Read Tunisian Arabic New Testament رُومِيَة 8 Bible Online

رُومِيَة 8 - Tunisian Arabic New Testament bible

رُومِيَة 8

¹إِمَّالاَ مَا ثَمَّاشْ حَتَّى حُكْمْ تَوَّا عَلِّي هُومَا فِي المَسِيحْ يَسُوعْ،

²رَاهِي شَرِيعِةْ الرُّوحْ القُدُسْ مْتَاعْ الحَيَاةْ فِي المَسِيحْ يَسُوعْ حَرَرِتْنِي مِنْ قَانُونْ الذْنُوبْ وِالمُوتْ.

³عْلَى خاطِرْ اللّي كَانِتْ الشّريعَة عَاجْزَة عْلِيهْ بِخْصُوصْ اللّي كانْ ضْعيفْ بِطْبيعْتو الْجَسدِيّة، عَمْلُو الله كِي بْعَثْ ابْنُو في جَسَدْ يِشْبِهْ جَسَدْ الخَاطي، مِنْ أَجْلْ الْخطِيّة، وْحْكُمْ على الخَطِيّة في الْجَسدْ.

⁴بَاشْ يْتِمْ فِينَا أَحْنَا الشَّيْء الِّي تُفْرْضُو الشَّرِيعَة، أَحْنَا الِّي نْعِيشُوا كِيفْ مَا يْحِبْ الرُّوحْ القُدُسْ مُوشْ كِيفْ مَا يْحِبْ البْدَنْ.

⁵رَاهُمْ الِّي يْعِيشُوا كِيفْ مَا يْحِبْ البْدَنْ يْفَكّْرُوا فِي الحَاجَاتْ مْتَاعْ البْدَنْ، وِلِّي يْعِيشُوا كِيفْ مَا يْحِبْ الرُّوحْ القُدُسْ يْفَكّْرُوا فِي الحَاجَاتْ مْتَاعْ الرُّوحْ القُدُسْ.

⁶التَّفْكِيرْ فِي الحَاجَاتْ مْتَاعْ البْدَنْ يْهِزْ لِلمُوتْ، وِالتِّفْكِيرْ فِي الحَاجَاتْ مْتَاعْ الرُّوحْ القُدُسْ يْهِزْ لِلحَيَاةْ وِالسَّلاَمْ،

⁷رَاهُو التَّفْكِيرْ فِي الحَاجَاتْ مْتَاعْ البْدَنْ يْخَلِّي الإِنْسَانْ يْوَلِّي العْدُو مْتَاعْ اللهْ وْمَا يْطِيعِشْ الشَّرِيعَة مْتَاعْ اللهْ وْمَا يْنَجِّمْشْ يْطِيعْهَا.

⁸الِّي يْعِيشُوا كِيفْ مَا يْحِبْ البْدَنْ مَا يْنَجّْمُوشْ يْرَضِّيوْ اللهْ.

⁹آمَا إِنْتُومَا مَا كُمْشْ فِي البْدَنْ، إِذَا كَانْ رُوحْ اللهْ يُسْكُنْ فِيكُمْ رَاكُمْ فِي الرُّوحْ القُدُسْ، أَيْ وَاحِدْ مَا عِنْدُوشْ رُوحْ المَسِيحْ، رَاهُو مُوشْ تَابْعُو.

¹⁰آمَا إِذَا كَانْ المَسِيحْ فِيكُمْ، رَاهِي رْوَاحْكُمْ حَيَّة بِسْبَبْ البِرْ، رَغْمِلِّي بْدُونَاتْكُمْ مِيتَة بِسْبَبْ الخَطِيئَة.

¹¹إِذَا كَانْ رُوحْ الِّي قَيِّمْ يَسُوعْ مِنْ بِينْ المُوتَى يُسْكُنْ فِيكُمْ، رَاهُو الِّي قَيِّمْ المَسِيحْ يَسُوعْ مِنْ بِينْ المُوتَى بَاشْ يَعْطِي حَيَاةْ لِبْدُونَاتْكُمْ المِيتَة زَادَا عْلَى طْرِيقْ رُوحُو الِّي يُسْكُنْ فِيكُمْ.

¹²إِمَّالاَ يَا خْوَاتِي رَانَا مَدْيُونِينْ، مُوشْ لِلبْدَنْ بَاشْ نْعِيشُوا كِيفْ مَا يْحِبْ البْدَنْ.

¹³رَاكُمْ إِذَا كَانْ تْعِيشُوا كِيفْ مَا يْحِبْ البْدَنْ بَاشْ تْمُوتُوا، آمَا إِذَا كَانْ تُقْتْلُوا أَعْمَالْ البْدَنْ بِالرُّوحْ القُدُسْ رَاكُمْ بَاشْ تَحْيَاوْ.

¹⁴الِّي يْقُودْ فِيهُمْ رُوحْ اللهْ الكُلْهُمْ رَاهُمْ وْلاَدْ اللهْ،

¹⁵رَاكُمْ مَا خْذِيتُوشْ رُوحْ مْتَاعْ عَبِيدْ بَاشْ تْعِيشُوا فِي الخُوفْ، آمَا خْذِيتُوا الرُّوحْ مْتَاعْ وْلاَدْ اللهْ الِّي يْخَلِّيكُمْ تْعَيّْطُوا: «يَا بَابَا! يَا بُونَا!»

¹⁶وِالرُّوحْ القُدُسْ هُوَ بِيدُو يِشْهِدْ مْعَ رْوَاحْنَا الِّي أَحْنَا وْلاَدْ اللهْ.

¹⁷إِذَا كَانْ أَحْنَا وْلاَدْ اللهْ، مَعْنَاهَا رَانَا وَارْثِينْ: وَارْثِينْ اللهْ وْمِتْشَارْكِينْ فِي الوَرْثَة مْعَ المَسِيحْ، نِتْعَذّْبُوا مْعَاهْ بَاشْ انَّجّْمُوا نِتْمَجّْدُوا مْعَاهْ زَادَا.

¹⁸العْذَابْ الِّي نْعَانِيوْ فِيهْ فِي الوَقْتْ الحَاضِرْ مَا يْجِي حَتَّى شَيْء قُدَّامْ المَجْدْ الِّي بَاشْ يُظْهُرْ فِينَا فِي المُسْتَقْبِلْ.

¹⁹رَاهِي الخْلِيقَة تِسْتَنَّى وَقْتَاشْ بَرْكَة بَاشْ يُظْهْرُوا وْلاَدْ اللهْ.

²⁰الخْلِيقَة تْحَطِّتْ تَحْتْ البَاطِلْ مُوشْ بْإِرَادِتْهَا، آمَا بْإِرَادِةْ الِّي حَطّْهَا. وْبَاقِي مَازَالْ عِنْدْهَا أَمَلْ

²¹رَاهِي الخْلِيقَة بِيدْهَا بَاشْ تِتْحَرِرْ مِنْ عُبُودِيِّةْ الفْسَادْ مْتَاعْهَا وْتَاخُذْ الحُرِّيَّة مْتَاعْ مَجْدْ وْلاَدْ اللهْ.

²²أَحْنَا نَعْرْفُوا الِّي الخْلِيقَة الكُلْهَا تِتْعَذِّبْ لِليُومْ بِوْجَايِعْ كِيفْ وْجَايِعْ الوْلاَدَة.

²³وْمُوشْ الخْلِيقَة آكَاهُو، آمَا أَحْنَا بِيدْنَا الِّي عِنْدْنَا الغَلَّة الأُولَى مْتَاعْ الرُّوحْ القُدُسْ نِتْوَجّْعُوا فِي قْلُوبْنَا كِنِسْتَنَّاوْ بَاشْ اللهْ يْرُدّْنَا وْلاَدُو وْيِفْدِي بْدُونَاتْنَا.

²⁴رَانَا خْلُصْنَا بِالأَمَلْ. وْتَوَّا الأَمَلْ الِّي يِتْشَافْ مُوشْ أَمَلْ. شْكُونُو الِّي عَنْدُو أَمَلْ فِي حَاجَة يْشُوفْ فِيهَا؟

²⁵آمَا إِذَا كَانْ عِنْدْنَا أَمَلْ فِي الشَّيْء الِّي مَا نْشُوفُوهِشْ، رَانَا نِسْتَنَّاوْهْ وْإِحْنَا صَابْرِينْ.

²⁶وْهَكَّا زَادَا الرُّوحْ القُدُسْ يْعَاوِنَّا فِي ضَعْفْنَا. رَانَا مَا نَعْرْفُوشْ كِيفَاشْ نْصَلِّيوْ كِيفْ مَا يِلْزِمْ، آمَا الرُّوحْ القُدُسْ بِيدُو يِشْفَعْ فِينَا بِوْجَايِعْ مَا تِتْوْصُفْشْ.

²⁷آمَا اللهْ الِّي يَعْرِفْ بِالشَّيْء الِّي فِي القْلُوبْ يَعْرِفْ شْنُوَّة الرُّوحْ القُدُسْ يْفَكِّرْ. رَاهُو الرُّوحْ القُدُسْ يِشْفَعْ فِي المُؤْمْنِينْ كِيفْ مَا يْحِبْ اللهْ.

²⁸وْإِحْنَا نَعْرْفُوا الِّي الحَاجَاتْ الكُلْهَا تِخْدِمْ فِي مَصْلَحْةْ النَّاسْ الِّي يْحِبُّوا رَبِّي، الِّي عَيّْطِلْهُمْ كِيفْ مَا قْصَدْ.

²⁹هَاكَا الِّي عْرَفْهُمْ مِنْ قْبَلْ خْتَارْهُمْ مِنْ قْبَلْ بَاشْ يْكُونُوا عْلَى صُورِةْ إِبْنُو بَاشْ يْكُونْ الخُو الكْبِيرْ فِي وُسْطْ بَرْشَة إِخْوَة.

³⁰وْهَاكَا الِّي خْتَارْهُمْ مِنْ قْبَلْ نَادَالْهُمْ، وِلِّي نَادَالْهُمْ بَرِّرْهُمْ زَادَا، وِلِّي بَرِّرْهُمْ مَجِّدْهُمْ زَادَا.

³¹وْبَعْدْ هَاذَا الكُلْ، آشْ بَاشْ نْقُولُوا؟ إِذَا كَانْ اللهْ مْعَانَا، شْكُونْ بَاشْ يْكُونْ ضِدّْنَا؟

³²الِّي مَا بْخِلْشْ عْلِينَا بْإِبْنُو، آمَا سَلّْمُو لِلمُوتْ عْلَى خَاطِرْنَا الكُلْنَا، يَاخِي مُوشْ بَاشْ يَعْطِينَا مْعَاهْ كُلْ شَيْء؟

³³شْكُونْ بَاشْ يِتْهِمْ الِّي خْتَارْهُمْ اللهْ، اللهْ بِيدُو رَدّْهُمْ أَبْرَارْ؟

³⁴شْكُونْ الِّي بَاشْ يُحْكُمْ عْلِيهُمْ؟ مُوشْ المَسِيحْ يَسُوعْ، الِّي مَاتْ، وْهُوَ الِّي قَامْ مِنْ بِينْ المُوتَى، الِّي هُوَ عْلَى يْمِينْ اللهْ يِشْفَعْ فِينَا.

³⁵شْكُونْ بَاشْ يْبَعِّدْنَا عْلَى المْحَبَّة مْتَاعْ المَسِيحْ؟ يَاخِي الشِّدَّة وِلاَّ الضِّيقْ وِلاَّ الإِضْطِهَادْ وِلاَّ الجُّوعْ وِلاَّ العْرَى وِلاَّ الخْطَرْ وِلاَّ السِّيفْ؟

³⁶كِيفْ مَا هُوَ مَكْتُوبْ فِي الكْتَابْ المُقَدَّسْ: نِتْقِتْلُوا النْهَارْ الكُلُّو عْلَى خَاطْرِكْ تِحْسِبْنَا كِيفْ غْنَمْ لِلذَّبْحَانْ.

³⁷آمَا رَانَا فِي الحَاجَاتْ هَاذِي الكُلْهَا نِنْتَصْرُوا بَرْشَة بِلِّي حَبّْنَا.

³⁸رَانِي مِتْأَكِّدْ الِّي لاَ المُوتْ وْلاَ الحَيَاةْ، وْلاَ المْلاَيْكَة وْلاَ رُؤَسَاءْ المْلاَيْكَة، وْلاَ الحَاجَاتْ القْوِيَّة وْلاَ الحَاضِرْ وْلاَ المُسْتَقْبِلْ،

³⁹وْلاَ الحَاجَاتْ القْوِيَّة الِّي لْفُوقْ وْلاَ الحَاجَاتْ القْوِيَّة الِّي لُوطَا وْلاَ حَتَّى حَاجَة فِي الخْلِيقَة الكُلْهَا بَاشْ تِقْدِرْ تْبَعِّدْنَا عْلَى مْحَبِّةْ اللهْ فِي المَسِيحْ يَسُوعْ رَبّْنَا.