Read Tunisian Arabic New Testament كُورِنْثُوسْ الأَوِلْ 10 Bible Online

كُورِنْثُوسْ الأَوِلْ 10 - Tunisian Arabic New Testament bible

كُورِنْثُوسْ الأَوِلْ 10

¹يَا إِخْوْتِي مَا نْحِبّْكُمْشْ تَنْسُوا الِّي جْدُودْنَا الكُلْهُمْ كَانُوا مِحْمِينْ بِالسْحَابَة، وِالكُلْهُمْ شَقُّوا البْحَرْ،

²وِالكُلْهُمْ تْعَمّْدُوا مْعَ مُوسَى تَحْتْ السْحَابَة وْفِي البْحَرْ،

³وِالكُلْهُمْ كْلاَوْ نَفْسْ المَاكْلَة الرُّوحِيَّة،

⁴وِالكُلْهُمْ شَرْبُوا مَاء رُوحِي وَاحِدْ، وْشَرْبُوا مِنْ حَجْرَة رُوحِيَّة تِمْشِي مْعَاهُمْ، وِالحَجْرَة هَاذِي كَانِتْ المَسِيحْ.

⁵وِبْرَغْمْ هَاذَا اللهْ مَا رْضَاشْ عْلَى أَكْثِرْهُمْ هَاذَاكَا عْلاَشْ مَاتُوا فِي الصَّحْرَاء.

⁶الشَّيْء هَاذَا الكُلُّو بَاشْ يْكُونْ مِثَالْ لِينَا، بَاشْ مَا نِشْتْهَاوْشْ الشَّرْ كِيفْ مَا هُومَا شْتْهَاوْ،

⁷وْمَا تِعْبْدُوشْ الصْنَبْ كِيفْ مَا عَبْدُوهَا نَاسْ مِنْهُمْ، وْكِيفْ مَا يْقُولْ الكْتَابْ المُقَدَّسْ: «الشَّعْبْ قْعَدْ يَاكُلْ وْيُشْرُبْ، وِمْبَاعِدْ قَامُوا يَلْعْبُوا.»

⁸وْمَا نَزْنَاوْشْ كِيفْ مَا زْنَاوْ نَاسْ مِنْهُمْ، يَاخِي مَاتُوا مِنْهُمْ ثْلاَثَة وْعِشْرِينْ أَلْفْ فِي نْهَارْ وَاحِدْ.

⁹وْمَا نْجَرّْبُوشْ المَسِيحْ كِيمَا جَرّْبُوهْ نَاسْ مِنْهُمْ، وْقَتْلِتْهُمْ اللْفَاعِي.

¹⁰وْمَا تِتْشَكَّاوْشْ كِيفْ مَا تْشَكَّاوْ نَاسْ مِنْهُمْ، وْمَلاَكْ المُوتْ قْتَلْهُمْ.

¹¹وِالحَاجَاتْ هَاذِي الكُلْهَا جْرِتِّلْهُمْ بَاشْ تْكُونْ مِثَالْ لِينَا، وِتْكِتْبِتْ بَاشْ تْنَبِّهْنَا أَحْنَا الِّي قْرُبْنَا لْإِخْرْ الزْمَانْ.

¹²هَاذَاكَا عْلاَشْ الِّي مَاشِي فِي بَالُو الِّي هُوَ وَاقِفْ يْرُدْ بَالُو بَاشْ مَا يْطِيحِشْ.

¹³كُلْ امْتِحَانْ طُحْتُوا فِيهْ رَاهُو مُوشْ فُوقْ طَاقِتْكُمْ، آمَا اللهْ رَاهُو أَمِينْ وْمَا يْخَلِّيكُمْشْ اطِّيحُوا فِي امْتِحَانَاتْ أَكْثِرْ مِنْ طَاقِتْكُمْ، آمَا وَقْتِلِّي اطِّيحُوا فِي امْتِحَانْ يَعْطِيكُمْ القُوَّة بَاشْ تْنَجّْمُوا تِتْحَمّْلُوا.

¹⁴هَاذَاكَا عْلاَشْ، يَا حْبَابِي، أُهْرْبُوا مِنْ عْبَادِةْ الصْنَبْ.

¹⁵آنَا نْكَلِّمْ فِيكُمْ كِيفْ نَاسْ فَاهْمِينْ، إِمَّالاَ احْكْمُوا وَحَّدْكُمْ عْلَى الشَّيْء الِّي نْقُولْ فِيهْ:

¹⁶كِنُشْكْرُوا اللهْ عْلَى كَاسْ البَرْكَة وَقْتِلِّي نُشْرْبُوهْ يَاخِي مَا يْخَلِّينَاشْ مِتْشَارْكِينْ فِي دَمْ المَسِيحْ؟ الخُبْزْ الِّي نِقْسْمُوهْ وَقْتِلِّي نَاكْلُوهْ، يَاخِي مَا يْخَلِّينَاشْ مِتْشَارْكِينْ فِي بْدَنْ المَسِيحْ؟

¹⁷وْإِحْنَا الكُلْنَا بْدَنْ وَاحِدْ، عْلَى خَاطِرْ ثَمَّة خُبْزْ وَاحِدْ، وْإِحْنَا الكُلْنَا نِتْشَارْكُوا فِي الخُبْزْ هَاذَا.

¹⁸شُوفُوا بَنِي إِسْرَائِيلْ فِي الكْتَابْ المُقَدَّسْ: يَاخِي الِّي يَاكْلُوا الذْبَايِحْ الِّي فِي المَذْبَحْ مُوشْ مِتْشَارْكِينْ فِي المَذْبَحْ؟

¹⁹إِمَّالاَ شْنُوَّة بَاشْ نْقُولْ؟ يَاخِي الصَّنْبَة عِنْدْهَا قِيمَة، وِلاَّ الشَّيْء الِّي تِذْبَحْ لِلصَّنْبَة عَنْدُو قِيمَة؟

²⁰لاَ آمَا رَاهِي الذْبَايِحْ مْتَاعْ النَّاسْ الِّي مُوشْ يْهُودْ مَذْبُوحَة لِلشْوَاطِنْ، مُوشْ للهْ. وْآنَا مَا نْحِبّْكُمْشْ تْكُونُوا مِتْشَارْكِينْ مْعَ الشْوَاطِنْ.

²¹مَا تْنَجّْمُوشْ تُشْرْبُوا مِالكَاسْ مْتَاعْ الرَّبْ وْمِنْ كَاسْ الشْوَاطِنْ. مَا تْنَجّْمُوشْ تَاكْلُوا مِالطَّاوْلَة مْتَاعْ الرَّبْ وِالطَّاوْلَة مْتَاعْ الشْوَاطِنْ.

²²وِلاَّ بَاشْ نْخَلِّيوْ الرَّبْ يْغِيرْ؟ يَاخِي أَحْنَا أَقْوَى مِنُّو؟

²³«كُلْ شَيْء حْلاَلْ»، آمَا مُوشْ كُلْ شَيْء يِنْفَعْ. «كُلْ شَيْء حْلاَلْ»، آمَا مُوشْ كُلْ شَيْء يْعَاوِنْ.

²⁴الوَاحِدْ مَا يْلَوِّجْشْ عْلَى مَصْلَحْتُو، آمَا عْلَى مَصْلَحْةْ الأُخْرِينْ.

²⁵كُولُوا مِاللْحَمْ الكُلْ الِّي يِتْبَاعْ فِي السُّوقْ مِنْ غِيرْ مَا تِسْأْلُوا عْلَى حَتَّى شَيْء بَاشْ تْرَضِّيوْ ضَمِيرْكُمْ.

²⁶وِالكْتَابْ المُقَدَّسْ يْقُولْ: «الأَرْضْ وْكُلْ مَا فِيهَا مِلْكْ لِلرَّبْ.»

²⁷وْإِذَا سْتَدْعَاكُمْ وَاحِدْ مُوشْ مُؤْمِنْ وِمْشِيتُوا بِحْذَاهْ، كُولُوا أَيْ حَاجَة يْحُطّْهَالْكُمْ مِنْ غِيرْ مَا تِسْأْلُوا بَاشْ تْرَضِّيوْ ضَمِيرْكُمْ.

²⁸آمَا إِذَا كَانْ قَالِلْكُمْ وَاحِدْ: «الذْبِيحَة هَاذِي رَاهِي لِلصْنَبْ»، مَا تَاكْلُوشْ مِنْهَا، عْلَى خَاطِرْ الِّي قَالِلْكُمْ وِعْلَى خَاطِرْ ضَمِيرْكُمْ.

²⁹وْمَا نُقْصُدْشْ ضَمِيرْكُمْ انْتُمْ، آمَا ضَمِيرْ غِيرْكُمْ. عْلاَشْ حُرِّيتِي يِتْحَكِّمْ فِيهَا ضَمِيرْ غِيرِي؟

³⁰وْإِذَا كْلِيتْ مَاكْلَة وِشْكَرْتْ رَبِّي عْلِيهَا، عْلاَشْ يِتْبَلُّوا عْلِيَّ بِسْبَبْ المَاكْلَة الِّي شْكَرْتْ اللهْ عْلِيهَا؟

³¹إِذَا تَاكْلُوا وِلاَّ تُشْرْبُوا، وِلاَّ تَعْمْلُوا أَيْ حَاجَة، أَعْمْلُوا كُلْ شَيْء لْمَجْدْ اللهْ.

³²مَا تْكُونُوشْ عَثْرَة لِليْهُودْ وِلاَّ اليُونَانِيِّينْ وِلاَّ لْكَنِيسِةْ اللهْ،

³³كُونُوا كِيفِي، آنَا نْحَاوِلْ بَاشْ نْرَضِّي النَّاسْ الكُلْ فِي أَيْ حَاجَة نَعْمِلْهَا، وْمَا نْلَوِّجْشْ عْلَى مَصْلِحْتِي، آمَا نْلَوِّجْ عْلَى الخِيرْ لْبَرْشَة نَاسْ بَاشْ يُخْلْصُوا.