Read Tunisian Arabic New Testament رُومِيَة 9 Bible Online

رُومِيَة 9 - Tunisian Arabic New Testament bible

رُومِيَة 9

¹نْقُولْ الحَقْ فِي المَسِيحْ وْمَا نِيشْ نِكْذِبْ. وْضَمِيرِي يِشْهِدْلِي فِي الرُّوحْ القُدُسْ

²الِّي آنَا حْزِينْ بَرْشَة وْعِنْدِي وْجِيعَة فِي قَلْبِي مَا تُوفَاشْ

³رَانِي تْمَنِّيتْ لُوكَانْ آنَا بِيدِي مَحْرُومْ مِ المَسِيحْ عْلَى خَاطِرْ خْوَاتِي وْأَقَارْبِي فِي الدَّمْ.

⁴هُومَا شَعْبْ إِسْرَائِيلْ الِّي خْتَارُو اللهْ وْرَدّْهُمْ وْلاَدُو وْظَهّْرِلْهُمْ مَجْدُو وِعْطَاهُمْ عَهْدُو وِالشَّرِيعَة وِالعِبَادَة وِالوُعُودْ مْتَاعُو،

⁵وْمِنْهُمْ كَانُوا الجْدُودْ وْمِنْهُمْ جَا المَسِيحْ فِي البْدَنْ، الِّي هُوَ فُوقْ كُلْ شَيْء، إِلاَهْ مُبَارَكْ لِلأَبَدْ. آمِينْ.

⁶وْمَا نْقُولِشْ الِّي الوَعْدْ مْتَاعْ اللهْ مَا تَمِّشْ. رَاهُو مُوشْ بَنِي إِسْرَائِيلْ الكُلْهُمْ مِنْ بَنِي إِسْرَائِيلْ بِالحَقْ،

⁷وْمُوشْ ذُرِّيِّةْ إِبْرَاهِيمْ الكُلْهُمْ بَاشْ يْكُونُوا وْلاَدْ اللهْ. آمَا اللهْ قَالْ: «عْلَى طْرِيقْ إِسْحَاقْ بَاشْ تْكُونْ عِنْدِكْ ذُرِّيَّة.»

⁸وْهَاذَا مَعْنَاهْ الِّي مُوشْ الوْلاَدْ الِّي يْجِيوْ مِ اللحَمْ هُومَا وْلاَدْ اللهْ، آمَا الوْلاَدْ الِّي تُوعِدْ بِيهُمْ هُومَا الِّي يِتْحِسْبُوا ذُرِّيَّة.

⁹رَاهُو هَاذَا هُوَ الشَّيْء الِّي وْعِدْ بِيهْ اللهْ: «تَوْ نَرْجَعْلِكْ العَامْ الجَّايْ فِي الوَقْتْ هَاذَا وْسَارَّة بَاشْ تْجِيبْ وْلِدْ.»

¹⁰وْمُوشْ هَاذَا آكَاهُو، آمَا زَادَا وَقْتِلِّي رِفْقَة حِبْلِتْ وْجَابِتْ وْلاَدْ مِنْ رَاجِلْ وَاحِدْ الِّي هُوَ بُونَا إِسْحَاقْ.

¹¹وْبَاشْ يَبْقَى الشَّيْء الِّي عْلَى خَاطْرُو خْتَارْهُمْ اللهْ، وِلِّي هُوَ الدَّعْوَة مْتَاعُو مُوشْ الأَعْمَالْ، وَقْتِلِّي هُومَا مَازَالُوا مَا تْوِلْدُوشْ وْمَا زَالُوا مَا عَمْلُوشْ لاَ الخِيرْ وْلاَ الشَّرْ

¹²قَالِلْهَا اللهْ: «الكْبِيرْ بَاشْ يِخْدِمْ الصْغِيرْ.»

¹³كِيفْ مَا تِكْتِبْ فِي الكْتَابْ المُقَدَّسْ: «حَبِّيتْ يَعْقُوبْ وْ أقَلْ مِنُّو مْحَبّة عِيسُو.»

¹⁴إِمَّالاَ آشْ بَاشْ نْقُولُوا؟ يَاخِي اللهْ ظَالِمْ؟ حَاشَا!

¹⁵رَاهُو اللهْ قَالْ لْمُوسَى: نَرْحِمْ الِّي نَرْحِمْ وِنْحِنْ عَلِّي نْحِنْ عْلِيهْ.

¹⁶إِمَّالاَ مَا هِيشْ حْكَايِةْ قَدَّاشْ الإِنْسَانْ يْحِبْ وْيَسْعَى، آمَا بْرَحْمِةْ اللهْ.

¹⁷رَاهُو اللهْ قَالْ فِي الكْتَابْ المُقَدَّسْ لْفَرْعُونْ: «رْفَعْتِكْ بَاشْ نْوَرِّي فِيكْ قُوتِي وْإِسْمِي يِتْخَبِّرْ بِيهْ فِي الأَرْضْ الكُلْهَا.»

¹⁸إِمَّالاَ هُوَ يَرْحِمْ الِّي يْحِبْ وِيْقَسِّي قَلْبْ الِّي يْحِبْ.

¹⁹بَاشْ تْقُولُولِي: «عْلاَشْ اللهْ يْلُومْ فِي العْبَادْ؟ شْكُونُو الِّي يْنَجِّمْ يْخَالِفْ إِرَادْتُو؟»

²⁰آمَا شْكُونِكْ إِنْتِ يَا إِنْسَانْ بَاشْ تِتْشَكَّى عْلَى رَبِّي؟ يَاخِي الحَاجَة المَصْنُوعَة تْنَجِّمْ تْنَاقِشْ الِّي صْنَعْهَا وِتْقُلُّو: «عْلاَشْ صْنَعْتْنِي هَكَّا؟»

²¹تَوّا مُوشْ الِّي يَصْنَعْ فِي القْلاَلْ عَنْدُو سُلْطَة عْلَى الفُخَّارْ بَاشْ يَصْنَعْ مِالطِّينْ هُوَ بِيدُو قُلَّة عِنْدْهَا قِيمة وْقُلَّة مَا عِنْدْهَاشْ؟

²²وِالله زَادَا، كِحَبْ يْوَرِّي الغَضَبْ مْتَاعُو وِيْظَهِّرْ قُوتُو، تْحَمِّلْ بْصَبْرْ كْبِيرْ قْلاَلْ مْتَاعْ غَضَبْ تْصَنْعِتْ بَاشْ تِتْكَسِّرْ؟

²³بَاشْ يْظَهِّرْ الغْنَى مْتَاعْ مَجْدُو فِي القْلاَلْ مْتَاعْ الرَّحْمَة الِّي سْبِقْ وْحَضِّرْهَا لِلمَجْدْ،

²⁴وْمِنْ بِينْهُمْ أَحْنَا الِّي دْعَانَا مُوشْ مِاليْهُودْ آكَاهُو آمَا مِالشْعُوبْ الأُخْرِينْ زَادَا.

²⁵هَاذَا الشَّيْء الِّي قَالُو فِي كْتَابْ هُوشَعْ: الِّي مَا كَانُوشْ شَعْبِي بَاشْ انَّادِيلْهُمْ «شَعْبِي» وِلِّي مَا كَانِتْشْ حْبِيبْتِي بَاشْ انَّادِيهَا «حْبِيبْتِي»

²⁶وْفِي الكْتَابْ بِيدُو الِّي تقَالِلْهُمْ فِيهْ: مَا كُمْشْ شَعْبِي، بَاشْ يْنَادُولْهُمْ «وْلاَدْ اللهْ الحَيْ.»

²⁷وْإِشَعْيَاءْ يْصِيحْ عْلَى خَاطِرْ بَنِي إِسْرَائِيلْ: «حَتَّى إِذَا كَانْ بَنِي إِسْرَائِيلْ قَدْ الرْمَلْ مْتَاعْ البْحَرْ، بَاشْ يُخْلْصُوا شْوَيَّة مِنْهُمْ آكَاهُو،

²⁸رَاهُو الرَّبْ بَاشْ يُحْكُمْ عْلَى الأَرْضْ الحُكْمْ الإِخْرَانِي بْسُرْعَة.»

²⁹وْكِيفْ مَا قَالْ إِشَعْيَاءْ مِنْ قْبَلْ: إِذَا كَانْ رَبْ الجُنُودْ مَا خَلاَّشْ لِينَا ذُرِّيَّة، تَالِي رَانَا وَلِّينَا كِيفْ سَدُومْ وْوَلِّينَا نِشْبْهُوا لْعَمُورَة.

³⁰إِمَّالاَ آشْ بَاشْ نْقُولْ؟ الشْعُوبْ الأُخْرِينْ الِّي مَا سْعَاوْشْ بَاشْ يْكُونُوا أَبْرَارْ وَلُّوا أَبْرَارْ بِالإِيمَانْ.

³¹آمَا شَعْبْ إِسْرَائِيلْ الِّي سْعَى بَاشْ يْكُونْ بَارْ عْلَى طْرِيقْ الشَّرِيعَة مَا نَجِّمْشْ يْتَمِّمْ الشَّرِيعَة.

³²عْلاَشْ؟ عْلَى خَاطِرْهُمْ مَا سْعَاوْشْ لِلبِرْ بِالإِيمَانْ آمَا بِالأَعْمَالْ الِّي تُفْرُضْهَا الشَّرِيعَة، يَاخِي ادَّعْثْرُوا فِي الحَجْرَة الِّي تْعَثِّرْ،

³³كِيفْ مَا هُو مَكْتُوبْ فِي الكْتَابْ المُقَدَّسْ: هَانِي نْحُطْ فِي صِهْيُونْ حَجْرَة بَاشْ تْخَلِّي النَّاسْ يِتْعَثّْرُوا حَجْرَة بَاشْ تْخَلِّيهُمْ يْطِيحُوا آمَا الِّي يِمِّنْ بِيهْ مَا يْخِيبِشْ.