Read Tunisian Arabic New Testament رُومِيَة 5 Bible Online

رُومِيَة 5 - Tunisian Arabic New Testament bible

رُومِيَة 5

¹إِمَّالاَ مَادَامْنَا وَلِّينَا أَبْرَارْ بِالإِيمَانْ خَلّي يْكُونْ عِنْدْنَا سَلاَمْ مْعَ اللهْ بْرَبّْنَا يَسُوعْ المَسِيحْ

²الّي بِيهْ هُوَ وَلِّينَا انَّجّْمُوا نُدْخْلُوا بِالإِيمَانْ لِلنِّعْمَة الِّي أَحْنَا فِيهَا تَوَّا ونِفْتَخْرُوا بِالأَمَلْ الِّي عِنْدْنَا فِي مَجْدْ اللهْ

³وْأَكْثِرْ مِنْ هَكَّا نَفْرْحُوا زَادَا فِي الأَوْقَاتْ الصْعِيبَة وْإِحْنَا عَارْفِينْ الِّي الأَوْقَاتْ الصْعِيبَة تْجِيبْ الصَّبْرْ.

⁴وْفِي الصَّبْرْ اخْبِبَارْ، وْفِي الاخْتِبَارْ رَجَاءْ،

⁵وِالرّجَاءْ فِي اللهْ مَا يْخَيِّبْنَاشْ، عْلَى خَاطِرْ اللهْ صَبْ مْحَبّْتُو في قْلُوبْنَا بِالرُّوحْ القُدُسْ الِّي عْطَاهُولْنَا.

⁶وْإِحْنَا مَازِلْنَا ضْعَافْ، مَاتْ المَسِيحْ عْلَى خَاطِرْ المِذْنْبِينْ فِي الوَقْتْ الِّي خْتَارُو اللهْ.

⁷صْعِيبْ بَاشْ الوَاحِدْ يْمُوتْ عْلَى خَاطِرْ إِنْسَانْ بَارْ، وْمُمْكِنْ الوَاحِدْ يِتْشَجَّعْ وِيْمُوتْ عْلَى خَاطِرْ إِنْسَانْ بَاهِي.

⁸آمَا اللهْ وَرَّانَا مْحَبّْتُو كِمَاتْ المَسِيحْ عْلَى خَاطِرْنَا وَقْتِلِّي أَحْنَا مَازِلْنَا مِذْنْبِينْ.

⁹مَا دَامْنَا تَوَّا وَلِّينَا مِتْبَرَرِينْ بْدَمُّو، زِيدْ عْلَى هَذا بَاشْ نُخْلْصُوا بِيهْ هُوَ مِالغَضَبْ مْتَاعْ اللهْ.

¹⁰رَاهُو إِذَا كُنَّا، وْنِحْنَا أَعْدَاءْ مْتَاعْ اللهْ تْصَالِحْنَا مْعَ اللهْ بِالمُوتْ مْتَاعْ إِبْنُو، إِمَّالاَ أَكْثِرْ مِنْ هَذَا تَوَّا وْإِحْنَا مِتْصَالْحِينْ مْعَاهْ بَاشْ نُخْلْصُوا بِحْيَاةْ إِبْنُو.

¹¹وْإِحْنَا زَادَا نَفْرْحُوا فِي اللهْ بْرَبّْنَا يَسُوعْ المَسِيحْ الِّي عْلَى طْرِيقُو تَوَّا تْصَالِحْنَا مْعَ اللهْ.

¹²هَاذَاكَا عْلاَشْ الخَطِيئَة جَاتْ لِلدِّنْيَا عْلَى طْرِيقْ إِنْسَانْ وَاحِدْ، وِالمُوتْ عْلَى طْرِيقْ الْخَطِيّة. وْهَكَّا النَّاسْ الكُلْهُمْ وَلاَّوْ يْمُوتُوا عْلَى خَاطِرْ الكُلْهُمْ عَمْلُوا الْخَطَايِا.

¹³الْخَطِيّة كَانتْ فِي العَالَمْ قْبَلْ مَا تِتْعْطَى الشَّرِيعَة. آمَا وِينْ مَا ثَمَّاشْ شَرِيعَةْ، الْخَطِيّة مَا يِتْحْسِبْشْ.

¹⁴آمَا مِنْ آدَمْ لْوَقْتْ مُوسَى المُوتْ حْكُمْ فِي البَشَرْ الكُلْهُمْ، حَتَّى فِي النَّاسْ الِّي مَا عَمْلُوشْ الْخَطَايا كِيفْ مَا عْمَلْ آدَمْ. وْكَانْ آدَمْ مِثَالْ لِلِّي بَاشْ يْجِي بَعْدُو.

¹⁵آمَا المَوْهْبَة مْتَاعْ اللهْ مَا هِيشْ كِيفْ الْخَطِيّة. إِذَا كَانْ بَرْشَة نَاسْ مَاتُوا بِسْبَبْ خَطِيّة إِنْسَانْ وَاحِدْ، رَاهِي النِّعْمَة مْتَاعْ اللهْ أَكْبِرْ ابَّرْشَة وِالعْطِيَّة مْتَاعُو الِّي عْطَاهَا لْبَرْشَة نَاسْ عْلَى طْرِيقْ النِّعْمَة مْتَاعْ إِنْسَانْ وَاحِدْ الِّي هُوَ يَسُوعْ المَسِيحْ.

¹⁶وْرَاهِي العْطِيَّة مَا هِيشْ كِيفْ الإِنْسَانْ الوَاحِدْ الِّي عْمَلْ خَطِيّة. الحُكْمْ الِّي جَا مِنْ خَطِيّة الإِنْسَانْ الوَاحِدْ خَلَّى النَّاسْ يِتْحْكُمْ عْلِيهُمْ. آمَا العْطِيَّة بِالنِّعْمَة، رَغْمِلِّي ثَمَّة بَرْشَة خَطايَا، جَابِتْ التَّبْرِيرْ.

¹⁷إِذَا كَانْ بِسْبَبْ الْخَطيّة مْتَاعْ الإِنْسَانْ الوَاحِدْ المُوتْ حْكُمْ فِي النَّاسْ عْلَى طْرِيقُو، قَدَّاشْ الِّي خْذَاوْ النِّعْمَة العْظِيمَة وِالعْطِيَّة مْتَاعْ البِرْ يُحْكْمُوا فِي الحَيَاةْ عْلَى طْرِيقْ إِنْسَانْ وَاحِدْ الِّي هُوَ يَسُوعْ المَسِيحْ!

¹⁸كِيفْ مَا خَطيّة وَاحِدْ خَلَّات النَّاسْ الكُلْهُمْ يِتْحْكَمْ عْلِيهُمْ، زَادَا بِرْ وَاحِدْ يْهِزْ النَّاسْ الكُلْهُمْ لِلبِرْ وِالحَيَاةْ.

¹⁹كِيفْ مَا بِالمَعْصْيَة مْتَاعْ الإِنْسَانْ الوَاحِدْ بَرْشَة نَاسْ تْرَدُّوا خَاطْئين، زَادَا بِالطَّاعَة مْتَاعْ الإِنْسَانْ الوَاحِدْ بَرْشَة نَاسْ بَاشْ يِتْرَدُّوا أَبْرَارْ.

²⁰الشَّرِيعَة جَاتْ بَاشْ الْخَطَايا تُكْثُرْ، آمَا وِينْ تُكْثُرْ الْخَطَايا تْزِيدْ تُكْثُرْ النِّعْمَة.

²¹بَاشْ كِيفْ مَا الخَطِيئَة حُكْمِتْ بَاشْ تْخَلِّي النَّاسْ يْمُوتُوا، النِّعْمَة زَادَا تُحْكُمْ عْلَى طْرِيقْ البِرْ بَاشْ تْخَلِّي النَّاسْ يَاخْذُوا الحَيَاةْ الأَبَدِيَّة عْلَى طْرِيقْ يَسُوعْ المَسِيحْ رَبّْنَا.