Read Tunisian Arabic New Testament كُورِنْثُوسْ الأَوِلْ 12 Bible Online

كُورِنْثُوسْ الأَوِلْ 12 - Tunisian Arabic New Testament bible

كُورِنْثُوسْ الأَوِلْ 12

¹وْتَوَّا فِي مَا يْخُصْ المَوَاهِبْ الرُّوحِيَّة، يَا إِخْوْتِي، مَا نْحِبْكُمْشْ تْكُونُوا جَاهْلِينْ بِيهَا.

²إِنْتُومَا تَعْرْفُوا الِّي وَقْتِلِّي كُنْتُوا مِالشْعُوبْ الِّي مَا يَعْرْفُوشْ اللهْ، كُنْتُوا تِجْرِيوْ وْرَاء الصْنَبْ الِّي مَا تِتْكَلِّمْشْ وْكُنْتُوا ضَالِّينْ.

³هَاذَاكَا عْلاَشْ نْحِبّْكُمْ تَعْرْفُوا الِّي حَتَّى حَدْ مَا يْقُولْ بِالرُّوحْ القُدُسْ الِّي يَسُوعْ مَلْعُونْ، وْحَتَّى حَدْ مَا يْنَجِّمْ يْقُولْ الِّي يَسُوعْ رَبْ كَانْ بِالرُّوحْ القُدُسْ.

⁴ثَمَّة بَرْشَة أَنْوَاعْ مْتَاعْ مَوَاهِبْ رُوحِيَّة، آمَا الرُّوحْ وَاحِدْ.

⁵وْثَمَّة بَرْشَة أَنْوَاعْ مْتَاعْ خْدِمْ فِي الكَنِيسَة، آمَا الرَّبْ وَاحِدْ.

⁶وْثَمَّة بَرْشَة طُرُقْ مْتَاعْ خْدِمْ، آمَا اللهْ الِّي يَعْطِي القُدْرَة لِلنَّاسْ الكُلْ وَاحِدْ.

⁷آمَا اللهْ يْظَهِّرْ الرُّوحْ مْتَاعُو لْكُلْ وَاحِدْ وْهَاذَا لْمَنْفِعْةْ النَّاسْ الكُلْ.

⁸وَاحِدْ يَعْطِيهْ الرُّوحْ كْلاَمْ حِكْمِةْ، وْوَاحِدْ آخَرْ يَعْطِيهْ الرُّوحْ هُوَ بِيدُو كْلاَمْ عِلْمْ.

⁹وِالرُّوحْ هُوَ بِيدُو يَعْطِي إِيمَانْ لْوَاحِدْ آخَرْ وْهُوَ بِيدُو يَعْطِي مَوَاهِبْ شِفَاءْ لْوَاحِدْ آخَرْ،

¹⁰لْوَاحِدْ آخَرْ القُدْرَة بَاشْ يَعْمِلْ مُعْجْزَاتْ، وِلآخَرْ بَاشْ يِتْنَبَّأ، وِلآخَرْ بَاشْ يْفَرِّقْ بِينْ الأَرْوَاحْ، وِلآخَرْ بَاشْ يِتْكَلِّمْ بْلُغَاتْ مُوشْ مَفْهُومَة، وِلآخَرْ بَاشْ يْتَرْجِمْهَا.

¹¹الحَاجَاتْ هَاذِي الكُلْهَا يَعْمِلْهَا الرُّوحْ الوَاحِدْ هُوَ بِيدُو وِيْوَزِّعْ عْلَى كُلْ وَاحِدْ كِيفْ مَا يْحِبْ.

¹²كِيفْ مَا الْجَسدْ وَاحِدْ وْعِنْدُو بَرْشَة أَعْضَاءْ وْهِيَ جَسَدْ وَاحِدْ رَغْمِلِّي هِيَ بَرْشَة، وْهَكَّاكَا زَادَا المَسِيحْ.

¹³إِذَا كَانْ أَحْنَا لْكُلْنَا، يْهُودْ وِلاَّ يُونَانِيِّينْ، عَبِيدْ وِلاَّ أَحْرَارْ، تْعَمِّدْنَا بْرُوحْ وَاحِدْ بَاشْ نْكُونُوا جَسَدْ وَاحِدْ، وِشْرَبْنَا مِنْ رُوحْ وَاحِدْ.

¹⁴الْجَسَدْ مُوشْ عُضْوْ وَاحِدْ، آمَا بَرْشَة أَعْضَاءْ.

¹⁵إِذَا قَالِتْ السَّاقْ: «مَانِيشْ يِدْ، إِمَّالاَ آنَا مَا نِيشْ مِالْجَسَدْ.»

¹⁶إِذَا قَالِتْ الوْذِنْ: «مَا نِيشْ عِينْ، إِمَّالاَ مَا نِيشْ مِالْجَسَدْ»، تْنَجِّمْشْ تْوَلِّي مُوشْ مِالْجَسَدْ؟

¹⁷إِذَا كَانْ الْجَسدْ الكُلُّو عِينْ، كِيفَاشْ نِسْمْعُوا؟ وْإِذَا كَانْ الْجَسَدْ الكُلُّو وْذِنْ، كِيفَاشْ نْشِمُّوا؟

¹⁸آمَا اللهْ حَطْ كُلْ عُضْوْ فِي الْجَسَدْ كِيفْ مَا حَبْ.

¹⁹لُو كَانْ جَاوْ الكُلْهُمْ عُضْوْ وَاحِدْ إِمَّالاَ فِينُو الْجَسَدْ؟

²⁰إِمَّالاَ ثَمَّة بَرْشَة أَعْضَاءْ وْجَسَدْ وَاحِدْ.

²¹العِينْ مَا تْنَجِّمْشْ تْقُولْ لِليِدْ: «مَا نِيشْ فِي حَاجَة لِيكْ.» وِلاَّ الرَّاسْ يْقُولْ لِلسَّاقِينْ: «مَا نِيشْ فِي حَاجَة لِيكُمْ!»

²²وْبِالعَكْسْ أَعْضَاءْ الْجَسَدْ الِّي تُظْهْرِلْنَا أَضْعِفْ مِنْ غِيرْهَا هِيَ لاَزْمَة،

²³وْأَعْضَاءْ الْجَسَدْ الِّي نِعْتَبْرُوهُمْ أَقَلْ كَرَامَة نَعْطِيوْهُمْ كَرَامَة أَكْثِرْ، الأَعْضَاءْ الِّي نَحْشْمُوا بِيهُمْ نَعْمْلُولْهُمْ قِيمَة أَكْثِرْ.

²⁴آمَا الأَعْضَاءْ البَاهْيَة، مَا تِحْتَاجِشْ لْهَاذَا. آمَا اللهْ نَظِّمْ الْجَسَدْ بَاشْ الأَعْضَاءْ الضْعِيفَة تْكُونْ لِيهَا كَرَامَة أَكْثِرْ،

²⁵بَاشْ الْجَسَدْ مَا يِتْقْسِمْشْ آمَا الأَعْضَاءْ الكُلْهَا تِتْلْهَى بِبْعَضْهَا.

²⁶إِذَا كَانْ عُضْوْ يِتْوَجَّعْ، الأَعْضَاءْ الكُلْهَا تِتْوَجَّعْ مْعَاهْ، إِذَا كَانْ عُضْوْ تْوَلِّي عَنْدُو كَرَامَة، الأَعْضَاءْ الكُلْهَا تَفْرَحْ مْعَاهْ.

²⁷إِنْتُومَا تَوَّا جَسَدْ المَسِيحْ، وْكُلْ وَاحِدْ مِنْكُمْ عُضْوْ فِيهْ.

²⁸وْهَاذُومَا النَّاسْ الِّي حَطّْهُمْ اللهْ فِي الكَنِيسَة الرُّسُلْ فِي الأُوِّلْ وِالأَنْبِيَاءْ الثَّانِينْ وِالمُعَلّْمِينْ الثَّالْثِينْ، وِمْبَاعِدْ الِّي يَعْمْلُوا فِي المُعْجْزَاتْ وِمْبَاعِدْ المَوَاهِبْ مْتَاعْ الشْفَاءْ وِلِّي يْعَاوْنُوا وِلِّي يْنَظّْمُوا وِلِّي يِتْكَلّْمُوا بْلُغَاتْ مُوشْ مَفْهُومَة.

²⁹يَاخِي الكُلْهُمْ رُسُلْ وِالكُلْهُمْ أَنْبِيَاءْ وِالكُلْهُمْ مُعَلّْمِينْ وِالكُلْهُمْ يَعْمْلُوا فِي المُعْجْزَاتْ

³⁰وِالكُلْهُمْ عِنْدْهُمْ مَوَاهِبْ شِفَاءْ وِالكُلْهُمْ يِتْكَلّْمُوا بْلُغَاتْ مُوشْ مَفْهُومَة وِالكُلْهُمْ يْتَرْجْمُوا فِيهَا؟

³¹آمَا اسْعَاوْ لِلمَوَاهِبْ الِّي هُومَا خِيرْ مِالأُخْرِينْ؟ وْآنَا نْوَرِّيكُمْ طْرِيقْ خِيرْ مِنْهُمْ الكُلْ.