Read Tunisian Arabic New Testament كُورِنْثُوسْ الأَوِلْ 4 Bible Online

كُورِنْثُوسْ الأَوِلْ 4 - Tunisian Arabic New Testament bible

كُورِنْثُوسْ الأَوِلْ 4

¹خَلِّي النَّاسْ يِحْسْبُونَا خُدَّامْ المَسِيحْ وِالله وَكِّلْنَا عْلَى أَسْرَارُو.

²وِالشَّيْء المَطْلُوبْ مِلِّي وَكِّلْهُمْ اللهْ إِنُّو كُلْ وَاحِدْ فِيهُمْ يْكُونْ ثِيقَة.

³آمَا آنَا رَانِي مَا يْهِمّْنِيشْ بَرْشَة كِتُحْكْمُوا عْلِيَّ إِنْتُومَا وِلاَّ أَيْ بَشَرْ، وْحَتَّى آنَا مَا نُحْكُمْشْ عْلَى رُوحِي.

⁴وْضَمِيرِي مَا يْأَنِّبْنِيشْ عْلَى حَتَّى شَيْء، وِالشَّيْء هَاذَا مَا يْبَرِّرْنِيشْ، آمَا الِّي يُحْكُمْ عْلِيَّ هُوَ اللهْ.

⁵إِمَّالاَ مَا تُحْكْمُوشْ عْلَى حَتَّى شَيْء قْبَلْ الوَقْتْ، حَتَّى لِينْ يْجِي الرَّبْ الِّي بَاشْ يْظَهِّرْ الِّي مْخُبِّي فِي الظْلاَمْ وْيِكْشِفْ نِيَّاتْ القْلُوبْ، وْكُلْ وَاحِدْ يَاخُذْ مِنْ عِنْدْ اللهْ الأَجْرْ الِّي يِسْتْحَقُّو.

⁶يَا خْوَاتِي، آنَا حْكِيتِلْكُمْ قْبَلْ عْلَى رُوحِي وِعْلَى أَبُلُّوسْ كِيفْ مِثَالْ تِتْعَلّْمُوا مِنَّا «إِنّْكُمْ مَا تُخْرْجُوشْ عَلِّي مَكْتُوبْ فِي الكْتَابْ المُقَدَّسْ.» بَاشْ مَا تِتْفُوخْرُوشْ عْلَى بْعَضْكُمْ.

⁷شْكُونُو الِّي رَدِّكْ خِيرْ مِنْ غِيرِكْ؟ وِشْنُوَّة الشَّيْء الِّي تِمْلْكُو وْمَا خْذِيتُوشْ مِنْ عِنْدْ اللهْ؟ وْإِذَا كَانْ خْذِيتُو، عْلاَشْ تِتْفُوخِرْ كَإِنِّكْ مَا خْذِيتُوشْ؟

⁸رَاكُمْ شْبَعْتُوا وْتِغْنِيتُوا! وَلِّيتُوا مُلُوكْ بْلاَشْ بِينَا! وْيَا لِيتْكُمْ كُنْتُوا بِالحَقْ مُلُوكْ عْلَى الأَقَلْ نْشَارْكُوا مْعَاكُمْ فِي المُلْكْ!

⁹وْآنَا نْشُوفْ الِّي اللهْ حَطّْنَا أَحْنَا الرُّسُلْ فِي الإِخِّرْ كَإِنُّو مَحْكُومْ عْلِينَا بِالمُوتْ، عْلَى خَاطِرْنَا وَلِّينَا فُرْجَة لِلعَالَمْ، لِلمْلاَيْكَة وِالنَّاسْ.

¹⁰أَحْنَا جُهَّالْ عْلَى خَاطِرْ المَسِيحْ وْإِنْتُومَا حُكَمَاءْ فِي المَسِيحْ. أَحْنَا ضْعَافْ وْإِنْتُومَا قْوِيِّينْ. إِنْتُومَا بِقْدَرْكُمْ وْإِحْنَا مَحْقُورِينْ.

¹¹وْإِحْنَا مَازِلْنَا لْتَوَّا نْجُوعُوا وْنَعْطْشُوا وْمَا عِنْدْنَاشْ لِبْسَة وْنِتْضَرْبُوا وْمَا عِنْدْنَاشْ وِينْ نُسْكْنُوا،

¹²وْنِتْعْبُوا فِي خِدْمِةْ يْدِينَا. نْبَارْكُوا النَّاسْ الِّي يْسِبُّونَا، وْنِتْحَمّْلُوا وَقْتِلِّي يِضْطَهْدُونَا،

¹³وْنَعْمْلُوا البَاهِي وَقْتِلِّي يِتْبَلُّوا عْلِينَا. وَلِّينَا كِيفْ الفَضْلَة وِالوْسَخْ مْتَاعْ العَالَمْ.

¹⁴آنَا مَا نِيشْ نِكْتْبِلْكُمْ فِي الشَّيْء هَاذَا بَاشْ نْحَشِّمْكُمْ، لَكِنْ بَاشْ نَنْصَحْكُمْ كِوْلاَدِي الِّي نْحِبّْهُمْ.

¹⁵يْنَجِّمْ يْكُونْ عِنْدْكُمْ آلاَفْ مْتَاعْ مُعَلّْمِينْ فِي المَسِيحْ، آمَا مَا عِنْدْكُمْشْ بَرْشَة أُبَّيَّانْ، عْلَى خَاطِرْنِي آنَا وْلِدْتْكُمْ فِي المَسِيحْ يَسُوعْ بِالإِنْجِيلْ الِّي بَشِّرْتْكُمْ بِيهْ.

¹⁶إِمَّالاَ نُطْلُبْ مِنْكُمْ بَاشْ تَعْمْلُوا كِيفِي.

¹⁷وْبِسْبَبْ الشَّيْء هَاذَا بِيدُو بْعَثْتِلْكُمْ تِيمُوثَاوُسْ، وِلْدِي حْبِيبِي الأَمِينْ فِي الرَّبْ، وْهُوَ بَاشْ يْذَكِّرْكُمْ بْسِيرْتِي فِي المَسِيحْ يَسُوعْ، كِيفْ مَا آنَا نْعَلِّمْ فِيهَا فِي كُلْ بْلاَصَة لِلكَنَايِسْ الكُلْ.

¹⁸ثَمَّة شْكُونْ مِنْكُمْ مْشَى فِي بَالْهُمْ الِّي آنَا مَا نِيشْ بَاشْ نْجِيكُمْ وْوَلاَّوْ مِتْكَبّْرِينْ،

¹⁹آمَا رَانِي إِنْ شَاءْ اللهْ بَاشْ نْجِيكُمْ عْلَى قْرِيبْ، بَاشْ نَعْرِفْ النَّاسْ المِتْكَبّْرِينْ هَاذُومَا آشْ يْنَجّْمُوا يَعْمْلُوا، مُوشْ كْلاَمْهُمْ آكَاهُو.

²⁰وْمَلَكُوتْ اللهْ مُوشْ بِالكْلاَمْ آكَاهُو، رَاهُو بِالفِعْلْ.

²¹شْنُوَّة تِخْتَارُوا؟ نْجِيكُمْ بِالعْصَا وِلاَّ بِالمْحَبَّة وِالقَلْبْ الحْنِينْ.