Read Tunisian Arabic New Testament كُورِنْثُوسْ الأَوِلْ 2 Bible Online

كُورِنْثُوسْ الأَوِلْ 2 - Tunisian Arabic New Testament bible

كُورِنْثُوسْ الأَوِلْ 2

¹وْآنَا، وَقْتِلِّي جِيتْكُمْ يَا إِخْوَة، مَا جِيتْكُمْشْ بْقُوَّة الكْلاَمْ وِالحِكْمَة بَاشْ نْبَشِّرْكُمْ بْسِرْ اللهْ الغَامِضْ،

²وْقَرِّرْتْ بَاشْ مَا نَعْرِفْ حَتَّى شَيْء وْآنَا مْعَاكُمْ كَانْ يَسُوعْ المَسِيحْ، نُقْصُدْ يَسُوعْ المَسِيحْ المَصْلُوبْ.

³وْآنَا فِي وُسْطْكُمْ كُنْتْ ضْعِيفْ وْخَايِفْ وْنِتْرْعِدْ بَرْشَة،

⁴وِالكْلاَمْ وِالتَّبْشِيرْ مْتَاعِي مَا كَانِشْ بْقُوِّةْ الكْلاَمْ وِالحِكْمَة مْتَاعْ البَشَرْ، آمَا بِالدَّلِيلْ مْتَاعْ رُوحْ اللهْ وْقُوتُو،

⁵بَاشْ إِيمَانْكُمْ مَا يِتْبْنَاشْ عْلَى حِكْمِةْ البَشَرْ، آمَا بْقُوِّةْ اللهْ.

⁶آمَا رَاهِي ثَمَّة حِكْمَة بِينْ النَّاسْ النَّاضْجِينْ فِي الرُّوحْ، وْهِيَ مَاهِيشْ كِيفْ حِكْمِةْ العَالَمْ هَاذَا وِلاَّ الرُّؤَسَاءْ مْتَاعْ العَالَمْ هَاذَا، الِّي يَفْنَاوْ،

⁷آمَا أَحْنَا رَانَا نِتْكَلّْمُوا بْحِكْمِةْ اللهْ المْخُبّْيَة وِالغَامْضَة الِّي اللهْ حَضِّرْهَا مِنْ قْبَلْ مَا تِبْدَا الدِّنْيَا لِلمَجْدْ مْتَاعْنَا،

⁸وِالحِكْمَة هَاذِي حَتَّى وَاحِدْ مِالرُّؤَسَاءْ مْتَاعْ العَالَمْ هَاذَا مَا عْرَفْهَا، وْكَانْ عَرْفُوهَا رَاهُمْ مَا صُلْبُوشْ رَبْ المَجْدْ.

⁹آمَا كِيفْ مَا قَالْ الكْتَابْ المُقَدَّسْ: الِّي مَا شَافِتُّو عِينْ وْلاَ سَمْعِتُّو وْذِنْ وْلاَ جَا عْلَى بَالْ إِنْسَانْ حَضّْرُو اللهْ لِلِّي يْحِبُّوهْ.

¹⁰آمَا اللهْ وَرَّاهُولْنَا بِالرُّوحْ، عْلَى خَاطِرْ الرُّوحْ يَعْرِفْ كُلْ شَيْء حَتَّى أَعْمَاقْ اللهْ.

¹¹شْكُونْ يَعْرِفْ الِّي فِي الإِنْسَانْ غِيرْ الرُّوحْ الِّي فِي الإِنْسَانْ؟ وْزَادَا حَتَّى وَاحِدْ مَا يَعْرِفْ الِّي فِي اللهْ غِيرْ رُوحْ اللهْ.

¹²وْإِحْنَا مَا خْذِينَاش رُوحْ العَالَمْ، آمَا خْذِينَا الرُّوحْ الِّي بَعْثُو اللهْ بَاشْ نَعْرْفُوا بِيهْ الحَاجَاتْ الِّي نْعِمْ عْلِينَا بِيهُمْ.

¹³وْإِحْنَا مَا نَحْكِيوْشْ عْلِيهْ بِكْلاَمْ تْعَلّْمُو الحِكْمَة مْتَاعْ البَشَرْ، آمَا بِكْلاَمْ يْعَلّْمُو الرُّوحْ القُدُسْ، وْهَكَّا نْفَسّْرُوا الحَاجَاتْ مْتَاعْ الرُّوحْ بِكْلاَمْ رُوحَانِي.

¹⁴آمَا البَشَرْ العَادِي مَا يِقْبِلْشْ الحَاجَاتْ مْتَاعْ رُوحْ اللهْ وْيِعْتَبِرْهَا جَهْلْ، وْمَا يْنَجِّمْشْ يِفْهِمْهُمْ عْلَى خَاطِرْ فَهْمَانْهُمْ مَا يْكُونْ كَانْ بِالرُّوحْ.

¹⁵آمَا الإِنْسَانْ الرُّوحَانِي، رَاهُو يِفْهِمْ كُلْ شَيْء، وْحَتَّى حَدْ مَا يْنَجِّمْ يُحْكُمْ عْلِيهْ.

¹⁶وِالكْتَابْ يْقُولْ: شْكُونُو الِّي يَعْرِفْ فِكْرْ الرَّبْ، بَاشْ يْوَرِّيهْ شْنُوَّة يَعْمِلْ؟ آمَا أَحْنَا رَانَا عِنْدْنَا فِكْرْ المَسِيحْ.