Read Tunisian Arabic New Testament كُورِنْثُوسْ الأَوِلْ 11 Bible Online

كُورِنْثُوسْ الأَوِلْ 11 - Tunisian Arabic New Testament bible

كُورِنْثُوسْ الأَوِلْ 11

¹تَبّْعُونِي كِيفْ مَا آنَا نْتَبِّعْ فِي المَسِيحْ.

²نَحْكِي عْلِيكُمْ بِالبَاهِي عْلَى خَاطِرْكُمْ دِيمَا تِتْذَكّْرُونِي فِي كُلْ شَيْء وِتْحَافْظُوا عْلَى التَّقَالِيدْ كِيفْ مَا عْطِيتْهَالْكُمْ.

³آمَا نْحِبّْكُمْ تَعْرْفُوا الِّي المَسِيحْ رَاسْ الرَّاجِلْ، وِالرَّاجِلْ رَاسْ المْرَا، وِالله رَاسْ المَسِيحْ.

⁴كُلْ رَاجِلْ يْصَلِّي وِلاَّ يِتْنَبَّأْ وْرَاسُو مْغُطِّي، يْهِينْ رَاسُو،

⁵وْكُلْ مْرَا تْصَلِّي وِلاَّ تِتْنَبَّأْ وْرَاسْهَا مُوشْ مْغُطِّي تْهِينْ رَاسْهَا، كَإِنّْهَا شْعَرْهَا مْحَجِّمْ.

⁶وْإِذَا كَانْ المْرَا مَا تْغَطِّيشْ رَاسْهَا، خِيرِلْهَا تْقُصْ شْعَرْهَا، آمَا إِذَا كَانْ عِيبْ عْلَى المْرَا بَاشْ تْقُصْ شْعَرْهَا وِلاَّ تْحَجّْمُو، إِمَّالاَ تْغَطِّي رَاسْهَا خِيرْ.

⁷وِالرَّاجِلْ مَا يِلْزْمُوشْ يْغَطِّي رَاسُو عْلَى خَاطْرُوا صُورِةْ اللهْ وْمَجْدُو، آمَا المْرَا رَاهِي المَجْدْ مْتَاعْ الرَّاجِلْ،

⁸مُوشْ الرَّاجِلْ هُوَ الِّي جَا مِالمْرَا، آمَا المْرَا هِيَ الِّي جَاتْ مِالرَّاجِلْ،

⁹وْمُوشْ الرَّاجِلْ الِّي تِخْلَقْ مِ المْرَا، آمَا المْرَا هِيَ الِّي تْخَلْقِتْ مِ الرَّاجِلْ.

¹⁰هَاذَاكَا عْلاَشْ المْرَا يِلْزِمْهَا تْكُونْ عِنْدْهَا عَلاَمَة مْتَاعْ سُلْطَة عْلَى رَاسْهَا، عْلَى خَاطِرْ المْلاَيْكَة.

¹¹وْبِالنِّسْبَة لِلرَّبْ المْرَا مَا تْنَجِّمْشْ تْكُونْ مِنْ غِيرْ الرَّاجِلْ، وِالرَّاجِلْ مَا يْنَجِّمْشْ يْكُونْ مِنْ غِيرْ المْرَا.

¹²كِيفْ مَا المْرَا جَاتْ مِالرَّاجِلْ، الرَّاجِلْ زَادَا مَوْجُودْ بالمْرَا، وْكُلْ شَيْء جَا مِنْ عِنْدْ اللهْ.

¹³احْكْمُوا بِينْكُمْ وْبِينْ رْوَاحْكُمْ: يَاخِي يْلِيقْ بِالمْرَا بَاشْ تْصَلِّي للهْ وْرَاسْهَا مُوشْ مْغُطِّي؟

¹⁴وِلاَّ مُوشْ العَادَة بِيدْهَا تْعَلِّمْكُمْ الِّي عِيبْ عْلَى الرَّاجِلْ بَاشْ يْطَوِّلْ شَعْرُو،

¹⁵آمَا مُوشْ فُخْرَة لِلمْرَا وَقْتِلِّي اطَّوِّلْ شْعَرْهَا؟ عْلَى خَاطِرْ اللهْ عْطَاهَا الشْعَرْ بَاشْ يُسْتُرْهَا.

¹⁶آمَا إِذَا كَانْ وَاحِدْ يْحِبْ المَشَاكِلْ، رَاهُو الشَّيْء هَاذَا مُوشْ فِي عْوَايِدْنَا وْلاَ فِي عْوَايِدْ كَنَايِسْ اللهْ.

¹⁷وِلِّي بَاشْ نْقُولْهُولْكُمْ تَوَّا رَاهُو مُوشْ بَاشْ نُفْخُرْكُمْ، عْلَى خَاطِرْ إِجْتِمَاعَاتْكُمْ تْضُرْ أَكْثِرْ مِلِّي تِنْفَعْ.

¹⁸قْبَلْ كُلْ شَيْء، سْمَعْتْ الِّي وَقْتِلِّي تِجْتَمْعُوا فِي الكَنِيسَة تِتْقِسْمُوا كُلْ جْمَاعَة وَحَّدْهُمْ. وْآنَا بْدِيتْ نْصَدِّقْ فِي الشَّيْء هَاذَا،

¹⁹بِالرَّسْمِي لاَزِمْ تَاقَعْ الإِنْقِسَامَاتْ مَا بِينَاتْكُمْ بَاشْ يُظْهْرُوا المُؤْمْنِينْ بِالحَقْ.

²⁰وْإِنْتُومَا تِجْتَمْعُوا مُوشْ بَاشْ تَاكْلُوا عْشَاء الرَّبْ

²¹عْلَى خَاطِرْ وَقْتِلِّي تَاكْلُوا كُلْ وَاحِدْ مِنْكُمْ يَاخُذْ فِي الأُوِّلْ العْشَاء مْتَاعُو، وْهَكَّا وَاحِدْ يْجُوعْ وِالآخَرْ يِسْكِرْ.

²²يَاخِي مَا عِنْدْكُمْشْ دْيَارْ تَاكْلُوا فِيهَا وْتُشْرْبُوا؟ وِلاَّ تِتْمَسْخْرُوا عْلَى كَنِيسِةْ اللهْ وِتْحَشّْمُوا فِي النَّاسْ الِّي مَا عِنْدْهُمْشْ؟ شْنُوَّة نْقُولِلْكُمْ؟ يَاخِي نَحْكِي عْلِيكُمْ بِالبَاهِي؟ آنَا مَا نَحْكِيشْ عْلِيكُمْ بِالبَاهِي فِي الحَاجَة هَاذِي.

²³رَانِي خْذِيتْ مِنْ عِنْدْ الرَّبْ الشَّيْء الِّي عْطِيتْهُولْكُمْ، الِّي الرَّبْ يَسُوعْ فِي اللِّيلَة الِّي سَلْمُوهْ فِيهَا خْذَا خُبْزَة

²⁴وْشْكَرْ وِقْسِمْ وْقَالْ: «هَاذَا جَسدِي الِّي تِعْطَى عْلَى خَاطِرْكُمْ. أَعْمْلُوا الشَّيْء هَاذَا بَاشْ تِتْذَكّْرُونِي.»

²⁵وِخْذَا الكَاسْ بَعْدْ العْشَاء وْقَالْ: «الكَاسْ هَاذَا هُوَ العَهْدْ الجْدِيدْ بْدَمِّي. أَعْمْلُوا الشَّيْء هَاذَا كُلْ مَا تُشْرْبُوا بَاشْ تِتْذَكّْرُونِي.»

²⁶رَاكُمْ كُلْ مَا تَاكْلُوا الخُبْزْ وْتُشْرْبُوا الكَاسْ تْخَبّْرُوا عْلَى مُوتْ الرَّبْ حَتَّى لِينْ يْجِي.

²⁷إِمَّالاَ أَيْ وَاحِدْ يَاكُلْ الخُبْزْ وْيُشْرُبْ الكَاسْ مْتَاعْ الرَّبْ وْهُوَ مَا يِسْتْحَقّْهُمْشْ رَاهُو بَاشْ يُغْلُطْ فِي حَقْ الْجَسَدْ وِالدَّمْ مْتَاعْ الرَّبْ.

²⁸إِمَّالاَ كُلْ وَاحِدْ يْتْأَكِّدْ مِنْ رُوحُو قْبَلْ وِمْبَاعِدْ خَلِّي يَاكُلْ مِالخُبْزْ وْيُشْرُبْ مِالكَاسْ،

²⁹عْلَى خَاطِرْ الِّي يَاكُلْ وْيُشْرُبْ وْهُوَ مَا يْرَاعِيشْ جَسَدْ الرَّبْ رَاهُو اللهْ بَاشْ يُحْكُمْ عْلِيهْ وَقْتِلِّي يَاكُلْ وْيُشْرُبْ.

³⁰هَاذَاكَا عْلاَشْ فِيكُمْ بَرْشَة نَاسْ مُرْضَى وِضْعَافْ وْثَمَّة شْكُونْ مِنْكُمْ مَاتْ.

³¹كَانْ حْكَمْنَا عْلَى رْوَاحْنَا بِالصْحِيحْ تَالِي رَاهُو مَا تِحْكَمْشْ عْلِينَا.

³²آمَا رَاهُو الرَّبْ يُحْكُمْ عْلِينَا وِيْأَدِّبْ فِينَا بَاشْ مَا يِتْحْكَمْشْ عْلِينَا مْعَ العَالَمْ.

³³إِمَّالاَ يَا خْوَاتِي وَقْتِلِّي تِجْتَمْعُوا بَاشْ تَاكْلُوا، اسْتَنَّاوْ بْعَضْكُمْ.

³⁴إِذَا كَانْ وَاحِدْ جِيعَانْ خَلِّيهْ يَاكُلْ فِي دَارُو، بَاشْ اللهْ مَا يُحْكُمْشْ عْلِيكُمْ وْإِنْتُومَا مُجْتَمْعِينْ. آمَا فِي مَا يْخُصْ الحَاجَاتْ الأُخْرَى تَوْ كِيفْ نْجِي نْقُلْكُمْ آشْ تَعْمْلُوا.