Read Tunisian Arabic New Testament رُومِيَة 6 Bible Online

رُومِيَة 6 - Tunisian Arabic New Testament bible

رُومِيَة 6

¹إِمَّالاَ آشْ بَاشْ نْقُولُوا؟ يَاخِي نُقْعْدُوا نْعِيشُوا فِي الخَطِيئَة بَاشْ النِّعْمَة تُكْثُرْ؟

²حَاشَا! أَحْنَا الِّي مُتْنَا عْلَى الخَطِيئَة كِيفَاشْ نَبْقَاوْ نْعِيشُوا فِيهَا؟

³وِلاَّ مَا كُمْشْ عَارْفِينْ الِّي أَحْنَا الكُلْنَا الِّي تْعَمِّدْنَا فِي المَسِيحْ يَسُوعْ تْعَمِّدْنَا بَاشْ نْمُوتُوا مْعَاهْ؟

⁴وْتِدْفِنَّا مْعَاهْ بِالمَعْمُودِيَّة لِلْمُوتْ، بَاشْ كِيفْ مَا المَسِيحْ قَامْ مِنْ بِينْ المُوتَى بِالمَجْدْ مْتَاعْ الآبْ، هَكَّا أَحْنَا زَادَا بَاشْ نْعِيشُوا فِي الحَيَاةْ الجْدِيدَة.

⁵رَاهُو كِيفْ مَا تْوَحِّدْنَا مْعَاهْ كِمُتْنَا كِيفُو، زَادَا بَاشْ نِتْوَحّْدُوا مْعَاهْ كِنْقُومُوا كِيفْ مَا قَامْ هُوَ.

⁶وْإِحْنَا نَعْرْفُوا الِّي الإِنْسَانْ القْدِيمْ الِّي فِينَا تِصْلَبْ مْعَاهْ بَاشْ البْدَنْ مْتَاعْ الخَطِيئَة يِفْنَى، وْمَا عَادِشْ بَاشْ نَبْقَاوْ عَبِيدْ مْتَاعْ الخَطِيئَة.

⁷رَاهُو الِّي يْمُوتْ يْوَلِّي حُرْ مِالسُّلْطَة مْتَاعْ الخَطِيئَة.

⁸آمَا إِذَا كَانْ مُتْنَا مْعَ المَسِيحْ، رَانَا نِمّْنُوا الِّي أَحْنَا زَادَا بَاشْ نَحْيَاوْ مْعَاهْ.

⁹وْنَعْرْفُوا إِنُّو المَسِيحْ بَعْدْ مَا قَيّْمُو اللهْ مِنْ بِينْ المُوتَى مُوشْ بَاشْ يْمُوتْ مَرَّة أُخْرَى وِالمُوتْ مُوشْ بَاشْ يْكُونْ عَنْدُو سُلْطَة عْلِيهْ،

¹⁰وْكَوْنُو مَاتْ، هَاذَا مَعْنَاهْ إِنُّو مَاتْ مَرَّة وَحْدَة عْلَى الخَطِيئَة. وِالحَيَاةْ الِّي بَاشْ يْعِيشْهَا رَاهُو يْعِيشْهَا لِلّه،

¹¹إِمَّالاَ إِنْتُومَا زَادَا يِلْزِمْكُمْ تِحْسْبُوا رْوَاحْكُمْ مُوتَى عْلَى الخَطِيئَة وْحَيِّينْ للهْ فِي المَسِيحْ يَسُوعْ.

¹²هَاذَاكَا عْلاَشْ مَا تْخَلِّيوْشْ الخَطِيئَة تْسَيْطِرْ عْلَى بْدُونَاتْكُمْ الفَانْيَة وِتْخَلِّيكُمْ اتَّبْعُوا الشْهَاوِي مْتَاعْهُمْ،

¹³مَا تْسَلّْمُوشْ الأَعْضَاءْ مْتَاعْ بْدُونَاتْكُمْ لِلخَطِيئَة بَاشْ يِتْعْمَلْ بِيهُمْ الشَّرْ، آمَا سَلّْمُوا رْوَاحْكُمْ للهْ كِيفْ نَاسْ رَجْعُوا مِالمُوتْ لِلحَيَاةْ، وسَلْمُوا الأَعْضَاءْ مْتَاعْكُمْ للهْ بَاشْ يِتْعْمَلْ بِيهُمْ البِرْ،

¹⁴رَاهِي الخَطِيئَة مَا عَادِشْ عِنْدْهَا حَتَّى سْيَادَة عْلِيكُمْ، مَا دَامْكُمْ مَا كُمْشْ تَحْتْ الشَّرِيعَة مْتَاعْ مُوسَى آمَا تَحْتْ النِّعْمَة.

¹⁵شْنُوَّة مَالاَ؟ يَاخِي نَعْمْلُوا الخَطِيئَة عْلَى خَاطِرْنَا مَا نَاشْ تَحْتْ الشَّرِيعَة آمَا تَحْتْ النِّعْمَة؟ حَاشَا!

¹⁶يَاخِي مَا تَعْرْفُوشْ الِّي إِذَا كَانْ تْسَلّْمُوا رْوَاحْكُمْ لأَيْ وَاحِدْ وِاطِّيعُوهْ كِيفْ العَبِيدْ، تْوَلِّيوْا العَبِيدْ مْتَاعُو؟ عَبِيدْ الخَطِيئَة الِّي تْهِزْ لِلمُوتْ وِلاَّ عَبِيدْ لِلطَّاعَة الِّي تْهِزْ لِلبِرْ.

¹⁷آمَا نُشْكْرُوا اللهْ إِنّْكُمْ إِنْتُومَا الِّي كُنْتُوا عَبِيدْ مْتَاعْ الخَطِيئَة وَلِّيتُوا اطِّيعُوا بِقْلُوبْكُمْ الكُلْهَا فِي التَّعْلِيمْ الِّي خْذِيتُوهْ،

¹⁸وِتْحَرِرْتُوا مِالخَطِيئَة وْوَلِّيتُوا عَبِيدْ مْتَاعْ البِرْ.

¹⁹نِتْكَلِّمْ كِيفْ بَشَرْ يْرَاعِي الِّي انْتُومَا مَا تْنَجّْمُوشْ تِفْهْمُونِي. إِمَّالاَ كِيفْ مَا سَلِّمْتُوا الأَعْضَاءْ مْتَاعْكُمْ لِلنْجَاسَة وِالفْسَادْ بَاشْ تَعْمْلُوا الشَّرْ، تَوَّا سَلْمُوا الأَعْضَاءْ مْتَاعْكُمْ كِيفْ عَبِيدْ لِلبِرْ بَاشْ تِتْقَدّْسُوا.

²⁰وْوَقْتِلِّي كُنْتُوا عَبِيدْ مْتَاعْ الخَطِيئَة، كُنْتُوا أَحْرَارْ مِالبِرْ.

²¹إِمَّالاَ شْنُوَّة اسْتْفِدْتُوا مِالحَاجَاتْ الِّي تَوَّا وَلِّيتُوا تِحْشْمُوا بِيهُمْ؟ رَاهُمْ الحَاجَاتْ هَاذُمْ إخّْرِتْهُمْ المُوتْ.

²²آمَا تَوَّا، بَعْدْ مَا تْحَرِرْتُوا مِالخَطِيئَة وْوَلِّيتُوا العَبِيدْ مْتَاعْ اللهْ، الشَّيْء الِّي رْبِحْتُوهْ هُوَ القَدَاسَة الِّي تْهِزْ لِلحَيَاةْ الأَبَدِيَّة،

²³رَاهُو الأَجْرْ مْتَاعْ الذْنُوبْ هُوَ المُوتْ، آمَا العْطِيَّة مْتَاعْ اللهْ هِيَ الحَيَاةْ الأَبَدِيَّة فِي المَسِيحْ يَسُوعْ رَبّْنَا.