Read Tunisian Arabic New Testament رُومِيَة 3 Bible Online

رُومِيَة 3 - Tunisian Arabic New Testament bible

رُومِيَة 3

¹إِمَّالاَ شْنُوَّة يِسْتْفَادْ الوَاحِدْ كِيْكُونْ يْهُودِي؟ وِشْنُوَّة فَايِدْةْ الطْهُورْ؟

²ثَمَّة بَرْشَة فَوَايِدْ فِي بَرْشَة حَاجَاتْ. الأُولَى بِالكُلْ هِيَ إِنُّو اللهْ إِمِّنْ اليْهُودْ عْلَى الكِلْمَة مْتَاعُو.

³وْإِذَا كَانْ جْمَاعَة مِنْهُمْ مَا كَانُوشْ ثِيقَة؟ يَاخِي الخِيَانَةْ مْتَاعْهُمْ تْرُدْ الأَمَانَة مْتَاعْ اللهْ بَاطْلَة؟

⁴حَاشَا! حَتَّى إِذَا كَانْ النَّاسْ الكُلْهُمْ كَاذْبِينْ رَاهُو اللهْ صَادِقْ. كِيفْ مَا يْقُولْ الكْتَابْ المُقَدَّسْ: وِتْوَرِّي الِّي إِنْتِ صَادِقْ كِتِتْكَلِّمْ وِتْظَهِّرْ بَرَاءْتِكْ كِيِتْهْمُوكْ.

⁵آمَا إِذَا كَانْ فْسَادْنَا يْظَهِّرْ البِرْ مْتَاعْ اللهْ، آشْ بَاشْ نْقُولُوا؟ يَاخِي اللهْ ظَالِمْ كِيْعَاقِبْنَا؟ وِهْنَا نِتْكَلِّمْ كِيفْ بَشَرْ.

⁶حَاشَا! إِمَّالاَ كِيفَاشْ اللهْ بَاشْ يُحْكُمْ عْلَى العَالَمْ؟

⁷آمَا إِذَا كَانْ الكِذْبْ مْتَاعِي يْزِيدْ يْظَهِّرْ الصِّدْقْ مْتَاعْ اللهْ بَاشْ يِتْمَجِّدْ، إِمَّالاَ عْلاَشْ يِتْحْكَمْ عْلِيَّ كِيفْ وَاحِدْ يَعْمِلْ فِي الذْنُوبْ؟

⁸وِعْلاَشْ مَا نَعْمْلُوشْ الشَّرْ بَاشْ يْجِي مِنُّو الخِيرْ، كِيفْ مَا ثَمَّة نَاسْ يِتْبَلَّاوْا عْلِينَا، وْيِدَّعِيُوا الِّي أَحْنَا نْقُولُوا بِالشَّيْء هَاذَا؟ هَاذُومَا رَاهُو العِقَابْ مْتَاعْهُمْ عَادِلْ.

⁹شْنُوَّة، مَالاَ؟ يَاخِي أَحْنَا خِيرْ مِالنَّاسْ الأُخْرِينْ؟ مُسْتَحِيلْ، رَانِي وَرِّيتْ الِّي اليْهُودْ وِاليُونَانِيِّينْ الكُلْهُمْ تَحْتْ السُّلْطَة مْتَاعْ الذَّنْبْ.

¹⁰كِيفْ مَا يْقُولْ الكْتَابْ المُقَدَّسْ: حَتَّى وَاحِدْ مَاهُو بَارْ، حَتَّى وَاحِدْ

¹¹حَتَّى وَاحِدْ مَا يِفْهِمْ حَتَّى وَاحِدْ مَا يْلَوِّجْ عْلَى رَبِّي.

¹²الكُلْهُمْ ضَلُّو، الكُلْهُمْ غُلْطُوا. حَتَّى وَاحِدْ مَا يَعْمِلْ البَاهِي، حَتَّى وَاحِدْ

¹³قْرَاجِمْهُمْ كِيفْ القْبُورَاتْ تْحَلُّوا وْيَخْدْعُوا فِي النَّاسْ بِلْسَانَاتْهُمْ. وْسِمْ اللْفَاعِي يُخْرُجْ مِنْ افَّامْهُمْ.

¹⁴فُمّْهُمْ مَلْيَانْ بِاللَّعْنَة وِالمْرَارَة.

¹⁵سَاقِيهُمْ خْفِيفَة كِتِجْرِي بَاشْ تُقْتُلْ الأَرْوَاحْ،

¹⁶وْفِي طْرِيقْهُمْ الخْرَابْ وِالمِيزِيرْيَا.

¹⁷وْمَا عَرْفُوشْ طْرِيقْ السَّلاَمْ.

¹⁸وْمَا يْخَافُوشْ مِنْ الله.

¹⁹تَوَّا أَحْنَا نَعْرْفُوا الِّي وَقْتِلِّي الشَّرِيعَة تْقُولْ أَيْ حَاجَة رَاهِي تْكَلِّمْ فِلِّي تُحْكُمْ فِيهُمْ الشَّرِيعَة، بَاشْ النَّاسْ الكُلْهُمْ يُسْكْتُوا وِالعَالَمْ الكُلُّو يْوَلِّي تَحْتْ حُكْمْ اللهْ.

²⁰حَتَّى وَاحِدْ مَا يْوَلِّي بَارْ عِنْدْ اللهْ كِيَعْمِلْ الشَّيْء الِّي تْقُولْ عْلِيهْ الشَّرِيعَة، رَاهُو بِالشَّرِيعَة تِتْعْرَفْ الذْنُوبْ.

²¹آمَا تَوَّا بَانْ كِيفَاشْ اللهْ يْرُدْ النَّاسْ أَبْرَارْ مِنْ غِيرْ الشَّرِيعَة وِالكْتُبْ المُقَدّْسَة الِّي يِشْهْدُوا بِالشَّيْء هَاذَا.

²²البِرْ مْتَاعْ اللهْ بِالإِيمَانْ بْيَسُوعْ المَسِيحْ لِلِّي يِمّْنُوا الكُلْهُمْ: رَاهُو مَا ثَمَّاشْ حَتَّى فَرْقْ بِينْ النَّاسْ.

²³مَا دَامْهُمْ الكُلْهُمْ عَمْلُوا الذْنُوبْ وِتْحِرْمُوا مِالمَجْدْ مْتَاعْ اللهْ.

²⁴وِالكُلْهُمْ وَلُّوا أَبْرَارْ بْلاَشْ وِبْنِعْمِةْ اللهْ عْلَى طْرِيقْ الفِدَاءْ مْتَاعْ المَسِيحْ يَسُوعْ

²⁵وِلِّي قَدّْمُو لِلنَّاسْ كَفَّارَة بِالإِيمَانْ بْدَمُّو، لِلِّي يِمّْنُوا بِيهْ الكُلْهُمْ. وِالله عْمَلْ الشَّيْء هَاذَاكَا بَاشْ يْوَرِّي البِرْ مْتَاعُو عْلَى خَاطِرْ اللهْ بْصَبْرُو غْفِرْ الذْنُوبْ الِّي تْعَمْلِتْ قْبَلْ.

²⁶يْوَرِّي البِرْ مْتَاعُو فِي الوَقْتْ الحَاضِرْ بَاشْ يْوَرِّي الِّي هُوَ بَارْ وِيْبَرِّرْ كُلْ مِنْ يِمِّنْ بْيَسُوعْ.

²⁷إِمَّالاَ عْلاَشْ نِتْفُوخْرُوا؟ مَا ثَمَّاشْ عْلاَشْ؟ بْأَيْ شَرِيعَةْ؟ شَرِيعِةْ الأَعْمَالْ؟ لاَ، رَاهُو بْشَرِيعِةْ الإِيمَانْ.

²⁸رَانَا نْقُولُوا الِّي الإِنْسَانْ يْوَلِّي بَارْ بِالإِيمَانْ مُوشْ بِالأَعْمَالْ مْتَاعْ الشَّرِيعَة.

²⁹وِلاَّ اللهْ إِلاَهْ اليْهُودْ آكَاهُو؟ يَاخِي مُوشْ إِلاَهْ الشْعُوبْ الأُخْرِينْ زَادَا؟ إِي نْعَمْ، هُوَ إِلاَهْ الشْعُوبْ الأُخْرِينْ زَادَا.

³⁰مَا دَامُو اللهْ وَاحِدْ وْبِشْ يْبَرِّرْ المْطَهّْرِينْ وِالمُوشْ مْطَهّْرِينْ بِالإِيمَانْ مْتَاعْهُمْ.

³¹يَاخِي أَحْنَا نْرُدُّوا الشَّرِيعَة مَا فِيهَاشْ فَايْدَة بِالإِيمَانْ؟ لاَ، بِالعَكْسْ أَحْنَا نْثَبّْتُوا الشَّرِيعَة.