Read Tunisian Arabic New Testament كُورِنْثُوسْ الأَوِلْ 5 Bible Online

كُورِنْثُوسْ الأَوِلْ 5 - Tunisian Arabic New Testament bible

كُورِنْثُوسْ الأَوِلْ 5

¹فِي كُلْ بْلاَصَة يْقُولُوا الِّي عِنْدْكُمْ زْنَى فِي الكَنِيسَة! مُوشْ مُوجُودْ كِيفُو حَتَّى عِنْدْ النَّاسْ الِّي مَا هُمْشْ مُؤْمْنِينْ: رَاجِلْ يَزْنَى مْعَ مَرْةْ بُوهْ.

²وْإِنْتُومَا بَاقِي مِتْكَبّْرِينْ! فِي عُوضْ تِبْكِيوْ وِتْنَوّْحُوا حَتَّى لِينْ يِتْنَحَّى الِّي قَاعِدْ يَعْمِلْ فِي الشَّيْء هَاذَا مِنْ بِينَاتْكُمْ.

³آنَا رَانِي غَايِبْ عْلِيكُمْ بِالبْدَنْ آمَا حَاضِرْ مَا بِينَاتْكُمْ بِالرُّوحْ، وِحْكُمْتْ عْلَى مُولَى العْمَايِلْ هَاذِي كَإِنِّي حَاضِرْ.

⁴بْإِسْمْ رَبّْنَا يَسُوعْ المَسِيحْ وْقُدْرْتُو، وَقْتِلِّي تِجْتَمْعُوا مْعَ بْعَضْكُمْ، وْآنَا مْعَاكُمْ بِالرُّوحْ،

⁵سَيّْبُوا الرَّاجِلْ هَاذَا لِلشِّيطَانْ، بَاشْ يِهْلِكْ بَدْنُو وْرُوحُو تُخْلُصْ فِي يُومْ الرَّبْ.

⁶مَا حَقّْكُمْشْ تِتْكَبّْرُوا! يَاخِي مَا تَعْرْفُوشْ الِّي شْوَيَّة خْمِيرَة يْخَمّْرُوا العْجِينْ الكُلُّو؟

⁷نِحُّوا الخْمِيرَةْ القْدِيمَة مِنْ وُسْطْكُمْ بَاشْ تْوَلِّيوْا عْجِينْ جْدِيدْ عْلَى خَاطِرْكُمْ فْطِيرْ مَا فِيهِشْ خْمِيرَة، رَاهُو الخَرُوفْ مْتَاعْ الفِصْحْ مْتَاعْنَا الِّي هُوَ المَسِيحْ تِذْبَحْ عْلَى خَاطِرْنَا.

⁸إِمَّالاَ خَلِّينَا نْعَيّْدُوا، مُوشْ بِالخْمِيرَة القْدِيمَة وِلاَّ بِالخْمِيرَة مْتَاعْ الشَّرْ وِالفْسَادْ، آمَا بِالفْطِيرْ مْتَاعْ الطْهَارَة وِالحَقْ.

⁹كْتِبْتِلْكُمْ فِي جْوَابِي الآخَرْ بَاشْ مَا تْخَالْطُوشْ الزُّنَاةْ.

¹⁰وْمَا نُقْصُدْشْ الزُّنَاةْ فِي العَالَمْ وِلاَّ الطَّمَّاعِينْ وِلاَّ السُّرَّاقْ وِلاَّ الِّي يِعْبْدُوا فِي الصْنَبْ، مَا كَانِشْ يِلْزِمْكُمْ تُخْرْجُوا مِالعَالَمْ!

¹¹آمَا تَوَّا رَانِي كْتِبْتِلْكُمْ بَاشْ مَا تْخَالْطُوشْ الِّي يِتْسَمَّى خُو وْهُوَ زَانِي وِلاَّ طَمَّاعْ وِلاَّ يِعْبِدْ فِي الصْنَبْ وِلاَّ يْسِبْ فِي النَّاسْ وِلاَّ يِسْكِرْ وِلاَّ سَارِقْ. حَتَّى المَاكْلَة مَا تَاكْلُوهَاشْ مْعَاهْ.

¹²عْلاَشْ آنَا نُحْكُمْ عْلَى النَّاسْ الِّي مَا هُمْشْ مِالكَنِيسَة. يَاخِي مُوشْ يِلْزِمْكُمْ إِنْتُومَا تُحْكْمُوا عْلَى النَّاسْ الِّي فِي الكَنِيسَة؟

¹³رَاهُو اللهْ هُوَ الِّي يُحْكُمْ عْلَى النَّاسْ الِّي البَرَّة مِالكَنِيسَة. «خَرّْجُوا الفَاسِدْ مِنْ بِينَاتْكُمْ.»