Read Tunisian Arabic New Testament رُومِيَة 7 Bible Online

رُومِيَة 7 - Tunisian Arabic New Testament bible

رُومِيَة 7

¹يَاخِي مَا كُمْشْ عَارْفِينْ يَا الإِخْوَة، وْرَانِي نْكَلِّمْ فِي الِّي يَعْرْفُوا الشَّرِيعَة، الِّي الشَّرِيعَة عِنْدْهَا سُلْطَة عْلَى الإِنْسَانْ وَقْتِلِّي هُوَ حَيْ آكَاهُو؟

²وِالمْرَا المْعَرّْسَة تَرْبِطْهَا الشَّرِيعَة بْرَاجِلْهَا مَا دَامُو حَيْ، آمَا إِذَا كَانْ يْمُوتْ رَاجِلْهَا رَاهِي تِتْحَرِرْ مِالشَّرِيعَة الِّي تَرْبِطْهَا بِيهْ.

³إِمَّالاَ إِذَا كَانْ تِمْشِي مْعَ رَاجِلْ آخَرْ وَقْتِلِّي رَاجِلْهَا حَيْ رَاهِي تِتْسَمَّى زَانْيَة. آمَا إِذَا كَانْ رَاجِلْهَا يْمُوتْ تِتْحَرِرْ مِالشَّرِيعَة هَاذِي، وْمَا هِيشْ زَانْيَة إِذَا كَانْ تْعَرِّسْ بْرَاجِلْ آخَرْ.

⁴وْهَكَّا إِنْتُومَا زَادَا يَا إِخْوْتِي، مُتُّوا عْلَى شَرِيعِةْ مُوسَى عْلَى طْرِيقْ الْجَسَدْ مْتَاعْ المَسِيحْ بَاشْ تْوَلِّيوْا تَابْعِينْ لْوَاحِدْ آخَرْ، لِلِّي قَامْ مِنْ بِينْ المُوتَى، بَاشْ تْجِيبُوا ثَمَرْ للهْ.

⁵وَقْتِلِّي كُنَّا عَايْشِينْ حَسْبْ البْدَنْ، شْهَاوِي الذْنُوبْ مْتَاعْنَا الِّي ظَهّْرِتْهُمْ الشَّرِيعَة كَانُوا يِخْدْمُوا فِي أَعْضَاءْ البْدَنْ مْتَاعْنَا بَاشْ يْخَلُّونَا نْجِيبُوا ثَمَرْ لِلمُوتْ.

⁶آمَا تَوَّا رَانَا تْحَرِّرْنَا مِالشَّرِيعَة، كِمُتْنَا عْلَى هَاكَا الِّي كَانِتْ رَابْطِتْنَا، بَاشْ نِخْدْمُوا تَحْتْ الحَيَاةْ الجْدِيدَة مْتَاعْ الرُّوحْ القُدُسْ، مُوشْ تَحْتْ سُلْطِةْ القَانُونْ القْدِيمْ الِّي هُوَ مَكْتُوبْ.

⁷إِمَّالاَ آشْ بَاشْ نْقُولُوا؟ يَاخِي الشَّرِيعَة خَطِيئَة؟ حَاشَا؟ رَانِي مَا كُنْتِشْ بَاشْ نَعْرِفْ الخَطِيئَة كَانْ مَا جَاتِشْ ثَمَّة شَرِيعَةْ. مَا كُنْتِشْ بَاشْ نَعْرِفْ آشْ مَعْنَاهَا الشَّهْوَة لُوكَانْ الشَّرِيعَة مَا قَالِتْشْ: «مَا تِشْتْهَاشْ»

⁸آمَا الذْنُوبْ لْقَاتْ الفُرْصَة فِي الوْصِيَّة بَاشْ تْحَرِّكْ فِيَّ الشْهَاوِي الكُلْهَا، مِنْ غِيرْ شَرِيعَةْ الذْنُوبْ مِيتَة.

⁹قْبَلْ كُنْتْ نَحْيَى مِنْ غِيرْ الشَّرِيعَة مْتَاعْ مُوسَى، آمَا وَقْتِلِّي الوْصَايَا مْتَاعْ الشَّرِيعَة جَاتْ الذْنُوبْ حْيَاتْ.

¹⁰وْآنَا مُتْ، وِالوْصِيَّة الِّي تَعْطِي الحَيَاةْ، هَزِّتْنِي آنَا لِلمُوتْ،

¹¹رَاهِي الذْنُوبْ لْقَاتْ فُرْصِتْهَا فِي الوْصِيَّة، وْخِدْعِتْنِي وْقِتْلِتْنِي بِيهَا.

¹²إِمَّالاَ رَاهِي الشَّرِيعَة مُقَدّْسَة، وِالوْصِيَّة مُقَدّْسَة وْعَادْلَة وْصَالْحَة.

¹³يَاخِي الشَّيْء الصَّالِحْ اسَّبِبْلِي فِي المُوتْ؟ حَاشَا! رَاهِي الذْنُوبْ هِيَ الِّي خَلاَّتْنِي نْمُوتْ عْلَى طْرِيقْ الشَّيْء الصَّالِحْ، بَاشْ تُظْهُرْ عْلَى حْقِيقِتْهَا، وِعْلَى طْرِيقْ الوْصِيَّة تُظْهُرْ الِّي هِيَ مِذْنْبَة بَرْشَة.

¹⁴وْإِحْنَا نَعْرْفُوا الِّي الشَّرِيعَة رُوحِيَّة، آمَا آنَا رَانِي بَشَرْ تْبِعْتْ كِيفْ عَبْدْ لِلذْنُوبْ:

¹⁵مَا نِيشْ عَارِفْ عْلَى رُوحِي شْنُوَّة نَعْمِلْ، رَانِي الِّي نْحِبْ نَعْمْلُو مَا نَعْمْلُوشْ، وِلِّي مَا نْحِبِّشْ نَعْمْلُو نَعْمْلُو.

¹⁶وْكِنَعْمِلْ الشَّيْء الِّي مَا نْحِبُّوشْ، نْوَافِقْ الِّي الشَّرِيعَة صَالْحَة.

¹⁷إِمَّالاَ مَا نِيشْ آنَا الِّي قَاعِدْ نَعْمِلْ فِي الشَّيْء هَاذَاكَا، آمَا رَاهِي الذْنُوبْ الِّي سَاكْنَة فِيَّ

¹⁸رَانِي نَعْرِفْ الِّي مَا فِيَّ حَتَّى حَاجَة تُصْلُحْ، مَعْنَاهَا فِي بَدْنِي. نْحِبْ نَعْمِلْ الخِيرْ، آمَا مَا انَّجِّمْشْ نَعْمْلُو.

¹⁹رَانِي مَا نَعْمِلْشْ الخِيرْ الِّي نْحِبْ نَعْمْلُو، آمَا نَعْمِلْ الشَّرْ الِّي مَا نْحِبِّشْ نَعْمْلُو.

²⁰وْإِذَا كَانْ نَعْمِلْ الشَّيْء الِّي مَا نْحِبِّشْ نَعْمْلُو، رَانِي مَا نِيشْ آنَا الِّي نَعْمِلْ فِيهْ، رَاهِي الذْنُوبْ الِّي سَاكْنَة فِيَّ.

²¹إِمَّالاَ رَاهِي وَلاَّتْ كِيفْ القَانُونْ، كِنْحِبْ نَعْمِلْ الخِيرْ مَا نَلْقَى قُدَّامِي كَانْ الشَّرْ انَّجِّمْ نَعْمْلُو.

²²رَانِي فِي قَلْبِي نْحِبْ شَرِيعِةْ اللهْ أَكْثِرْ مَا يُمْكِنْ.

²³آمَا رَانِي نْشُوفْ فِي قَانُونْ آخَرْ فِي الأَعْضَاءْ مْتَاعِي يْحَارِبْ فِي القَانُونْ مْتَاعْ عَقْلِي وِيْخَلِّينِي مَرْبُوطْ فِي القَانُونْ مْتَاعْ الذْنُوبْ الِّي سَاكِنْ فِي الأَعْضَاءْ مْتَاعِي.

²⁴يَا وِيلِي آنَا الإِنْسَانْ المِسْكِينْ! شْكُونْ بَاشْ يْمَنَّعْنِي مِالبْدَنْ هَاذَا الِّي هَازْنِي لِلمُوتْ؟

²⁵نُشْكُرْ للهْ اللّي هَذَا تَمْ بْرَبْنَا يَسُوعْ المَسِيحْ. آنَا نِخْدِمْ فِي شَرِيعِةْ اللهْ بْعَقْلِي، آمَا نِخْدِمْ فِي قَانُونْ الذْنُوبْ ابَّدْنِي.