Read Tunisian Arabic New Testament رُومِيَة 16 Bible Online

رُومِيَة 16 - Tunisian Arabic New Testament bible

رُومِيَة 16

¹نْوَصِّيكُمْ عْلَى أُخْتْنَا فِيبِي، الخَادْمَة فِي كَنِيسِةْ كَنْخَرِيَّةَ.

²إِنّْكُمْ تِقْبْلُوهَا فِي الرَّبْ كِيفْ مَا يْلِيقْ بِالمُؤْمْنِينْ، وْعَاوْنُوهَا فِلِّي تِحْتَاجْلُو مِنْ عِنْدْكُمْ الكُلُّو، رَاهِي عَاوْنِتْ بَرْشَة نَاسْ وْعَاوْنِتْنِي آنَا زَادَا.

³سَلّْمُوا عْلَى بْرِيسْكِلَّة وْأَكِيلاَ، الِّي يِخْدْمُوا مْعَايَا فِي المَسِيحْ يَسُوعْ،

⁴الِّي خَاطْرُوا بِحْيَاتْهُمْ عْلَى خَاطْرِي. وْمُوشْ آنَا وَحْدِي نُشْكُرْهُمْ، آمَا الكَنَايِسْ مْتَاعْ الشْعُوبْ الأُخْرِينْ الكُلْهُمْ يُشْكْرُوهُمْ.

⁵سَلّْمُوا زَادَا عْلَى الكَنِيسَة الِّي تِجْتَمَعْ فِي بِيتْهُمْ. سَلّْمُوا عْلَى حْبِيبِي أَبَيْنِتُوسْ، أَوِّلْ وَاحِدْ إِمِّنْ بِالمَسِيحْ فِي مَنْطِقْةْ أَسِيَّة.

⁶سَلّْمُوا عْلَى مَرْيَمْ الِّي خِدْمِتْكُمْ بَرْشَة

⁷سَلّْمُوا عْلَى أنْدْرُونِيكُوسْ وْنِيَاسْ، أَقَارْبِي وِلِّي تْرُبْطُوا مْعَايَ فِي الحَبْسْ، هُومَا نَاسْ مَشْهُورِينْ بِينَاتْ الرُّسُلْ، وْإِمّْنُوا بِالمَسِيحْ قَبْلِي.

⁸سَلّْمُوا عْلَى أَمْبِلْيَاتُوسْ حْبِيبِي فِي الرَّبْ،

⁹سَلّْمُوا عْلَى أُورْبَانُوسْ الِّي يِخْدِمْ مْعَايَا فِي المَسِيحْ، وِعْلَى حْبِيبِي إِسْتَاخِيسْ.

¹⁰سَلّْمُوا عْلَى أَبُلُّسْ الِّي وَرَّى الِّي هُوَ بِالرَّسْمِي ثَابِتْ فِي المَسِيحْ. سَلّْمُوا عْلَى بِيتْ أَرِسْتُوبُولُسْ

¹¹سَلّْمُوا عْلَى هِيرُودِيُونْ قْرِيبِي. سَلّْمُوا عَلِّي هُومَا يِمّْنُوا بِالرَّبْ مِنْ عَايِلْةْ نَرْكِيسُّوسْ.

¹²سَلّْمُوا عْلَى تَرِيفَيْنَة وْتَرِيفُوسَة الِّي يِخْدْمُوا فِي الرَّبْ. سَلّْمُوا عْلَى حْبِيبِتْنَا بَرِسِيسْ الِّي خِدْمِتْ الرَّبْ بَرْشَة.

¹³سَلّْمُوا عْلَى رُوفُسْ الِّي مُخْتَارْ فِي الرَّبْ، وِعْلَى أُمُّو الِّي هِيَ كِيفْ أُمِّي.

¹⁴سَلّْمُوا عْلَى أَسِينْكِرِيتُسْ وْفِلِيغُونْ وْهَرْمِيسْ وْبَتْرُوبَاسْ وْهَرْمَاسْ وِعْلَى الإِخْوَة الِّي مْعَاهُمْ.

¹⁵سَلّْمُوا عْلَى فِيلُولُوغُسْ وْجُولْيَا وْنِيرْيُوسْ وْأُخْتُو، وِعْلَى أُولَمْبَاسْ وِالإِخْوَة المُؤْمْنِينْ الِّي مْعَاهُمْ الكُلْهُمْ.

¹⁶سَلّْمُوا عْلَى بْعَضْكُمْ ابُّوسَة مُقَدّْسَة. كَنَايِسْ المَسِيحْ الكُلْهُمْ يْسَلْمُوا عْلِيكُمْ.

¹⁷وْنُطْلُبْ مِنْكُمْ، يَا الإِخْوَة، إِنّْكُمْ تْرُدُّوا بَالْكُمْ مِالنَّاسْ الِّي يْفَرّْقُوا وْيَعْمْلُوا فِي المَشَاكِلْ وِيْدَمّْرُوا فِي الإِيمَانْ مْتَاعْ الأُخْرِينْ وِيْجِيوْ ضِدْ الشَّيْء الِّي تْعَلِّمْتُوهْ. إِبْعْدُوا عْلِيهُمْ،

¹⁸رَاهُمْ النَّاسْ الِّي يَعْمْلُوا فِي الحَاجَاتْ هَاذِي مَا هُمْشْ يِخْدْمُوا فِي رَبّْنَا المَسِيحْ، آمَا يِجْرِيوْ عْلَى كْرُوشْهِمْ، وْيَخْدْعُوا فِي النَّاسْ البُسَطَاءْ كِيْقُولُولْهُمْ كْلاَمْ حْلُو وْيَمْدْحُوهُمْ.

¹⁹النَّاسْ الكُلْهُمْ يَعْرْفُوا الِّي إِنْتُومَا اطِّيعُوا فِي الإِنْجِيلْ، هَاذَاكَا عْلاَشْ آنَا فَرْحَانْ بِيكُمْ. نْحِبّْكُمْ تْكُونُوا حُكَمَاءْ فِي عَمْلاَنْ الخِيرْ، وْأَبْرِيَاءْ كِمَا تَعْمْلُوشْ الشَّرْ.

²⁰وِالله الِّي يَعْطِينَا السَّلاَمْ عْلَى قْرِيبْ بَاشْ يْحُطْ الشِّيطَانْ تَحْتْ سَاقِيكُمْ. نِعْمِةْ رَبّْنَا يَسُوعْ المَسِيحْ مْعَاكُمْ.

²¹يْسَلِّمْ عْلِيكُمْ تِيمُوثَاوُسْ الِّي يِخْدِمْ مْعَايَا وْأَقَارْبِي لُوكِيُوسْ وْيَاسُونْ وْسُوسِيبَاتْرُسْ.

²²وِنْسِلِّمْ عْلِيكُمْ فِي الرَّبْ، آنَا تَرْتِيُوسْ، الِّي كْتِبْتْ الرِّسَالَة هَاذِي.

²³يْسَلِّمْ عْلِيكُمْ غَايُوسْ الِّي مْضَيِّفْنِي وِلِّي الكَنِيسَة تِجْتَمَعْ فِي دَارُو. وِيْسَلِّمْ عْلِيكُمْ أَرَاسْتُسْ، المَسْؤُولْ عْلَى الكَاسَة مْتَاعْ المْدِينَة، وِيْسَلِّمْ عْلِيكُمْ خُونَا كَوَارْتُسْ.

²⁴[نِعْمِةْ رَبّْنَا يَسُوعْ المَسِيحْ مْعَاكُمْ الكُلْكُمْ. آمِينْ.]

²⁵المَجْدْ للهْ الِّي قَادِرْ بَاشْ يْثَبِّتْكُمْ فِي الإِنْجِيلْ مْتَاعْ يَسُوعْ المَسِيحْ الِّي نْبَشِّرْ بِيهْ وْفِي الرُّؤْيَا مْتَاعْ السِّرْ الغَامِضْ الِّي بْقَى مْخُبِّي لْوَقْتْ طْوِيلْ قْبَلْ

²⁶آمَا تَوَّا تِكْشِفْ وْعَرْفُوهْ الشْعُوبْ الكُلْهُمْ عْلَى طْرِيقْ الكْتُبْ مْتَاعْ الأَنْبِيَاءْ. وِالله الخَالِدْ أْمَرْ بَاشْ يِتْعْرَفْ عِنْدْ الشْعُوبْ الكُلْهُمْ بَاشْ يِمّْنُوا وِيْطِيعُوا.

²⁷المَجْدْ لِلأَبَدْ للهْ الِّي هُوَ وَحْدُو حَكِيمْ، عْلَى طْرِيقْ يَسُوعْ المَسِيحْ. آمِينْ.