Read Tunisian Arabic New Testament كُورِنْثُوسْ الأَوِلْ 1 Bible Online

كُورِنْثُوسْ الأَوِلْ 1 - Tunisian Arabic New Testament bible

كُورِنْثُوسْ الأَوِلْ 1

¹مِنْ بُولُسْ الرَّسُولْ مْتَاعْ المَسِيحْ يَسُوعْ، وْمِالأَخْ سُوسْتَانِيسْ،

²لْكَنِيسِةْ اللهْ فِي كُورِنْثُوسْ، لِلِّي خْتَارْهُمْ اللهْ فِي المَسِيحْ يَسُوعْ وِدْعَاهُمْ بَاشْ يْكُونُوا قِدِّيسِينْ مْعَ النَّاسْ الكُلْهُمْ الِّي يِدْعِيوْ بْإِسْمْ رَبّْنَا يَسُوعْ المَسِيحْ فِي كُلْ بْلاَصَة، وِلِّي هُوَ رَبّْهُمْ وْرَبْنَا.

³النِّعْمَة وِالسَّلاَمْ لِيكُمْ مِنْ اللهْ بُونَا وِالرَّبْ يَسُوعْ المَسِيحْ.

⁴نُشْكُرْ اللهْ دِيمَا عْلَى خَاطِرْكُمْ وِعْلَى النِّعْمَة الِّي عْطَاهَالْكُمْ فِي المَسِيحْ يَسُوعْ.

⁵وْبِيهْ هُوَ وَلِّيتُوا غُنْيَا فِي كُلْ شَيْء، فِي الكْلاَمْ الكُلْ وْفِي المَعْرْفَة الكُلْهَا.

⁶بْقَدْرْ مَا ثِبْتِتْ فِيكُمْ الشّْهَادَة مْتَاعْ المَسِيحْ،

⁷مَا كُمْشْ نَاقْصِتْكُمْ حَتَّى مَوْهْبَة، وِانْتُمْومَا تِسْتَنَّاوْ فِي يَسُوعْ المَسِيحْ بَاشْ يُظْهُرْ،

⁸وْهُوَ الِّي يَحْفِظْكُمْ قْوِيِّينْ لِلإِخْرْ بَاشْ تْكُونُوا مَا عْلِيكُمْشْ لُومْ فِي اليُومْ الِّي بَاشْ يَرْجَعْ فِيهْ رَبّْنَا يَسُوعْ المَسِيحْ.

⁹اللهْ أَمِينْ وِتْنَجّْمُوا تَاثْقُوا فِيهْ وْهُوَ الِّي دْعَاكُمْ بَاشْ تْكُونْ عِنْدْكُمْ عَلاَقَة مْعَ ابْنُو يَسُوعْ المَسِيحْ رَبّْنَا.

¹⁰نُطْلُبْ مِنْكُمْ يَا إِخْوَة، بْإِسْمْ يَسُوعْ المَسِيحْ، بَاشْ تْكُونُوا الكُلْكُمْ مِتَّفْقِينْ فِي الرَّايْ وْمَا تْكُونُوشْ مِتْخَالْفِينْ، آمَا كُونُوا مِتَّفْقِينْ فِي كُلْ شَيْء، عِنْدْكُمْ رُوحْ وَاحِدْ وْفِكْرْ وَاحِدْ.

¹¹يَا إِخْوْتِي رَاهُو عِلْمُونِي عَايِلْةْ خُلُوِي الِّي ثَمَّة مَشَاكِلْ بِينَاتْكُمْ.

¹²نُقْصُدْ الِّي كُلْ وَاحِدْ فِيكُمْ يْقُولْ: «آنَا مْعَ بُولُسْ» وْ «آنَا مْعَ أَبُلُّوسْ» وْ «آنَا مْعَ بُطْرُسْ» وْ «آنَا مْعَ المَسِيحْ.»

¹³يَاخِي المَسِيحْ تِقْسِمْ؟ يَاخِي بُولُسْ هُوَ الِّي تِصْلَبْ عْلَى خَاطِرْكُمْ؟ وِلاَّ تْعَمِّدْتُو بْإِسْمْ بُولُسْ؟

¹⁴نُشْكُرْ اللهْ الِّي مَا عَمِّدْتِشْ حَتَّى وَاحِدْ مِنْكُمْ كَانْ كْرِيسْبُسْ وْغَايُوسْ،

¹⁵هَاذَاكَا عْلاَشْ حَتَّى حَدْ مَا يْنَجِّمْ يْقُولْ الِّي إِنْتُومَا تْعَمِّدْتُو بْإِسْمِي.

¹⁶آمَا زَادَا، عَمِّدْتْ عَايِلْةْ اسْتِفَانَاسْ. وْمَا عَدَا هَاذُومَا مَا نِتْذَكِّرْشْ رُوحِي عَمِّدْتْ وَاحِدْ آخَرْ.

¹⁷المَسِيحْ مَا بْعَثْنِيشْ بَاشْ نْعَمِّدْ، آمَا بْعَثْنِي بَاشْ نْبَشِّرْ مِنْ غِيرْ مَا نْعَمِّلْ عْلَى قُوِّةْ كْلاَمِي بَاشْ مُوتْ المَسِيحْ عْلَى الصَّلِيبْ مَا اطِّيحِشْ قِيمْتُو.

¹⁸كِلْمِةْ الصَّلِيبْ هِيَ جَهْلْ عِنْدْ النَّاسْ المَاشِينْ لِلهْلاَكْ. آمَا عِنْدْنَا أَحْنَا الِّي نْتَبّْعُوا فِي طْرِيقْ الخَلاَصْ، رَاهُي قُدْرِةْ اللهْ.

¹⁹رَاهُو مَكْتُوبْ فِي الكْتَابْ المُقَدَّسْ: بَاشْ نْغَلِّطْ الحِكْمَة مْتَاعْ الحُكَمَاءْ، وِانَّحِّي الحِيلَة مْتَاعْ الأذْكِيَاءْ.

²⁰وِينُو الحَكِيمْ؟ وِينُو الكَاتِبْ؟ وِينْهُمْ الِّي يْنَاقْشُوا فِي الزْمَانْ هَاذَا؟ يَاخِي مُوشْ اللهْ ظَهِّرْ الِّي الحِكْمَة مْتَاعْ العَالَمْ جَهْلْ؟

²¹مَا دَامُو اللهْ فِي حِكْمْتُو خَلَّى العَالَمْ مَا يَعْرْفُوشْ بِالحِكْمَة مْتَاعُو، إِمَّالاَ اللهْ حَبْ يْخَلِّصْ المُؤْمْنِينْ بِيهْ بِالجَهْلْ مْتَاعْ البْشَارَة.

²²وَقْتِلِّي اليْهُودْ يُطْلْبُو فِي المُعْجْزَاتْ، وِاليُونَانِيِّينْ يْلَوّْجُوا عْلَى الحِكْمَة.

²³أَحْنَا نْبَشّْرُوا بِالمَسِيحْ مَصْلُوبْ، وِالشَّيْء هَاذَا عَثْرَة عِنْدْ اليْهُودْ وْجَهْلْ عِنْدْ اليُونَانِيِّينْ.

²⁴آمَا عِنْدْ اليْهُودْ وِاليُونَانِيِّينْ الِّي دْعَاهُمْ اللهْ بَاشْ يِمّْنُوا، المَسِيحْ هُوَ قُدْرِةْ اللهْ وْحِكْمْتُو.

²⁵رَاهُو الجَهْلْ مْتَاعْ اللهْ أَحْكِمْ مِنْ النَّاسْ، وِالضَّعْفْ مْتَاعْ اللهْ أَقْوَى مِالنَّاسْ.

²⁶شُوفُوا يَا إِخْوَة كِيفَاشْ كُنْتُوا وَقْتِلِّي نَادَالْكُمْ اللهْ، مَا كَانُوشْ فِيكُمْ بَرْشَة نَاسْ حُكَمَاءْ بِالحِكْمَة مْتَاعْ البَشَرْ وِلاَّ نَاسْ قْوِيِّينْ وِلاَّ مِنْ النَّاسْ الوَاصْلِينْ.

²⁷آمَا اللهْ خْتَارْ الجُهَّالْ مْتَاعْ العَالَمْ بَاشْ يْحَشِّمْ الحُكَمَاءْ، وِخْتَارْ زَادَا الضْعَافْ مْتَاعْ العَالَمْ بَاشْ يْحَشِّمْ القْوِيِّينْ.

²⁸وِخْتَارْ اللهْ الِّي مَا عِنْدُوشْ حَتَّى قِيمَة وِالمَحْقُورْ وِلِّي مَا يِسْوَى حَتَّى شَيْء بَاشْ يْنَحِّي الِّي عَنْدُو قْدَرْ وْقِيمَة فِي العَالَمْ،

²⁹بَاشْ حَتَّى وَاحِدْ مَا يِتْفُوخِرْ قُدَّامْ اللهْ.

³⁰آمَا إِنْتُومَا، بْفَضْلْ اللهْ وَلِّيتُو فِي المَسِيحْ يَسُوعْ الِّي وَلاَّلْنَا حِكْمَة وْبِرْ وْقَدَاسَة وْفِدْيَة مِنْ عِنْدْ اللهْ.

³¹إِمَّالاَ كِيفْ مَا هُو مَكْتُوبْ فِي الكْتَابْ المُقَدَّسْ: «الِّي يِتْفُوخِرْ يِتْفُوخِرْ بِالرَّبْ.»