Read Tunisian Arabic New Testament كُورِنْثُوسْ الأَوِلْ 14 Bible Online

كُورِنْثُوسْ الأَوِلْ 14 - Tunisian Arabic New Testament bible

كُورِنْثُوسْ الأَوِلْ 14

¹خَلِّيوْ المْحَبَّة تْكُونْ أَكْثِرْ حَاجَة تَسْعَاوْلْهَا، وْأَسْعَاوْ زَادَا لِلمَوَاهِبْ الرُّوحِيَّة، وْبِالأَخَصْ المَوْهْبَة مْتَاعْ النُّبُوَّة.

²الِّي يِتْكَلِّمْ بْلُغَاتْ مُوشْ مَفْهُومَة رَاهُو يْكَلِّمْ فِي اللهْ مُوشْ فِي النَّاسْ، وْحَتَّى حَدْ مَا يِفْهْمُو آشْ يْقُولْ، عْلَى خَاطْرُو يِتْكَلِّمْ بِالرُّوحْ وِيْقُولْ فِي أَسْرَارْ غَامْضَة.

³آمَا الِّي يِتْنَبَّأْ، رَاهُو يْكَلِّمْ فِي النَّاسْ بِكْلاَمْ يْعَاوِنْ وِيْشَجَّعْ وِيْعَزِّي.

⁴الِّي يِتْكَلِّمْ بْلُغَاتْ يْعَاوِنْ رُوحُو، آمَا الِّي يِتْنَبَّأْ يِبْنِي الكَنِيسَة.

⁵آنَا نْحِبّْكُمْ الكُلْكُمْ تِتْكَلّْمُوا بْلُغَاتْ، آمَا بِالأَخَصْ نْحِبّْكُمْ تِتْنَبّْأُوا، الِّي يِتْنَبَّأْ أَعْظِمْ مِلِّي يِتْكَلّْمُوا بْلُغَاتْ، إِلاَّ إِذَا كَانْ تَرْجِمْ الشَّيْء الِّي يْقُولْ فِيهْ بَاشْ الكَنِيسَة تِتْبْنَى.

⁶إِذَا كَانْ جِيتْكُمْ، يَا إِخْوَة، وْكَلِّمْتْكُمْ بْلُغَاتْ مُوشْ مَفْهُومَة، كِيفَاشْ بَاشْ نَنْفِعْكُمْ إِذَا كَانْ كْلاَمِي مَا فِيهِشْ إِعْلاَنْ وِلاَّ مَعْرْفَة وِلاَّ نُبُوءَة وِلاَّ تَعْلِيمْ.

⁷كَانْ جَاتْ آلاَتْ المُوسِيقَى النَّايْ وِلاَّ القِيتَارَة صُوتْهُمْ كِيفْ كِيفْ، إِمَّالاَ كِيفَاشْ نْفَرّْقُوا بِينَاتْهُمْ.

⁸وْإِذَا كَانْ صُوتْ البُوقْ مُوشْ وَاضِحْ، شْكُونْ بَاشْ يْحَضِّرْ رُوحُو لِلحَرْبْ؟

⁹وْإِنْتُومَا زَادَا، إِذَا مَا تَنْطْقُوشْ بِكْلاَمْ مَفْهُومْ، كِيفَاشْ بَاشْ يِفْهْمُوكُمْ؟ مُوشْ كْلاَمْكُمْ يِمْشِي فِي الهْوَاء؟

¹⁰ثَمَّة بَرْشَة لُغَاتْ فِي العَالَمْ وِالكُلْهُمْ عِنْدْهُمْ مَعْنَى،

¹¹إِذَا كَانْ مَا نِفْهِمْشْ مَعْنَى الكْلاَمْ، نْكُونْ غْرِيبْ عَلِّي نْكَلِّمْ فِيهْ، وِلِّي يْكَلِّمْ فِيَّ يْكُونْ غْرِيبْ عْلِيَّا.

¹²وْبِمَا إِنّْكُمْ مِتْحَمّْسِينْ لِلمَوَاهِبْ الرُّوحِيَّة، اطْلْبُوا مِنْ اللهْ إِنُّو يْزِيدْكُمْ مِنْهَا بَاشْ تِبْنِيوْ الكَنِيسَة.

¹³هَاذَاكَا عْلاَشْ الِّي يِتْكَلِّمْ بْلُغَاتْ مُوشْ مَفْهُومَة يُطْلُبْ مِنْ اللهْ بَاشْ يَعْطِيهْ مَوْهْبَة مْتَاعْ تَفْسِيرْهَا.

¹⁴إِذَا صَلِّيتْ بْلُغَاتْ مُوشْ مَفْهُومَة رَاهِي رُوحِي تْصَلِّي آمَا عَقْلِي مَا يِسْتْفَادْ حَتَّى شَيْء.

¹⁵إِمَّالاَ آشْ يِلْزِمْنِي نَعْمِلْ؟ لاَزِمْ نْصَلِّي بْرُوحِي وْعَقْلِي زَادَا. وِنْرَنِّمْ بْرُوحِي وِبْعَقْلِي زَادَا.

¹⁶إِذَا كُنْتْ تِحْمِدْ اللهْ بِالرُّوحْ بَرْكَة، كِيفَاشْ المُؤْمِنْ الجْدِيدْ يْقُولْ «آمِينْ» عْلَى الحَمْدْ مْتَاعِكْ، وْهُوَ مُوشْ فَاهِمْ آشْ قَاعِدْ تْقُولْ؟

¹⁷إِنْتِ حْمِدْتْ رَبِّي بِالقْدَا، آمَا غِيرِكْ مَا تِنْفَعْ بشَيْء.

¹⁸نِحْمِدْ رَبِّي الِّي نِتْكَلِّمْ بْلُغَاتْ مُوشْ مَفْهُومَة أَكْثِرْ مِنْكُمْ الكُلْ،

¹⁹آمَا فِي الكَنِيسَة نْقُولْ خَمْسَة كِلْمَاتْ مَفْهُومِينْ نْعَلِّمْ بِيهُمْ النَّاسْ الأُخْرِينْ أَحْسِنْ مِنْ عَشْرَة آلاَفْ كِلْمَة بْلُغَاتْ مُوشْ مَفْهُومَة.

²⁰يَا إِخْوَة مَا تْكُونُوشْ كِالوْلاَدْ الصْغَارْ فِي تَفْكِيرْكُمْ، آمَا كُونُوا كِالوْلاَدْ الصْغَارْ فِي فِعْلْ الشَّرْ وْكِالكْبَارْ فِي تَفْكِيرْكُمْ

²¹تِكْتِبْ فِي الشَّرِيعَة: قَالْ الرَّبْ: بَاشْ نْكَلِّمْ الشَّعْبْ هَاذَا بْلُغَاتْ غْرِيبَة وْبِشْفَايِفْ غْرِيبَة، وْحَتَّى هَكَّا مَا هُمْشْ بَاشْ يِسْمْعُونِي.

²²إِمَّالاَ اللُّغَاتْ هِيَ عَلاَمَة مُوشْ لِلمُؤْمْنِينْ، آمَا لْغِيرْ المُؤْمْنِينْ. آمَا مَوْهِبْةْ النُّبُوءَة لِلمُؤْمْنِينْ، وْمُوشْ لْغِيرْ المُؤْمْنِينْ.

²³إِذَا تْلَمِّتْ الكَنِيسَة الكُلْهَا وِتْكَلِّمْ كُلْ وَاحِدْ فِيهَا بْلُغَاتْ مُوشْ مَفْهُومَة، وْدَخْلُوا نَاسْ جْدُدْ فِي الإِيمَانْ وِلاَّ مُوشْ مُؤْمْنِينْ، زَعْمَة مَا يْقُولُوشْ عْلِيكُمْ مْهَبّْلَة؟

²⁴وْلُو كَانْ جَاوْ النَّاسْ الكُلْ يِتْنَبّْأُوا، وِدْخَلْ وَاحِدْ مُوشْ مُؤْمِنْ وِلاَّ جْدِيدْ فِي الإِيمَانْ، رَاهُو النَّاسْ الكُلْ يْوَبّْخُوهْ وْيُحْكْمُوا عْلِيهْ،

²⁵وْهَكَّا تِتْكْشِفْ النْوَايَا مْتَاعْ قَلْبُو، وْيُسْجُدْ للهْ وْيِعْبْدُو وْيَعْتَرِفْ إِنُّو اللهْ مُوجُودْ فِي وُسْطْكُمْ.

²⁶إِمَّالاَ شْنُوَّة نَعْمْلُوا يَا إِخْوَة؟ وَقْتِلِّي تِجْتَمْعُوا وْكُلْ وَاحِدْ فِيكُمْ يِبْدَى عَنْدُو تَرْنِيمَةْ وِلاَّ تَعْلِيمْ وِلاَّ إِعْلاَنْ وِلاَّ كْلاَمْ بْلُغَاتْ مُوشْ مَفْهُومَة وِلاَّ تَرْجْمِتْهَا، خَلِّي كُلْ شَيْء يْكُونْ لِلبَنْيَانْ.

²⁷كِتِتْكَلّْمُوا بْلُغَاتْ مُوشْ مَفْهُومَة، خَلِّي يِتْكَلّْمُوا ثْنِينْ وِلاَّ ثْلاَثَة أَكْثِرْ شَيْء، بِالوَاحِدْ بِالوَاحِدْ، وْوَاحِدْ مِنْكُمْ يْتَرْجَمْ.

²⁸وْإِذَا مَا كَانِشْ ثَمَّة مُتَرْجِمْ، الِّي قَاعِدْ يِتْكَلِّمْ بِالأَلْسُنْ فِي الكَنِيسَة يُسْكُتْ وْيِتْكَلِّمْ بِينُو بِينْ اللهْ.

²⁹آمَا الأَنْبِيَاءْ، خَلِّي يِتْكَلّْمُوا مِنْهُمْ ثْنِينْ وِلاَّ ثْلاَثَة، وِالبْقِيَّة يُحْكْمُوا.

³⁰إِذَا كَانْ وَاحِدْ آخَرْ جَاهْ إِعْلاَنْ مِنْ عِنْدْ اللهْ، لاَزِمْ الِّي قَاعِدْ يِتْكَلِّمْ يُسْكُتْ،

³¹عْلَى خَاطِرْكُمْ تْنَجّْمُوا تِتْنَبّْأُوا الكُلْكُمْ، بِالوَاحِدْ بِالوَاحِدْ، بَاشْ النَّاسْ الكُلْ يِتْعَلّْمُوا وْيِتْشَجّْعُوا.

³²الأَنْبِيَاءْ يِتْحَكّْمُوا فِي المَوَاهِبْ مْتَاعْهُمْ،

³³رَاهُو اللهْ مُوشْ إِلاَهْ فَوْضَى، آمَا إِلاَهْ سَلاَمْ. وْكِيفْ مَا هُو مُوجُودْ فِي كَنَايِسْ المُؤْمْنِينْ الكُلْهُمْ،

³⁴النْسَاء لاَزِمْهُمْ يُسْكْتُوا فِي الكَنَايِسْ، وْمُوشْ مَسْمُوحْ لِيهُمْ بَاشْ يِتْكَلّْمُوا. آمَا خَلِّيهُمْ يْطِيعُوا كِيفْ مَا تْقُولْ الشَّرِيعَة.

³⁵وْإِذَا كَانْ يْحِبُّوا يِتْعَلّْمُوا حَاجَة، يِسْأْلُوا رْجَالْهُمْ فِي الدَّارْ، عْلَى خَاطِرْ عِيبْ عْلَى المْرَا كِتِتْكَلِّمْ فِي الكَنِيسَة.

³⁶يَاخِي مِنْ عِنْدْكُمْ جَاتْ كِلْمِةْ اللهْ؟ وِلاَّ وُصْلُتْكُمْ إِنْتُومَا بَرْكْ؟

³⁷إِذَا وَاحِدْ مْشَى فِي بَالُو الِّي هُوَ نَبِي وِلاَّ عَنْدُو مَوْهْبَة رُوحِيَّة أُخْرَى، يِلْزْمُو يَعْرِفْ الِّي الشَّيْء الِّي نِكْتِبْ فِيهْ لِيكُمْ هُوَ وْصِيَّة مِنْ عِنْدْ الرَّبْ،

³⁸الِّي مَا يِسْتَعْرِفْشْ بِالشَّيْء هَاذَا، مَا تِسْتَعْرْفُوشْ بِيهْ.

³⁹إِمَّالاَ يَا إِخْوَة، اسْعَاوْ لْمَوْهِبْة النُّبُوءَة، وْمَا تَمْنْعُوشْ حَتَّى وَاحِدْ يِتْكَلِّمْ بْلُغَاتْ مُوشْ مَفْهُومَة.

⁴⁰وْخَلِّيوْ كُلْ شَيْء يْتِمْ بْتُرْبْيَة وْنِظَامْ.