Read Tunisian Arabic New Testament كُورِنْثُوسْ الأَوِلْ 16 Bible Online

كُورِنْثُوسْ الأَوِلْ 16 - Tunisian Arabic New Testament bible

كُورِنْثُوسْ الأَوِلْ 16

¹وْآمَا فِي مَا يْخُصْ لَمَّانْ التَّبَرُّعَاتْ لِلإِخْوَة المُؤْمْنِينْ، أَعْمْلُوا إِنْتُومَا زَادَا الشَّيْء الِّي وَصِّيتْ بِيهْ الكَنَايِسْ فِي غَلاَطْيَة.

²وْهُوَ إِنُّو كُلْ وَاحِدْ فِيكُمْ، أَوِّلْ نْهَارْ فِي الجِّمْعَة، يْخَبِّي الِّي يْنَجِّمْ يْفَضّْلُو مِالفْلُوسْ، بَاشْ مَا يْكُونِشْ لَمَّانْ الفْلُوسْ نْهَارِتْ الِّي نْجِي.

³وْوَقْتِلِّي نْجِي، نَبْعِثْ النَّاسْ الِّي تِخْتَارُوهُمْ لْأُورْشَلِيمْ بَاشْ يْهِزُّوا التَّبَرُّعَاتْ مْتَاعْكُمْ وِمْعَاهَا جْوَابَاتْ مِنْ عِنْدِي.

⁴وْكَانْ لْزِمْ بَاشْ نْسَافِرْ تَوْ يْسَافْرُوا مْعَايَا.

⁵تَوْ نْجِيكُمْ بَعْدْ مَا نِتْعَدَّى عْلَى مَقْدُونِيَّة، عْلَى خَاطِرْنِي بَاشْ نِتْعَدَّى عْلِيهَا.

⁶وْمُمْكِنْ نْعَدِّي بِحْذَاكُمْ الشْتَاء الكُلُّو بَاشْ تَعْطِيوْنِي الِّي نِحْتَاجُو بَاشْ انَّجِّمْ نْكَمِّلْ السْفَرْ مْتَاعِي.

⁷آنَا مَا نْحِبِّشْ نْشُوفْكُمْ وْآنَا مِتْعَدِّي، آمَا نْحِبْ نُقْعُدْ بِحْذَاكُمْ مُدَّة طْوِيلَة كَانْ سَهِّلْ رَبِّي.

⁸بَاشْ نُقْعُدْ هْنَا فِي أَفَسُسْ حَتَّى لِينْ يْجِي عِيدْ يُومْ الخَمْسِينْ،

⁹رَاهُو ثَمَّة بَابْ كْبِيرْ تْحَلْلِي فِي الخِدْمَة، رَغْمِلِّي ثَمَّة بَرْشَة نَاسْ يْعَارْضُوا فِيَّ.

¹⁰وْإِذَا كَانْ جَاكُمْ تِيمُوثَاوُسْ، خَلِّيوْهْ يْكُونْ مُطْمَانْ، عْلَى خَاطْرُو يِخْدِمْ فِي الرَّبْ كِيفِي.

¹¹وْحَتَّى وَاحِدْ مَا يَحْقْرُو، آمَا سَهّْلُولُو بَاشْ يْجِينِي لاَبَاسْ، عْلَى خَاطِرْنِي آنَا وِالإِخْوَة نِسْتَنَّاوْ فِيهْ.

¹²آمَا خُونَا أَبُلُّوسْ، رَانِي طْلَبْتْ مِنُّو بَرْشَة مَرَّاتْ بَاشْ يْجِيكُمْ مْعَ الإِخْوَة، آمَا هُوَ مَا حَبِّشْ وْشَدْ صْحِيحْ بَاشْ يْجِيكُمْ فِي الوَقْتْ الحَاضِرْ، وْتَوْ يْجِيكُمْ وَقْتِلِّي تْوَاتِي الفُرْصَة.

¹³رُدُّوا بَالْكُمْ وِاثْبْتُوا فِي الإِيمَانْ، كُونُوا رْجَالْ، كُونُوا قْوِيِّينْ،

¹⁴أَعْمْلُوا كُلْ شَيْء بِمْحَبَّة.

¹⁵نْحِبْ نْوَصِّيكُمْ يَا إِخْوْتِي ؛ إِنْتُومَا تَعْرْفُوا الِّي عَايِلْةْ اسْتِفَانَاسْ هُومَا الأُولاَنِينْ الِّي امّْنُو بِالمَسِيحْ فِي أَخَائِيَة، وِلِّي هُومَا عْطَاوْ وَقْتْهُمْ الكُلْ بَاشْ يِخْدْمُوا المُؤْمْنِينْ.

¹⁶هَاذَاكَا عْلاَشْ نُطْلُبْ مِنْكُمْ إِنّْكُمْ تِسْمْعُوا كْلاَمْهُمْ هُومَا وْكُلْ مِنْ يِخْدِمْ وْيِتْعِبْ مْعَاهُمْ.

¹⁷وْآنَا فْرَحْتْ بْجَيَّانْ اسْتِفَانَاسْ وْفُرْتُونَاتُوسْ وْأَخَائِيكُوسْ، عْلَى خَاطِرْهُمْ عَوّْضُوكُمْ وَقْتِلِّي إِنْتُومَا غَايْبِينْ،

¹⁸وْرَتّْحُوا قَلْبِي كِيفْ مَا رَتّْحُوا قْلُوبْكُمْ. أَعْرْفُوا كِيفَاشْ تِكْرْمُوا النَّاسْ الِّي كِيفْهُمْ.

¹⁹تْسَلِّمْ عْلِيكُمْ الكَنَايِسْ الِّي فِي أَسِيَّة، وِيْسَلّْمُوا عْلِيكُمْ بَرْشَة فِي الرَّبْ أَكِيلاَ وِبْرِسْكِلَّة هُومَا وِالكَنِيسَة الِّي تِجْتَمَعْ فِي دَارْهُمْ.

²⁰يْسَلّْمُوا عْلِيكُمْ الإِخْوَة الكُلْهُمْ. سَلّْمُوا عْلَى بْعَضْكُمْ بْبُوسَة مُقَدّْسَة.

²¹آنَا بُولُسْ نِكْتْبِلْكُمْ السْلاَمْ هَاذَا بْخَطْ إِيدِي

²²الِّي مَا يْحِبِّشْ الرَّبْ رَاهُو مَلْعُونْ! «يَا رَبّْنَا إِيجَا.»

²³نِعْمِةْ الرَّبْ يَسُوعْ مْعَاكُمْ.

²⁴مْحَبّْتِي لِيكُمْ الكُلْ فِي المَسِيحْ يَسُوعْ.