الِّي يْحِبْ مَا يَعْمِلْشْ الشَّرْ مْعَ قْرِيبُو، هَاذَاكَا عْلاَشْ المْحَبَّة اتَّمِّمْ الشَّرِيعَة.

¹¹زِيدْ عْلَى هَاذَا إِنْتُومَا تَعْرْفُوا فِآنَا سَاعَة أَحْنَا تَوَّا، جَا الوَقْتْ بَاشْ تْفِيقُوا مِنْ النُّومْ مْتَاعْكُمْ، رَاهُو الخَلاَصْ مْتَاعْنَا أَقْرْبِلْنَا تَوَّا مِالوَقْتْ الِّي امِّنَّا فِيهْ.

¹²اللِّيلْ قْرِيبْ يُوفَى وِالنْهَارْ قْرُبْ. إِمَّالاَ خَلِّينَا انَّحِّيوْ الحَاجَاتْ مْتَاعْ الظْلاَمْ وْخَلِّينَا نْهِزُّوا سْلاَحْ النُّورْ مْتَاعْ الجُنُودْ.

¹³خَلِّينَا نِتْصَرّْفُوا كِيفْ نَاسْ يْعِيشُوا فِي النْهَارْ: مُوشْ بِالفْسَادْ وِالسُّكْرْ، مُوشْ بالفُجُورْ وِالفَاحْشَة، مُوشْ بِالعَرْكْ وِالحُسْدْ.

¹⁴آمَا البْسُوا الرَّبْ يَسُوعْ المَسِيحْ، وْمَا عَادِشْ تِتْلْهَاوْ بِبْدُونَاتْكُمْ وِالشْهَاوِي مْتَاعْهُمْ.