Read Tunisian Arabic New Testament كُورِنْثُوسْ الأَوِلْ 15 Bible Online

كُورِنْثُوسْ الأَوِلْ 15 - Tunisian Arabic New Testament bible

كُورِنْثُوسْ الأَوِلْ 15

¹نْذَكِّرْكُمْ، يَا إِخْوَة، بِالبْشَارَة الِّي بَشِّرْتْكُمْ بِيهَا، وِقْبِلْتُوهَا وْمَازِلْتُوا ثَابْتِينْ فِيهَا،

²وْتُخْلْصُوا بِيهَا إِذَا حَافِظْتُوا عْلِيهَا كِيمَا بَشِّرْتْكُمْ بِيهَا، مَاكَانِشْ إِيمَانْكُمْ بَاطِلْ.

³قْبَلْ كُلْ شَيْء عْطِيتْكُمْ الشَّيْء الِّي خْذِيتُو، الِّي المَسِيحْ مَاتْ عْلَى خَاطِرْ ذْنُوبْنَا كِيمَا جَا فِي الكْتُبْ المُقَدّْسَة،

⁴وِلِّي هُوَ تِدْفِنْ وْقَامْ فِي النْهَارْ الثَّالِثْ كِيفْ مَا جَا فِي الكْتُبْ المُقَدّْسَة،

⁵وِلِّي هُوَ ظْهُرْ لْبُطْرُسْ وْلِلرُّسُلْ الأَثْنَاشْ،

⁶وْمِنْ بَعْدْ ظْهُرْ لأَكْثِرْ مِنْ خَمْسَة مْيَاةْ وَاحِدْ مِالإِخْوَة مْعَ بْعَضْهُمْ وْمُكْثُرْهُمْ مَازَالُو حَيِّينْ وْثَمَّة شْكُونْ مِنْهُمْ مَاتُوا،

⁷وِمْبَاعِدْ ظْهُرْ لْيَعْقُوبْ، وِمْبَاعِدْ لِلرُّسُلْ الكُلْ،

⁸وْفِي الإِخِّرْ ظْهُرْ لِيَّا آنَا الِّي كَإِنِّي مُولُودْ قْبَلْ وَقْتِي.

⁹آنَا أَقَلْ وَاحِدْ فِي الرُّسُلْ، وْمَا نِسْتَاهِلْشْ بَاشْ نِتْسَمَّى رَسُولْ عْلَى خَاطِرْنِي اضْطَهِدْتْ كَنِيسِةْ اللهْ.

¹⁰وِبْنِعْمِةْ اللهْ وْصُلْتْ لِلشَّيْء الِّي آنَا فِيهْ تَوَّا، وْنِعْمِةْ اللهْ عْلِيَّا مَا كَانِتْشْ مِنْ غِيرْ فَايْدَة. آمَا رَانِي خْدِمْتْ أَكْثِرْ مِالرُّسُلْ الأُخْرِينْ الكُلْ، مَا نِيشْ آنَا الِّي خْدِمْتْ آمَا نِعْمِةْ اللهْ الِّي مْعَايَا.

¹¹سِوَى كُنْتْ آنَا وِلاَّ هُومَا، هَاذَا الِّي نْبَشّْرُوا بِيهْ وْهَاذَا الِّي امِّنْتُوا بِيهْ.

¹²وْمَادَامْ نْبَشّْرُوا بِالمَسِيحْ الِّي قَامْ مِنْ بِينْ المُوتَى، كِيفَاشْ ثَمَّة نَاسْ مِنْكُمْ يْقُولُوا الِّي المُوتَى مَا يْقُومُوشْ؟

¹³إِذَا كَانْ المُوتَى مَا يْقُومُوشْ، إِمَّالاَ المَسِيحْ زَادَا مَا قَامِشْ مِالمُوتْ.

¹⁴وْإِذَا كَانْ المَسِيحْ مَا قَامِشْ، رَاهُو تَبْشِيرْنَا مِنْ غِيرْ فَايْدَة وْإِيمَانْكُمْ زَادَا،

¹⁵وْإِذَا كَانْ المُوتَى مَا يْقُومُوشْ، إِمَّالاَ أَحْنَا شْهُودْ بِالكِذْبْ عْلَى اللهْ، عْلَى خَاطِرْنَا شْهِدْنَا الِّي هُوَ قَيِّمْ المَسِيحْ وْهُوَ مَا قَيّْمُوشْ.

¹⁶إِذَا كَانْ المُوتَى مَا يْقُومُوشْ، المَسِيحْ زَادَا مَا قَامِشْ.

¹⁷وْإِذَا كَانْ المَسِيحْ مَا قَامِشْ، إِمَّالاَ إِيمَانْكُمْ مَا عِنْدُوشْ فَايْدَة وْإِنْتُومَا مَازِلْتُوا فِي الذْنُوبْ مْتَاعْكُمْ.

¹⁸إِمَّالاَ الِّي مَاتُوا وْهُومَا مُؤْمْنِينْ بِالمَسِيحْ زَادَا تْهِلْكُوا.

¹⁹إِذَا كَانْ عِنْدْنَا أَمَلْ فِي المَسِيحْ فِي الدِّنْيَا هَاذِي آكَاهُو، إِمَّالاَ رَانَا أَتْعِسْ مِنْ النَّاسْ الكُلْ.

²⁰آمَا تَوَّا المَسِيحْ قَامْ مِنْ بِينْ المُوتَى بَاشْ يْكُونْ الثَّمْرَة الأُولَى مِلِّي قَامُوا مِنْ بِينْ المُوتَى.

²¹وْمَا دَامْهَا المُوتْ جَاتْ عْلَى طْرِيقْ بَشَرْ وَاحِدْ، رَاهِي القْيَامَة مِنْ بِينْ المُوتَى بَاشْ تْجِي عْلَى طْرِيقْ بَشَرْ وَاحِدْ.

²²كِيفْ مَا النَّاسْ الكُلْ مَاتُوا بِسْبَبْ آدَمْ، هُومَا زَادَا بَاشْ يَحْيَاوْ بِسْبَبْ المَسِيحْ،

²³آمَا كُلْ وَاحِدْ عَنْدُو رُتْبْتُو. المَسِيحْ هُوَ الثَّمْرَة الأُولَى عْلَى خَاطْرُو هُوَ الِّي قَامْ لُوِّلْ مِالمُوتْ وِمْبَاعِدْ يْقُومُوا المُؤْمْنِينْ بِيهْ وَقْتِلِّي يَرْجَعْ.

²⁴وِمْبَعْدْ فِي الإِخِّرْ، وَقْتِلِّي المَسِيحْ يْسَلِّمْ المُلْكْ للهْ الآبْ بَعْدْ مَا يِقْضِي عْلَى كُلْ رِئَاسَة وْسُلْطَة وْقُوَّة.

²⁵ويِلْزْمُو يِمْلِكْ حَتَّى لِينْ يْحُطْ الأَعْدَاءْ مْتَاعُو تَحْتْ سَاقِيهْ.

²⁶وْآخِرْ عْدُو يِقْضِي عْلِيهْ هُوَ المُوتْ.

²⁷وِالكْتَابْ المُقَدَّسْ يْقُولْ: «حَطْ كُلْ شَيْء تَحْتْ سَاقِيهْ.» وَقْتِلِّي يْقُولْ حَطْ كُلْ شَيْء، وَاضِحْ إِنُّو مَا يُقْصُدْشْ اللهْ الآبْ زَادَا تَحْتْ سَاقِيهْ عْلَى خَاطِرْ الله الآبْ هُوَ الِّي عْطَى السُّلْطَة هَاذِي لِلمَسِيحْ.

²⁸وَقْتِلِّي كُلْ شَيْء يْجِي تَحْتْ سُلْطِةْ الإِبْنْ، الإِبْنْ بِيدُو يْجِي تَحْتْ سُلْطِةْ اللهْ الِّي حَطْ كُلْ شَيْء تَحْتْ سُلْطْتُو، بَاشْ يْكُونْ اللهْ هُوَ الكُلْ فِي الكُلْ.

²⁹وْإِذَا كَانْ المُوتَى مَا يْقُومُوشْ، شْنُوَّة يِسْتْفَادُوا الِّي يِتْعَمّْدُوا فِي بْلاَصِةْ المُوتَى؟ عْلاَشْ يِتْعَمّْدُوا عْلَى خَاطِرْهُمْ؟

³⁰وِعْلاَشْ نْعَرّْضُوا فِي رْوَاحْنَا لِلخْطَرْ فِي كُلْ لَحْظَة؟

³¹آنَا نْشُوفْ فِي المُوتْ كُلْ يُومْ. وْآنَا نْقُولْ الشَّيْء هَاذَا، يَا إِخْوْتِي، وْهُوَ صْحِيحْ كِفُخْرْتِي بِيكُمْ فِي المَسِيحْ يَسُوعْ رَبّْنَا.

³²وْفِي أَفَسُسْ تْعَارِكْتْ مْعَ نَاسْ كِيفْ الوُحُوشْ، وِشْنُوَّة اسْتْفِدْتْ؟ إِذَا كَانْ المُوتَى مَا يْقُومُوشْ، إِمَّالاَ خَلِّينَا نَاكْلُوا وْنُشْرْبُوا، رَانَا غُدْوَة بَاشْ نْمُوتُوا.

³³مَا تُغْلْطُوشْ، رَاهِي الخُلْطَة الخَايْبَة تْفَسِّدْ الأَخْلاَقْ البَاهْيَة.

³⁴أَرْجْعُوا لِعْقُولْكُمْ وْمَا تَعْمْلُوشْ الذْنُوبْ، رَاهُو ثَمَّة شْكُونْ فِيكُمْ جَاهْلِينْ بِالله. نْقُلْكُمْ الشَّيْء هَاذَا بَاشْ تِحْشْمُوا عْلَى رْوَاحْكُمْ.

³⁵وِيْقُولْ القَايِلْ: «زَعْمَة المُوتَى كِيفَاشْ يْقُومُوا، وْكِيفَاشْ تْكُونْ أَجْسَادْهُمْ وَقْتِلِّي يَرْجْعُوا؟»

³⁶يَا جَاهِلْ! رَاهُو الِّي تَزْرْعُو مَا يَحْيَى كَانْ بَعْدْ مَا يْمُوتْ.

³⁷وِلِّي تَزْرْعُو رَاهُو مُوشْ النَّبْتَة الِّي بَاشْ تِنْبِتْ، آمَا رَاهُو كَعْبَة مْتَاعْ قَمْحْ وِلاَّ أَيْ زِرِّيعِةْ أُخْرَى تَزْرِعْهَا.

³⁸وِالله يَعْطِيهَا الْجِسْمْ الِّي يْحِبْ عْلِيهْ، وْكُلْ زِرِّيعَة عِنْدْهَا الْجِسْمْ مْتَاعْهَا.

³⁹وِالأَجْسَامْ الكُلْهَا مَا هِيشْ كِيفْ كِيفْ، الإِنْسَانْ عَنْدُو جِسْمْ وِالحَيَوانْ عَنْدُو جِسْمْ آخَرْ، الطّْيُورْ عِنْدْهَا جِسْمْ وِالحُوتْ عَنْدُو جِسْمْ آخَرْ.

⁴⁰ثَمَّة أَجْسَامْ سَمَاوِيَّة وْأَجْسَامْ أَرْضِيَّة. الَأَجْسَامْ السَّمَاوِيَّة عِنْدْهَا مَجْدْ، وِالأَجْسَامْ الأَرْضْيَّة عِنْدْهَا مَجْدْ آخَرْ.

⁴¹الشَّمْسْ عِنْدْهَا مَجْدْ وِالقَمْرَة عِنْدْهَا مَجْدْ آخَرْ، وِالنْجُومْ عِنْدْهَا مَجْدْهَا، وْكُلْ نِجْمَة عِنْدْهَا مَجْدْ مُوشْ كِالنْجُومْ الأُخْرِينْ.

⁴²وْهَاذِي الحَالَة الِّي يْقُومُوا فِيهَا المُوتَى: يِتْدْفِنْ الجِسْمْ مِيتْ وِيْقُومْ خَالِدْ.

⁴³يِتْدْفِنْ بْلاَشْ كَرَامَة وِيْقُومْ بْمَجْدْ. يِتْدْفِنْ ضْعِيفْ وِيْقُومْ قْوِي.

⁴⁴يِتْدْفِنْ جِسْمْ مْتَاعْ بَشَرْ وِيْقُومْ جِسْمْ رُوحَانِي. وْإِذَا كَانْ ثَمَّة جِسْمْ مْتَاعْ بَشَرْ، ثَمَّة زَادَا جِسْمْ رُوحَانِي.

⁴⁵كِيفْ مَا هُو مَكْتُوبْ فِي الكْتَابْ المُقَدَّسْ: «الإِنْسَانْ الأُوِّلْ الِّي هُوَ آدَمْ كَانْ نَفْسْ حَيَّة»، وْآدِمْ الإِخْرَانِي وَلَّى رُوحْ يِحْيِي.

⁴⁶آمَا مُوشْ الرُّوحَانِي هُوَ الِّي كَانْ فِي الأُوِّلْ، البَشَرْ هُوَ الِّي كَانْ فِي الأُوِّلْ، وِالرُّوحَانِي جَا بَعْدُو.

⁴⁷الإِنْسَانْ الأُوِّلْ مِالتْرَابْ مْتَاعْ الأَرْضْ، وِالإِنْسَانْ الثَّانِي مِالسْمَاءْ.

⁴⁸وْأَهْلْ الأَرْضْ هُومَا كِيفْ الِّي مِالأَرْضْ وْأَهْلْ السْمَاءْ هُومَا كِيفْ الِّي مِالسْمَاءْ.

⁴⁹وْكِوَلِّينَا عْلَى صُورِةْ الِّي مِالأَرْضْ، بَاشْ نْوَلِّيوْ زَادَا عْلَى صُورِةْ الِّي مِالسْمَاءْ.

⁵⁰نْقُلْكُمْ، يَا إِخْوَة، اللْحَمْ وِالدَّمْ مَا يْنَجّْمُوشْ يُورْثُوا مَمْلِكْةْ اللهْ، وِلِّي هُوَ فَانِي مَا يْنَجِّمْشْ يُورِثْ الِّي عُمْرُو مَا يِفْنَى.

⁵¹بَاشْ نْقُلْكُمْ سِرْ: أَحْنَا مَا نْمُوتُوشْ الكُلْنَا، آمَا الكُلْنَا نِتْبَدّْلُوا،

⁵²فِي لَحْظَة وْفِي غَمْضِةْ عِينْ، مْعَ صُوتْ البُوقْ الإِخْرَانِي، عْلَى خَاطِرْ صُوتْ البُوقْ بَاشْ يَعْلَى، وِيْقُومُوا المُوتَى وْمَا عَادِشْ يَفْنَاوْ وْإِحْنَا نِتْبَدّْلُوا.

⁵³لاَزِمْ بْدُونَاتْنَا هَاذِي الِّي تْمُوتْ تْوَلِّي مَا تْمُوتِشْ، وِبْدُونَاتْنَا هَاذِي الفَانْيَة تْوَلِّي مَا تَفْنَاشْ.

⁵⁴وْوَقْتِلِّي الِّي يْمُوتْ يْوَلِّي مَا يْمُوتْشْ، وِالفَانِي مَا يَفْنَاشْ، اتِّمْ الكِلْمَة المَكْتُوبَة فِي الكْتَابْ المُقَدَّسْ: «وِالإِنْتِصَارْ بْلَعْ المُوتْ.»

⁵⁵يَا مُوتْ وِينُو انْتِصَارِكْ؟ يَا مُوتْ وِينِي شُوكْتِكْ؟

⁵⁶وْشُوكِةْ المُوتْ هِيَ الخَطِيئَة وْقُوِّةْ الخَطِيئَة هِيَ شَرِيعِةْ مُوسَى.

⁵⁷آمَا نُشْكْرُوا اللهْ الِّي نْصَرْنَا بْرَبّْنَا يَسُوعْ المَسِيحْ.

⁵⁸إِمَّالاَ يَا إِخْوْتِي الِّي نْحِبّْهُمْ، كُونُوا قْوِيِّينْ وْثَابْتِينْ، اخْدْمُوا الرَّبْ بَرْشَة وْفِي كُلْ وَقْتْ، وْأَعْرْفُوا الِّي تْعَبْكُمْ مُوشْ بَاشْ يْضِيعْ.