Read Tunisian Arabic New Testament رُومِيَة 15 Bible Online

رُومِيَة 15 - Tunisian Arabic New Testament bible

رُومِيَة 15

¹أَحْنَا القْوِيِّينْ فِي الإِيمَانْ يِلْزِمْنَا نْعَاوْنُوا الضْعَافْ بَاشْ يْهِزُّوا الحْمِلْ مْتَاعْهُمْ، مَا يِلْزِمْنَاشْ نلَوّْجُوا عْلَى الشَّيْء الِّي يْرَضِّينَا،

²وْخَلِّي كُلْ وَاحِدْ فِينَا يْرَضِّي خُوهْ لْمَصْلِحْتُو بَاشْ يِبْنِيهْ.

³رَاهُو المَسِيحْ مَا لَوِّجْشْ عْلَى الشَّيْء الِّي يْرَضِّيهْ هُوَ، آمَا كِيفْ مَا هُو مَكْتُوبْ فِي الكْتَابْ المُقَدَّسْ: «السَّبَّانْ الِّي يْسِبُّوا فِيكْ بِيهْ خْلَطْلِي آنَا.»

⁴وْأَيْ حَاجَة تْكِتْبِتْ قْبَلْ فِي الكْتُبْ المُقَدّْسَة رَاهِي تْكِتْبِتْ بَاشْ تْعَلِّمْنَا كِيفَاشْ يْوَلِّي عِنْدْنَا أَمَلْ بِالصَّبْرْ وِالتَّشْجِيعْ الِّي فِي الكْتُبْ المُقَدّْسَة.

⁵إِنْ شَاءْ اللهْ الإِلاَهْ مْتَاعْ الصَّبْرْ وِالتَّشْجِيعْ يَعْطِيكُمْ إِنّْكُمْ تْكُونُوا عِنْدْكُمْ رَايْ وَاحِدْ كِيفْ مَا عَلِّمْنَا المَسِيحْ يَسُوعْ،

⁶بَاشْ الكُلْكُمْ مْعَ بْعَضْكُمْ تْمَجّْدُوا إِلاَهْ وْبُو رَبّْنَا يَسُوعْ المَسِيحْ بْقَلْبْ وَاحِدْ وبْصُوتْ وَاحِدْ.

⁷إِمَّالاَ اقْبْلُوا بْعَضْكُمْ كِيفْ مَا المَسِيحْ قْبِلْكُمْ بَاشْ تْمَجّْدُوا اللهْ.

⁸رَانِي نْقُلْكُمْ الِّي المَسِيحْ وَلَّى خَادِمْ لِليْهُودْ بَاشْ يْوَرِّي الِّي اللهْ صَادِقْ بَاشْ يْثَبِّتْ الوُعُودْ الِّي عْطَاهُمْ اللهْ لِلجْدُودْ.

⁹وْبَاشْ الشْعُوبْ الأُخْرِينْ يْمَجّْدُوا اللهْ عْلَى رَحْمْتُو كِيفْ مَا تِكْتِبْ فِي الكْتُبْ المُقَدّْسَة: هَاذَاكَا عْلاَشْ فِي وُسْطْ الشْعُوبْ الأُخْرِينْ بَاشْ نِحْمْدِكْ، وْبِالغْنَاء نْسَبِّحْ لإِسْمِكْ.

¹⁰وِيْقُولْ الكْتَابْ زَادَا: أَفْرْحُوا يَا الشْعُوبْ الأُخْرِينْ مْعَ شَعْبْ اللهْ!

¹¹وِيْقُولْ مَرَّة أُخْرَى: سَبّْحُوا الرَّبْ يَا كُلّ الأُمَمْ. احْمْدُوهْ يَا كُلّ الشْعُوبْ.

¹²وْقَالْ إِشَعْيَاءْ زَادَا: وِلْدْ يَسَّى بَاشْ يْجِي يْقُومْ وْيُحْكُمْ فِي الشْعُوبْ الأُخْرِينْ وِيْكُونْ عِنْدْهُمْ رَجَاءْ فِيهْ.

¹³إِنْ شَاءْ اللهْ إِلاَهْ الرَّجَاءْ يِمْلاَكُمْ بِالفَرْحَة وِالسَّلاَمْ بْإِيمَانْكُمْ بِيهْ بَاشْ الرَّجَاءْ مْتَاعْكُمْ يْفِيضْ بْقُوِّةْ الرُّوحْ القُدُسْ!

¹⁴آنَا بِيدِي يَا خْوَاتِي عِنْدِي ثِيقَة فِيكُمْ الِّي إِنْتُومَا مِمْلِينْ بِالصْلاَحْ، وْمِمْلِينْ بِالمَعْرْفَة، وْقَادْرِينْ بَاشْ تْعَلّْمُوا بْعَضْكُمْ.

¹⁵آمَا رَاهُو ثَمَّة حَاجَاتْ كْتِبْتِلْكُمْ عْلِيها بْصَرَاحَة بَاشْ نْذَكِّرْكُمْ بِيها، بْفَضْلْ النِّعْمَة الِّي عْطَاهَالِي اللهْ

¹⁶بَاشْ نْكُونْ خَادِمْ مْتَاعْ المَسِيحْ يَسُوعْ مَا بِينْ الشْعُوبْ الأُخْرِينْ. نِخْدِمْ كِيفْ كَاهِنْ فِي الإِنْجِيلْ الِّي مِنْ عِنْدْ اللهْ، بَاشْ الشْعُوبْ الأُخْرِينْ يْكُونُوا قُرْبَانْ مَقْبُولْ عِنْدْ اللهْ مُقَدَّسْ بِالرُّوحْ القُدُسْ.

¹⁷إِمَّالاَ، عِنْدِي الحَقْ، بَاشْ نِتْفُوخِرْ فِي المَسِيحْ يَسُوعْ بِالخِدْمَة مْتَاعْ اللهْ،

¹⁸رَانِي مَا عِنْدِيشْ الجُرْأَة بَاشْ نِتْكَلِّمْ بْصَرَاحَة كَانْ عْلَى الشَّيْء الِّي عَمْلُو المَسِيحْ عْلَى طْرِيقِي بَاشْ يْخَلِّي الشْعُوبْ الأُخْرِينْ يْطِيعُوا اللهْ، عْمَلْ الشَّيْء هَاذَا عْلَى طْرِيقْ كْلاَمِي وْأَفْعَالِي

¹⁹بْقُوِّةْ المُعْجْزَاتْ وِالعْجَايِبْ وِبْقُوِّةْ الرُّوحْ القُدُسْ. كَمِّلْتْ التَّبْشِيرْ بِإِنْجِيلْ المَسِيحْ مِنْ أُورْشَلِيمْ وِالمَنَاطِقْ الِّي دَايْرِينْ بِيهَا حَتَّى لِلِّيرِيكُونْ

²⁰وْكَانْ الهَدَفْ مْتَاعِي هُوَ إِنِّي نْبَشِّرْ بِالإِنْجِيلْ مُوشْ فِي البْلاَيِصْ الِّي تِعْرَفْ فِيها المَسِيحْ، بَاشْ مَا نِبْنِيشْ عْلَى سَاسْ عَمْلُو غِيرِي،

²¹آمَا كِيفْ مَا تِكْتِبْ فِي الكْتَابْ المُقَدَّسْ: الِّي مَا تْبَشّْرُوشْ بِيهْ بَاشْ يْشُوفُوهْ، وِلِّي عْمُرْهُمْ مَا سَمْعُوا بِيهْ بَاشْ يِفْهْمُوا.

²²وْهَاذَاكَا عْلاَشْ تْعَطِّلْتْ بَرْشَة مَرَّاتْ بَاشْ نْجِيكُمْ

²³آمَا تَوَّا مَا دَامْنِي كَمِّلْتْ خِدْمْتِي فِي المَنَاطِقْ هَاذُومَا، وْمَادَامْنِي عِنْدِي سْنِينْ نْحِبْ نْجِيكُمْ،

²⁴نِتْمَنَّى بَاشْ نْشُوفْكُمْ وْآنَا فِي طْرِيقِي لْإِسْبَانْيَا وِتْعَاوْنُونِي بَاشْ نِمْشِي لْغَادِي، بَعْدْ مَا نْعَدِّي مْعَاكُمْ حَتَّى شْوَيَّة وَقْتْ بَاهِي.

²⁵آمَا تَوَّا رَانِي مَاشِي لْأُورْشَلِيمْ بَاشْ نِخْدِمْ الإِخْوَة المُؤْمْنِينْ،

²⁶رَاهُمْ الكَنَايِسْ مْتَاعْ مَقْدُونِيَّة وْأَخَائِيَة حَبُّوا بَاشْ يْعَاوْنُوا الفُقَرَاءْ مَا بِينْ المُؤْمْنِينْ الِّي فِي أُورْشَلِيمْ.

²⁷هُومَا يْحِبُّوا يَعْمْلُوا الشَّيْء هَاذَا وْبِالرَّسْمِي هُومَا مَدْيُونِينْ لِيهُمْ، عْلَى خَاطِرْ إِذَا كَانْ الشْعُوبْ الأُخْرِينْ جَاوْ بَاشْ يْشَارْكُوا فِي البَرَكَاتْ الرُّوحِيَّة مْتَاعْهُمْ رَاهُمْ يِلْزِمْهُمْ زَادَا يِخْدْمُوهُمْ بِالمَادِّيَّاتْ.

²⁸هَاذَاكَا عْلاَشْ بَعْدْ مَا نْكَمِّلْ الشَّيْء هَاذَا وْنَعْطِيهُمْ الشَّيْء الِّي تْلَمْ، نِتْعَدَّالْكُمْ وْآنَا فِي طْرِيقِي لْإِسْبَانْيَا.

²⁹وْنَعْرِفْ الِّي آنَا بَاشْ نْجِيكُمْ بِالبَرْكَة مْتَاعْ المَسِيحْ كَامْلَة.

³⁰نُطْلُبْ مِنْكُمْ، يَا الإِخْوَة، بْإِسْمْ رَبّْنَا يَسُوعْ المَسِيحْ وْبِالمْحَبَّة مْتَاعْ الرُّوحْ القُدُسْ، إِنّْكُمْ تْجَاهْدُوا مْعَايَا بِصْلاَتْكُمْ للهْ، عْلَى خَاطْرِي،

³¹بَاشْ يْمَنَّعْنِي مِلِّي مَا هُمْشْ مُؤْمْنِينْ فِي مَنْطِقْةْ اليَهُودِيَّة وِيْخَلِّي خِدْمْتِي فِي أُورْشَلِيمْ مَقْبُولَة عِنْدْ الإِخْوَة المُؤْمْنِينْ،

³²وْهَكَّا نْجِيكُمْ وْآنَا مَلْيَانْ بِالفَرْحَة، إِذَا كَانْ رَبِّي حَبْ، وْنَرْتَاحْ عِنْدْكُمْ.

³³وْإِلاَهْ السَّلاَمْ يْكُونْ مْعَاكُمْ الكُلْكُمْ. آمِينْ.