Read Tunisian Arabic New Testament رُومِيَة 2 Bible Online

رُومِيَة 2 - Tunisian Arabic New Testament bible

رُومِيَة 2

¹هَاذَاكَا عْلاَشْ رَاكْ مَا عِنْدِكْشْ حَتَّى عُذْرْ يَا إِنْسَانْ، يَلِّي تُحْكُمْ عْلَى النَّاسْ الأُخْرِينْ وْإِنْتِ تَعْمِلْ فِي عْمَايِلْهُمْ هِيَ بِيدْهَا. رَاكْ تُحْكُمْ عْلَى رُوحِكْ

²نَعْرْفُوا الِّي اللهْ يُحْكُمْ بِالحَقْ عْلَى النَّاسْ الِّي يَعْمْلُوا الحَاجَاتْ هَاذِيكَا.

³يَاخِي مَاشِي فِي بَالِكْ، يَا إِنْسَانْ، الِّي كِتُحْكُمْ عْلَى النَّاسْ الِّي يَعْمْلُوا فِي الحَاجَاتْ هَاذُوكُمْ وْإِنْتِ زَادَا تَعْمِلْ فِيهُمْ بَاشْ تِمْنَعْ مِالحُكْمْ مْتَاعْ اللهْ؟

⁴وِلاَّ إِنْتِ مَاكِشْ عَامِلْ قِيمَة لِلطِّيبَة مْتَاعُو وْوُسْعْ بَالُو وْصَبْرُو؟ يَاخِي مَا تَعْرِفْشْ الِّي الطِّيبَة مْتَاعْ اللهْ المَفْرُوضْ تْخَلِّيكْ اتُّوبْ؟

⁵آمَا رَاكْ بِالعْنَادْ الّي في قَلْبِكْ الكَاسِحْ قَاعِدْ تْلِمْ فِي غَضَبْ لْرُوحِكْ لِلنْهَارْ الِّي بَاشْ يُظْهُرْ فِيهْ الحُكْمْ العَادِلْ مْتَاعْ اللهْ،

⁶رَاهُو بَاشْ يْجَازِي كُلْ وَاحِدْ عْلَى قَدْ مَا عْمَلْ.

⁷بَاشْ يَعْطِي الحَيَاةْ الأَبَدِيَّة لِلِّي يْفَرْكْسُوا عْلَى الأَعْمَالْ الصَّالْحَة وِالمَجْدْ وِالكَرَامَة وِالحَيَاةْ الِّي مَا تُوفَاشْ وْهُومَا صَابْرِينْ،

⁸آمَا بَاشْ يَغْضِبْ عَلِّي يْحِبُّوا رْوَاحْهُمْ وْيَعْصِيُوا الحَقْ وِيْطِيعُوا البَاطِلْ وْبِشْ يَسْخِطْهُمْ.

⁹شِدَّة وْضِيقْ لْكُلْ إِنْسَانْ يَعْمِلْ الشَّرْ، اليْهُودِي فِي الأُوِّلْ وِمْبَاعِدْ اليُونَانِي،

¹⁰آمَا اللهْ بَاشْ يَعْطِي مَجْدْ وْكَرَامَة وْسَلاَمْ لْكُلْ وَاحِدْ يَعْمِلْ الخِيرْ، لِليْهُودْ فِي الأُوِّلْ وِمْبَاعِدْ لِليُونَانِيِّينْ.

¹¹رَاهُو اللهْ مَا يْعَامِلْ حَتَّى حَدْ.

¹²الِّي عَمْلُوا الذْنُوبْ وْهُومَا مَا عِنْدْهُمْشْ شَرِيعِةْ مُوسَى، بَاشْ يْمُوتُوا زَادَا مِنْ غِيرْ شَرِيعَةْ. وِلِّي عَمْلُوا الذْنُوبْ وْهُومَا عِنْدْهُمْ شَرِيعِةْ مُوسَى بَاشْ تُحْكُمْ عْلِيهُمْ الشَّرِيعَة.

¹³رَاهُمْ مَا هُمْشْ الِّي يِسْمْعُوا فِي الشَّرِيعَة هُومَا الِّي أَبْرَارْ عِنْدْ اللهْ، آمَا الِّي يَعْمْلُوا بِالشَّرِيعَة هُومَا الِّي اللهْ بَاشْ يْرُدّْهُمْ أَبْرَارْ.

¹⁴وَقْتِلِّي النَّاسْ الِّي مَا هُمْشْ يْهُودْ الِّي مَا عِنْدْهُمْشْ شَرِيعَةْ بِطْبِيعِتْهُمْ يَعْمْلُوا الشَّيْء الِّي تْحِبْ عْلِيهْ الشَّرِيعَة، رَاهُمْ بَاشْ يْكُونُوا شَرِيعَةْ لِرْوَاحْهُمْ، حَتَّى إِذَا كَانْ مَا عِنْدْهُمْشْ شَرِيعَةْ.

¹⁵يْوَرِّيوْ الِّي الشَّيْء الِّي تْحِبْ عْلِيهْ الشَّرِيعَة مَكْتُوبْ فِي قْلُوبْهُمْ وْضَمَايِرْهُمْ زَادَا تِشْهِدْ عْلَى الشَّيْء هَاذَا وِأفْكَارْهُمْ مَرَّة تِتْهِمْهُمْ وْمَرَّة ادَّافِعْ عْلِيهُمْ.

¹⁶وِالشَّيْء هَاذَا بَاشْ يْكُونْ نْهَارِتْ الِّي اللهْ بَاشْ يُحْكُمْ عْلَى الحَاجَاتْ المْخُبّْيَة فِي قْلُوبْ النَّاسْ عْلَى طْرِيقْ يَسُوعْ المَسِيحْ كِيفْ مَا يْقُولْ الإِنْجِيلْ الِّي نْبَشِّرْ بِيهْ.

¹⁷وْإِنْتِ يَلِّي تْسَمِّي فِي رُوحِكْ يْهُودِي، وِمْعَمِّلْ عْلَى الشَّرِيعَة وْتِتْفُوخِرْ بْعَلاَقْتِكْ بِالله،

¹⁸وْتَعْرِفْ إِرَادْتُو، وِتْفَرِّقْ بِينْ الحَاجَاتْ الِّي مَا هُمْشْ كِيفْ بْعَضْهُمْ وِانْتِ تِتْعَلِّمْ مِالشَّرِيعَة،

¹⁹وْوَاثِقْ الِّي إِنْتِ تْقُودْ فِي العِمْيَانْ، وِلِّي إِنْتِ نُورْ لِلِّي عَايْشِينْ فِي الظْلاَمْ

²⁰وِلِّي إِنْتِ تِهْدِي الجُهَّالْ، وِتْعَلِّمْ الِّي مَازَالُو صْغَارْ، وِلِّي إِنْتِ عِنْدِكْ العِلْمْ وِالحَقْ الِّي مُوجُودْ فِي الشَّرِيعَة.

²¹إِمَّالاَ إِنْتِ، يَلِّي تْعَلِّمْ فِي الأُخْرِينْ، مُوشْ كَانْ تْعَلِّمْ رُوحِكْ خِيرْ؟ يَاخِي تُوعِظْ وتْقُولْ مَا تِسْرْقُوشْ وْإِنْتِ تِسْرِقْ؟

²²يَاخِي تْقُولْ مَا تَزْنَاوْشْ وْإِنْتِ تِزْنَى؟ تَكْرَهْ الصْنَبْ وْتِسْرِقْ فِي الهَيْكِلْ مْتَاعْهَا؟

²³تِتْفُوخِرْ بِالشَّرِيعَة وِتْهِينْ اللهْ كِتْكَسِّرْ الشَّرِيعَة؟

²⁴رَاهُو كِيفْ مَا هُو مَكْتُوبْ فِي الكْتَابْ المُقَدَّسْ: «النَّاسْ الِّي مَا هُمْشْ يْهُودْ كُفْرُوا بْإِسْمْ اللهْ بِسْبَبْكُمْ.»

²⁵الطْهُورْ عَنْدُو قِيمَة إِذَا كَانْ اطِّيعْ الشَّرِيعَة، آمَا إِذَا كَانْ خَالِفْتْ الشَّرِيعَة رَاكْ كَإِنِّكْ مَا كِشْ مْطَهِّرْ.

²⁶وْإِذَا كَانْ النَّاسْ الِّي مُوشْ مْطَهّْرِينْ يَعْمْلُوا بِالأَحْكَامْ مْتَاعْ بِالشَّرِيعَة، يَاخِي اللهْ مُوشْ بَاشْ يِحْسِبْهُمْ مْطَهّْرِينْ؟

²⁷وِالمُوشْ مْطَهّْرِينْ آمَا بِطْبِيعِتْهُمْ يْطِيعُوا فِي الشَّرِيعَة بَاشْ يُحْكْمُوا عْلِيكْ إِنْتِ الِّي عِنْدِكْ الكْتَابْ المُقَدَّسْ وِالطْهُورْ آمَا مَا اطِّيعِشْ الشَّرِيعَة.

²⁸رَاهُو اليْهُودِي الحَقَّانِي مُوشْ الِّي يْظَهِّرْ رُوحُو يْهُودِي، وِالطْهُورْ الحَقَّانِي مُوشْ حَاجَة مِنْ بَرَّة فِي البْدَنْ،

²⁹آمَا اليْهُودِي الحَقَّانِي رَاهُو مِنْ دَاخِلْ، وِالطْهُورْ الحَقَّانِي حَاجَة فِي القَلْبْ بِالرُّوحْ مُوشْ بِالحْرُوفْ. الإِنْسَانْ هَاذَاكَا يُشْكْرُوا اللهْ مُوشْ النَّاسْ.