Read Tunisian Arabic New Testament كُورِنْثُوسْ الأَوِلْ 3 Bible Online

كُورِنْثُوسْ الأَوِلْ 3 - Tunisian Arabic New Testament bible

كُورِنْثُوسْ الأَوِلْ 3

¹آمَا آنَا يَا إِخْوَة، مَا نَجِّمْتِشْ نْكَلِّمْكُمْ كِيمَا نْكَلِّمْ نَاسْ رُوحَانِيِّينْ، آمَا نْكَلّمْكُمْ كِيفْ نَاسْ عَادِيِّينْ مَازَالُوا صْغَارْ فِي المَسِيحْ.

²هَاذَاكَا عْلاَشْ شَرِّبْتْكُمْ الحْلِيبْ وْمَا عْطِيتْكُمْشْ مَاكْلَة قْوِيَّة، عْلَى خَاطِرْكُمْ مَا نَجِّمْتُوشْ تَاكْلُوهَا وْحَتَّى لْتَوَّا مَا تْنَجّْمُوشْ تَاكْلُوهَا.

³رَاكُمْ مَازِلْتُوا تْعِيشُوا حَسْبْ الجَسَدْ، إِذَا كَانْ عِنْدْكُمْ حُسْدْ وْعَرْكْ، كِيفَاشْ مَا تْكُونُوشْ عَايْشِينْ فِي الجَسَدْ وْتِتْصَرّْفُوا كِيفْ بْقِيِّةْ النَّاسْ؟

⁴وْكِوَاحِدْ مِنْكُمْ يْقُولْ: «آنَا مْعَ بُولُسْ»، وِاللآخَرْ يْقُولْ «آنَا مْعَ أَبُلُّوسْ»، يَاخِي مَا تْكُونُوشْ كِيمَا البَشَرْ العَادِيِّينْ؟

⁵شْكُونُو بُولُسْ؟ وِشْكُونُو أَبُلُّوسْ؟ هُومَا زُوزْ خُدَّامْ امِّنْتُوا عْلَى يْدِيهُمْ عْلَى قَدْرْ مَا رَبِّي عْطَى لْكُلْ وَاحِدْ فِيهُمْ.

⁶آنَا غْرِسْتْ وْأَبُلُّوسْ سْقَى، آمَا اللهْ هُوَ الِّي نَبِّتْ.

⁷إِمَّالاَ مُوشْ مُهِمْ شْكُونْ الِّي غْرِسْ وِشْكُونْ الِّي سْقَى، المُهِمْ هُوَ اللهْ الِّي نَبِّتْ.

⁸وْمَا ثَمَّة حَتَّى فَرْقْ مَا بِينْ الِّي يِغْرِسْ وِلِّي يِسْقِي، كُلْ وَاحِدْ بَاشْ يَاخُذْ أَجْرُو عْلَى قَدْ فِعْلُو.

⁹رَانَا نِخْدْمُوا فِي اللهْ مْعَ بْعَضْنَا، وْإِنْتُومَا السَّانْيَة مْتَاعْ اللهْ وِالبَنْيَة مْتَاعْ اللهْ الِّي يِبْنِي فِيهَا.

¹⁰عْلَى قَدْرْ النِّعْمَة الِّي عْطَاهَالِي اللهْ، كِيفْ بَنَّايْ بَاهِي، آنَا حَطِّيتْ السَّاسْ وْوَاحِدْ آخَرْ يِبْنِي عْلِيهْ. إِمَّالاَ خَلِّي كُلْ وَاحِدْ يْرُدْ بَالُو كِيفَاشْ يِبْنِي،

¹¹رَاهُو حَتَّى حَدْ مَا يْنَجِّمْ يْحُطْ سَاسْ آخَرْ غِيرْ السَّاسْ الِّي حَطُّو اللهْ، الِّي هُوَ يَسُوعْ المَسِيحْ.

¹²آمَا كُلْ وَاحِدْ بْنَى عْلَى السَّاسْ هَاذَا بَنْيَة بِالذْهَبْ وِلاَّ الفِضَّة وِلاَّ الدّْيَامُنْتْ وِلاَّ اللُّوحْ وِلاَّ قَشْ وِلاَّ تْبِنْ،

¹³تَوْ تُظْهُرْ خِدْمْتُو، وْيُومْ المَسِيحْ بَاشْ يْظَهِّرْهَا عْلَى خَاطِرْ فِي النْهَارْ هَاذَاكَا النَّارْ بَاشْ تِكْشِفْ وِتْظَهِّرْ القِيمَة مْتَاعْ خِدْمِةْ كُلْ وَاحِدْ.

¹⁴إِذَا كَانْ الخِدْمَة مْتَاعْ أَيْ وَاحِدْ ادُّومْ وْمَا اطِّيحِشْ رَاهُو بَاشْ يَاخُذْ أَجْرُو،

¹⁵وِلِّي خِدْمْتُو تِتْحْرَقْ بَاشْ يِخْسِرْ أَجْرُو. آمَا هُوَ رَاهُو بَاشْ يُخْلُصْ، كَإِنُّو مِتْعَدِّي فِي وُسْطْ النَّارْ.

¹⁶يَاخِي مَا تَعْرْفُوشْ الِّي إِنْتُومَا هَيْكِلْ اللهْ، وِلِّي رُوحْ اللهْ سَاكِنْ فِيكُمْ؟

¹⁷الِّي يْدَمِّرْ هَيْكِلْ اللهْ يْدَمّْرُو اللهْ، عْلَى خَاطِرْ هَيْكِلْ اللهْ مُقَدَّسْ، وْإِنْتُومَا بِيدْكُمْ هَيْكِلْ اللهْ.

¹⁸حَتَّى حَدْ مَا يْغَلِّطْ رُوحُو. إِذَا كَانْ وَاحِدْ مِنْكُمْ يِحْسِبْ رُوحُو حَكِيمْ فِي الزْمَانْ هَاذَا، خَلِّيهْ يْكُونْ جَاهِلْ بَاشْ يْوَلِّي حَكِيمْ،

¹⁹عْلَى خَاطِرْ الحِكْمَة مْتَاعْ العَالَمْ هَاذَا هِيَ جَهْلْ عِنْدْ اللهْ، عْلَى خَاطْرُو مَكْتُوبْ فِي الكْتَابْ المُقَدَّسْ: «يْحَصِّلْ الحُكَمَاءْ بْخُبْثْهُمْ.»

²⁰وِيْقُولْ زَادَا: «الرَّبْ يَعْرِفْ الِّي أَفْكَارْ الحُكَمَاءْ بَاطْلَة.»

²¹إِمَّالاَ حَتَّى حَدْ مَا يِتْفُوخِرْ بِالنَّاسْ، عْلَى خَاطِرْ كُلْ شَيْء لِيكُمْ،

²²بُولُسْ وِلاَّ أَبُلُّوسْ وِلاَّ صَفَا، وِلاَّ العَالَمْ، وِلاَّ الحَيَاةْ وِلاَّ المُوتْ وِلاَّ الحَاضِرْ وِلاَّ المُسْتَقْبِلْ: كُلْ شَيْء لِيكُمْ،

²³آمَا إِنْتُومَا رَاكُمْ لِلمَسِيحْ، وِالمَسِيحْ للهْ.